"Шери Панҷшер" -- симфонияи оҳангсози амрикоӣ Дейвид Гейнс, ки ба корномаи Аҳмадшоҳи Масъуд бахшида шуда. дар бузургтарин толорҳои консертии ҷаҳон садо дод, акнун дар шакли албоми алоҳида ба нашр расид.
Симфонияи Гейнс монанди филми коргардони фаронсавӣ Кристоф де Понфили талошест дар кашфи сарчашмаи нирӯофарин ва мояи бузургии фармондеҳи машҳури Афғонистон Аҳмадшоҳи Масъуд. "Ҷанги ман бар зидди ҷанг", "Оташи дил", "Охирин девор" номи фаслҳои симфонияи Гейнс ҳастанд ва фасли ниҳоии он чунин ном дорад: "Акнун мо ҳама Масъудем", ки бо суханони маҳшури акнун ман ҳам берлиниям-и Ҷон Кеннеди ҳамсадо мешавад.

Нӯҳуми сентябри соли 2001, ду рӯз пеш аз ҳамлаҳои террористӣ ба Иёлоти Муттаҳида, Масъуд аз тарафи ду террористи араб, ки худро журналист муаррифӣ карда буданд, ба ҳалокат расид.
Ин ҳам дар ҳоле ки вай охирин девори Афғонистон дар сари роҳи ҷумбиши тундрави Толибон буд. Пас аз панҷ соли ин фоҷиа, имрӯз дар Афғонистон, ки ҷангу нооромӣ аз нав қувват мегирад, дар миёни аҳли назари ин кишвар сӯги камбуд ё набуди шахсе монанди Масъуд матраҳ мешавад. Раҳматуллоҳи Бежанпур, коршиноси афғон мегӯяд: "Дар гуфтумонҳое, ки дар ҳавзаи баҳси масъалаҳои Афғонистон матраҳ шуд, фуқдони шахсияти каризматик (машҳур) ва муҳими сиёсӣ барои инсиҷоми масоили Афғонистон, ки зиндаёд Аҳмадшоҳи Масъуд буд, дарвоқеъ яке аз мушкилоти муҳиму меҳварии масоили Афғонистон шинохта шуд. Дар гузаштаҳо мавҷудияти як партизон, як чирик, як инсони созмонгари фаъоли сиёсӣ барои убур аз ҳар марҳилаи душвор як итминони хотир барои ҷомеаи Афғонистон буд ва ҳуҷуму ҳузури бегонаву душману ғайр душман дар Афғонистон зиёд хатар намеофарид. Аммо дар панҷ соле ки таҳаввулоти ҷаҳонӣ бар меҳвари бардоштан ва фуқдони эшон созмон ёфт, таҳаввулоте ки ҳам дар дохили Амрико ва ҳам дар ҳавзаи Афғонистон одреси муштарак пайдо карданд ва дарвоқеъ баландтарин сохтмонҳои оламро дар Амрико фурӯ рехт ва баландтарин чеҳра ва истиқомату қомати баланди таърихи Машриқзаминро дар Шарқ фурӯ рехт, дар ҳақиқат яке аз ҳаводиси фоҷиавии ҷаҳон маҳсуб мешавад."
Захме ки аз бохти шахсияте монанди Масъуд ба дилҳо нишаст, ба навиштаи Сардор Аҳмад, журналисти афғон, ҳамоно хунчакон аст. Дар рӯзи ёдбуди Масъуд ҳазорон нафар дар зодбуми ӯ, деҳаи Ҷангалаки Панҷшер ҷамъ меоянд ва дар пояи мадфани ӯ намоз мегузоранд.
Сардор Aҳмад менависад, дар солҳои охири умраш Масъудро "падари афғон"-ҳо меномиданд ва даъвати ӯро ба ваҳдати кишвари азҳамрехта ба ҷон мепазируфтанд. Вале имрӯз, Воҳиди Мужда, як таҳлилгари сиёсии афғон дар Кобул мегӯяд, ҳамкорони Масъуд номи ӯро бузург мекунанд, то бо номи ӯ қудрат ба даст оранд. Ва Рӯҳулло, як сокини Кобул гуфтааст, "вай як ҷангсолор буд."
Ба навиштаи хабарнигори Asia Times Пепе Эскобар Масъуд дар ҷавонӣ орзу дошт, меъмор шавад ва биноҳои зебо барафрозад, вале ба ҷойи ин маҷбур шуд, тамоми умр биҷангад. Дар маҷаллаи Central Asia Monitor тасвири хонаи Масъуд омадааст, ки аз рӯи тарҳи худи ӯ сохта шудааст. Аммо дар бораи ҳунари ҷангии ӯ дуктур Чингизи Паҳлавон мегӯяд: "Масъуд аз нигоҳи низомӣ, бетардид, як нобиға ба ҳисоб меояд. Зеро ӯ тавонист, тиурии ҷангро бо фаъолиятҳои гуногуни худаш таҳаввул бидиҳад ва фавқулодда ҳушманд буд ва аз аъмоли зудгузар мепарҳехт."
Шахсияти нодири Аҳмадшоҳи Масъудро Пепе Эскобар муҳимтарин омили маҳбубияти ӯ дар миёни мардуми худ ва дар саҳнаи ҷаҳонӣ номидааст. Вай менависад, дар мулоқотҳояш Масъуд ба чашми ӯ шабеҳи шоирони давраи зуҳури Битлз падид омадааст. Ва хабарнигори дигар, Роланд Барисил, Масъудро "ҷанговари рӯшанфикр" меномад.
Ва Раҳматуллоҳ Бежанпур мегӯяд: "Бо шинохте ки аз ишон доштам, як чунин фарди пуринержӣ ва тавонманде бо имконоти андак дар баробари хатароти бисёр бузург аз муҳаббату аз шигифтиҳои рӯзгор аст. Вале мо эъмоли салиқа мекардем, бахше ба унвони ҳокимияти соқитшуда аз ҷомеа ба наҳве нафрат дошт, ки гӯё ин омили суқути мо буд, бахше ба унвони инки ӯ тафаккураш исломисту мо нестем, ихтилоф дошт, бахше ба унвони инки ӯ тоҷик асту мо аз ин табор нестем, ихтилоф доштанд ва бахше ба хотири инки ӯ бисёр бузург асту мо кӯчак ҳастем, ихтилоф доштанд, аз чандин раҳгузар эъмоли салиқа карданд ва ба ин тартиб як вазъияти бисёр носудманди сиёсӣ дар Афғонистон ба вуҷуд омад. Ин ихтилофот бойис шуд, ки ин барномаҳо ва истротеҷиҳои гунгу мубҳам созмондиҳӣ бишаванд ва як инержии фаъолу як шонси воқеъиро аз мардуми Афғонистон бигиранд."
Аз журналистони тоҷик аввалин мусоҳибаро бо Аҳмадшоҳи Масъуд, сардабири барномаҳои иттилоотии телевизиони Тоҷикистон Қурбоналӣ Хуҷамов дар соли 1996 анҷом додааст. Вай мегӯяд: "Ба сурати умум, ҳамчун қумондон агар ба ӯ нигарем, дар ӯ ягон чизи омирона ва назарбаландона эҳсос намешуд, балки бештар фикр мекардед, дар баробари шумо як одами хоксор ва бисёр фурӯтан нишастааст. Ҳамзамон хеле зуд мефаҳмидед, ки ӯ як шахси оқил, донишманду хирадманд ва дурандеш аст. Оре, вай шахсе буд, ки фаросот ва заковати бисёр бузург дошт ва ба ҳар савол ҷавоби рӯшaну комил медод."
Аз рӯйи ончи дар замони зиндагии Масъуд, махсусан солҳои охири ҳаёташ, дар матбуоти Ғарб чоп шудааст, метавон дид, ки аксарият кӯшидаанд, муносибати ӯро ба ислом ошкор кунанд. Пепе Эскобар менависад, исломи Масъуд нарм буд монанди шафтолуи Панҷшер. Дар водии ӯ занон таҳсил мекарданд, ҳамсари худаш бурқа намепӯшид ва Масъуд исломи толибонро қабул надошту мегуфт, бин Лодин бояд боздошт шавад ва ё аз Афғонистон ронда шавад. Ними суолҳо дар мусоҳибаи он ду террорист дар ниқоби хабарнигор, охирин мусоҳибаи Масъуд, ба бин Лодин марбут буд. Ҳангоми сафараш ба Аврупо, аввалин сафари хориҷии Масъуд, аз ӯ бисёр суол мешуд, ки оё Афғонистон зимни сиёсатҳои толибҳо ба қисматҳо ҷудо хоҳад шуд. Ин ишорае ҳам буд ба тоҷик будани Масъуд.
Дуктур Чингизи Паҳлавон мегӯяд: "Аз назари сиёсӣ ба иллати ин ки тоҷик буд, мухолифонаш ҳамвора мекӯшиданд, ба ӯ хислати қавмӣ диҳанд, аз ин бобат ӯро накӯҳиш бикунанд ва ба унвони як хатар аз ӯ ёд бикунанд. Лаҳҷаи ширини Масъудро бархе аз мухолифонаш дарвоқеъ баҳонае мекарданд, барои ҳамла ба ӯ. Аммо ман ки ҳар бор аз наздик ӯро медидам, медидам, ки чӣ равобити неке бо ақвоми мухталиф дорад, ба хусус бо бародарони паштун, ҳазора, туркман ва ӯзбак ва чӣ қадар кӯшо буд, ки усулан сохтори қудрати сиёсӣ дар Афғонистон таркибе аз ширкати ҳамаи ин ақвом ва мардум бошад."
Дар охирин солҳои умраш Масъуд бо тоҷикони шӯравӣ аз наздик ошно шуд, аз он ҷо ки паноҳандагони тоҷик ва намояндагони иттиҳоди оппозисюни Тоҷикистон қисман дар қаламравҳои таҳти назорати ӯ ба сар мебурданд.
Хабарнигори тоҷик, он вақт корманди телевизиони давлатӣ ва ҳоло сардабири нашрияи "Зиндагӣ" Қурбоналӣ Хуҷамов мегӯяд: "Як саволе ки ман бо ӯ матраҳ кардам, дар бораи равобити Тоҷикистон ва Афғонистон буд. Ва манзури ман ин буд, ки оё ҷаноби Масъуд роҷеъ ба Тоҷикистон то куҷо огаҳӣ дорад ва муносибаташ ба Тоҷикистон чигуна аст. Ӯ ба сурати бисёр комил посух дод. Дар бораи робитаҳои ду кишвар бисёр суханони хуб гуфт ва ҳамчунон дар бораи ягонагии фарҳангу тамаддуни мо, забони мо ва нишон медод, ки ба масъала бисёру бисёр огаҳ буд."
Ба гуфтаи Хуҷамов ҳамон рӯзҳо буд, ки Масъуд ба таври ҷиддӣ ду тарафи низоъи Тоҷикистонро ба сулҳу оштӣ даъват мекард.
Раҳматуллоҳи Бежанпур ҳамчун шоҳид як мулоқоти Тахорро ба ёд меорад: "Як гуфтугӯ байни ҷаноби Нурӣ ҳамчун раҳбари мухолифон ва ҷаноби Раҳмонов, раисиҷумҳури Тоҷикистон дар Тахор барпо шуд ва ман шоҳид будам, ки аз оғози он Масъуд талош кард, хиҷолат аз низоъро дар миён гузорад ва фазои ҳокими музокирот бикунад. Масъуд ҳардуи онҳоро бисёр зебо дар оғӯш гирифт ва гуфт, бардорон, ман аслан хиҷолат мекашам, ки мо баҳси ихтилоф бикунем. Мо арзишҳои хубе дорем ва гузаштаҳои рӯшану боифтихоре ва баҳсе ки сар задааст, бисёр осон бо гуфтугӯи рӯбарӯ ҳал мешавад. Шумо биравед ва мардуми Тоҷикистонро аз ин беш интизор накунед. Мо бо шумо ҳастем, мо яке ҳастем ва мо ҷудоинопазир ҳастем. Ва инсофан, ин иддаъо набуд. Инро ҷаноби Раҳмонов худашон ба хотир доранд, ки ин яке аз эҳсосҳи амиқе буд, ки Аҳмадшоҳи Масъуд дар нафаси худ мунтақилаш мекард."
Ва охирин нафаси худро Масъуд дар он сӯи рӯди Омӯ, дар Тоҷикистон кашид.
Он вақт журналисти собиқи телевизиони тоҷик Қурбоналӣ Хуҷамов ҳанӯз фикр надошт, ки хотираҳои худро рӯйи қоғаз оварад: "Рӯзи ҷашни истиқлоли Тоҷикистон буд ва шоми он рӯз мо дар зиёфати як дӯсти худ будем, ки касе омад ва ин хабарро расонд, ки Аҳмадшоҳи Масъуд даргузаштааст. Ин як хабари аввалан, боварнакарданӣ ва баъдан бисёр ғамангез буд. Ғамангез на танҳо барои мардум Афғонистон, балки барои тамоми мардуме ки барои озодӣ, барои ифтихор ва ғурури миллӣ, барои ҳаққи инсон ва қоил буданд барои он ки ҳеҷ кас дар ҳеҷ куҷо ба касе зулм накунад, хабари бисёр мутаассиркунанда буд ва ҳамаи онҳое, ки сари дастархон бо мо менишастанд, аз чашмонашон ашк мерехт. Он рӯз бо вуҷуди он ки иди истиқлол буд, дар дилҳои мо ғами даргузашти Аҳмадшоҳи Масъуд бисёр асар гузошта буд."

Раисҷумҳури Амрико мегӯяд, нақша надорад, ки оташбасро бо Эрон тамдид кунад. Доналд Трамп рӯзи 14-уми апрел дар суҳбат бо телевизиони амрикоии ABC тахмин кард, ки “барои Эрон шояд созиш беҳтар бошад, то онҳо кишварашонро барқарор кунанд.”

Амрико ва Эрон 7-уми апрел ба оташбаси дуҳафтаина мувофиқат карда, сипас дар Покистон сари мизи музокирот нишастанд, аммо барои хатми ҷанг ба созише нарасиданд.

Президенти Амрико аз эҳтимол дур намедонад, ки дар як -ду рӯзи оянда даври нави музокироти ду ҷониб аз сар гирифта мешавад.

Ҷей Ди Венс, муовини президенти Амрико, низ рӯзи 14-уми апрел дар робита бо музокироти Иёлоти Муттаҳидаву Эрон изҳори назар кард. Ба қавли ӯ, беэътимодӣ миёни Вашингтону Теҳрон дар як шаб аз байн нахоҳад рафт.

Ӯ афзуд: "Самимона гӯем, баъди ин 49 сол миёни Эрону Амрико беэътимодӣ зиёд аст. Шумо наметавонед ҳамаи мушкилиҳоро дар як шаб ҳал кунед. Ба фикрам, мардум ҷамъ шуданду талош карданд, то созише ҳосил шавад. Медонед, президенти Амрико ба мо дастур дод, ки ба онҷо рафта, бо нияки нек гуфтушунид кунем. Мо ин корро анҷом додем. Мо ин корро идома медиҳем. Хуб, намедонем, ки чӣ пеш меояд."

Венс раҳбарии ҳайати Амрикоро дар даври аввали музокирот бо Эрон бар дӯш дошт. Ӯ ҳам мисли Трамп таъкид кард. ки Эрон шадидан аз созиш ҷонибдорӣ мекунад.

Дар ҳар сурат, баъд аз анҷоми музокироти ноком нерӯҳои мусаллаҳои Амрико муҳосираи гулӯгоҳи Ҳурмузро оғоз намудаанд.

СЕНТКОМ ё Ситоди марказии фармондеҳии Амрико, ки назорати амалиётро дар Ховари Миёна бар ӯҳда дорад, 14-уми апрел дар шабакаи "Х" навишт, ки тамоми равуо тавассути гулӯгоҳи Ҳурмуз қатъ шудааст.

Эрон аз оғози низоъ равуои киштиҳоро дар ин гулӯгоҳи стратегӣ, ки тавассути он то бист дарсади сӯзишворӣ ба бозорҳои ҷаҳонӣ содир мешавад, маҳдуд кард.

Ҷанг дар Ховари Миёна бо ҳамлаҳои Амрикову Исроил ба Эрон ва амалиёти Исроил дар Лубнон дар таърихи 28-уми феврал оғоз ёфта, боис ба марги ҳазорҳо ва бехонаву ҷой шудани миллионҳо нафар шудааст.

"Гурӯҳи 24" пешниҳоди додситони вилояти Ивановоро дар бораи "ифротгаро ва мамнуъ" донистани ин созмони мухолифи ҳукумати Тоҷикистон дар ҳудуди Русия "беасос, сохта ва дорои ангезаи сиёсӣ" номид.

Андрей Жугин, додситони вилояти Иваново, дар як дархости расмӣ гуфтааст, "Гурӯҳи 24" пештар зидди ҳукумати Тоҷикистон фаъолият мебурд, "вале пас аз оғози амалиёти низомӣ дар Украина ба зидди ҳукумати Русия кор мекунад." Русия ҷангро дар Украина амалиёти вижаи ҳарбӣ меномад.

Дилшод Шарифов, раиси "Гурӯҳи 24", рӯзи 15-уми апрел дар баёнияи расмӣ гуфт, "иттиҳомоти зикршуда ба воқеият мутобиқат накарда, бар пояи маълумоти нодуруст ва таҳрифшуда омода гардидаанд."

Вай афзуд, "Гурӯҳи 24" пас аз содир шудани қарори Додгоҳи Русия мавқеи худро "ба таври муфассал ва бо далелҳои иловагӣ шарҳ хоҳад дод".

Дар ду соли охир бори севум аст, ки мақомоти Русия шаҳрвандони Тоҷикистон ё созмонҳои марбут ба онҳоро ба ҳамкорӣ бо Украина муттаҳам мекунанд.

Додгоҳе дар Русия соли 2025 Шарофиддин Гадоев, раҳбари Ҷунбиши ислоҳот ва рушди Тоҷикистонро бо баҳонаи онки дар бораи артиши Русия "хабарҳои дурӯғ паҳн кардааст", дар ғайбаш ба зиндон маҳкум кард. Худи ӯ иттиҳомро бофтаву сохта донист.

"Гурӯҳи 24" соли 2012 дар Русия таъсис ёфта, соли 2014 бо қарори Додгоҳи олии Тоҷикистон созмони экстремистӣ ва мамнуъ эълон шуд. Пайравонаш ин қарорро намепазиранд.

То кунун даҳҳо нафар дар Тоҷикистону Русия ва кишварҳои дигари пасошӯравӣ бо иттиҳоми тарафдорӣ аз “Гурӯҳи 24” боздошту зиндонӣ шудаанд. Ин созмонро тоҷири норозӣ Умаралӣ Қувватов бунёд гузоштааст. Худи ӯ соли 2015 дар шаҳри Истанбул кушта шуд.

Додгоҳи олии Русия дар соли 2022 Ҳизби наҳзати исломии Тоҷикистонро як созмони террористӣ эълон ва фаъолияти онро дар қаламраваш манъ карда буд.

Мақомоти қудратии Тоҷикистон мегӯянд, дар як размоиши низомӣ аз паҳпод ё ҳавопаймоҳои бесарнишин васеъ истифода кардаанд.

Вазорати дифои Тоҷикистон хабар додааст, ки размоиши "Ҳамкорӣ-2026" “бо истифодаи васеи дастгоҳҳои парвозкунандаи бесарнишин" дар шароити кӯҳсор баргузор гардид.

Ин размоиш аз 6 то 10-уми апрел дар тамрингоҳи "Ҳарбмайдон"-и вилояти Хатлон гузашт ва дар он роҳҳои нобуд кардани гурӯҳҳои силоҳбадасти сарҳадшикан дар шароити кӯҳсор тамрин шудааст.

Дар гузориши расмии Вазорати мудофиа омадааст, дар ин тамрин ҳавопаймоҳои бесарнишин барои маълум кардани макони душмани шартӣ ва "разведкаи ҳавоӣ" истифода шудаанд. Маълум нест, ки ин ҳавопаймоҳои бесарнишин аз кадом намуд ҳастанд.

Соли гузашта мақомоти Тоҷикистон хабар дода буданд, ки дар як амалиёт бар зидди қочоқбарони афғонистонӣ аз ҳавопаймоҳои бесарнишин истифода шудааст.

Гузоришҳо аз хариди ҳавопаймоҳои бесарнишин барои артиши Тоҷикистон солҳои гузашта низ садо дода буд, аммо мақомот ҳеч гоҳ ин хабарҳоро расман тасдиқ ё рад накардаанд.

Аз ҷумла, соли 2022 як мансабдори Қирғизистон гуфта буд, бо вуҷуди мухолифати ин кишвар, Туркия чанд ҳавопаймои бесарнишини "Байрақдор"-ро ба Тоҷикистон додааст.

Соли 2024 Тоҷикистон ва Туркия созишномаеро имзо карданд, ки бар асоси он Душанбе метавонад аз корхонаҳои Туркия таҷҳизоти низомӣ, аз ҷумла дастгоҳҳои бесарнишин харидорӣ кунад.

Расонаҳои Эрон дар моҳи майи соли 2022 гузориш дода буданд, ки Теҳрон дар Тоҷикистон корхонаи тавлиди дрон ё ҳавопаймои бесарнишини "Абобил-2" кушодааст. Ҳарчанд дар бораи ин корхона дигар ҳеч гоҳ маълумоте нашр нашуд.

Порлумони Тоҷикистон ҳуҷҷатеро тасвиб кард, ки бар асоси он минбаъд ҳангоми ворид кардани сӯзишворӣ ба кишвар молиёт ё андози нав ситонида мешавад.

Бар асоси тағйирот ба қонун дар бораи пардохтҳои ҳатмӣ, минбаъд дар вақти овардани маҳсулоти нафтӣ ва гази табиӣ ба Тоҷикистон пардохти экологӣ бояд супорида шавад.

Маблағи ин навъ молиёт ҳанӯз маълум нест. Мақомот танҳо гуфтаанд, ин маблағро воридкунандагони мол месупоранд.

Феълан ҳангоми ворид кардан ба Тоҷикистон аз ҳар тонна маҳсулоти нафтӣ 70 евро андози аксиз ситонида мешавад.

Тоҷикистон қариб ҳамаи сӯзишвории мавриди ниёзашро аз Русия ва Қазоқистон ворид мекунад.

Ба иттилои дарёфтии Радиои Озодӣ, Додситонии кулли Тоҷикистон ба таҳқиқи марги як духтари 23-сола дар ноҳияи Дарвоз шуруъ кардааст.

Дар ҳоле ки мақомот шарҳу ҷузъиёт намедиҳанд, як манбаи боварбахши Радиои Озодӣ дар мақомоти тафтишотӣ 14-уми апрел гуфт, “ҷасади Меҳрона Ноибоваро рӯзи 7-уми апрел аз соҳили рӯди Панҷ ёфтанд”.

“Вай 3-юми апрел барои истироҳат аз ноҳияи Шоҳмансури шаҳри Душанбе ба ноҳияи Дарвоз рафта, нопадид шуда буд,” – афзуд мусоҳиби мо.

Ба қавли ин манбаъ дар мақомоти тафтишотӣ, ки номаш фош намешавад, Меҳрона Ноибова ҳамроҳи дӯстонаш, аз ҷумла ду маъмури Додситонии кул ба истироҳатгоҳи “Чорчаман”-и Дарвоз рафта будааст.

Вай афзуд: “Кормандони додситонӣ ба тафтишот гуфтаанд, ки сари Меҳрона ҳангоми тамошои рӯдхонаи Паткуноб чарх зад ва сипас ба об афтод.”

Ҳанӯз хулосаи Додситонии кулли Тоҷикистон маълум нест.

Талоши мо барои ёфтани наздикони Меҳрона Ноибова то ин дам бенатиҷа буд.

"Чорчаман" истироҳатгоҳи маъруф дар ноҳияи Дарвоз аст. Ҷараёни рӯдхонаи Паткуноб дар ин ноҳия тез аст ва аз миёни истироҳатгоҳи “Чорчаман” гузашта, ба дарёи Панҷ мепайвандад.

Омбудсмен ё Ваколатдори ҳуқуқи инсон дар Русия мегӯяд, барои интиқоли 200 зани маҳбус аз Русия ба Тоҷикистон ба раисҷумҳур Эмомалӣ Раҳмон муроҷиат карда, посухи мусбат гирифтааст.

Дар ин бора Татяна Москалкова дар суҳбат ба хабаргузории давлати ТАСС хабар додааст.

Маскалова аз ин бештар ҷузъиёт надодааст ва маълум нест, ки дархости ӯ ба Эмомалӣ Раҳмон кай ирсол шудааст? Мақомоти Тоҷикистон ҳам дар ин замина чизе нагуфтаанд.

Ваколатдори ҳуқуқи инсон дар Русия гуфтааст, занони маҳбуси хориҷӣ дар зиндонҳои Русия ба мушкилоти зиёд рӯбарӯ ҳастанд ва аз ҷумла наметавонанд саривақт хешовандони худро бинанд.

Омори занони маҳбус аз Тоҷикистон дар Русия дар манобеи боз дастрас нест.

Маъмурони гумрук дар фурудгоҳи Толмачевои шаҳри Новосибирск мардеро боздошт кардаанд, ки мехост зиёда аз 25 миллион рубл ё 313 ҳазор долларро ба шаҳри Душанбе биорад.

Мақомоти Русия аз ин фард ном набурда, танҳо гуфтаанд, ӯ шаҳрванди хориҷӣ ва 30-сола аст.

Ба иттилои Хадамоти гумруки Русия, ин нафар беш аз 25 миллион рублро дар шакли нақд дар ҷомадонаш ҷой дода, онҳоро дар эъломия ё декларатсия ворид накардааст.

Назари худи ӯ ба қазия маълум нест.

Гуфта мешавад, ки ин фард дар аввал интиқоли пули зиёдро рад карда, вале ҳангоми санҷиш онро эътироф кардааст.

Мақомоти Русия алайҳи ин шахс бо иттиҳоми қочоқи пули нақд ба миқдори калон, парвандаи ҷиноӣ боз карданд.

Ба гумонзад ҷаримаи калон ё зиндон таҳдид мекунад.

Мақомоти Тоҷикистон квотаро барои ҷалби нерӯи кории хориҷӣ дар соли 2026 тасдиқ карданд.

Бар асоси фармони раисҷумҳур Эмомалӣ Раҳмон, ки Радиои Озодӣ 14-уми апрел дид, имсол 5500 хориҷӣ бояд барои кор ба Тоҷикистон оварда шаванд.

Аз ин шумор 3400 ҷой барои чиниҳо, 520 ҷой барои шаҳрвандони Афғонистон, 400 квота барои эрониҳо ва боқӣ барои кишварҳои дигар пешбинӣ шудааст.

Дар фармони президент омадааст, ки коргарони хориҷӣ аз ҳама бештар барои кор дар соҳаҳои саноат ва сохтмон ҷалб карда мешаванд.

Бар асоси ин санад, бештари хориҷиҳо дар шаҳри Душанбе ва ноҳияи тобеи ҷумҳурӣ ба кор фаро гирифта мешаванд.

Ҳукумати Тоҷикистон ҳамасола барои ҷалби коргарони хориҷӣ квота таъйин мекунад.

Ин дар ҳолест, ки солона ҳудуди як миллион шаҳрванди Тоҷикистон дар ҷустуҷӯйи кору маоши муносиб барои кор ба Русия ва кишварҳои дигар мераванд.

Гурӯҳе аз коргарони чинӣ бо сабаби пардохт нашудани ҳаққи корашон дар шаҳри Комсомоли лаби Амури Русия даст ба эътироз заданд.

Бахши русии Радиои Озодӣ навишт, беш аз сад коргари чинӣ рӯзи 12-уми апрел бо навиштаҳое бо забони русӣ ва чинӣ дар кӯчаҳои шаҳр раҳпаймоӣ карданд.

Онҳо дар муроҷиати худ аз президенти Русия Владимир Путин ва раҳбари ширкати “Роснефт” Игор Сечин талаб кардаанд, ки ҳаққи корашон пардохт шавад.

Эътирозгарон гуфтанд, коргари ширкати "Петро-Хэхуа"-и ҳамкори “Роснефт” мебошанд. Дмитрий Заплутаев, шаҳрдори Комсомоли лаби Амур гуфт, мақсади эътирозгарон ҷалби таваҷҷӯҳ ба мушкилашон буда, аз рӯи ин қазия додситонӣ санҷишро шуруъ намуд.

Эътирозгаронро боздошт накарданд.

Дертар ҳукумати вилояти Хабаровск гуфт, коргарон аз он норозӣ ҳастанд, ки корфармо бо онҳо қарордодро қатъ намуд. Мақомот гуфтанд, мушкил дар мӯҳлати иҷрои кор ва сифати он буд.

Дар айни замон "Роснефт" гуфт, ки ба ҳайси ширкати фармоишгар саривақт тамоми маблағро пардохт кардааст ва мушкили напардохтани маош дар масъулияти "Петро-Хэхуа" мебошад.

Намояндагони мақомоти маҳаллӣ бо коргарони чинӣ ва раҳбарияти корхона гуфтушунид карда, барои ҳалли масъала Вазорати корҳои хориҷии Русия ва консулгарии генералии Чин ҷалб шудаанд. Раиси ширкати "Петро-Хэхуа" бо сабаби дар хориҷ аз Русия буданаш натавонистааст бо кормандон мулоқот кунад.

Мақомоти минтақа гуфтаанд, ки метавонанд аз ҳисоби худ ба кормандони чинӣ барои бозгашт ба ватанашон мусоидат кунанд, вале ин ҷараён бояд бо ташаббуси кордиҳанда ба роҳ монда шавад.

Соли 2021 ҳам коргарони чинӣ дар шаҳри Комсомоли лаби Амур як чунин эътирозеро бо далели пардохт нашудани маош баргузор карда буданд.

Соати даҳи 13-уми апрел ба вақти шарқии Иёлоти Муттаҳида (соати даҳи шаб ба вақти Тоҷикистон). Замонеро, ки Фармондеҳии Марказии Амрико ё СЕНТКОМ барои оғози муҳосираи бандарҳои Эрон дар атрофи гулӯгоҳи Ҳурмуз эълон карда буд, фаро расид.

Доналд Трамп, раисҷумҳури Амрико, 13-уми апрел дар шабакаи Truth Social таҳдид кард, ки "ҳар қаиқи таҳоҷумии тезрав аз тарафи Эрон ба хати муҳосираи мо наздик шавад, билофосила нобуд хоҳад шуд."

Ӯ дар паёми нави худ ишора кардааст, ки артиши Амрико барои ин кор аз ҳамон тарзе истифода хоҳад кард, ки алайҳи қочоқчиёни маводи мухаддир дар дарё истифода мекунад.

Раисҷумҳури Амрико паёми худро бо ишора ба нобудии комили нерӯи дарёии Эрон оғоз кардааст: "Нерӯи дарёии Эрон алъон дар қаъри дарё хобидааст – комилан нобуд шудааст – 158 киштӣ."

Вай сипас идома додааст, ки Амрико танҳо чизе, ки аз нерӯи дарёии Эрон ҳадаф нагирифта буд, "ҳамин қаиқҳои таҳоҷумии тезрав" аст, чун онҳоро таҳдиди бузурге дар назар нагирифтааст.

Вазорати корҳои дохилии Қирғизистон Даниэл Рисалиев, муовини пешини раиси КДАМ ё Кумитаи давлатии амнияти миллии ин кишварро дастгир кардааст.

Бахши қирғизии Радиои Озодӣ дар ин бора рӯзи 13-уми апрел бо такя ба манбаъҳои худ хабар дод.

Ба иттилои манобеъ, маъмурони милиса ӯро дар вилояти Иссиқкӯл боздошт кардаанд.

Вазорати корҳои дохилии Қирғизистон ҳанӯз шарҳе надодааст.

Ҳамзамон иттиҳоми зидди ӯ рӯшан нест.

Даниэл Рисалиев дар моҳи декабри соли 2025 муовини раиси КДАМ-и Қирғизистон таъйин шуд. Вай раёсати Маркази ҳамоҳангсозӣ барои таъмини амнияти сайберӣ ё кибернетикиро бар уҳда дошт.

Пас аз 10-уми феврали имсол ва баъди барканории Қамчибек Тошиев аз мансаби раиси КДАМ-и Қирғизистон, муовинони ӯ, аз ҷумла Даниэл Рисалев низ аз мақомҳои худ ронда шуданд.

Леои шонздаҳум, поп ё раҳбари 1,4 миллиард католики ҷаҳон, гуфт, ба мухолифаташ ба ҷанг идома медиҳад.

Изҳороти ӯ дар вокуниш ба танқиди Доналд Трамп, раисҷумҳури Амрико садо дод.

Ӯ 13-уми апрел ҳангоми сафараш ба Алҷазоир дар мусоҳиба бо хабаргузории “Рейтерс” гуфт, “ман ба зидди ҷанг садо баланд хоҳам кард.”

“Имрӯз дар ҷаҳон одамони зиёд ранҷ мекашанд. Бисёре аз одамони бегуноҳ кушта мешаванд. Ба назари ман, касе бояд бархезаду бигӯяд, ки роҳи беҳтаре ҳам ҳаст,” – афзуд раҳбари католикҳои ҷаҳон.

Доналд Трамп, раисҷумҳури Амрико, рӯзи 12-уми апрел поп Леоро барои мавзеъгирии Ватикан дар мавриди ҷанг бо Эрон танқид карда, гуфт, попи Рум “бо кишваре бозӣ мекунад, ки мехоҳад силоҳи ҳастаӣ дошта бошад.”

Попи Рум пештар ҳамлаҳои Иёлоти Муттаҳида ва Исроилро ба Эрон маҳкум карда буд.

Нахуствазири Бритониё гуфт, кишвараш аз тасмими Амрико барои муҳосираи бандарҳои Эрон пуштибонӣ нахоҳад кард.

Кейр Стармер афзуд, тамаркузи онҳо бештар ба он равона шудааст, ки гулӯгоҳи муҳими Ҳурмуз “пурра боз” бошад.

Вай рӯзи 13-уми апрел дар суҳбат бо радиои Би-би-сӣ гуфт, “муҳим аст, ки гулӯгоҳ комилан боз бошад ва ҳамаи талошҳои худро ба ҳамин равона кардаем ва минбаъд низ чунин хоҳем кард.”

Доналд Трамп, раисҷумҳури Амрико, гуфт, нерӯҳои кишвараш аз соати даҳи сездаҳуми апрел ба вақти шарқии Иёлоти Муттаҳида (соати даҳи шаб ба вақти Тоҷикистон) муҳосираи гулӯгоҳи Ҳурмузро оғоз мекунанд.

“Дигар миллатҳо низ дар ин самт кор мекунанд ва Эрон имкон нахоҳад дошт, ки нафт фурӯшад," – афзуд ӯ. Ба қавли Трамп, сарфи назар аз нокомии музокироти Амрикову Эрон дар Исломободи Покистон, оташбаси дуҳафтаина побарҷост.

Ситоди марказии нерӯҳои мусаллаҳи Амрико, ки раҳбарии амалиёт дар Ховари Миёнаро бар ӯҳда дорад, иброз доштааст, ки муҳосира танҳо ба киштиҳое дахл дорад, ки озими бандарҳои эронӣ ҳастанд ё аз бандарҳои Ҷумҳурии Исломӣ берун мешаванд.

Тибқи омори расмӣ, рӯзи шанбе се киштии саршор аз нафт гулӯгоҳи Ҳурмузро гзаштанд, вале рӯзи душанбе дар остонаи муҳосираи амрикоӣ ҳаракати киштиҳо дар ин гузаргоҳ мушоҳида намешуд.

Аз замони оғози низоъ дар Ховари Миёна, Эрон равуои киштиҳоро дар гулӯгоҳи Ҳурмуз манъ намуда, сабабгори боло рафтани нархи нафт дар саросари олам шуд. Ҳамзамон Теҳрон эълон кардааст, ки барои гузаштан аз Ҳурмуз аз киштиҳо ҳақ хоҳад ситонд.

Гуфтушуниди миёни Амрико ва Эрон рӯзи 12-уми апрел дар Исломобод бе даст ёфтан ба созиш поён ёфт. Ҳайати амрикоӣ гуфт, ҷониби эронӣ баъзе аз шартҳои онҳоро напазируфтааст. Эрон мегӯяд, “дипломатия ҳеч вақт тамом намешавад”. Ҷониби Покистон аз тарафҳо хост, ба оташбас пойбанд бимонанд.

Артиши Иёлоти Муттаҳида аз рӯзи душанбеи 13-уми апрел муҳосираи дарёии киштиҳоеро оғоз мекунад, ки ба самти бандарҳои Эрон мераванд ё аз онҷо хориҷ мешаванд.

Фармондеҳи марказии Иёлоти Муттаҳида (СЕНТКОМ) эълон кард, ки муҳосираи киштиҳо аз соати 17:30 ба вақти Теҳрон оғоз мешавад.

Фармондеҳии марказии Амрико навиштааст, "ин муҳосира бидуни ҳеҷ табъиз (фарқгузорӣ)" нисбати ҳама киштиҳое татбиқ мешавад, ки вориди бандарҳои Эрон мешаванд ё аз онҷо хориҷ мешаванд.

Ин хабар дар ҳоле эълон мешавад, ки ахиран Доналд Трамп раисҷумҳури Амрико эълон кард, дар пайи ба натиҷа нарасидани музокирот бо Эрон, нерӯҳои баҳрии ИМА билофосила муҳосираи тангаи Ҳурмузро оғоз хоҳад кард.

Раисҷумҳури Амрико ваъда додааст, ки ин кишвар минаҳои гузошташуда тавассути Эронро нобуд кунад ва афзуд, "ҳар эронӣ, ки ба тарафи мо ё ба самти киштиҳои ғайринизомӣ тирандозӣ кунад, нобуд хоҳад шуд". Мақомоти Эрон то кунун ба ин изҳороти Трамп вокуниш нишон надодаанд.

Баъди ҳамлаи Амрико ва Исроил ба Эрон дар таърихи 28 феврал, Теҳрон равуо аз тариқи Тангаи Ҳурмузро амалан бастааст.

Оҷонсии зидди фасоди Тоҷикистон аз боздошти як афсари Комиссариати ҳарбии ноҳияи Ҷаббор Расулов хабар додааст.

Ба иттилои ин ниҳод, Сатторзода А "барои ба таъхир гузоштани муҳлати даъват" ва нагузаронидани як даъватшаванда аз комиссияи ҳарбӣ-тиббӣ, аз наздикони ӯ 15 ҳазор сомонӣ гирифтааст.

Мақомот гуфтанд, ин афсар бо сӯистифода аз мақоми хизматиаш ин маблағро гирифта, "ба манфиати шахсиаш сарф намуд". Назари Сатторзода А. ва наздиконаш ба иттиҳом маълум нест. Рӯшан нест, ки ин афсар дар додгоҳ то куҷо ба гуноҳи худ иқрор кардааст.

Боздошти ин корманди комиссариат дар ҳолест, ки дар Тоҷикистон даъвати баҳории ҷавонон ба артиш идома дорад.

Ин бори аввал нест, ки кормандони комиссариати ҳарбӣ, ки масъули даъвати ҷавонон ба артиш ҳастанд, бо иттиҳоми гирифтани пора дастгир мешаванд.