Пайвандҳои дастрасӣ

Хабари нав

Хабарҳо

"Оби тоза"-и Швейтсария барои аҳолии Суғд

МИ

Ҳукумати Швейтсария ба татбиқи марҳилаи аввали як барнома ҷиҳати таъмини сокинони Суғд бо оби тоза шурӯъ кардааст.


Рудолф Шох, консули Швейтсария дар Тоҷикистон гуфт, ин барнома дар 6 моҳи аввал обрасонӣ ба 10 деҳаи ноҳияи Конибодомро дар бар мегирад, ки 30 ҳазор нафар сокин доранд. Ва сармояи барнома наздики 150 ҳазор доллари амрикоӣ мебошад.


Бо вуҷуди он ки устони Суғд захираи бузурги об дорад ва бузургтарин рӯди Осиёи Марказӣ – Сир аз маркази Хуҷанд убур мекунад, ағлаби аҳолии вилоят оби тозаи нӯшиданӣ надорад. Ба иллати набуди шабакаи ягонаи обрасон одамон дар деҳот аз оби нотозаи ҷубору наҳрҳо истифода мекунанд. Сокинони шаҳрҳои Суғд, аз ҷумла Хуҷанд низ ба иллати фарсуда ва хароб шудани шабакаҳои обрасон бо камбуди шадиди об рўбарўянд. Мақсуд Одинаев, ҳамоҳангсози барномаҳои иқтисодии Швейтсария дар мисоли ноҳияи Конибодоми устони Суғд мегӯяд, ки дар ҳоли ҳозир аз 47 ҳазор сокини ин ноҳия танҳо 15 ҳазор ба оби тоза дастрасӣ доранд.


Рудолф Шох мегӯяд, дар нимаи дуввуми соли 2007 аз сӯи ин кишвар марҳилаи асосии барномаи оби тоза барои бархе дигар аз сокинони Суғд, бо масрафи тақрибан 2 миллион доллар ёрии бебозгашт оғоз хоҳад ёфт.
Маъсуми Муҳаммадраҷаб, Хуҷанд

Ҳамаи хабарҳои имрӯзро дар инҷо бихонед

Мақомоти шаҳри Маскав ба коммунистҳо ҳушдор дод ба гирдиҳамоӣ даъват накунанд

Полиси шаҳри Маскав Ҳизби коммунистро ҳушдор дод, ки сокинонро ба гирдиҳамоии эътирозӣ зидди натиҷаҳои интихобот рӯзи 25-уми сентябр даъват накунад.

Ба гуфтаи ду тан аз номзади коммунистҳо, танзимгари расонаҳои Русия "Роскомнадзор" ба ноширони вебсайти ин ҳизб дастур додааст, ки навиштаҷот дар бораи ин чорабиниро пок кунанд. Шубҳаҳо дар шафоф будани интихобот миёни рақибони ҳизби ҳокими "Русияи Воҳид" ва нозирони хориҷӣ боқӣ мондааст. Ин дар ҳолест, ки дар интихоботи вакилони Думаи Давлатӣ аз 17-ум то 19-уми сентябр номзадҳои мухолифин роҳ наётанд ва иддао мешавад қонуншиканиҳо ба муттафиқони президент Владимир Путин имкон дод, ки аксарияти курсиҳоро дар парлумон ба даст оранд.

Аммо Кумиссиюни Марказии Интихоботии Русия (КМИР) рӯзи 24-уми сентябр эълон кард, ки натиҷаҳои интихоботро тасдиқ кардааст. Раиси КМИР Элла Памфилова эълом дошт, ки "Русияи Воҳид" дар парлумон 324 курсӣ ба даст овардааст, ки нисбат ба соли 2016 19 адад камтар аст. Аммо ин курсиҳо барои тағйири Конститутсия ватаҳкими қудрати қудрати Путин дар пешорӯи интихоботи президентии соли 2024 кифоя аст.

Коммунистҳо исрор меварзанд, ки чорабинии рӯзи 25-уми сентябри онҳо як маҷлиси вакилон аст ва аз ин рӯ иҷозати расмӣ талаб намекунад. Аммо шаҳрдории Маскав, додситонӣ ва пулиси шаҳр ҳушдор доданд, ки ба ташкили ин ҳамоиш иҷозат дода нашудааст ва гуфтанд, ки ширкаткунандагони он ба ҷавобгарӣ кашида хоҳанд шуд.

Байден нишасти сарони "Чаҳоргонаи нигарон аз Чин"-ро мизбонӣ кард

Ҷо Байден дар Маҷмаи умумии СММ

Президенти ИМА Ҷо Байден рӯзи 24 сентябр раҳбарони Австралия, Ҳиндустон ва Ҷопонро дар Кохи Сафед мизбонӣ кард. Бо назардошти нигарониҳои муштараки онҳо аз Чин ин мулоқот сароғози Чаҳоргонаи нав унвон шудааст. Дар он таъкид шуд, ки ҳавзаи Ҳинду Уқёнуси Ором бояд озод, босубот ва боз боқӣ монад. Ҳарчанд нигарониҳо аз Чин дар суҳбатҳои расонаии ин роҳбарон садо надод, ба эҳтимоли қавӣ амалкардҳои Пекин ва ҳамкории стратегии чаҳор кишвари пешрафтаи демократӣ дар маркази диққат буданд.

Байден гуфт, Чаҳоргона дар ҷабҳаи аввали мушкилоти ҷаҳонӣ қарор хоҳад дошт.
"Мо чаҳор демократияи бузурги дорои таърихи тӯлонии ҳамкорӣ ҳастем. Мо медонем, ки корҳоро чӣ гуна бояд анҷом диҳем ва мо ба мушкилот дастболо хоҳем буд,"-- гуфт ӯ.

Сарвазири Австралия Скотт Моррисон ба ӯ ҳамовоз шуд: "Мо демократияҳои либералӣ ба назми ҷаҳонӣ бовар дорем, ки озодиро афзал медонанд, ҳамин гуна ба бозу озод будани минтақаи Ҳинду Уқёнуси Ором бовар дорем, зеро медонем, ки маҳз ҳамин чиз минтақаи қавӣ, устувор ва шукуфонро таъмин мекунад".

Ибораи "минтақаи бозу озод" ба нигарониҳои муштарак аз афзоиши нуфузи иқтисодӣ ва низомии Чин дар минтақа ишора мекунад. Дар эъломияи якҷоя пас аз музокирот, раҳбарони чаҳор кишвар қавл доданд, ки як минтақаи бозу озод ва "сарбаланд"-и Ҳинду Уқёнуси Оромро дунбол хоҳанд кард.

Ҳамчунин интизор мерафт, ки дар ҳамоиш пешрафтҳо дар тавлиди эмҳои зидди COVID-19, зербино, тағирёбии иқлим ва ҳамкориҳои технологӣ низ баррасӣ шаванд. Пеш аз нишасти чаҳорҷониба, сарвазири Ҳиндустон Нарендра Модӣ бо Байден бори аввал рӯбарӯ мулоқот кард.

Русия Валентина Чупик, ҳомии муҳоҷирони кориро 30 сол аз ҳаққи вуруд маҳрум кард

Валентина Чупик, роҳбари созмони "Тонг-ҷаҳонӣ"

Марзбонони Русия Валентина Чупик, роҳбари созмони "Тонг ҷаҳони" ва ҳомии шинохтаи муҳоҷирони кориро ҳангоми бозгашт аз Арманистон дар фурдугоҳи Шереметево ба қаламрави ин кишвар роҳ надодаанд. Ба Чупик хабарномае додаанд, ки дар он гуфта мешавад, вуруди ӯ ба қаламрави Русия то соли 2051 манъ шудааст.

Муҳаммад Собиров, яке аз ҳамкорони Валентина Чупик рӯзи 25-уми сентябр дар суҳбат бо Радиои Озодӣ гуфт, Валентина ҳамроҳи як корманди дигари ин созмон бо як сафари корӣ ба Арманистон рафта буданд.

"Вақти бозгашт шаби 24-уми сентябр дар фурудгоҳи Шереметево нагузоштаанд ӯ аз марз гузарад ва ба ӯ огоҳинома додаанд, ки то соли 2051 ӯ ҳаққи ворид шудан ба Русияро надорад",- гуфт Собиров.

Ӯ афзуд, то ба ҳол намедонанд, ки Чупик дар куҷои фурудгоҳ нигоҳ дошта мешавад ва талош доранд макони нигоҳдории ӯро пайдо кунанд. Хабари манъи вуруди ӯро ба Русия ҳамсафари ӯ ба дигар ҳамкорон расонидааст.

Валентина Чупик, шаҳрванди Узбекистон буда, як сол пеш дар Русия санади паноҳандагиро ба даст овардааст. Ҳоло ҳамкорон ва ҳампешагони ӯ нигаронанд, ки имкон дорад мақомоти Русия ӯро ба Узбекистон истирдод кунанд ва ӯ дар ин кишвар мавриди озору азияти кормандони мақомоти ҳифзи ҳуқуқ шавад.

Бархе аз ҳампешагони Чупик навиштанд, ки ихроҷи Валентина Чупик аз Русия ва бекор кардани санади паноҳандагиаш як навъ "интиқоми мақомоти Русия барои дифоъ аз ҳуқуқи муҳоиҷрони корӣ аст".

Валентина Чупик, танҳо ҳомии ҳуқуқи муҳоҷирон дар Русия нест, ки мақомоти ин кишвар ихроҷ мекунанд. Тайи чанд соли охир чанде аз ҳомиёни ҳуқуқи муҳоҷирони тоҷик, аз ҷумла Каромат Шарипов, роҳбари "Созмони муҳоҷирони кории тоҷик", Иззат Амон поягузори созмони "Тоҷикон" дар Маскав, ки аз ҳуқуқи муҳоҷирони тоҷик дифоъ мекарданд бо баҳонаҳои гуногун аз қаламрави Русия ихроҷ шуданд.

Аҳмад Масъуд: "Толибон кишвари моро ба паноҳгоҳи терроризми байналмилалӣ табдил додаанд"

Пас аз чанд рӯзи хомӯшӣ Аҳмад Масъуд, роҳбари Ҷабҳаи муқовимати миллӣ дар Афғонистон бо нашри як паёми савтӣ ба ширкатдорони конфронси бахшида ба падараш Аҳмадшоҳ Масъуд дар донишгоҳи Оксфорди Британия аз худ дарак дод. Паёми ӯ рӯзи 24-уми сентябр дар саҳифааш дар шабакаи иҷтимоии Ютуб нашр шуд.

Дар ин паём Аҳмад Масъуд Толибонро як "гурӯҳи экстремистӣ" хонд ва гуфт ҷонибдори ғайримутамарказ кардани низоми сиёсиву идорӣ дар Афғонистон аст, то ҳама ақвоми сокини Афғонистон имкони интихоби роҳбари худ ва таъсиргузорӣ дар таъини сиёсатҳоро дошта бошанд.

Ӯ гуфт, "бовар дорем, ки ғайримутамарказ кардани низоми сиёсиву идорӣ (дар Афғонистон) беҳтарин роҳ барои оянда мебошад. Дар заминаи чунин низом ақвоми бумӣ имкон хоҳанд дошт ки роҳбарони маҳаллии худро интихоб кунанд ва онҳо дар назди сокинон ҳисоботдиҳанда бошанд. Дар ин сурат сокинон имкон хоҳанд дошт, дар таъини сиёсатҳо дар маҳали скунати худ иштироки фаъол дошта бошанд.”

Аҳмад Масъуд афзуд, ки падараш Аҳмадшоҳ Масъуд низ ҷонибдори чунин низом буд, ки шараф ҳайсият ва адолати иҷтимоиро барои ҳамагон таъмин кунад.

Дар идомаи ин паём, ӯ гуфт падараш зидди режимҳои мустамликавӣ ё ҳукумати гурӯҳои экстремистие мисли Толибон мубориза мебурд. Ба гуфтаи Аҳмад Масъуд, Толибон аз рӯзи дигарбора ишғол кардани ҳукумат дар Кобул " бо идомаи террору тахрибкорӣ ва кирдорҳои ваҳшиёна бори дигар ҷомеаҳои гуногунро гирифтор карданд. Онҳо зидди ҳуқуқҳои бунёдии занон ва таҳсили духтарон ҳастанд. Толибон кишвари моро ба паноҳгоҳи терроризми байналмилалӣ табдил доданд.”

Ба гуфтаи Аҳмад Масъуд, ба он хотир Ҷабҳаи муқовимати миллиро ташаккул дод, ки ормонҳои падарашро идома диҳад ва орзӯи мардуми Афғонистонро амалӣ созад.“Ҳадафи ҷабҳа озодии Афғонистон, дифоъ аз ҳуқуқи худ, амният ва эҳтиром ба мероси фарҳангиву таърихӣ аст",- иброз дошт ӯ.

​Қабл аз хуруҷи нерӯҳои Амрико ва ҳампаймононаш аз НАТО аз Афғонистон Толибон рӯзи 15-уми август ҳукуматро дар Кобул ишғол карданд. Раисҷумҳур Ашраф Ғанӣ аз кишвар фирор кард.

Ҷомеаи байналмилалӣ дар эътирофи ин гурӯҳи тундрав ба ҳайси ҳокими Афғонистон дар дуроҳа аст. Дар айни замон, Мулло Муҳаммад Ҳасан Охунд, иҷрокунандаи вазифаи раиси ҳукумати "Толибон", рӯзи 21-уми сентябр дар Кобул бо намояндагони Русия, Чин ва Покистон мулоқот кард. Аввали ҳафтаи ҷорӣ президенти Узбекистон дар Маҷмаи умумии Созмони Милал дар Ню-Йорк гуфт, ин кишвари Осиёи Марказӣ интиқоли нафту барқро ба Афғонистон аз сар гирифтааст.

Дар ҳамин ҳол, кишварҳои Осиёи Марказии ҳаммарз бо Афғонистон аз таҳдидҳои амниятӣ ва эҳтимоли омадани даҳҳо ҳазор гуреза аз Афғонистон дар ташвиш ҳастанд. "Толибон" кӯшиш дорад, итминон диҳад, ки ба кишварҳои ҳамсоя ҳеч таҳдид надорад.

Туробӣ гуфт, "Толибон" аз буридани даст ва ҳукми қатл даст намекашад

Мулло Нуриддин Туробӣ

Мулло Нуриддин Туробӣ, яке аз поягузорон ва вазири адлияи ҳукумати гузаштаи "Толибон", дар суҳбат бо хабаргузории "Ассошиэйтед Пресс" гуфтааст, ки гуруҳ аз ҷазоҳое ба монанди буридани даст ва ҳукми қатл ё эъдом даст намекашад.

Намояндагони "Толибон" дар даври гузаштаи ҳокимияташон дар Афғонистон (аз 1996 то 2001) дар ҳузури ҳазорон нафар, асосан дар майдонҳо, гунаҳкоронро эъдом мекарданд. Аммо Туробӣ гуфтааст, мумкин аст, ин дафъа муҷримон дар ҳузури мардум муҷозот нашаванд.

Ин намояндаи "Толибон" гуфтааст, нигарониҳои кишварҳои хориҷиро аз иҷрои ҳукми қатл намепазиранд ва ҳушдор додааст, ки ҷаҳон бояд ба умури дохилии ҳукумати "Толибон" дар Афғонистон дахолат накунад.

"Ҳеч кас ҳақ надорад, ба мо бигӯяд, ки қонунҳои мо чӣ гуна бояд бошанд. Мо қонунҳои худро бо пайравӣ ба Ислом ва Қуръон таҳия мекунем", - гуфтааст Мулло Нуриддин Туробӣ.

Аз замони ғасби ҳукумат дар Кобул дар 15-уми августи имсол ҷомеаи ҷаҳонӣ ба амалкарди "Толибон" назорат мекунад, ки оё қонунҳои золимонаи худро ба мисли солҳои 90-ум бақарор мекунад ё хайр.

Зиндоние, ки шиканҷаи пеш аз қатли варзишгари эрониро дидааст, даргузашт

Шоҳин Носирӣ аз дохили зиндон нақл кард, ки шоҳиди шиканҷаи пеш аз марги варзишгар Навид Афкорӣ шудааст

Мақомоти эронӣ тасдиқ карданд, ки Шоҳин Носирӣ, як зиндоние, ки иддао кардааст пеш аз иҷро шудани ҳукми қатли гӯштигир Навид Афкорӣ дар оғози соли ҷорӣ шоҳиди шиканҷа шудани ӯ будааст, даргузашт. Мақомоти зиндонҳо рӯзи 23-юми сентябр гуфтанд, ки сабаби марги Носирои, ки дар зиндони "Теҳрони бузург" рух додааст, таҳқиқ мекунанд. Ду рӯз пеш аз ин як созмони Ҳуқуқи башари Эрон, воқеъ дар Осло бо нашри гузорише гуфт, ки “Носирӣ баъди интиқолаш ба утоқи якҳуҷраӣ дар шароити мармуз даргузашт”. Ин созмон гуфт, ки дар солгарди ҳукми қатли Афкорӣ, ки барои куштори як афсари амниятӣ дар эътирозҳои зиддиҳукуматии соли 2018 ба ҳукми қатл маҳкум шуд, Носириро ба макони номуайян интиқол доданд.

Афкорӣ 12 сентябри соли 2020 ба дор овехта шуд ва ин кори мақомоти эронӣ маҳкумиятҳои ҷомеаи байналмилалиро ба бор овард. Ҳомиёни ҳуқуқ гуфтанд, ки Афкорӣ шиканҷа шуд ва баъди ин иттиҳомоти дурӯғинро ба гардан гирифт. Вакили дифои ӯ гуфт, ки исботи гунаҳгор будани ӯ вуҷуд надорад. Мақомот шиканҷа шудани Афкориро рад мекунанд.

Навид Афкорӣ, гӯштигири эронӣ барои куштори як ходими амниятӣ ба ҳукми қатл маҳкум шуд ва соли гузашта ҳукми ӯ иҷро гардид. Ҳукми ин варзишгари қаҳрамони миллӣ маҳкумияти ҷомеаи ҷаҳониро ба бор овард
Навид Афкорӣ, гӯштигири эронӣ барои куштори як ходими амниятӣ ба ҳукми қатл маҳкум шуд ва соли гузашта ҳукми ӯ иҷро гардид. Ҳукми ин варзишгари қаҳрамони миллӣ маҳкумияти ҷомеаи ҷаҳониро ба бор овард

Баъди ин ҳодиса Носирӣ иддао кард, ки шоҳиди латукӯби шадиди Афкорӣ аз ҷониби ду марди ҳузарби либоси мулкипӯш шуд ва шунид, ки Афкорӣ дод мезад. Дар як паёми садоие, ки Радио Фардо ба даст овардааст, Носирӣ нақл мекунад, ки шоҳиди “як шиканҷаи монанд ба асри миёнаи”-и Афкорӣ шудааст. Ӯ инчунин гуфтааст, ки мақомот ба ӯ таҳдид карданд, ки дар бораи марги Афкорӣ лаб накушояд.

Мақомоти зиндонҳои Эрон дар як изҳорот навиштанд, ки Носирии маҳкумшуда барои тақаллуб ва дуздӣ баъди 45 дақиқаи ба беморхонаи зиндон интиқол ёфтанаш ва бо вуҷуди ёрии зарурии тиббӣ гирифтанаш даргузашт. Мақомот гуфтанд, ки сабаби марги ӯро таҳқиқ мекунанд. Манобеъ гуфтанд, ки Носирӣ аз ҳеҷ дарде шикоят надошт.

Созмони “Афви байнулмилал” дар гузорише рӯзи 15-уми сентябр гуфт, аз оғози соли 2010 то кунун марги мармузи 72 нафар дар зиндонҳои Эрон сабт шудааст, вале ҳеҷ як мақомдор барои ин ҳодисаҳо ба ҷавобгарӣ кашида нашудааст.

Дар Элбруси Русия панҷ кӯҳнавард кушта шуд

Кормандони вазорати ҳолатҳои изтирории Русия дар амалиёти наҷот иштирок мекунанд. 23-юми сентябри соли 2021, ҷумҳурии Қабардину Балқор, минтақаи Қафқози Шимолӣ

Дар Русия аз миёни 19 кӯҳнаварде, ки талош карданд қуллаи баландтарини Элбрусро фатҳ кунанд, панҷ нафарашон куштаву 11 нафарашон захмӣ шуданд. Ин гурӯҳ шоми 23-юми сентябр дархости наҷот карда буданд. Дар ин гурӯҳ, ба иттилои Интерфакс, намояндагони 11 минтақаи Русия аъзо буданд. 14 нафарашонро дар амалиёти ҷустуҷӯ, ки бо ширкати 70 наҷотбахшу 16 васоили нақлиётӣ барпо шуд, зинда пайдо карданд. Фарзияи пешакии сабабҳои фоҷеа бад шудани ҳаво ва бориши зиёди барфу тӯфон гуфта мешавад. Шоми панҷшанбе суръати бод 40 метр дар сония ва ҳарорати ҳаво минус 20 дараҷа Селсияро ташкил медод. Барфу тӯфон имкони диданро ҳам мушкил кард ва кӯҳнавардон танҳо фосилаи 1 метр аз ҳамдигарро ба сахтӣ дида метавонистанд, менависад Радио Свобода. Ҳеҷ яке аз ҳайати гурӯҳ кӯнаварди касбӣ набудааст.

Аризаи фатҳи қуллаҳои Элбрусро ин гурӯҳ аз қабл дар вазорати ҳолатҳои изтирории Русия сабт карда, ҳангоми ирсоли занги хатар ва дархости наҷот дар баландии 5400 метр дар сатҳи баҳр қарор доштааст.

Элбрус дар ҳудудҳои Қафқози Шимолӣ ҷойгир буда, яке аз маконҳои маъруф дар миёни кӯҳнавардони ҷаҳон ба шумор меравад.

Эрдуғон гуфт, ки чаро муносибати Амрико бо Туркия бад шуд

Раҷаб Таййиб Эрдуғон

Раҷаб Таййиб Эрдуғон, президенти Туркия, рӯзи 23-юми сентябр дар шаҳри Ню-Йорки Амрико гуфт, самти кунунии муносибатҳои амрикоиву туркӣ "хушиеро ба бор намеорад".

Эрдуғон афзуд, муносибатҳои Анкара бо ҳукумати президенти нави Амрико Ҷо Байден "аз қадамҳои дуруст шуруъ нашуданд". Вай гуфт, агар Иёлоти Муттаҳида ҳамчун узви НАТО ба Туркия дар амри тақвияти ниёзҳои мудофиааш ёрӣ нарасонад, Туркия метавонад, ба кишварҳои дигар муроҷиат кунад.

Нашрияи Haberturk бо нақли қавл кардани суханони Эрдуғон навишт, мушкилӣ дар муносибатҳои ду кишвар, мумкин аст, дар пайи норизоии Вашингтон аз хариди низоми зиддимушакии С-400-и русӣ аз сӯи Туркия сар зада бошад.

"Ман наметавонам, бигӯям, ки дар равобити Туркияву Амрико раванди солим идома дорад", - гуфт Эрдуғон дар суҳбат бо рӯзноманигорон дар Ню-Йорк.

Ҳукумати Доналд Трамп, президенти пешини Амрико, баъди аз сӯи Туркия харида шудани низоми зиддимушакии русӣ нисбат ба Анкара таҳрим ҷорӣ кард.

Баъзе аз коршиносон мегӯянд, низоми зиддимушакии С-400 ба ҳавопаймоҳои F-35 хатар эҷод мекунад. F-35 аз сӯи НАТО ва Амрико истифода мешавад. Ин ҳавопаймоҳо дар Туркия низ истеҳсол мешаванд.

Русия барои ҳар навзоди муҳоҷирон дар Маскав 20 000 рубл медиҳад

Яке аз таваллудхонаҳои Русия

Шаҳрдории Маскав барои ҳар фарзанди таваллудшудаи муҳоҷирони корӣ дар пойтахти Русия 20 ҳазор рубл медиҳад. Ба иттилои сомонаи "Readovka", солона аз буҷаи Маскав барои ин навъи пардохтҳо 700 миллион рубл харҷ мешавад.

Рӯзноманигорони расона дар таваллудхонаҳои пойтахти Русия навиштаҳоеро дар бораи пардохти 20 ҳазор рубл барои ҳар як кӯдаки муҳоҷир бо забонҳои гуногуни хориҷӣ, аз ҷумла англисӣ, озарӣ, ветнамӣ, тоҷикӣ, дарӣ, узбекӣ, туркманӣ, қазоқӣ ва қирғизӣ дидаанд.

Шаҳрдории Маскав моҳи феврали соли 2020 дар сомонаи расмии худ қарореро нашр кард, ки бар асоси он, ба волидони навзодон дар таваллудхонаҳои пойтахти Русия 20 ҳазор рубл ва туҳфа дода мешавад.

Дар сурати таваллуд шудани ду тифл ва ё зиёда аз он миқдори кумакпулӣ сари ҳар як кӯӯдак ҳисоб карда мешавад.

Дипломати амрикоӣ ба нишони эътироз аз бӯҳрони муҳоҷират истеъфо дод

Даҳҳо ҳазор паноҳҷӯи ҳаитӣ зери як пули Техас хайма задаанд

Фиристодаи ИМА барои Ҳаитӣ ба нишони эътироз аз ихроҷи ҳазорҳо паноҳҷӯи ин кишвар дар Амрико истеъфо дод. Давоми чанд рӯзи гузашта шаҳрвандони ин кишвари соҳилҳои Карриб дар Техаси Амрико ҷамъ шуда, бархе дархости паноҳандагӣ дар ИМА кардаанд. Даниэл Фут, дипломати собиқадор вазъи Ҳаитиро бо истилоҳи як “давлати суқуткарда” тасвир карда гуфт, ки ин кишвар ҳоло наметавонад ба мушкилоти муҳоҷирони баргашта расидагӣ кунад. Дар номае, ки Фут ба унвонии Котиби давлатии ИМА Энтони Блинкен рӯзи 23-юми сентябр навишт, гуфт, “Ман бо қарори ғайриинсонӣ ва носозгори ИМА оид ба ихроҷи ҳазорҳо паноҳҷӯёну муҳоҷирони ғайриқонунии ҳаитӣ ҳеҷ умумияте доштан намехоҳам”.

Нед Прайс, сухангӯи Департаменти давлатӣ интиқодҳои Футро рад карда гуфт, ки ин дипломат шароити истеъфояшро ба шакли дигар шарҳ додааст. Ӯ гуфт: “Ӯ натавонист бо имкониятҳои васее, ки дошт, дар замони ишғоли вазифааш натавонист дар заминаи паноҳҷӯён изҳори нигаронӣ кунад ва ба ҷои ин қарор кард, ки ба истеъфо равад”.

Ҳаити дар ғарби сайёра кишвари фақиртарин ба ҳисоб меравад. Моҳи июл президенти ин кишвар кушта шуд ва моҳи август зилзилаи пурқурбоние рух дод.

Баъди ин ҳодисаҳо тахминан 150 ҳазор нафар аз ин кишвар ба хоки ИМА гузашта, зери пули калони Дел Риои Техас хайма заданд. Баъди он ки ба матбуот ва шабакаҳо саҳнаҳои бархӯрди шадиди марзбонони аспсавор бо паноҳҷӯён роҳ ёфт, бӯҳрон пуршиддат шуд. Вазорати амнияти дохилии ИМА гуфт, ки Амрико 1400 паноҳҷӯро ба кишварашон баргардонид ва беш аз 3200 нафари дигарро аз хаймаҳо берун кард.

Раиси Оҷонсии СММ оид ба паноҳандагон аз ихроҷи дастаҷамъии паноҳҷӯёни ҳаитӣ изҳори нигаронии амиқ кард ва гуфт, ки ихроҷи онҳо бидуни санҷиши ҳолату вазъияташон “дар ихтилоф бо қонунҳои байналмилалӣ” аст.

Тоҷикистон наврасони боздоштшудаи қирғизро раҳо кардааст

Акс аз бойгонӣ

Тоҷикистон дар натиҷаи музокирот ду хонандаи мактаберо, ки 23-юми сентябр дар минтақаи номуайяни марзӣ бо Қирғизистон дастгир шуда буданд, озод кардааст.

Бино ба иттилои Хадамоти марзбонии Қирғизистон, ду навраси 16-сола 23-юми сентябр дар марз бо Тоҷикистон ба қочоқбарон кумак мекарданд. Дар ҳамин ҳол, намояндагони мақомоти ҳифзи ҳуқуқи Тоҷикистон онҳоро дар минтақаи номуайяни марзӣ боздошт кардаанд.

Раҳбарони вилоятҳои Бодканди Қирғизистону Суғди Тоҷикистон дар гузаргоҳи "Кулунду" бо иштироки раҳбарони ниҳодҳои маҳаллии қудратӣ мулоқот кардаанд. Ҷониби Тоҷикистон дар натиҷаи гуфтугӯ наврасони боздоштшударо озод кардааст.

Ин дар ҳолест, ки чанде аз сокинони деҳаи Сомониёни ҷамоати Чоркӯҳ дар Исфара рӯзи 23-юми сентябр хабар доданд, ки як гуруҳ аз бошандагони деҳаи Куктоши Қирғизистон кӯдакони тоҷикро "ҳангоми бозгашт аз мактаб бо санг задаанд".

Ба иттилои манобеи Радиои Озодӣ, ба камияш ду нафар дар бемористони марказии шаҳри Исфара бистарӣ шудаанд, вале сабаби сангзанӣ маълум нест. Ҷониби Қирғизистон дар бораи захмӣ шудани чаҳор хонандаи қирғиз хабар дода буд.

"Кӯдакон пас аз адои дарс аз мактаби рақами 64 бармегаштанд. Онҳоро чанд сокини деҳаи Куктоши вилояти Бодканд, ки бо деҳаи Сомониён наздик аст, бе ҳеч сабаб задаанд. Ҳоло ҳодисаро таҳқиқ дорем", -- нақл кард раиси ҷамоати Чоркӯҳи Исфара.

Тоҷикистон бо Қирғизистон 970-980 километр марз дорад, ки аз ин танҳо 519 километр мушаххас ва нишонагузорӣ шудааст. Ҳамасола дар минтақаҳои баҳсии марзи ду кишвар бо сабабҳои гуногун, аз ҷумла бар сари тақсими об, муноқиша сар мезанад.

Дар пайи муноқишаи мусаллаҳонаи 28-29-уми апрели имсол дар сарҳади Тоҷикистону Қирғизистон аз ду тараф 55 кас кушта, даҳҳо нафар захмӣ ва даҳҳо манзил сӯхтаву вайрон шуданд. Нерӯҳои ду кишвар якдигарро ба оғози ҷанг гунаҳкор мекунанд. Додситониҳои кулли ду кишвар дар пайванд ба ҳодиса парванда кушода, таҳқиқро оғоз карда буданд, аммо то ҳанӯз натиҷаи онро эълон накардаанд.

ИМА дар САҲА: интихоботи Русия озоду одилона набуд

Як мақоми интихоботӣ дар интихоботи Русия

Ҳайати ИМА дар САҲА интихоботи ахири Думаи давлатии Русияро ҳамчун “ҷавобгӯ набуданаш ба меъёри интихоботи озоду одилона” интиқод карда иддаои Маскавро дар бораи дахолати берун “бепояву асос” номид. Эндрю Шепард, иҷрокунандаи вазифаи мушовири сиёсии ИМА интиқодҳои худро рӯзи 23-юми сентябр дар сатҳи Шӯрои доимии САҲА матраҳ кард. Шепард гуфт: “Амалҳои саркӯбгаронаи ҳукумати Руси пеш аз баргузории интихоботи Дума дар таърихи 17-19-уми сентябр ва баъди он аз шаффофияти интихооботӣ озод буд, орӣ аз пӯшиши хабарии матбуоти озод гузашт ва ин ҳама эътимод ба интихоботро ба ҳам зад”.

Аввалин бор аз соли 1993 бо сабаби ҷорӣ кардани маҳдудият аз ҷониби ҳукмати Русия нозирони САҲА дар интихоботи ин кишвар иштирок накарданд.

Даъвати нави мақомдори тоҷик: мошинро ба дучарха иваз кунед. ВИДЕО

Кӯчае дар маркази Душанбе

Раиси Кумитаи ҳифзи муҳити зисти Тоҷикистон, аз мардуми кишвар даъват кардааст мошинро камтар истифода намуда ба велосипед гузаранд. Баҳодур Шерализода дар сӯҳбат бо нашрияи расмии «Ҷумҳурият» гуфтааст, бо ин васила аз олуда шудани муҳити атроф ва тағийри иқлим метавон ҷилавгирӣ кард. Мақомдори тоҷик мисол овардааст, ки дар саҳни даромадгоҳи кумитаи таҳти раҳбарии ӯ барои дучарха тавақуффгоҳ бунёд шудааст.

Даъват ба истифодаи дучарха дар Тоҷикистон нав нест. Чандин мақомдори баландпояи дигар ҳам дар гузашта ба хотири сабук кардани роҳҳои шаҳр аз тамбашавӣ ва таблиғи варзишу ҳаёти солим даъват карда буданд, ки ҳам мардум ва ҳам мақомдорон ба дучарха гузаранд. Соли 2009 Бег Сабур, муовини вақти вазири нақлиёт аз кормандони ин вазоратхона даъват карда буд, ки мошинро бо велосипед табдил диҳанд. Аммо ин даъват на аз ҷониби кормандони ин идораи давлатӣ ва на дигар мақомдорон пуштибонӣ наёфт.

Сокинони ноҳияи Дӯстӣ ба дучархасаворӣ муҳаббати хос доштаанд
лутфан мунтазир бошед

Феълан кор намекунад

0:00 0:02:48 0:00

Мӯҳлати бақайдгирии муҳоҷирони корӣ дар Русия тамдид намешавад

Полиси Русия бо шеваи бисёр бераҳмонаи бархӯрдаш бо муҳоҷирон, бахусус муҳоҷирони ғайриқонунӣ маъруф аст

Қарори президенти Русия Владимир Путин дар бораи додани имтиёз барои қонунӣ кардани будубоши шаҳрвандони хориҷӣ дар Русия дароз карда намешавад. Федератсияи муҳоҷирон дар Русия мегӯяд, ин тасмим 23-юми сентябр дар пайи ҷаласаи васеи мақомоти рус гирифта шуд. Мӯҳлати охирини сабтиноми шаҳрвандони хориҷӣ дар Русия 30-юми сентбяр ба поён мерасад. Баъди ин мақомоти Русия ба ихроҷи муҳоҷирони ғайриқонунӣ оғоз хоҳанд кард. Моҳи гузашта Вазорати корҳои дохилии Русия гуфта буд, ки бар асоси ҳисобҳои пешакӣ маълум шудааст, ки ҳоло дар Русия беш аз 700 ҳазор муҳоҷир аз қаламправи Иттиҳоди давлатҳои мустақил ғайриқонунӣ зиндагӣ мекунанд ва агар ҳуҷҷатҳояшонро дуруст накунанд, депортатсия мешаванд. Ин ниҳод моҳи апрели имсол шумори тоҷиконеро, ки ғайриқонунӣ дар Русия ба сар мебаранд 247 ҳазор ҳисоб карда буд. Вале мақомот дар Тоҷикистон ин рақамро дур аз воқеъият номиданд. Ҳоло маълум нест, ки баъди 30-юми сентябр чӣ теъдод аз зодагони Тоҷикистон дар пешорӯи ихроҷ қарор мегиранд.

Байден раҳбарони Ҳинду Ҷопон ва Австралияро даъват намуд

Ҷаласаи фосилавии сарони кишварҳои Quad. Моҳи марти соли 2021

Қарор аст рӯзи 24-уми сентябр президенти ИМА Ҷо Байден дар Кохи Сафед ҷаласаи сарони кишварҳои узви гурӯҳи Quad-ро барпо кунад, ки аз раҳбарони кишварҳои Ҳинду Уқёнусия иборат аст. Рӯзи 24-уми сентябр Байден нахуствазирони Ҳинд, Ҷопон ва Австралия - Нарендра Моди, Йошиҳиде Суга ва Скотт Моррисонро қабул мекунад. Ин ҷаласа ба Байден имкон медиҳад, ки таваҷҷӯҳро аз вокуниши тунди Фаронса ба барномаи бисёрмиллиарддолларии сохтмони киштиҳои зериобии атомӣ барои Австралия ба сӯи дигар бикашад. Пеш аз ҷаласаи Quad, ҳукуматҳои Ҷопону Ҳинд эълони ИМА-ро дар бораи эҷоди як эътилоф бо Австралия ва Бритониё истиқбол карданд.

ИМА, Бритониё ва Австралия гуфтанд, ки нақшаи сохтмони киштиҳои ҳастаии зериобӣ ӯҳдадории ин кишварҳо дар баробари минтақаи Ҳинду Уқёнусияро тақвият дода, изҳори умедворӣ кардаанд, ки бӯҳрони дипломатии баамаломада дар дарозмуддат ба равобит бо Фаронса осеб намерасонад.

Фаронса маъмурияти Байденро дар “зарба аз пушт” гунаҳгор кард. Вале баъди як гуфтугӯи телефонии президентони ИМА ва Фаронса – Ҷо Байден ва Эммануэл Макрон рӯзи 23-юми сентябр таниш камтар шуд ва раҳбарон ба мувофиқа расиданд, ки фаъолиятҳо дар қаламрави Ҳинду Уқёнусияро аз наздик ҳамоҳанг мекунанд.

Ҳайати ҳукумати "Толибон" ба Маскав сафар мекунад

Хабаргузории "РИА Новости" иттилоъ дод, ки айни замон миёни Маскав ва "Толибон" гуфтушунид бобати сафари як ҳайати ҳукумати "Толибон" ҷараён дорад. Ҳамчунин ба нақл аз иҷрокунандаи вазифаи муовини вазири фарҳанг ва иттилооти ҳукумати "Толибон" Забеҳулло Муҷоҳид гуфта мешавад, ки Кобул хостори чунин сафар шудааст.

Ин дар ҳолест, ки панч увзи доимии Шӯрои Амнияти Созмони Милал хостори муколама бо ҳукумати "Толибон" шудаанд. Антонио Гутерреш, дабири кулли СММ рӯзи 22-юми сентябр гуфт, ки ин талошҳо ба он хотир аст, ки “дар Афғонистон ҳуқуқи занону духтарон риоят шавад. Афғонистон паноҳгоҳи террористон нашавад ва ҳукумате фарогире дошта бошад, ки аз тамоми аҳолии намояндагӣ кунад.”

Бо вуҷуди он ки Русия ва Тоҷикистон шарикони стратегӣ шумурда мешаванд, Тоҷикистон аз камтарин кишуарҳоест, ки эътирофи ҳукумати толибҳоро рад мекунад ва хостори таъсиси ҳукумати ҳамашумал дар Афғонистон аст.

Раҳбари ҷудоиталабони Каталония дар Итолиё боздошт шуд

Карлес Пучдемон

Карлес Пучдемон, раҳбари ҷудоиталабон бо дархости Испания дар ҳудуди ҷазираи Сардиняи Итолиё боздошт шуд. Ӯ баъди чор сол пеш барпо кардани референдуми итиқлолият, ки онро Мадрид ғайриқонунӣ номидааст, аз кишвар фирор кард. Вакили дифои Пучдемон гуфт, ки ӯ рӯзи 24-уми сентябр дар додгоҳи истирдодаш ҳозир хоҳад шуд. Каталония як минтақаи дурдаст ва сарватмандтарини Испания мебошад.

Ҳоло ӯ сокини Белгия ва як узви Парлумони Аврупо мебошад. Пучдемон дар оғоз дар баробари таъқиби ҷиноӣ масуният дошт, вале моҳи март масунияти ӯ бекор карда шуд. Референдуми соли 2017 боиси эҷоди бӯҳрони сиёсӣ дар Испания шуд, чун бар асоси он парлумони минтақаи Каталония эълон кард, ки ин минтақа аз Испания ҷудо аст, вале Мадрид мудирияти мустақимро дар минтақа ҷорӣ намуд. Дафтари Пучдемон гуфт, ӯ хост дар як ҷашнвораи мардумии мардуми каталон дар Итолиё иштирок кунад, вале ба ҳангоми убури марз боздошт шуд.

ИМА як мудири ширкати русиро бо гумони напардохтани андоз боздошт кард

Дар ИМА як раҳбари баландпояи ширкати русии истеҳсолкунандаи гази табииро бо иттиҳоми фирор аз пардохти андоз ва дар ҳисобҳои офшор нигоҳ доштани даҳҳо миллион доллар боздошт шуд.

Вазорати адлияи ИМА рӯзи 23-юми сентябр гуфт, ки Марк Ҷетвей бо қарори додраси додгоҳи калони федеролии Флорида бар асоси иттиҳоме, ки рӯзе аз он пеш эълон шуд, дастгир гардид. Ширкати “Новатэк” истеҳсолкунандаи азим ва мустақили гази табиӣ мебошад.

Марк Ҷетвей дар назди сармоягузорони хориҷӣ ба ҳайси симои муаррифгари ширкат баромад мекард. Ҷетвейро дар он муттаҳам мекунанд, ки сармояҳояшро ба ҳисобҳои бонкии офшор бароварда, бо ин роҳ аз пардохти андоз фирор кардааст. Таҳқиқоти пешакӣ солҳои 2003 то 2014-ро дар бар мегирад. Дар як маврид гуфта мешавад, ки соли 2005 гӯё Ҷетвей дар бонки Швейсария ҳисобҳо кушода, маблағҳои дар он ҷамъшуда дар як вақт то 93 миллион долларро ташкил додааст.

Ширкати “Новатэк” ба муроҷиатҳои Радиои Озодӣ барои шарҳи ин қазия посух надод. Рӯзи 23-юми сентябр Ҷетвей дар додгоҳ ҳозир мешавад. Дар сурати гунаҳгор дониста шуданаш ба ӯ даҳҳо соли зиндон таҳдид мекунад.

Қазоқистон эътирозгарони назди сафорати Чинро боздошт кард

Назди сафорати Чин дар шаҳри Нурсултон. 23 сентябри соли 2021.

Пулиси Қазоқистон шоми 23-юми сентябр ҳудуди даҳ нафареро, ки бо талаби раҳоии наздиконашон аз боздоштгоҳҳои Шинҷон дар назди сафорати Чин дар шаҳри Нурсултон ҷамъ шуда буданд, боздошт кард.

Дар ин бора фаъоли мадании қазоқтабор Байболат Кунболатулӣ, ки бародараш дар яке аз боздоштгоҳҳои минтақаи Шинҷони Чин нигаҳдорӣ мешавад, дар шабакаи иҷтимоии "Фейсбук" хабар дод.

"Кормандони пулис ҳамаи занони ҷамъшударо бо худ ба ҷои номаълуме бурданд", - изҳор дошт фаъоли қазоқтабор. Дар Раёсати пулиси Алмато гуфтанд, ки дар бораи боздошти таҷаммуъгарони назди сафорати Чин маълумот надоранд.

Ҳудуди даҳ нафар аз аввали ҳафтаи равон ба ин сӯ дар назди сафорати Чин дар Нурсултон ҷамъ шуда, раҳоии наздиконашонро аз боздоштгоҳҳои Шинҷон талаб мекунанд. Онҳо 22 сентябр низ дар назди сафорат гирди ҳам омада, хостанд сафири Чин Чжна Сяо Қазоқистонро тарк кунад. Бештари эътирозгарон занони нафақахӯранд.

Як мард дар Узбекистон барои фурӯхтани гӯшти хар ба ду сол зиндон маҳкум шуд

Акс аз бойгонӣ.

Додгоҳи шаҳри Қаршии Узбекистон шаҳрванд Х.Ж.-ро барои фурӯхтани гӯшти хар ба муҳлати ду сол ба корҳои ислоҳӣ ва ба фоидаи давлат рӯёнидани 20 дарсади маошаш маҳкум кард.

Ба иттилои пулиси Узбекистон, мақомоти қудратӣ пештар аз ин дар яке аз хонаҳо дар маҳаллаи "Арабхона"-и шаҳри Қаршӣ мардеро ҳангоми тақсими гӯшти хар пайдо карданд. Дар манзили вай гӯшту пуст ва 20 хари зиндаи дигар пайдо шуд.

Ибтидо марди боздоштшуда исрор меварзид, ки гӯшти харро барои сагҳо омода мекард, аммо дертар иқрор шуд, ки барои фурӯш хар мекушт.

Рӯзи 26-уми майи соли ҷорӣ расонаҳои маҳаллии Узбекистон хабар дода буданд, ки чаҳор сокини ноҳияи Косони Узбекистон бо гумони куштори харҳо боздошт шуданд.

Будҷаи харҷҳои президенти Русияро як миллиард рубл зиёд карданд

Дар се соли оянда барои фаъолияти ниҳодҳои ҳукуматии Русия 1,5 триллион рубли буҷа харҷ хоҳад шуд, ки аз ин маблағ 45 миллиарди он барои таъмини фаъолияти президент ва дастгоҳи вай ҷудо мегардад.

Як соли пеш дар тарҳи буҷаи давлатии Русия барои эҳтиёҷоти президент ва дастгоҳи вай як миллиард рубл камтар ва барои фаъолияти сарвазиру дастгоҳи ҳукумати он кишвар се миллиард рубл камтар маблағ пешбинӣ шуда буд.

Бештар шудани харҷҳо дар тарҳи нави буҷа ба афзудани маоши мансабдорон, гароншавии парвозҳо, таҳияи ҷоизаҳои давлатӣ, инчунин маросими савгандёдкунии президент дар соли 2024 рабт дода мешавад.

Дар шари буҷаи нав омадааст, ки қариб 719 миллиард рубл ба фаъолияти низоми додгоҳӣ равона мешавад. Аз ҳисоби ин маблағ афзоиши маоши судяҳои амалкунанд, пардохти нафақаи судяҳои нафақахӯр ва афзудани муҳофизони додгоҳҳо дар назар аст.

Мулоқоти мансабдорони баландпояи Қирғизистон бо "Толибон" дар Кобул

Мулоқоти намояндаи ҳукумати Қирғизистон бо иҷрокунандаи вазифаи вазири корҳои хориҷии "Толибон". Шаҳри Кобул, 23-юми сентябри соли 2021

Таалатбек Масодиқов, муовини раиси Шӯрои амният ва Ҷеенбек Кулубоев, раиси бахши сиёсати хориҷии ҳукумати Қирғизистон, барои музокирот бо "Толибон" ба Кобул рафтаанд. Ин гуруҳ дар нимаи моҳи августи имсол назорат бар Афғонистонро ба даст гирифт.

Забеҳуллоҳ Муҷоҳид, сухангӯйи "Толибон", рӯзи 23-юми сентябр гуфт, ду мансабдори баландпояи Қирғизистон бо сарпарасти Вазорати корҳои хориҷии ҳукумати "Толибон", Амирхон Муттақӣ, мулоқот карданд.

Мақомоти Қирғизистон ҳанӯз хабарро шарҳ надодаанд.

Муҷоҳид мегӯяд, Муттақӣ аз намояндагони Қирғизистон "пазироӣ карда, ба зарурати идомаи ҳамкорӣ ва ёриҳо" таъкид намуд. Сухангӯи "Толибон" акси лаҳзаи мулоқотро низ дар Твитттер гузошт.

Ин мулоқот дар ҳоле баргузор шуд, ки ҷомеаи байнулмилалӣ дар эътирофи ин гурӯҳи тундрав ба ҳайси ҳокими Афғонистон дар дуроҳа аст. Дар айни замон, Мулло Муҳаммад Ҳасан Охунд, иҷрокунандаи вазифаи раиси ҳукумати "Толибон", рӯзи 21-уми сентябр дар Кобул бо намояндагони Русия, Чин ва Покистон мулоқот кард.

Аввали ҳафтаи ҷорӣ президенти Узбекистон дар Маҷмаи умумии Созмони Милал дар Ню-Йорк гуфт, ин кишвари Осиёи Марказӣ интиқоли нафту барқро ба Афғонистон аз сар гирифтааст.

Дар ҳамин ҳол, кишварҳои Осиёи Марказии ҳаммарз бо Афғонистон аз таҳдидҳои амниятӣ ва эҳтимоли омадани даҳҳо ҳазор гуреза аз Афғонистон дар ташвиш ҳастанд. "Толибон" кӯшиш дорад, итминон диҳад, ки ба кишварҳои ҳамсоя ҳеч таҳдид надорад.

Ду ниҳод аз поймолшавии ҳуқуқи занон дар Ҳирот хабар медиҳанд

Тазоҳуроти занон дар Ҳирот. 2-юми сентябри 2021

Ҳомиёни ҳуқуқи башар гуфтанд, ки "Толибон" дар вилояти Ҳирот, воқеъ дар ғарби Афғонистон, ба таври "густурда" ва "ҷиддӣ" ҳуқуқи занону духтаронро поймол кардаанд.

Аз замони ба дасти "Толибон" гузаштани Ҳирот дар рӯзи 12-уми август, ҷангҷӯёни гурӯҳ дар байни занону духтарон тарсу ҳаросро ба вуҷуд овардаанд.

"Толибон" фаъолияти занонро маҳдуд карда, онҳоро ба пӯшидани либосҳои мавриди хосташон маҷбур мекунанд. Онҳо ҳамчунин имкони кор ва таҳсилро аз занон гирифта, иҷозат намедиҳанд, ки даст ба эътирозҳои осоишта бизананд.

Созмони Дидбони Ҳуқуқи Башар (HRW) ва Пажӯҳишгоҳи ҳуқуқи башар рӯзи 23-юми сентябр гуфтанд, тариқи телефон бо шуморе аз занон дар Ҳирот, аз ҷумла фаъолон, муаллимон, донишҷӯёни донишгоҳҳо дар бораи таҷрибаҳояшон баъди дар ихтиёри "Толибон" қарор гирифтани ин шаҳр суҳбатҳо доштанд.

Ин ду созмон гуфтанд, ин занон аз тарс ва ба хотири амнияташон нахостанд, номашон фош шавад. Ба гуфтаи занон, пас аз контроли Ҳирот аз сӯи "Толибон", зиндагии онҳо ба таври пурра тағйир ёфт ва худро дар дохили хона дар банд мебинанд.

Захмиҳо ҳастанд. Сангандозӣ дар як деҳаи наздимарзии Тоҷикистон бо Қирғизистон

Дар муноқишаи марзии моҳи апрел чандин хонаи сокинони деҳаи Сомониён сӯхтаву вайрон шудааст. Акс аз моҳи майи 2021

Чанде аз сокинони деҳаи Сомониёни ҷамоати Чоркӯҳ дар Исфара хабар доданд, ки як гуруҳ аз бошандагони деҳаи Куктоши Қирғизистон рӯзи 23-юми сентябр кӯдакони тоҷикро "ҳангоми бозгашт аз мактаб бо санг задаанд". Ҳокими вилояти Бодканд ҳодсиро "занозании байни хонандагони мактаб" номидааст.

Ба иттилои манобеи Радиои Озодӣ, ба камияш ду нафар дар бемористони марказии шаҳри Исфара бистарӣ шудаанд, вале сабаби сангзанӣ маълум нест. Ҷониби Қирғизистон дар бораи захмӣ шудани чаҳор хонандаи қирғиз хабар додааст.

Масъулони идораи марзбонии Тоҷикистон расман дар ин бора иттилоъ надодаанд.

Шукурхон Насриев, раиси ҷамоати Чоркӯҳи Исфара, рӯзи 23-юми сентябр дар суҳбат бо Радиои Озодӣ гуфт, намояндагони Қирғизистонро аз ҳодиса огоҳ карданд.

"Кӯдакон пас аз адои дарс аз мактаби рақами 64 бармегаштанд. Онҳоро чанд сокини деҳаи Куктоши вилояти Бодканд, ки бо деҳаи Сомониён наздик аст, бе ҳеч сабаб задаанд. Ҳоло ҳодисаро таҳқиқ дорем", -- афзуд ӯ, вале аз ин бештар тафсилот надод.

Як сокини деҳаи Сомониён бе зикри ном гуфт, як гуруҳ аз сокинони деҳаи Куктоши Қирғизистон як марду занро ҳам задаанд.

Дар ҳамин ҳол, як масъули ҳукумати шаҳри Исфара ба Радиои Озодӣ гуфт, ҳодиса пас аз зуҳри 23-юми сентябр рӯй дод. Ба гуфтаи манбаъ, дар ин ҳодиса ду кас захмӣ шуда, дар бемористони марказии Исфара бистарӣ ҳастанд.

Ба иттилои ҳамсуҳбати мо, "захмиён як марди 45-сола ва як ноболиғ ҳастанд. Бинӣ ва дандонҳои мард шикаста, аз сараш ҷароҳат бардоштааст. Писар аз сараш захмдор шудааст."

Деҳаи Сомониёни ҷамоати Чоркӯҳ дар баҳори имсол яке аз маконҳои низоъ дар сарҳади Тоҷикистону Қирғизистон буд. Дар он ҳодиса хонаи чандин сокини деҳа сӯхтаву вайрон шудааст.

Ҳокими вилояти Бодканд, Учкун Жоробоев, ба бахши қирғизии Радиои Озодӣ гуфтааст, занозанӣ дар деҳаи Куктош рӯй додааст. "Мувофиқи маълумоти пешакӣ, чаҳор хонандаи синфи 8-уми мактаби Қирғизистон аз ҷониби хонандагони синфи ёздаҳи Тоҷикистон латукӯб шудаанд", -- афзудааст ӯ.

Тоҷикистон бо Қирғизистон 970-980 километр марз дорад, ки аз ин танҳо 519 километр мушаххас ва нишонагузорӣ шудааст. Ҳамасола дар минтақаҳои баҳсии марзи ду кишвар бо сабабҳои гуногун, аз ҷумла бар сари тақсими об, муноқиша сар мезанад.

Дар пайи муноқишаи мусаллаҳонаи 28-29-уми апрели имсол дар сарҳади Тоҷикистону Қирғизистон аз ду тараф 55 кас кушта, даҳҳо нафар захмӣ ва даҳҳо манзил сӯхтаву вайрон шуданд. Нерӯҳои ду кишвар якдигарро ба оғози ҷанг гунаҳкор мекунанд. Додситониҳои кулли ду кишвар дар пайванд ба ҳодиса парванда кушода, таҳқиқро оғоз карда буданд, аммо то ҳанӯз натиҷаи онро эълон накардаанд.

Биржаи Лондон "Қирғизтило"-ро ширкати беэътимод номид

Акс аз бойгонӣ

Иттифоқи касабаи кӯҳӣ-металлургии Қирғизистон гуфт, қарори LBMA, ки ширкати "Қирғизтило"-ро дастраскунандаи беэътимод меномад, бояд бекор карда шавад.

Дар номаи иттифоқи мазкур омадааст, ки "ин қарори Биржаи металҳои гаронбаҳои Лондон метавонад, ба бахши истихроҷи тилои Қирғизистон таъсир расонда", боиси муфлисшавии корхонаи "Кара-Балтинский" шавад. Зеро ба гуфтаи муаллифони нома, коркарди тило дар корхонаи мазкур фоидаовар нахоҳад буд.

"Маҳрум шудан аз унвони "боэътимод" дар баробари талафоти иқтисодӣ зарбаи сахте ба имиҷи Қирғизистон дар арсаи байналмилалӣ, аз ҷумла дар миёни сармоягузорон низ хоҳад шуд", - омадааст дар номаи Иттифоқи касабаи кӯҳӣ-металлургии Қирғизистон.

LBMA 17-уми сентябр дар бораи қарори ахири худ хабар дода, гуфт, тасмими мазкур ба хотири риоя нашудани талабот аз сӯи ширкати қирғизӣ гирифта шудааст.

Бояд гуфт, "Қирғизтило" ягона ширкате дар Қирғизистон аст, ки ҳаққи содироти тилои бузургтарин кони ин кишвар - "Қумтор"-ро ба хориҷ дорад.

Ёфтҳои бештар

XS
SM
MD
LG