Пайвандҳои дастрасӣ

Хабари нав

Хабарҳо

Чӯҷаро омор дар тирамоҳ мешуморад

Мерган Шаҳбозов, раиси Кумитаи давлатии омори Тоҷикистон рӯзи 25 октябр зимни як нишасти хабарӣ гуфт, зарфи 9 моҳи аввали соли равон дар тавлиди маҳсулоти дохилӣ назар ба ҳамин давраи соли гузашта танҳо панҷ дарсад афзоиш мушоҳида шудааст. Агарчанд ин фоизи қобили мулоҳизае нест, аммо ба гуфтаи оқои Шаҳбозов, боз ҳам дарак медиҳад, ки иқтисоди кишвар дар як ҷой шах нашудааст. Ба ҳар ҳол, мегӯяд раиси кумитаи омори Тоҷикистон, тавозуни тиҷорати хориҷӣ дар кишвар тайи ин 9 моҳ манфӣ будааст. Оқои Мерганов мегӯяд, воридоти мол назар ба содирот афзун мебошад, ки ин ба рушди иқтисоди миллӣ мусоидат намекунад: "Баланси савдо манфӣ буда, 302 миллион долларро ташкил кард. Ин чунин маънӣ дорад, ки молу маҳсулот дар бозорҳои Тоҷикистон аз хориҷ ворид мешавад ва барои харидории ин молу коло асъори хориҷии Тоҷикистон ба хориҷ меравад."

Мизони тиҷорати хориҷии Тоҷикистон дар 9 моҳ 1 милиарду 500 миллион долларро ташкил додаст. Шарикони аслии тиҷоратии Тоҷикистон, назар ба маълумоти оморӣ, ҳамчунон Ҳолланду Русия, Эрону Чин ва Узбакистон боқӣ мондаанд. Оқои Шаҳбозов гуфт, дар ин миён Чин ва Эрон ба гунаи қобили мулоҳизае вориди бозорҳои Тоҷикистон гаштаанд: "75 фоизи молҳо аз Чин ворид мешаванд ва тамоми маҳсулоти ғизоие, ки дар бозорҳои Тоҷикистон ба фурӯш рафта истодааст, тавлидоти Эрон аст. Ҳол он ки заминҳои барои киштукори шолӣ мавҷуд дар Тоҷикистон ва ҳосили ғаллае, ки имсол ба даст омад, метавонанд 65-70 дарсади мардуми кишварро бо ин ду навъи маҳсулот таъмин кунанд."

Ба гуфтаи раиси кумитаи омори Тоҷикистон, дар ин миён 25 дарсади корхонаҳо ба далоили мухталиф аз кор боз монда, вале тавлидоти бархе фаровардахои дохилӣ, аз ҷумла гандум, картошка, шир, гӯшт ва ғайра афзоиш нишон додааст. Ҳамчунин дар Тоҷикистон сафи истифодакунандагони интернет се баробар афзуда ва шумори касоне, ки телефони ҳамроҳ (мобайл) доранд, ба 350 ҳазор нафар расидааст.
Раҳматкарими Давлат, Душанбе

Ҳамаи хабарҳои имрӯзро дар инҷо бихонед

Дар Турқузободи Эрон "зарраҳои ураниюм"-ро ёфтаанд

Акс аз бойгонӣ

Дидбони ҳастаии Созмони Милали Муттаҳид мегӯянд, нозирони он дар як маҳалли эълоннашуда дар Эрон “зарраҳои табиии урани пайдошуда аз антропоген”-ро ёфтаанд.

Хабаргузориҳои ғарбӣ рӯзи 11-уми ноябр дидаанд, ки Оҷонси байналмилалии энержии атомӣ (МАГАТЭ) ин маҳалро дар гузориши пинҳонии семоҳаи худ, ки ба кишварҳои узв мефиристад, нишон надодааст.

Исроил Эронро айбдор кардааст, ки дар макони эълоннашуда, ноҳияи Турқузобод дар канораи Теҳрон, фаъолиятҳои ҳастаӣ мекунад.

Дар гузориши Оҷонси байналмилалии энержии атомӣ ҳамчунин гуфта шудааст, ки захираҳои урани камғанишуда бо вуҷуди вайрон кардани созишномаи ҳастаии соли 2015 бо қудратҳои ҷаҳонӣ афзоиш ёфта ва тасдиқ мекунад, кишвар ҳоло уранро дар коргоҳи ҳастаии худ Фордов бой мекунад. Он ҳам аз рӯи шартномаи ҳастаӣ манъ карда шудааст.

Тибқи гузориш, Эрон ҳар моҳ баровардани уранро то 100 кило афзоиш медиҳад ва ин нишондод аз соли пеш дида 4 кило зиёдтар аст.

Теҳрон оҳиста-оҳиста баъзе аз ӯҳдадориҳои худро аз рӯи созишномаи ҳастаӣ кам кард, зеро Иёлоти Муттаҳида моҳи майи 2018 аз созишномае, ки ба Эрон дастрасиро ба тиҷорати ҷаҳонӣ ба ҷойи пешгирӣ аз барномаи ҳастаиаш фароҳам оварда буд, берун шуд ва ба Эрон таҳримҳои сахт ҷорӣ кард.

Президенти Тоҷикистон дар Форуми сулҳи Порис бо дабири кулли СММ вохӯрд

Раиси ҷумҳури Тоҷикистон дар Форуми сулҳи Порис иштирок кардааст. Форуми Порис, ки рӯзи 12-уми ноябр оғоз шуд, иттиҳодияи мустақил ва ғайритиҷоратӣ мебошад. Ин форум ҳамасола баргузор мешавад ва ҳадафи он дарёфти роҳҳои ҳалли коҳиши ташаннуҷҳо, таҳкими сулҳ, мубориза бо тағйирёбии иқлим, ҳалли мушкилоти фаромарзӣ, мудирияти муштараки мероси фарҳангии ҷаҳонӣ ва муқовимат бо қаллобии иттилоотӣ ва дигар мавзуъҳо мебошад.

Тибқи иттилои дафтари матбуоти раёсати ҷумҳури Тоҷикистон, дар ҳошияи ин ҳамоиш, оқои Раҳмон бо дабири кулли СММ Антониу Гуттериш, президенти Форуми сулҳи Порис Паскал Ламӣ, раиси ҷумҳури Фаронса Эммануэл Макрон, президенти Кипр Никос Анастасиадес, президенти Комиссияи Аврупо Урсула фон дер Ляйн мулоқот кардааст.

Раиси ҷумҳури Тоҷикистон аз 9 рӯз ба ин тараф дар сафари аврупоӣ қарор дорад. Сафари ӯ рӯз 4-уми ноябр аз Швейтсария оғоз шуд ва баъдан дар Фаронса идома кард.

Дар остонаи дидори раиси ҷумҳури Фаронса бо Эмомалӣ Раҳмон, дастикам ду созмони муътабари дифоъ аз ҳуқуқи башар ва озодии матбуот аз Эммануел Макрон хоста буданд, ки ба масъалаи саркӯбу ҳабси мунтақидон, шиканҷа, маҳдудияти озодии баён ва маргумири боздоштшудаҳо дар Тоҷикистон "чашм напӯшад".

Ҳамчунин гуруҳе аз мухолифони тоҷик, бо шумули намояндагони "Паймони Миллӣ", ки дар Тоҷикистон бар асоси қарори додгоҳ мамнуъ ва ифротӣ эълон шудаанд, рӯзи 8-уми ноябр дар Париж таҷаммӯи эътирозӣ баргузор карданд. Онҳо озодии маҳбусони сиёсӣ, хатми шиканҷа дар зиндонҳо ва баргузории интихоботҳои озоду шаффофро талаб карданд.

Сарони кишварҳои узви СПАД дар Қирғизистон ҷамъ меоянд

Президентҳои кишварҳои узви СПАД - Созмони паймони амнияти дастаҷамъӣ рӯзи 28 ноябр дар Қирғизистон гирди ҳам меоянд. Дар ин бора аз маркази матбуотии президенти Қирғизистон хабар доданд.

Сооронбой Ҷеенбеков, президенти Қирғизистон бо вазири корҳои хориҷиаш Чингиз Айдарбеков омодагӣ ба баргузории ҷаласаи Шӯрои СПАД-ро баррасӣ кард.

Қарор аст, ҳамчунин президенти Қазоқистон Қосимҷомарт Тоқаев рӯзи 27 ноябр ба Қирғизистон сафари давлатӣ анҷом диҳад. Рӯзи 28 ноябр ҷаласаи Шӯрои СПАД баргузор ва дар он роҳбарони Белорус, Қазоқистон, Русия, Тоҷикистон ва сарвазири Арманистон ширкат хоҳанд кард.

СПАД дар соли 1992 таъсис шуда, айни ҳол Қирғизистон, Қазоқистон, Русия, Тоҷикистон ва Белорус аъзои он ҳастанд. СПАД бо ҳадафи "тақвияти сулҳ, амнияту устуворӣ дар минтақа ва ҷаҳон, ҳифзи дастаҷамъии истиқлол, ягонагии марзӣ ва тамомияти арзии кишварҳои узв таъсис шудааст".

Пулҷамъкунӣ аз буҷавиҳои Туркманистон барои Рӯзи бетарафӣ

Кормандони муассисаҳои давлатии Туркманистонро вазифадор карданд, ки барои ҷашни Бетарафии Давлатӣ маблағ ҷамъ оваранд.

"Дар муассисаҳои тиббӣ, мактабҳо, боғчаҳо пулҷамъкунӣ шуруъ шудааст. Фаразан маоши ҳамшираҳои шавқат 1000 манат бошад, аз онҳо талаб мешавад, ки 2000 манат ҷамъ оранд. Кормандони боғча, ки маошашон 600 манат аст, аз онҳо талаб шудааст, ки 1000 манат пардохт кунанд. Ҳама ҷо ҳар гуна аст",-гуфт хабарнигори бахши туркмании Радиои Озодӣ.

Бонки марказии Туркманистон арзиши 1 доллари ИМА-ро 3,5 манат муқаррар кардааст. Маоши миёна дар он кишвар аз рӯи қурби расмӣ 228 долларро ташкил медиҳад.

Кормандони муассисаҳои давлатӣ хабар доданд, ки бахшида ба рӯзи ҷашн дар кишвар мусобиқаи дучархаронӣ баргузор мешавад. "Мегӯянд, бояд дучархаҳои нав харида шавад ва ҷашн дар сатҳи зарурӣ баргузор гардад",-гуфт як корманди муассисаи давлатӣ дар суҳбат бо хабарнигор.

Дар Туркманистон Рӯзи бетарафӣ 12 декабр таҷлил мешавад. Аммо барои ҷашнҳо, аз ҷумла харидани дучарха дар он кишвар дар сол чанд маротиба аз кормандони буҷавӣ маблағ ҷамъ меоранд.

Бори охир дар моҳи сентябри соли ҷорӣ дар вилоятҳои Марӣ ва Лебап аз кормандони буҷавӣ барои харидани дучарха маблағ ҷамъ оварда буданд.

Эрон ғанисозии уранро дар корхонаи зеризаминӣ оғоз кард

Оҷонси Байналмилалии Энержии Атомӣ (МАГАТЭ) гуфт, оғози ғанисозии уран дар корхонаи зеризаминии Фордуи Эрон бар хилофи созишномаи Теҳрон бо абарқудратҳои ҷаҳон аст. Дар қароргоҳи созмон дар Вена гуфтанд, ки захираи урани ғанишудаи Эрон меафзояд.

Хабаргузории Reuters гуфт, мавқеи Эрон хилофи маҳдудиятҳое аст, ки дар доираи созишномаи байналмилалии соли 2015 ҷорӣ шуда буд.

Мақомоти Эрон ғанӣ сохтани уранро дар посух ба бурунрафти ИМА аз созишномаи ҳастаӣ дубора оғоз карданд. Ин созишномаро панҷ узви доимии СММ - Русия, ИМА, Чин, Бритониё, Фаронса ва ҳамчунин Олмон имзо карда буданд. Мақомоти Теҳрон мегӯянд, омодаанд, ба иҷрои уҳдадориҳои худ баргарданд, агар Вашингтон таҳримҳоеро бекор кунад, ки пас аз бурунрафти ИМА аз созишнома ҷорӣ шудаанд.

Миллей: "Сарбозони Амрико чанд соли дигар дар Афғонистон мемонанд"

Марк Миллей.

Генерал Марк Миллей, раиси ситоди муштараки нерӯҳои мусаллаҳи Амрико гуфт, шояд сарбозони кишвараш то чанд соли дигар дар Афғонистон бимонанд. Нерӯҳои Амрико 18 сол аст, ки дар ин ҳамсоякишвари Тоҷикистон ҳузур доранд.

Дар мусоҳибае бо телевизиони ABC, ки рӯзи 10-уми ноябр нашр шуд, Марк Миллей гуфт, баъди ҳамлаҳои террористии соли 2001, ҳадафи аслии рафтани сарбозони Амрико ба Афғонистон, тазмин додани он буд, ки ин кишвар дигар ба пойгоҳи террористоне табдил наёбад, ки мехоҳанд, ба Амрико ҳамла кунанд. Вай афзуд: “Ин маъмурияти мо ҳанӯз поён наёфтааст. Маъмурияти мо замоне муввафақ мешавад, ки ҳукумати Афғонистон, нерӯҳои амниятии афғон тавоноии онро дошта бошанд, ки имкон надиҳанд, террористони қаламрави онҳоро барои ҳамла ба дигар кишварҳо ва бахусус Иёлоти Муттаҳида истифода баранд.”

Айни замон дар Афғонистон 14 ҳазор сарбози амрикоӣ ва ҳазорон низомӣ аз кишварҳои аврупоӣ ҳастанд, ки зери раҳбарии НАТО дар таъмини амният ва тақвияти артиши Афғонистон кумак мекунанд. Раиси ҷумҳур Доналд Трамп гуфтааст, фурсати он расидааст, ки нерӯҳояшро аз кишварҳои гирифтори муноқиша дар саросари ҷаҳон берун кашад.

Дар як рӯз дар Панҷоб 9 нафарро куштанд

Панҷоб дар гузашта ҳам шоҳиди ҳамлаву бомбгузорӣ шудааст. Акс аз бойгонӣ

Дар ҳамлаи ғофилгирона ба як мошини пулис дар вилояти Панҷоби Покистон 5 нафар кушта шудаанд. Мақомоти расмӣ гуфтанд, ки ҳамла рӯзи 10-уми ноябр дар ноҳияи Раҷанпур сурат гирифтааст. Ба қавли онҳо, маъмурони амниятӣ ва пулис ҳангоми талош барои боздошти гурӯҳе аз тундравон дар маҳаллаи Арбӣ Тибба мавриди ҳамлаи афроди мусаллаҳ қарор гирифтаанд.

Калим Қурайшӣ, сухангӯи пулис ба хабаргузории “Ассосиэйтед Пресс” гуфтааст, ки дар байни қурбониён ду афсари пулис, ду маъмури амниятӣ ва як ҳамкорашон буданд. То кунун касе масъулияти ҳамларо бар дӯш нагирифтааст. Дар як ҳамлаи дигари афроди мотосиклсавор дар посгоҳе дар шаҳри Дараи Ғозихон дар вилояти Панҷоб чаҳор нафар аз ҷумла як афсари пулис кушта шудаанд.

FT: Хешу наздикони Башор Асад дар Маскав 20 хона харидаанд

Маркази тиҷоратии байнулмилалии "Москва-Сити"

Хешу наздикони президенти Сурия Башор Асад дар маҷмаъҳои маскунии маркази тиҷоратии "Москва-Сити" на камтар аз 19 хонаро харидаанд. Дар ин бора нашрияи Financial Times бо такия ба ҳуҷҷатҳое хабар додааст, ки созмони ғайридавлатии зидди фасод Global Witness ба даст овардааст. Моликияти авлодии раҳбари Сурия дар Маскав ба сурати умум 40 миллион доллар баровард шудааст.

Бино бар ин аснод, аҳли хонадони тағо ё бародари модари Башор Асад – Муҳаммад Махлуф - аз соли 2013 ба харидани хонаҳо дар Маскав машғуланд. 13 воҳиди маскунӣ моликияти писартағои президенти Сурия Ҳафиз Махлуф ё ширкатҳои зери назорати ӯст. Ду манзили гаронбаҳо ба ҳамсари писартағои дувумии Асад — тоҷири бонуфузи Сурия Рами Махлуф тааллуқ доранд. Боз се иншооти дигар дар осмонхарошҳои Маскав аз тарафи бародарони Махлуф харида шудаанд. Ба қавли нашрия, ба камияш чаҳор воҳид ҳамчун хонаҳои истиқоматӣ истифода мешаванд.

Ҳама онҳо, ки соҳиби моликият дар Маскаванд, таҳти таҳримҳои байнулмилалӣ қарор доранд. Аммо барои ин муомилаҳо аз ширкатҳои офшор истифода шудааст. Ба навиштаи Financial Times, расман ин моликият ба чанд ширкати офшории лубнонӣ тааллуқ доранд. Намояндагони ин ширкатҳо аз посух додан ба хабарнигор худдорӣ намуданд.

Ба огаҳии Global Witness, ба камияш яке аз ширкатҳо бо кумаки Сбербанки Русия ин додуситадҳоро анҷом додааст. Гумон меравад, ин танҳо бахши кучаке аз ҳамкории бонкҳои Русия бо хонадони Асад бошад. Дар солҳои 2012 ва 2013 Reuters ва Wall Street Journal хабар дода буданд, ки режими Асад дар ду бонки асосии Русия- Газпромбонк ва ВТБ ҳисоб боз кардааст.

Лаҳистон дархости истирдоди Мазурро баррасӣ мекунад

Игор Мазур

Дар Лаҳистон муҳокимаи Игор Мазур як шаҳрванди Украина оғоз меёбад, ки бо дархости Русия ва бо иттиҳоми терроризм дастгир шудааст. Дар ин бора Артём Валах, консули Украина дар шаҳри Люблин рӯзи 10-уми ноябр ба расонаҳои украинӣ хабар додааст.

Игор Мазур, яке аз раҳбарони баландпояи гуруҳи миллатгарои УНА-УНСО аст ва Русия мегӯяд, ки ӯ дар ҷангҳои солҳои 90-ум дар Чеченистон ба зидди нерӯҳои Русия ҷангидааст. Мақомоти интизомии Маскав ӯро ба терроризм муттаҳам кардаанд ва аз Интерпол ҳам хостаанд, ки дар дастгир кардани Игор Мазур мусоидат кунад. Ӯро бар асоси ҳамин дархост рӯзи 9-уми ноябр дар гузаргоҳи Дороҳуск-Ягодин дар марзи Украинаву Лаҳистон дастгир карданд.

Мазур узви ду гурӯҳи украинӣ аст, ки Русия онҳоро гуруҳҳои ифротӣ мешуморад. Ӯ барои ширкат дар як конфронс ба Варшава мерафт, вале ӯро ба шаҳри Холм бурданд. Додситонҳои Лаҳистон ӯро се соат бозпурсӣ карда ва дар ивази васиқа ба консулгарии Украина дар шаҳри Люблин супоридаанд. Артём Валах гуфтааст, азбаски 11-уми ноябр дар Лаҳистон рӯзи истироҳат аст, муҳокимаи Игор Мазур ва баррасии дархост барои истирдоди ӯ ба Русия рӯзи 12-уми ноябр баргузор мешавад.

Раиси ҷумҳури феълии Руминия пешсафи интихобот

Клаус Ёҳаннис дар байн

Клаус Ёҳаннис, раиси ҷумҳури феълии Руминия, дар даври аввали интихоботи раёсати ҷумҳурӣ раъйи бештари мардумро ба даст овардааст. Бар асоси натиҷаҳои пешакӣ, ки Кумиссиёни Марказии Интихоботи Руминия эълон кард, Клаус Ёҳаннис, сиёсатмадори ғарбгаро ва раиси Ҳизби Миллии Либералӣ тақрибан 38 дар сади раъйи мардумро соҳиб шудааст.

Ба тарафдории рақиби ӯ Виорика Данчила, нахуствазири барканоршуда фақат 23 дар сад раъй додаанд. Ҳарду дар даври дуввуми интихобот бо ҳам рақобат мекунанд. Дар интихобот аз миёни 18 миллион мардуми дорои ҳаққи раъй фақат 48 дар сад ширкат кардаанд. Дан Барна, раиси саввумин ҳизби бузурги Руминия бо номи Ҳифзи Ваҳдати Руминия дар интихобот фақат 15 дар сади мардум раъй додаанд, ки натиҷаҳои маъюскунандае барои ҳизб ҳисоб мешавад.

Дар интихоботи вакилон барои Порлумони Аврупо ин ҳизб 22 дар сади мардум раъй дода буданд. Баръакси раъйдиҳандагон дар дохили кишвар, шаҳрвандони муқими хориҷ дар интихобот ширкати фаъол доштаанд ва 675 ҳазор нафар раъй додаанд. Натиҷаҳои ниҳоии интихобот то чанд рӯзи дигар эълон мешавад.

Мақоми нави домоди хурдии президенти Узбекистон

Отабек Умаров, домоди хурдии президенти Узбекистон Шавкат Мирзиёев президенти Федератсияи муҳорибаҳои омехта (ММА) таъйин шуд. Худи федератсия 8 ноябри соли равон таъсис ёфт.

Ба иттилои расонаҳои маҳаллӣ, Умаров бо варзишгарон мулоқот карда, ҳамроҳашон тамринеро низ анҷом додааст.

Ёдрас мешавем, ибтидои соли равон варзишгари маъруфи доғистонӣ дар риштаи муҳорибаҳои омехта Ҳабиб Нурмагомедов иттилоъ дод, ки мехоҳад, дар Узбекистон академияи ин навъи варзишро боз кунад.

Домоди хурдии Мирзиёев ҳамзамон муовини аввали раиси Хадамоти амнияти президенти Узбекистон низ ҳаст.

Комиссия бе барқ мондани шаҳри Нурсултонро тафтиш мекунад

Баъди садамаи шоми якшанбе дар хатҳои барқи шаҳри Нурсултони Қазоқистон қисме аз манзилҳои истиқоматӣ ва биноҳои маъмурии ин шаҳр бе барқ монданд. Субҳи рӯзи 11 ноябр ҳукумати шаҳри Нурсултон хабар дод, ки дар манзили сокинон ва биноҳои маъмурӣ барқ дубора барқарор шудааст.

Шоми якшанбе сокинони Нурсултон аз бебарқии қисме аз шаҳр ва фаъол набудани чароғакҳои роҳнамо шикоят карданд. Алтай Кулгинов, шаҳрдори Нурсултон тариқи шабакаҳои иҷтимоӣ хабар дод, ки бартарафсозии оқибати садама идома дорад.

Берик Курмангулӣ, сухангӯи президенти Қазоқистон субҳи рӯзи душанбе хабар дод, ки дар робита ба садама дар хатҳои барқ президенти Қазоқистон дастур додааст, ки комиссияи махсус ин ҳолатро санҷад.

"Санҷиши ҷиддӣ бояд анҷом ва гунаҳкорон пайдо шаванд ва дар сурати зарурат парванда бояд ба мақомоти ҳифзи ҳуқуқ ирсол шавад",-хабар дод Курмангулӣ аз қавли Қосимҷомарт Тоқаев, президенти Қазоқистон.

Миёнаҳои моҳи июл дар шаҳри Алматои Қазоқистон низ чанде аз ноҳияҳои шаҳр давоми чанд соат бе барқ монда буданд. Бебарқӣ дар шаҳри Алмато боиси танбашавии роҳҳо гардид ва метро низ аз кор монда буд.

Дар Туркия соҳибкори қирғиз Айэркен Саймаитиро куштанд

Соҳибкор Айэркен Саймаитӣ, ки номаш дар таҳқиқоти бахши қирғизии Радиои Озодӣ дар бораи берун бурдани миллионҳо доллар аз Қирғизистон зикр гашта буд, дар Туркия кушта шуд.

Ба иттилои нашрияи туркии "Hürriyet", шахси номаълуме 10 ноябр соҳибкори қирғизро дар меҳмонсарое дар минтақаи Фотеҳи шаҳри Истамбул парондааст. Соҳибкор дар беморхона ҷон додааст. Додситонии Туркия тафтиши ҳодисаро оғоз кардааст.

Бахши қирғизии Радиои Озодӣ 29 майи соли равон таҳқиқоти рӯзноманигор Алӣ Тоқтакуновро зери унвони "Аз пайи миллионҳо доллари аз Қирғизистон бурдашуда" нашр кард, ки бар асоси он, тайи солҳои 2011- 2017 ҳудуди 700 млн доллар ба воситаи бонкҳои гуногун ба кишварҳои хориҷ, аз ҷумла ИМА ва Ҳонгконг интиқол дода шудааст.

Расидҳои бонкӣ нишон медиҳанд, ки соҳибкор Айэркин Саймаитӣ ҷамъан ба 13 кишвар, аз ҷумла Туркия, Бритониё, АМА, Олмон ва Русия садҳо миллион доллар фиристодааст. Худи Саймаитӣ солҳои 2015-2017 аз Туркия бо номи ҳамсараш ба ҳисоби бунёди хайрияи ба номи Исмоил Матраимов дар Қирғизистон $2 338 700 гузарондааст.

Ин бунёд ба номи Руслан Матраимов -- бародари хурдии муовини пешини раиси Хадамоти гумруки Қирғизистон Райимбек Матраимов сабти ном аст. Худи ӯ дар суҳбат бо радио гуфт, ки Саймаитӣ ва ҳамсарашро намешиносад ва аз онҳо пуле ҳам дарёфт накардааст. Бунёди "Исмоил Матраимов" солҳои ахир чорабиниҳои варзишиеро бо иштироки мансабдорони баландпоя баргузор мекунад.

Панҷ эронӣ аз зиндонҳои Тоҷикистон озод шудаанд

Мақомоти эронӣ гуфтаанд, ки панҷ шаҳрванди ин кишвар аз зиндонҳои Тоҷикистон озод ва ба Эрон бозгаштаанд. Тибқи иттилои ИРНА -хабагузории расмии Эрон, ин афрод бо пайгирии сафорати Эрон дар Душанбе озод шуда ва рӯзҳои ахир ба Теҳрон бозгаштанд. Ин афрод дар пайи эълони афв дар Тоҷикистон, раҳо шуданд.

Ҳукумати Тоҷикистон моҳи гузашта ба муносибати 25-умин солгарди қабули Қонуни асосӣ афв эълон кард, ки тибқи онҳо ҳазорон нафар зиндонӣ, аз ҷумла хориҷиён мавриди афв қарор гирифтанд.

Маълум нест, ин шаҳрвандони Эрон ба кадом гуноҳ дар зиндонҳои Тоҷикистон нигоҳ дошта мешуданд. Дар соли 2015 ҳудуди 10 тан аз маҳбусони эронӣ дар зиндонҳои Тоҷикистон адои ҷазо мекарданд, ки асари онҳо барои қаллобӣ ва авбошӣ муҷрим шинохта шуда буданд.

Дар Ишқобод тандиси алабай қомат меафрозад

Қурбонгулӣ Бердимуҳаммадов, президенти Туркманистон дастур дод, ки дар пойтахти кишвараш тандис ё ҳайкали саги навъи алабай гузошта шавад.

Бердимуҳаммадов дар ҳоле ин дастурро дод, ки рӯзи 6 ноябр аз рафти корҳои сохтмонӣ дар Ишқобод ошно мешуд. Ба навиштаи расонаҳо, баландии тандис 15 метрро ташкил хоҳад дод.

Дар Туркманистон сагҳои навъи алабай ҳамчун дастоварди миллӣ эътироф шудаанд. Бердимуҳаммадов моҳи сентябр китоберо бахшида ба алабай таълиф ва интишор кард. 13 сентябр вай шеъреро низ бахшида ба алайб дар ҷаласаи ҳукуматӣ қироат кард.

Расонаҳои расмии Туркманистон мегӯянд, тандиси алайб моҳи июли соли 2020 такмил хоҳад шуд.

Ин ҳам дар ҳолест, ки дар шаҳри Ишқобод як тандиси алабай мавҷуд аст. Тандиси саги алабай бо номи "Бовафо" моҳи декабри соли 2017 пардабардорӣ шуда буд.

Дар як қисми низомии Қирғизистон як афсар худро ба дор овехт

Дар қисми низомии №73809 дар Кой-Тоши вилояти Чӯи Қирғизистон як афсар худро ба дор овехтааст. Хабарро сухангӯи Ситоди кулли Қувваҳои мусаллаҳи Қирғизистон Гулзод Жарашева тасдиқ кард. Ба гуфтаи ӯ, ҳодиса 10 ноябри соли равон дар шаҳраки низомие рух дод.

"Ӯ афсар буд ва рутбаи майор дошт. Ҷасадашро дар утоқи хидматӣ пайдо карданд. Парвандаро Додситонии низомӣ таҳқиқ дорад ва ҳамчунин санҷиши хидматӣ оғоз шудааст",-афзуд Жарашева.

Соли 2018 расонаҳо дар бораи латтукӯб шудани сарбозон дар қисми низомии мазкур хабар дода буданд. Дар пайи шикояти як қатор волидон, чандин афсар аз мақомҳои худ барканор шуданд.

Дар Қазоқистон дар натиҷаи лағзиши замин ду кас ҷон бохт

Дар шаҳри Чимкенти Қазоқистон бар асари лағзиши замин ҳангоми кофтани ҷои таҳкурсии бинои баландошёна ду корманд ба ҳалокат расидаанд. Ҳодиса 8 ноябр дар маҳаллаи Нурсат рух додааст.

Сардори Идораи нозироти меҳнати Чимкент Бауирҷон Калжанов гуфт, дар натиҷаи лағзиши замин 2 кас ҷон бохта, як тани дигар захмӣ шуд.

"Дар робита ба ҳодисаи мазкур комиссияи махсус ташкил шуд. Таҳқиқ карда мешавад, ки ҳангоми фаъолияти кормандон талаботи қонуни меҳнат ва бехатарии техникӣ риоя шудааст, ё не",-афзуд Калжанов.

Дар Департаменти пулиси Чимкент гуфтанд, ки ҳодиса бо банди "Нақзи қоидаҳои ҳифзи меҳнат" тафтиш мешавад.

Сабаби асосии бештари ҳодисаҳое, ки бо кормандони Қазоқистон дар маҳалли кор рух медиҳанд, ташкили ғайриқаноатбахши корҳо, нақзи қоидаҳои бехатарӣ ва ҳифзи меҳнат номида мешавад.

Максим Галкин ТВ-ҳои Русия ва Путинро масхара кард

Ҳунарманди рус Максим Галкин дар як консерт дар шаҳри Новосибирск гуфт, дар телевизионҳои Русия замони шӯравӣ ба "бадтарин маънояш" баргаштааст ва Путин, ки "дар фикраш Марсро фатҳ дорад", бо русҳо "дилтанг" шудааст. Видеои баромади Галкин ҳанӯз 3 октябри соли равон ба Ютуб роҳ ёфта аст, вале расонаҳо танҳо ҳоло ба он таваҷҷуҳ кардаанд. Ба иттилои расонаҳо, то ҳол онро ним миллион нафар тамошо кардааст.

"Агар ба вазъи телевизионҳо назар кунем, дар мо замони шӯравӣ баргаштааст. Зеро ба мо имкон намедиҳанд, ки майнаро об кунем. Зуд мехоянду мегӯянд, ин душман аст, ин мумкин нест, шумо ба онҷо, шумо ба инҷо. Мо менишинему ҳарос дорем, ки ҳоло бо зонуяшон ба ҷоғамон мезананд. Вале дар асл, ба шумо мегӯям, ки феълан дар консертҳо мумкин аст, ҳар чизеро, ки мехоҳед, бигӯед",-афзуд Галкин.

Ҳунарманд чанд нуктаро низ дар бораи президенти Русия Владимир Путин изҳор доштааст. "Худи Путин бо мо дилтанг шудааст. Дарк мекунед. Мо мушкилиҳо дорем, нафақа надорем. Дар онҷо кореро накардаанд, дар инҷо онро накардаанд. Вай аллакай ба таври дигар меандешад. Дар фикраш аллакай Марсро фатҳ дорад. Мо инҷо шикоят дорем, ки "чи гуна дар оянда зиндагӣ мекунем" ва ӯ ба мо мегӯяд, "таҳаммул кунед, миёнро маҳкам бандед". Мо ҳам маҳкам мебандем, яке миёнашро, дигарӣ гарданашро",-шӯхӣ кардааст Галкин.

Муҷрии рус Дмитрий Киселёв бо андешаи Галкин розӣ нест ва мегӯяд, дар телевизионҳои Русия сензура вуҷуд надорад. "Дар мо ҳар чизеро, ки мехоҳед, дар эфир гуфтан мумкин аст". ​Муҷрии барномаи "Вақт нишон медиҳад" Артём Шейнин гуфт, Галкин танҳо "барои он ранҷ мебарад, ки унвони ҳунарманди мардумиро соҳиб нашуд".

Аз гуфтаҳои Галкин танҳо муҷрии телевизиони Шабакаи аввали Русия Владимир Познер ҷонибдорӣ кард. Муҷрии рус гуфт, ӯ ҳақ аст. "Шабакае вуҷуд надорад, ки дар он дар бораи сиёсат ҳама чиз гуфта шавад", - изҳор дошт ӯ.

Боздошти шаҳрвандони Тоҷикистон бо 1 килову 200 грамм тилло

Акс аз бойгонӣ

Матбуоти Ҳинд аз боздошти ду шаҳрванди Тоҷикистон хабар додаанд, ки ба қочоқи тилло ва ҷавоҳирот бо арзиши 70 ҳазор доллар муттаҳам мешаванд. Нашрияи “Таймс оф Индиа” ва чанд вебсайти хабарии ин кишвар бо такя ба баёнияи Идораи гумруки Ҳинд навиштаанд, як марди тоҷикро рӯзи 9-уми ноябр дар фурудгоҳи Деҳлӣ бо бештар аз 627 грамм хиштҳои тиллоӣ ва ду ангуштарии алмосӣ дастгир кардаанд.

Дар ин баёния аз рӯзи 10-уми ноябр омадааст, шаҳрванди Тоҷикистон аз Зеландияи Нав ба фурудгоҳи Деҳлӣ ворид шудааст. Шаҳрванди дигари Тоҷикистон ба навиштаи расонаҳои Ҳиндустон зани 44-сола буда ва бо 650 грам тиллову дигар ҷавоҳирот рӯзи 8-уми ноябр дастгир шудааст.

Ӯро ҳангоми вуруд аз Истанбул ба Деҳлӣ боздошт кардаанд. Мақомоти Тоҷикистон ҳанӯз ин хабарҳоро шарҳ надодаанд. Дар бораи боздошти шаҳрвандони Тоҷикистон дар Ҳинд бо иттиҳоми қочоқи тилло то кунун бисёр кам гузориш шудааст.

Тазоҳурот бо талаби ислоҳоти сиёсӣ дар Қазоқистон

Тазоҳурот дар шаҳри Алмаато

Даҳҳо нафар аз сокинони Қазоқистон рӯзи 9-уми ноябр дар ду шаҳри кишвар ҷамъ омада ва хостори ислоҳоти сиёсӣ ва демократӣ дар кишвар шуданд. Дар шаҳри Алмаато тарафдорони ҳаракати «Қазоқистон бедор шав» ҷамъ омаданд ва бо вуҷуди иҷоза нагирифтан барои гирдиҳамоӣ пулис ба кори онҳо дахолат накард. Баъзе аз онҳо чунин шиоре дар даст доштанд: «Ман дар сухан гуфтан озодам».

Дар шаҳри Нурсултон пойтахти Қазоқистон, фаъолони ҳаракати «Республика» дар боғи марказӣ ҷамъ омаданд ва талаб карданд, ки низоми раёсати ҷумҳурӣ ба низоми порлумонӣ табдил дода шавад. Мақомот ба гирдиҳамоӣ дар инҷо иҷоза дода буданд.

Баъди истеъфои ногаҳонии Нурсултон Назарбоев, раиси ҷумҳури собиқи Қазоқистон дар моҳи март ва ба мақоми ӯ расидани ворисаш Қосимҷомарт Тоқаев, дар кишвар чанд дафъа тазоҳурот баргузор шуд. Тоқаев, ки раиси собиқи порлумон буд, дар интихоботи рӯзи 9-уми июн ғолиб эълон шуд, вале нозирони байналмилалӣ гуфтаанд, ки ин корзори сиёсӣ дар Қазоқистон ба қонуншиканиҳои зиёд олуда буд.

Аз хонаи таърихшиноси рус пораҳои ҷасади зан ва арра ёфтаанд

Олег Соколов

Мақомоти интизомии Русия як таърихшиноси шинохтаро бо иттиҳоми қатл дастгир кардаанд. Кумитаи тафтишотии Русия рӯзи 10-уми ноябр хабар дод, ки Олег Соколовро рӯзи 9-уми ноябр аз дохили рӯдхонаи Мойка дар маркази шаҳри Санкт Петербург берун кашидаанд ва дар дохили борхалтааш, ду дасти зан ва туфанги пневматикӣ пайдо кардаанд.

Ба навиштаи вебсайти «Фонтанка» Олег Соколов, дотсенти Донишгоҳи Давлатии Санкт Петербург зоҳиран хостааст, ки борхалтаро дар об ғарқ кунад, вале натавонистааст ва худаш ҳам ба об афтодааст. Ба навиштаи расонаҳои Русия ҳангоми тафтиш аз хонаи Олег Соколов, арра ва ҷасади пора-пораи зани 24 соларо ёфтаанд, ки шояд аз шогирдони собиқи таърихшинос бошад. Баъди нашри хабар дар бораи таърихшинос, маълумот дар бораи ӯро аз вебсайти донишгоҳ пок карданд.

Олег Соколови 63-сола яке аз поягузорони ҳаракати бозсозии таърих дар Русия ва раҳбари Ҳаракати низомӣ – таърихӣ аст, ки саҳнаҳои қадимаи ҷангҳоро аз нав месозанд. Ӯ барои бозсозии саҳнаҳои ҷанги Русия бо Наполеон ҷоизаи мӯътабари Фаронсаро соҳиб шудааст.

Соли 2018 дар Интернет як видеое нашр шуд, ки нишон медод, Олег Соколов барои суоли номуносиб ба ӯ, ду донишҷӯро мезанад. Соли 2008-ум ба навиштаи нашрияи «Московский Комсомолетс» як донишҷӯ таърихшиносро ба хушунати хонаводагӣ муттаҳам карда, ба пулис шикоят бурдааст. Маълум нест, ки шикояти ӯро баррасӣ кардаанд ва ё не.

Анвар Қарқош Эронро ба музокироти фарогир даъват кард

Анвар Қарқош

Аморати Муттаҳидаи Арабӣ аз Эрон хост, бо қудратҳои ҷаҳонӣ ва ҳамсоягонаш дар Халиҷи Форс музокироти васееро ба роҳ монад, ки на танҳо барномаи атомӣ, балки мушакҳои баллистикӣ ва гурӯҳҳои мавриди ҳимояташ дар хориҷро ҳам фаро бигирад. Пештар аз ин баёнияи мақомоти Аморати Муттаҳидаи Арабӣ, як шарики Амрико, ки бо Эрон баҳси қаламрав дорад, Теҳрон гуфт, ки иҷрои баъзе аз тааҳудоти созиши атомии соли 2015 -ро бас кард.

Анвар Қарқош, вазири умури хориҷии Аморати Муттаҳидаи Арабӣ рӯзи 10-уми ноябр дар як нишасте дар Дубай гуфтааст: “Айни замон шиддат гирифтани вазъ ба нафъи касе нест ва мо боварии қатъӣ дорем, ки дипломатияи муштарак метавонад, муввафақ бошад. Анвар Қарқош гуфтааст, ки созиши нави атомӣ бо Эрон мумкин аст, танишҳоро дар минтақа фӯру нишонад ва барои ба по хестани иқтисоди рӯ ба таназзули Эрон кӯмак расонад.

Танишҳо байни Амрико ва Эрон ва ҳамчунин дар минтақа баъд аз он авҷ гирифт, ки раиси ҷумҳур Доналд Трамп, моҳи майи соли 2018 Амрикоро аз созиши атомӣ бо Эрон хориҷ кард ва таҳримоти иқтисодӣ ба зидди Эронро аз нав барқарор кард. Тарафҳои дигари созиши атомӣ, Русияву Чин, Олмону Фаронсаву Бритониё талош карданд, ки созишро нигаҳ доранд, аммо Теҳрон гуфт, то замоне, ки таҳримот бардошта нашавад, музокироте намекунад.

Ёҳанис дар роҳ ба сӯи курсии раёсати ҷумҳурии Руминия

Клаус Ёҳанис - аз сиёсатмадорони рости марказгаро аст.

Дар Руминия интихоботи раёсати ҷумҳурӣ идома дорад ва мумкин аст, Клаус Ёҳанис, раҳбари собиқи Ҳизби Миллии Либералӣ ин мақомро соҳиб шавад ва мақоми ҳизбро мустаҳкамтар кунад. Раъйдиҳӣ дар байни мардуми хориҷ аз кишвар рӯзи 8-уми ноябр шуруъ шуд.

Дар интихобот 14 нафар, аз ҷумла Виорика Данчила, нахуствазири барканоршуда ва раиси Ҳизби Сотсиал Демократ ширкат мекунад. Бино ба назарсанҷиҳо, мумкин аст, Клаус Ёҳанис 40 дар сади раъйи мардумро ба даст оварад, вале ин ҳам барои раиси ҷумҳур шудан кофӣ нест ва шояд интихобот ба даври дуввум кашида шавад.

Агар ҳеҷ яке аз номзадҳо бештар аз 50 дар сади раъйи мардумро ба даст наёрад, даври дуввуми интихобот рӯзи 24-уми ноябр баргузор мешавад. Клаус Ёҳанис ваъда додааст, ки сохторҳои давлатии Руминияро пешрафта ва аз фасодкорӣ пок карда ва волоияти қонун дар кишварро тақвият мебахшад. Руминия дар чанд соли ахир шоҳиди моҷароҳои зиёди фасоду ришвахорӣ шуд.

Ҳушдори ҳукумати Бритониёи Кабир аз сафар ба Тоҷикистон

Ҳукумати Бритониёи Кабир аз эҳтимоли такрори ҳамлаҳои террористӣ дар Тоҷикистон ҳушдор додааст.

Дар як баёния, ки дар сомонаи ҳукумати ин кишвар нашр шудааст, бо зикри ҳамлаи маргбори 6-уми ноябр ба дидбонгоҳи "Ишқобод" дар ноҳияи Рӯдакӣ гуфта мешавад, ки “эҳтимолан террористон дар Тоҷикистон боз талоши ҳамла кунанд”.

Ҳукумати Бритониё аз шаҳрвандони ин кишвар хостааст, ки ҳангоми сафар ба Тоҷикистон, ба хусус ба Вилояти Мухтори Кӯҳистони Бадахшон ва дигар минтақаҳои марзӣ эҳтиёт кунанд.

Гуфта мешавад, бори дуюм аст, ки ДОИШ ҳамлаҳои маргбор дар Тоҷикистонро ба душ мегирад.

Дар баёния ба ҳамлаи 29-уми июли соли 2018 ишора шудааст, ки дар пайи он чор дучархаронӣ хориҷӣ кушта шуд.

Ба шаҳрвандони Бритониё таъкид шудааст, ки ҳангоми дучархаронӣ эҳтиёт кунанд.

“Дар сурати пеш омадани мушкил ба сафорат ё наздиктарин консулгарӣ тамос гиред”,--таъкид шудааст, дар баёния.

Дар ҳамлаи рӯзи 6-уми ноябр ба дидбонгоҳи марзӣ дар ноҳияи Рӯдакӣ 15 ҷангҷӯи, ба гуфтаи мақомот, марбут ба ДОИШ кушта ва 5 нафар боздошт шуданд.

Инчунин, панҷ марзбон ва як корманди Вазорати корҳои дохилӣ дар ин задухурд кушта шудааст.

ДОИШ масъулияти ҳамларо ба душ гирифт.

Дар Эрон 80 деҳа бар асари заминларза хароб шуд

Телевизиони давлатии Эрон хабар дод, ки теъдоди захмиён дар заминларзаи 8-уми ноябр аз 300 ба 520 нафар расидааст.

Бархе хабаргузориҳои Эрон аз кушта шудани шаш нафар низ хабар нашр карданд.

Заминларза бо қувваи 5,9 дараҷа бар асоси ҷадвали Рихтер дар шарқи вилояти Озарбойҷони Эрон, 400 километр дуртар аз Теҳрон рух додааст.

Заминларза беш аз 80 деҳаро хароб ва ба сокинон зарари зиёд расонидааст.

Мақомоти Эрон мегӯянд, ҳоло 28 нафар захмиён дар беморхона бистарӣ ҳастанд ва онҳое, ки захми сабук доштанд, рухсат шудаанд.

Дар Эрон зуд-зуд заминҷунбӣ сабт мешавад.

Дар соли 2003 заминҷунбии шиддаташ 6.6 дараҷа бар асоси ҷадвали Рихтер шаҳри таърихии Бамро ларзонд ва 26,000 нафар кушта шуд.

Соли 2017 заминларзаи шадид бо қувваи 7 дараҷа дар ғарби Эрон рух дод, ки беш аз 600 нафар кушта ва беш аз 9000 нафар маҷрӯҳ шуда буданд.

Ёфтҳои бештар

Гузоришҳои видеоӣ

Манъи парвариши чорво дар гӯшаҳои нави пойтахти Тоҷикистон
лутфан мунтазир бошед

Феълан кор намекунад

0:00 0:02:37 0:00
XS
SM
MD
LG