Пайвандҳои дастрасӣ

Хабари нав

Хабарҳо

Боздошти як нафар дар робита ба таркиши Душанбе

Вазорати амнияти Тоҷикистон бо нашри як баёния дар мавриди инфиҷори рӯзи душанбе, ки чаҳор нафар захмӣ бар ҷой гузошт, эълом кард, ки як нафар дар ин робита боздошт шудааст. Тибқи баёнияи вазорати амният, боздоштшуда аробакаше мебошад, ки маводи мунфаҷира дар аробаи ӯ ҷой гузошта шуда буд. Дар баёния омадааст, таҷҳизоти таркандаи камшиддат дар аробаи боркашонӣ ҷой доштааст, ки шахсияти соҳибаш муайян ва боздошт шудааст
Аз ҷониби вазорат тибқи ҳодиса, ё факти инфиҷор парвандаи ҷиноӣ боз шуда ва тафтишот идома дорад. Ҷузъиёти бештаре дар робита ба ҷараёни тафтиш дода нашудаст, аммо то ба ҳол кадоме аз мақомот дар мавриди ангезаи ин ҳодиса изҳори назар накардаанд ва тавре дар баёнияи расмӣ низ омадааст, парвандаи ҷиноӣ танҳо бар асоси факти таркиш то кунун пеш бурда шудааст.
Вале дар ҳамин ҳол бархе намояндагони аҳзоби сиёсӣ гуфтаанд, ин ҳодиса сарфи назар аз ангезаи он ба дасти давлат баҳонаи назорати бештар ба умури ҷомеаи шаҳрвандиро хоҳад дод. Гуфтанист дар моҳи январи соли равон низ дар ҳамин маҳалле, ки инфиҷор ба вуқуъ пайваст, як мошин таркида буд, ба гуфтаи вазири дохила омилони он ҳодисаи террористӣ шиносоӣ ва боздошт шуда ва таҳқиқи парвандаи онҳо низ анҷом шудааст.
Раҳматкарими Давлат, Душанбе

Ҳамаи хабарҳои имрӯзро дар инҷо бихонед

Даъвати “шоҳиди муҳим” ба таҳқиқи нобоварӣ ба Трамп

Адам Шифф, узви Конгресси Амрико, раиси Кумитаи иктишофии Маҷлиси Намояндагон гуфт, вай як коргари сафорати Иёлоти Муттаҳидаро дар Украина даъват кардааст, то дар таҳқиқи нобоварӣ ба президент Доналд Трамп гувоҳӣ диҳад. Вай ин коргарро "шоҳиди хеле муҳим" номид.

Вилям Тейлор, дипломати баландпояи Амрико дар Украина, рӯзи 13-уми ноябр дар Кумитаи иктишофии Конгресс гуфт, яке аз кормандонаш ҳангоми суҳбати телефонӣ шунидаст, ки Трамп аз сафири Амрико дар Иттиҳоди Аврупо Гордон Сондланд дар бораи "тафтишот" пурсидааст.

Ба гуфтаи Тейлор, Сондланд гуфта, ки украинҳо омодаанд пеш раванд. Изҳороти Тейлор дар бораи он чи ин коргар шунидааст, эҳтимолан бузургтарин пешрафтест, ки дар беш аз панҷ соати гувоҳидиҳии ӯ ва Ҷорҷ Кент, ҷонишини вазири корҳои хориҷӣ оид ба назорати Украина дар Кумитаи иктишофи маҷлис ба даст омадааст.

Кумита дар ҳоли баррасӣ аст, ки оё Трамп бо нигоҳ доштани ёриҳои ҳарбӣ ба ин кишвар ба президент Владимир Зеленский фишор овардааст ба зидди рақиби сиёсии ӯ Ҷо Байден тафтишот сар кунад ё не. Пас аз телефон Сондланд ба коргари сафорат гуфтааст, президенти ИМА “бештар дар бораи тафтишот”-и хонаводаи Байден ғамхорӣ мекунад, то ба Украина.

Тейлор гуфтааст, аз гузориши ин коргар дар бораи гуфтугӯи рӯзи 26-уми июли Трамп ва Зеленский танҳо ҳафтаи гузашта шунидааст. Адам Шифф маълумоти навро "ниҳоят муҳим" номид ва ба хабарнигорон дар поёни рӯзи гувоҳидиҳӣ гуфта, ин нишон медиҳад дастурҳои вобаста ба Украина "аз президент баромадаанд".

Дукони гӯштфурӯшии омӯзгори самарқандӣ дар ҳудуди мактаб

Дар ҳудуди мактаби №24 дар шаҳри Самарқанди Узбекистон дукони гӯштфурӯшӣ ба роҳ монда шудааст.

Дар бораи фурӯши гӯшти гӯсфанд дар ҳудуди мактаб рӯзи 12 ноябр дар шабакаҳои иҷтимоӣ хабар дода шуд. Ин хабар баҳси гармеро дар шабакаҳо ба бор овард.

"Гӯштфурӯш" омӯзгори мактаби мазкур будааст, ки рӯзи 11 ноябр аз коргоҳи бародараш гӯшт оварда, дар ҳудуди мактаб ба фурӯш гузоштааст.

Бархе аз омӯзгорон гӯштро бо нася харида, ваъда кардаанд, ки аз маошашон пардохт хоҳанд кард. Комисияи маҳаллӣ аз рӯи ин ҳодиса санҷиш гузаронида, ба омӯзгор ва мудири мактаб огоҳӣ додааст.

Донишҷӯе дар Амур 1 касро кушт ва 3 тани дигарро маҷруҳ кард

Дар шаҳри Благовешени вилояти Амури Русия дар тирпарронии рӯзи 14 ноябр дар коллеҷи сохтмонӣ ва хоҷагии коммуналӣ як одам кушта ва се тани дигар захмӣ шуд. Ин тирпаррониро донишҷӯи коллеҷ ташкил кард. Маҷруҳони 17, 19 ва 20-сола дар бемористон бистарӣ шуданд.

Пулис ҷавони 19-солаи мусаллаҳро дар ошёнаи дувуми коллеҷ муҳосира кард. Байни кормандони пулис ва ҷавони мусаллаҳ тирпарронӣ сурат гирифт. Ба иттилои пешакӣ, ҷавон дар ниҳоят аз силоҳи шикорӣ, ки ба номи худаш сабт шуда буд, худкушӣ кард.

Дар наворе, ки расонаҳои маҳаллӣ нашр карданд, донишҷӯе дида мешавад, ки дар замин хоб аст ва аз ҷисми вай хун меравад.

Шоҳидон гуфтанд, ҳодиса соати 10 субҳ замоне рух дод, ки ба далели дер мондан ӯро нагузоштанд, вориди синфхона шавад. Баъди ин вай тирпарронӣ кард. Ба гуфтаи шоҳидон, ҳадди ақал садои 5 тир шунида шудааст.

Абилғозиев гуфт, медонад кӣ аз қочоқчиён ҳимоят мекунад

Сарвазири Қирғизистон Муҳаммадқулӣ Абилғозиев гуфт, ҳар рӯз ба кишвараш аз тариқи қочоқ беш аз 100 тона маводи сӯхту равғани молиданӣ ворид мешавад. Ба гуфтаи Абилғозиев, ӯ огаҳ аст, ки дар ин қочоқҳо кадом мансабдорон даст доранд.

Вакили порлумони Қирғизистон Азамат Араббоев ҳангоми баррасии тарҳи буҷаи соли 2020 гуфт, қочоқ бидуни иштироки "шахсони рутбадор" номумкин аст. "Раҳбарони дидбонгоҳҳои марзӣ миллионер шудаанд. Ман ҳисоб кардам, тақрибан 8 миллиарду 200 миллион соми буҷа ба ҷайби бархеҳо меравад",-изҳор дошт Араббоев.

Сарвазири Қирғизистон дар посух ба гуфтаҳои вакил иқрор кард, ки ҳангоми воридоти сӯзишворӣ нақшаи қочоқ вуҷуд дорад.

"Масъалаи мудирияти воридот солҳо боз ҳалношуда аст. Мо аз чӣ оғоз кардем? Нахуст воридоти сӯзишвориро бо мошин манъ кардем. Ҳоло маводи сӯхт танҳо бо роҳи оҳан ворид мешавад. Дар ҳақиқат мушкилиҳо вуҷуд доранд ва лӯлаҳои интиқоли ғайриқонунии сӯзишворӣ низ ҳастанд. Мегӯянд, рӯзона беш аз 100 тона ворид месозанд. Вале ман фикр мекунам, рақамҳо бештар аз инанд. Инро низ медонам, ки иҷрои чунин нақшаҳо бе иштироки мақомоти ҳифзи ҳуқуқ имкон надорад. Ба мо хабар мерасонанд, ки дар онҷо кӣ нишастааст ва чи қадар мегирад",-изҳор дошт Абилғозиев.

Видеои латтукӯби ду ҷавон аз сӯи марзбонони Узбекистон

Дар шабакаҳои иҷтимоӣ 12 ноябри соли равон видеое нашр шуд, ки низомиёни ниқобпӯш ду ҷавони 22-23-соларо дашномҳои қабеҳ дода, сахт латтукӯб мекунанд. Умедҷон Саидҷонови 22-сола, ки баъди латтукӯб шудан аз тарафи низомиёни Хадамоти марзбонии Узбекистон дар беморхонаи ноҳиявии Фарғона бистарӣ шудааст, ҳодисаро чунин шарҳ дод:

"Ҳамроҳи модарам барои хариди нон ба марказ рафтем. Марзбонон хостанд мошини маро тафтиш кунанд ва гуфтанд, ки курсии ақибро боло бардор. Сипас талаб карданд, ки курсиро кушоям. Ман гуфтам, барои он калид лозим аст. Вале исрор карданд, ки "мекушоӣ". Боз фаҳмондам, ки ин номумкин аст. Баъдан гуфтанд, "мошинро яктараф гир". Ман мошинро ронда ба хонаамон, ки дар наздикӣ аст, рафтам ва модарамро гузошта, ҳамроҳи як дӯстам баргаштам. Вале марзбонон маро ба итоат накардан ва фирор аз тафтиш айбдор карда, латтукӯб намуданд. Ба сарам бо чӯбдаст заданд ва боқиро дар ёд надорам".

Абдурасул Фозилови 23-сола мегӯяд, марзбонони ӯзбек ӯро низ ба ҳадде латтукӯб карданд, ки дар беморхона бистарӣ шудааст.

"Шахсеро, ки марзбонон дар видео латтукӯб мекунанд ман ҳастам. Китфам то ҳол дард мекунад ва осори латтукӯб ҳанӯз ҳам боқист. Ҳамроҳи Умедҷон дар дохили мошин будам. Маро ҳам бе сабаб аз мошин бароварда, заданд", - афзуд ӯ.

Умедҷон Саидҷонов мегӯяд, марзбонони Узбекистон шахсони "шубҳанок"-ро пайваста таҳқир ва латтукӯб мекунанд.

Хадамоти амнияти давлатии Узбекистон бо нашри изҳороте видеои латтукӯби ҷавононро шарҳ дода, гуфт, Саидҷонов ва Фозилов ба марзбонон "итоат накарданд". Хадамот афзудааст, ки ин ду ҷавон қаблан бо ҷурми қочоқ ба ҷавобгарии маъмурӣ кашида шуда буданд.

Наздикони Саидҷонов ва Фозилов аз болои марзбонон ба додситонии ноҳияи Фарғона шикоят бурдаанд. Талошҳо барои дарёфти назари додситонии Фарғона бенатиҷа буданд.

Туркия 21 гумонбари узвияти ДОИШ-ро ба Тоҷикистон мефиристад

Ҳукумати Туркия гуфтааст, ки наздик ба 1000 нафар аз гумонбарони боздоштшуда ба узвият ё ҳамдастӣ бо ДОИШ-ро ба кишварҳояшон ихроҷ мекунад.

Рӯзномаи “Ҳуррият” навиштааст, 959 нафар ихроҷ хоҳанд шуд ва аз инҳо 21 тан ба Тоҷикистон, 82 кас ба Узбекистон, 10 тан ба Қазоқистон, 23 ба Қирғизистон ва 11 нафар ба Афғонистон фиристода хоҳанд шуд.

Мақомоти Туркия гуфтаанд, ҳамчунин 99 кас ба Русия, 17 тан ба Олмон, 3 ба Ҳолланд ва 2 нафар ба Фаронса ихроҷ мешаванд. Аммо бештарин теъдод, наздик ба 300-нафарӣ ба Ироқ ва Сурия истирдод хоҳанд шуд.

Дар байни гумонбарони боздоштшудаи ҳамдастӣ бо ДОИШ ҳамчунин 4 нафар аз Украина будаанд. Дар хабар гуфта мешавад, як бахши умдаи ин афродро ноболиғон ташкил медиҳанд.

Президент Раҳмон аз кори ниҳодҳои амниятӣ ва умури дохилӣ интиқод кардааст

Бархе аз ширкаткунандагони нишасти Шӯрои амнияти Тоҷикистон бо ширкати раисиҷумҳури кишвар Эмомалӣ Раҳмон дар рӯзи 14 ноябр пас аз поёни он ҷаласаи мақомоти аршади ниҳодҳои худ​ро баргузор ва онҳоро аз ҷараёни ҳамоиш огоҳ кардаанд.

Як манбаи мо, ки аз ҷузъиёти ҷаласа огоҳ аст, гуфт, президент аз ғафлати мақомоти марзбонӣ ва Кумитаи давлатии амнияти миллӣ интиқод кардааст, ки натавонистаанд, бо огоҳии пешакӣ аз рӯйдоди 6 ноябр дар дидбонгоҳи "Ишқобод" пешгирӣ кунанд.

Манбаъ ба нақл аз президент гуфт, "вақте шумо аз кори се-чаҳор террорист огоҳ нестед ва моҳҳо онҳо омодагӣ мегиранд, шумо бехабар мемонед, пас вазифаи шумо чӣ ҳаст." Ӯ ҳамчунин аз кори ниҳодҳои иктишофӣ танқид карда ва гуфтааст, чаро нозирони Вазорати умури дохилӣ дар маҳалҳо ҳаракати одамони шубҳаоварро зери назорат намегиранд.

Аз кормандони тамоми ниҳодҳо, ҳатто Кумитаи ҳолатҳои фавқулода, Агентии мубориза бо маводи мухаддир, Агентии мубориза бо фасод, додситонӣ ва КДАМ-у МВД хостааст, ки дар мубориза бо терроризм ҳамкорӣ кунанд. Ӯ гуфтааст, ки ин бояд як бахши муҳими кори шумо бошад, фақат ба ВКД ва КДАМ такя накунед.

Як манбаи дигар низ аз ноқаноатмандии ҷиддии раисиҷумҳур дар нишасти Шӯрои амният хабар дод ва ҳамчунин шеваи пахши иттилоъро дар бораи он низ интиқод кард. Ин манбаъ аз додани ҷузиёти бештар худдорӣ намуд.

Нишасти Шӯрои амнияти Тоҷикистон пас аз тақрибан 10 рӯзи ҳамла ба дидбонгоҳи "Ишқобод" дар марзи Тоҷикистону Узбекистон баргузор гардид. Бо вуҷуди он ки аз танқидҳои президент нисбати мансабдорони баландпоя хабар мерасад, чунин тарзи интиқод дар гузашта низ нисбати мансабдорони гуногун садо додаанд, вале кам иттифоқ афтодааст, ки раҳбарони ниҳодҳои қудратӣ муҷозот шуда бошанд. Ҳамзамон дар шабакаҳои иҷтимоӣ зимни хабарҳои зиёд роҷеъ ба "сарбозшикор" ҳамчун роҳи пур кардани сафҳои артиш аз вазири дифои Тоҷикистон даъват шудааст, аз мансабаш истеъфо диҳад.

Мақомот гуфтанд, дар бораи ҳамла ба дидбонгоҳ ва масоили дигар додситони кул, вазирони корҳои дохилӣ ва мудофиа, раиси Кумитаи давлатии амнияти миллӣ ва фармондеҳи нирӯҳои марзбонӣ гузориш доданд. Дар ҳоли ҳозир ҷузъиёти суҳбатҳои онҳо маълум нест. Ва ҳамчунин рушан нест, оё онҳо фарзияи расмии қаблиро ба сарвари давлат расонданд ё гузориши ҳар ниҳод бо ҳам фарқ мекард.

Дар ҳамлаи шаби 6-уми ноябр ба дидбонгоҳи "Ишқобод" дар ҳудуди ноҳияи Рӯдакӣ ва дар марзи Тоҷикистону Узбекистон 15 ҳамлавар ва чанд тан аз нерӯҳои марзбонӣ ва милиса кушта, панҷ ҳамлавар дастгир шудаанд. Мақомот гуфтанд, ки ҳамла кори ҷангҷӯёни гуруҳи ваҳшатафкани "Давлати исломӣ" аст ва ба иттилои расмӣ "онҳо аз ноҳияи Қалъаи Золи Афғонистон омадаанд".

ДОИШ низ масъулияти ҳамларо ба дӯш гирифт, вале ҳамчунон фарзия ва гумонзаниҳои дигаре дар ҷомеа ва расонаҳо вуҷуд дорад. Мақомоти Афғонистон ва чандин манбаи боварбахш дар мақомти Тоҷикистон убури ҳаросафканонро аз марз рад кардаанд.

Дар шабу рӯзи ҳодиса раиси ҷумҳури Тоҷикистон бо сафари расмӣ дар Аврупо буд ва ин ҳодиса бори нахуст бо ҳузури ӯ баррасӣ мешавад.

Дар нишасти Шӯрои амният масъалаи иҷрои қонуни афв низ баррасӣ шудааст. Мансурҷон Умаров, сардори раёсати зиндонҳои Тоҷикистон гуфт, то кунун 6 ҳазор нафар аз маҳбасҳо озод шуданд.

Мансурҷон Умаров рӯзи 14 ноябр пас аз поёни нишаст дар сӯҳбат ба Радиои Озодӣ гуфт, дар ҷаласаи Шӯрои амният раиси ҷумҳур дастур додааст, ки масъалаи иҷроиши қонуни афв ҳар чи зудтар ва бо пешгирӣ аз омилҳои коррупсионӣ ба охир расонида шавад. Умаров гуфт, то ҳол ягон шикоятеро дар робита ба ҷой доштани омилҳои коррупсиёнӣ ҳамнгои татбиқи қонуни афв аз наздикони маҳбусон дастрас накардаанд.

Дар сурати ба даст омадани тафсилоти нишасти Шӯрои амният дар ин ҷо нашр хоҳем кард. Моро пайгирӣ кунед, вале то он дам хабарҳои охирин ва назарҳоро дар бораи ҳамла ба дидбонгоҳи "Ишқобод" дар ин ҷо бихонед.

Манъи муваққатии вуруди маҳсулоти Узбекистон ба Қирғизистон

Аз оғози соли 2019 365 ҳолате сабт шудааст, ки маҳсулоти Узбекистон ба талаботи фитосанитарии Иттиҳоди иқтисодии Авруосиё (ИИАО) ҷавобгӯ набудааст.

Дар ин бора дар маркази матбуотии Вазорати кишоварзӣ, саноати ғизоӣ ва обёрии Қирғизистон хабар доданд. Дар вазорат гуфтанд, дар 10 ҳолат маҳсулоти Узбекистон заҳролуд будааст.

"Ташхис кардем, ки анорҳои Узбекистон заҳролуд ҳастанд. Он маҳсулот дорои санад буд. Вале ҳангоми озмоиш дар шаҳри Ӯш вируси Grapholitha molesta Busck пайдо шуд. Баъди ин ҳодиса 35 тона маҳсулоти дигарро аз гузаргоҳи гумрукӣ гардонидем",-хабар доданд дар вазорат.

Гуфта мешавад, дар чунин ҳолат, бар асоси талаботи ИИАО вуруди маҳсулот манъ мегардад. Вазорати кишоварзии Қирғизистон ба мақомоти Узбекистон иттилоъ додааст, ки вуруди ин навъи маҳсулот муваққатан қатъ мегардад.

Президентҳои ИМА ва Туркия дар Вашингтон мулоқот карданд

ИМА ва Туркия бо намояндагони Сенат имкони идомаи истеҳсоли муштараки зарбазанҳои амрикоии F-35-ро баррасӣ карданд. Дар ин бора президенти ИМА Доналд Трамп дар нишасти хабарӣ пас аз гуфтугӯ бо ҳамтои туркаш Раҷаб Эрдуғон иттилоъ дод.

Трамп дар мавриди тақдири минбаъдаи истеҳсоли муштараки зарбазанҳо гуфт, Барои идомаи ҳамкориҳо дар ин замина гузинаҳои гуногун мавҷуданд. "Бар асоси пешбиниҳои ман, мо чораҷӯӣ хоҳем кард",-изҳор дошт президенти ИМА.

Доналд Трамп ҳамчунин изҳор дошт, ки дар гуфтугӯ бо Эрдуғон масъалаи харидории низоми мушакии русии С-400 аз сӯи Туркия матраҳ шуд. Ба гуфтаи ӯ, ҷонибҳо барои баррасии он омодаанд.

Президенти ИМА иттилоъ дод, ки ду кишвар тасмим доранд ҳамкориҳои тиҷориро афзоиш диҳанд. Трамп пеш аз гуфтугӯ бо Эрдуғон изҳор дошта буд, ки дар ҳоли ҳозир ҳаҷми табодули коло миёни ду кишвар то ба 20 миллиард доллар расидааст. Интизор меравад, он то ба 100 миллиард доллар расонида шавад.

Гуфтугӯи Трамп ва Эрдуғон дар ҳоле баргузор шуд, ки муносибатҳои Анқара ва Вашингтон пас аз оғози амалиёти нерӯҳои Туркия дар шимоли Сурия ба сардӣ гароиданд. Вашингтон Анқараро пас аз харидории низоми мушакии русии С-400 аз барномаи истеҳсоли F-35 хориҷ кард.

ВКД: Саймаитӣ шиносномаи қирғизиро ғайриқонунӣ гирифта буд

Вазорати умури дохилии Қирғизистон гуфт, соҳибкори чинӣ Айеркин Саймаитӣ, ки дар Туркия кушта шуд, шиносномаи қирғизиро ғайриқонунӣ дарёфт кардааст.

Ба иттилои манбаъ, соли 2017 як шаҳрванди Чин, соли таваллудаш 1988 ба пулис муроҷиат карда, хостааст, зидди ҳамватанаш Айеркан Саймаитӣ чора андешида шавад. Ба гуфтаи ӯ, Саймаитӣ дар бозори Қара-Сӯ молу колои вайро ба маблағи 3 миллиону 28 ҳазор доллар аз худ кардааст.

Дар асоси шикояти шаҳрванди Чин бо банди "Қаллобӣ" парванда боз шуда, дар рафти санҷиш маълум гашт, ки шахси ҷустуҷӯшаванда аз шиносномаи ба номи шаҳрванди Қирғизистон Самятов Эркен Салимович додашуда ғайриқонунӣ истифода мекунад.

Моҳи июли соли равон дар робита ба ин ҳодиса бо банди "Ғайриқонунӣ додани шиноснома" парвандаи ҷиноӣ боз ва як масъули Шуъбаи шиносномадиҳии ноҳияи Сузаки вилояти Ҷалолобод гумонбар дониста шуд. ​Зидди худи Саймаитӣ парвандаи алоҳида боз гашта, тафтишот идома дорад.

Айеркен Саймаитӣ шоми 10 ноябр дар шаҳри Истамбул кушта шуд. Саймаитиро замоне куштанд, ки вай дар наздикии қаҳвахонае дар минтақаи Фотеҳи Истамбул нишаста буд. Қотил аз ҷои ҳодиса фирор кард.

Бахши қирғизии Радиои Озодӣ 29 майи соли равон таҳқиқоти рӯзноманигор Алӣ Тоқтакуновро зери унвони "Аз пайи миллионҳо доллари аз Қирғизистон бурдашуда" нашр кард, ки бар асоси он, тайи солҳои 2011- 2017 ҳудуди 700 млн доллар ба воситаи бонкҳои гуногун ба кишварҳои хориҷ, аз ҷумла ИМА ва Ҳонгконг интиқол дода шудааст.

Расидҳои бонкӣ нишон медиҳанд, ки соҳибкор Айэркин Саймаитӣ ҷамъан ба 13 кишвар, аз ҷумла Туркия, Бритониё, АМА, Олмон ва Русия садҳо миллион доллар фиристодааст. Худи Саймаитӣ солҳои 2015-2017 аз Туркия бо номи ҳамсараш ба ҳисоби бунёди хайрияи ба номи Исмоил Матраимов дар Қирғизистон $2 338 700 гузарондааст.

Ин бунёд ба номи Руслан Матраимов -- бародари хурдии муовини пешини раиси Хадамоти гумруки Қирғизистон Райимбек Матраимов сабти ном аст.

Пештар аз ин хабар дода шуд, ки бо гумони қатли Айеркен Саймаитӣ ду шаҳрванди Қирғизистон ва як шаҳрванди Сурия боздошт шудааст.

Боздошти шаҳрванди Русия дар Қазоқистон барои қочоқи шохҳои сайга

Хадамоти марзбонии Кумитаи амнияти миллии Қазоқистон мегӯяд, як шаҳрванди Русияро бо гумони қочоқи шохи сайга боздошт кард.

Ба огаҳии хадамот, аз ҷузвдони варзишие, ки дар дохили мошини шаҳрванди Қазоқистон буд, 64 ҷуфти шохи сайга дарёфт ва мусодира шудааст. Шаҳрванди Русияро дар гузаргоҳи марзии "Оқсой"-и вилояти Қазоқистони Ғарбӣ боздошт ва ба пулис супурдаанд.

Дар Хадамоти марзбонии Қазоқистон гуфтанд, ки арзиши тахминии шохҳои сайга 242 млн танга (ҳудуди 620 ҳазор доллар) аст.

Дар Қазоқистон сайгаҳо зери муҳофизати давлат қарор доранд. Мақомоти қазоқ то соли 2020 ҳама гуна истифодаи сайгаро, ба ҷуз бо ҳадафҳои илмӣ манъ кардаанд.

Дар соли равон ҳангоми боздошти шикорчиёни ғайриқонунии сайга ду нозири корхонаи "Охотзоопром"-и вилоятҳои Қарағанда ва Акмолин кушта шуданд.

Заҳматкашони Туркманистон барои худ аз номи президент туҳфа мехаранд

Кишоварзон ва комбайнчиёни Туркманистон, ки нақшаи давлатии пахтаро иҷро карданд, вазифадор шудаанд, барои ҷашни Рӯзи ҳосил якдонаӣ телевизор биоранд, то баъдан аз номи президент ба онҳо тақдим шавад.

Дар ин бора бахши туркмании Радиои Озодӣ иттилоъ дод. Ба онҳое, ки тавони харидории телевизори навро надоранд, гуфтаанд, телевизорҳои куҳнаи худро биоранд.

Кормандони техникӣ вазифадор шудаанд, трактор ва мошинҳои боркашеро таъмиру ранг кунанд, ки дар телевизион намоиш дода мешавад.

Дар Туркманистон чорабиниҳои расмии идонаро барои намоиш дар телевизион аз қабл ба навор мегиранд.

Тошканд гуфт, болоравии қимати нон дар мубориза зидди фасод кумак мекунад

Додситонии кулли Узбекистон бо нашри як изҳорот сабабҳои болоравии қимати нонро шарҳ дод.

Ба иттилои додситонӣ, омилҳои зер сабаби болоравии қимати нон шудаанд:

1. Даст кашидани давлат аз сиёсати ба таври сунъӣ нигаҳ доштани қимати орду нон.

2. Болоравии ҳамасолаи қимати маводи сӯхт, барқ ва газ. Аз ҷумла дар соли 2017 1 кВт⋅с неруи барқ барои истеҳсоли орд 204,3 сӯм арзиш дошт, аммо дар соли 2019 ба 405 сӯм расид (болоравии 120,4% қимати барқ).

Ба ҷуз ин, низоми мавҷуда, ки чандин сол амал мекард, ҳамроҳ бо қонеъсозии талаботи аҳолӣ бо нони арзон боис шуд, ки фасодкорие роҳандозӣ гардад. "Бархеҳо орди арзонеро, ки бояд ба аҳолӣ фурӯхта мешуд, харидорӣ ва барои истеҳсоли хлеб бо нархи гаронтар мефурӯхтанд",-омадааст дар хабари додситонӣ.

Бино ба хабари додситонӣ, дар солҳои 2011-2018 масъулони корхонаи "Оҳангарон дон" бо роҳи аз худ кардани орду гандум 1,9 миллион долларро "ба ҷайби худ задаанд".

Додгоҳи олии Тоҷикистон 30 сомонаро баст. Кадом сомонаҳоро?

Додгоҳи олии Тоҷикистон 30 сомона ва саҳифаҳои марбут ба Паймони миллӣ, эътилофи созмонҳои мухолифин дар хориҷаро бастааст. Қарори додгоҳ рӯзи 12-уми ноябр нашр шуд ва рӯйхат аз саҳифаи "Бги дега" то "Озодандешон" ва "Кимиёи саодат"-ро дар бар мегирад. Мухолифон ба ин тасмими додгоҳ ҳанӯз вокуниш накардаанд.

Бастани ин гурӯҳи сомонаҳои интернетӣ дар ҳолест, ки Додгоҳи олии Тоҷикистон рӯзи 11-уми октябр Паймони миллиро созмони террористиву экстремистӣ эътироф кард. Ба қавли мақомот, фаъолияти он дар қаламрави кишвар аз 15-уми августи имсол мамнуъст.

Масъулони Паймони миллии Тоҷикистон рӯзи 15-уми октябри имсол дар баёнияи расмӣ ҳалномаи Додгоҳи олиро "ҳайратангез" ва "ғайриконститутсионӣ" хонданд. Онҳо гуфтанд, на танҳо ин имкон барояшон дода нашуд, ки бо вакили худ дар мурофиае, ки парвандааш дар он муҳокима шудааст иштирок кунанд, балки "ҳатто пеш аз қабули ин қарор ҳеч хабаре дар бораи он надошт".

Додгоҳи олии Тоҷикистон то ба ҳол сабаби ифротӣ ва террористӣ эълон кардани паймонро шарҳ надодааст. Аммо дар гузашта мақомоту расонаҳои давлатии Тоҷикистон борҳо Паймони миллиро "ворис"-и ҳизби дар кишвар мамнӯи наҳзати исломӣ донистаанд, ки фаъолияташ аз соли 2015 боз мамнуъст.

Паймони Миллии Тоҷикистон, ки моҳи сентябри соли 2018 дар хориҷ таъсис ёфт, аз Анҷумани озодандешони тоҷик, Ҷунбиши ислоҳот ва рушд, Ассосиатсияи муҳоҷирини Осиёи Марказӣ ва Ҳизби дар Тоҷикистон мамнӯи наҳзати исломӣ ташкил ёфтааст. Додгоҳи олии Тоҷикистон Ҳизби наҳзати исломиро соли 2015 мамнуъ ва террористӣ эълон кард. Раҳбарияти ҳизб, ки дар хориҷа қарор дорад, онро рад мекунад.

Раҳбарони се созмони дигар низ аз Тоҷикистон берун шуда, дар хориҷа ҳастанд. Ҳадаф аз ташкили эътилоф сарҷамъии нирӯҳои мухолифин, риояи ҳуқуқи башар, рушди демократия ва интихоботҳои озоду шаффоф гуфта шудааст.

Мақомоти Тоҷикистон то кунун тақрибан бист созмону ҷунбиш, аз ҷумла “Ҳизби Таҳрир”, “Ал-Қоида”, “Ҳаракати исломии Узбекистон”, “Толибон”, “Ҷамоаи Таблиғ”, “Тоҷикистони Озод”, “Салафия”, “Гуруҳи 24”, “Давлати исломӣ”, “Ҷабҳат-ут-нусра” ва “Ҳизби наҳзати исломии Тоҷикистон”-ро ба ҳайси созмонҳои террористиву ифротӣ шинохтаанд. Даҳҳо нафар бо ҷурми пайравӣ ва тарафдорӣ аз ин созмонҳо боздошту зиндонӣ шудаанд.

Президенти пешин хост, тарафдоронашро озод кунанд

Алмосбек Отамбоев

Алмосбек Отамбоев, президенти пешини Қирғизистон, даъват дорад, ки ҳамаи боздоштшудаҳои ҳодисаҳои рӯзҳои 7 ва 8-уми августи имсол дар деҳаи Қой-Тош озод карда шаванд. Чунин изҳоротро Отамбоев рӯзи 13-уми ноябр паҳн кард.

Дар изҳорот омадааст, боздошти ҳаводорони вай ва иштирокдорони ҳодисаҳои Қой-Тош ба хотири "тарс додан ва иҷборан хомӯш кардан" сурат гирифтааст.

Отамбоев дар изҳорот гуфтааст, "мақомот огоҳ ҳастанд, ки афроди зикршуда айбе надоранд. Агар суоле ҳаст, аз ман бипурсанд. Бигзор маро ба ҳар муҳлате, ки мехоҳанд, зиндонӣ кунанд. Ман дар замони роҳбарии ин ҳукумат ба ҳар чизе омодаам. Аммо ҳамаи онҳое, ки дар робита ба ҳаводиси 7-8-уми август август боздошт шудаанд, бояд озод шаванд. Онҳо танҳо дар он айбдоранд, ки ба адолат, қонун, Конститутсияи кишвар бовар карданд."

Рӯзҳои 7-8-уми август дар деҳаи Қой-Тоши Қирғизистон "амалиёти иҷборан ба бозпурсӣ овардани президенти пешин Алмосбек Отамбоев" сурат гирифт. Бо қарори додгоҳ, вай то 26-уми октябр ба ҳабс гирифта шудааст.

Додситонии кулли Қирғизистон Отамбоевро дар чандин ҷиноят, аз ҷумла дар робита ба ҳодисаҳои Қой-Тош, ғайриқонунӣ озод кардани яке аз афроди бонуфузи олами ҷиноӣ Азиз Батукаев, фасодкорӣ ва ғайра айбдор кард. Ба гуфтаи Слесарев, дар маҷмуъ нисбат ба Отамбоев 14 айб эълон шудааст.

Баъди боздошти Отамбоев чанде аз тарафдорони ӯро, аз ҷумла вакилони порлумон Асел Кодуранова ва Ирина Карамушкина, вакили пешин Равшан Ҷеенбеков, мушовири пешини роҳбари давлат Кундуз Жолдубоева, раиси пешини КДАМ Абдил Сегизбоев ва дигаронро ба бозпурсӣ даъват карданд.

Дар ҳоли ҳозир роҳбари пешини дастгоҳи президент Фарид Ниёзов, ҷонибдорони президенти пешин Алга Киличов, Кияз Смаилов ва Амантур Жамгирчиев бо гумони ғасби шаш корманди мақомоти Қирғизистон дар боздошт ҳастанд. Ба айни ҳамин гумон вакилони порлумон Ирина Карамушкина ва Асел Кодуранова дар ҳабси хонагӣ ҳастанд.

Эрдуғон дар авҷи танишҳо ба Амрико рафтааст

Раҷаб Таййиб Эрдуғон

Раҷаб Таййиб Эрдуғон, раиси ҷумҳури Туркия, дар авҷи танишҳо байни Анқара ва Вашингтон, ду узви НАТО, ба Амрико рафтааст ва интизор меравад рӯзи 13-уми ноябр бо президент Доналд Трамп мулоқот кунад.

Эрдуғон бори охир соли 2017 ба Амрико рафта буд. Он вақт муҳофизонаш дар назди қароргоҳи сафири Туркия ба эътирозгарони осоиштаи курд ҳамла карданд.

Раиси ҷумҳури Туркия рӯзи 11 уми ноябр пеш аз сафараш ба Вашингтон дар Анқара гуфт, равобити Туркияву Амрико “марҳилаи дарднок”-ро пушти сар мекунад.

Ҳамон рӯз як мақоми баландпояи ҳукумати Амрико низ эътироф кард, ки ду кишвар дар баъзе аз масъалаҳо ихтилоф доранд.

Вай ба хариди системаи дифои ҳавоии S-400-и Русия аз сӯи Туркия ва вуруди нерӯҳои ин кишвар ба шимоли Сурия ишора кард.

Раҳбарони Осиёи Марказӣ дар Тошканд ҷамъ мешаванд

Мулоқоти дувуми машваратии раҳбарони кишварҳои Осиёи Марказӣ (ОМ) 27 ноябр дар шаҳри Тошканд баргузор мешавад. Ба иттилои хабаргузории ТАСС, дар ин бора президенти пешини Қазоқистон Нурсултон Назарбоев 12 ноябр иттилоъ дод.

Назарбоев изҳори умедворӣ кард, ки мулоқоти мазкур дар рӯзи эъломшуда дар Тошканд баргузор хоҳад шуд.

Ӯ ҳамчунин зикр кард, ки миёни Қирғизистон, Тоҷикистон ва Узбекистон баъзе аз мушкилиҳои ҳалношуда боқӣ мондааст. "Задухӯрдҳо рух дода, одамон кушта мешаванд",-афзуд вай.

Ёдрас мешавем, президенти Узбекистон Шавкат Мирзиёев моҳи сентябри соли 2017 ҳангоми суханронӣ дар ҷаласаи Маҷмаи умумии СММ бори нахуст пешниҳод кард, ки мулоқоти ғайрирасмии раҳбарони кишварҳои Осиёи Марказӣ баргузор карда шавад.

Мулоқоти якуми машваратии раҳбарони кишварҳои Осиёи Марказӣ моҳи марти соли 2018 дар пойтахти Қазоқистон барпо шуд. Моҳи июли соли равон дар Вазорати умури хориҷии Узбекистон иттилоъ доданд, ки мулоқоти дувум тирамоҳи имсол дар Тошканд баргузор мешавад.

Роҳбари мухолифони Боливия президенти муваққат шуд

Жанин Анес, роҳбари мухолифон дар сенати Боливия баъд аз истеъфои Эво Моралес худро президенти муваққати кишвар эълом кард.

Ба навиштаи Reuters, Анес сарфи назар аз мавҷудияти раъйи кофӣ масъулияти роҳбарии давлатро ба дӯш гирифт. Вакилони ҳизби президенти пешин - "Ҳаракат ба сӯи сотсиализм" - нишасти порлумонро тарк карданд. Аммо Додгоҳи конститутсионии Боливия президентии Жанин Анесро тасдиқ кард. Дар пойтахти Боливия, шаҳри Ла-Пас миёни тарафдорони Жанин Анес ва президенти пешин Эво Моралес задухӯрд шуруъ шуд.

Президенти Боливия Эво Моралес 10 ноябр, пас аз се рӯзи тазоҳуроти гуруҳҳои мухолифи ин кишвар аз мақомаш истеъфо дод. Фармондеҳи Қувваҳои мусаллаҳи Боливия Уилямс Калиман низ рӯзи якшанбе истеъфои Эво Моралесро талаб кард.

Қаблан Моралес дар пасманзари эътирозҳои кишвараш розӣ шуда буд, ки натиҷаҳои расмии интихоботи президентии ахирро бекор ва интихоботи нав эълом кунад. Вай ҳамчунин гуфт, комиссияи интихоботиро барҳам дода, онро аз нав ташкил мекунад.

Эътирозҳо дар Боливия пас аз он оғоз шуданд, ки Додгоҳи олии интихоботии ин кишвар натиҷаҳои интихоботи президентии 20 октябрро эълом кард. Бар асоси натиҷаҳо, Моралес, ки бори чаҳорум президент эълом шуд, беш аз 47 дарсад ва рақиби асосии ӯ Карлос Меса 36 дарсади раъйро ба даст овардаанд.

10 дарсади раъйи бештар ба Моралес имкон медод, ки дар даври аввал баранда эълом шавад. Меса натиҷаҳои интихоботро қабул накард ва бо талаби баргузории раъйгирии нав ҷонибдорони худро ба тазоҳурот даъват намуд. Дар чандин шаҳри Боливия миёни тазоҳургарон ва маъмурони пулис задухӯрдҳо сурат гирифта, дасти кам 3 кас кушта шуд.

Мушакпартоӣ ва ҳамлаи Исроил ба Ғазза давом дорад

Мушакпартоӣ ва ҳамлаи ҳавоии навори Ғазза рӯзи дувум аст, ки аз сӯи Исроил давом дорад. Рӯзи чаҳоршанбе дар пайи ҳамлаҳои ҳавоии Ғазза ду одам кушта шуд. Шумори умумии қурбониҳо аз ҳисоби фаластиниҳо ба 12 тан расид.

Дар камтар аз 2 рӯз ба сӯи Исроил низ аз ҳудуди Ғазза 250 мушак партоб ва қисме аз онҳо дар ҳаво маҳв карда шуд. Дар бораи кушташудаҳои Исроил ҳанӯз хабаре нест, аммо бештар аз 40 тан ҷароҳати сабук бардоштааст.

Артиши Исроил шоми сешанбе ба чаҳоршанбе дар "Твиттер" эълом кард, ки нерӯҳои ҳавоии ин кишвар манзилҳои зисти мақомҳои баландпояи созмони "Ҷиҳоди исломӣ"-ро ҳадаф қарор доданд. Ба иттилои манбаъ, дар навори Ғазза раҳбари "Ҷиҳоди исломӣ" Баҳа Абу ал-Ато кушта шудааст.

Гуруҳи "Ҷиҳоди исломии Фаластин" маҳви Исроилро ҳадаф гузоштааст. Фаъолияти он дар Исроил, ИМА ва кишварҳои Иттиҳоди Аврупо манъ карда шудааст. Вазорати умури дохилии Исроил мегӯяд, Эрон созмони мазкурро сармоягузорӣ мекунад.

Нерӯҳои Исроил ҳамчунин ба самти Димишқи Сурия низ чандин мушак партоб карданд. Дар ин бора хабаргузории расмии Сурия -- SANA иттилоъ дод. Дар Димишқ манзили зисти яке аз раҳбарони дигари созмони "Ҷиҳоди исломӣ" Акрам ал-Ҷуриро ҳадаф қарор доданд.

Пас аз кушта шудани раҳбари "Ҷиҳоди Исломӣ" аз навори Ғазза ба Исроил низ чандин мушак партоб шудааст.

Таркиши маргбор дар Кобул баъд аз озодии раҳбарони Толибон

Мақомоти Вазорати корҳои дохилии Афғонистон гуфтанд, дар таркиши мошини бомбгузоришуда дар Кобул дастикам 7 нафар кушта ва чандин тани дигар захмӣ шудаанд. Нусрат Раҳимӣ, сухангӯи вазорат, ба расонаҳои хориҷӣ гуфтааст, таркиш субҳи 13-уми ноябр дар минтақаи Қасаба, дар шимоли фурудгоҳи Кобул, рух дод.

То кунун масъулияти ҳамларо касе ба уҳда нагирифтааст. Ҳам Толибон ва ҳам гуруҳи даҳшатафкани "Давлати исломӣ" дар Кобул фаъоланд.

Нусрат Раҳимӣ гуфт, ҳамаи қурбониён ғайринизомӣ ҳастанд ва афзуд, "эҳтимол шумори кушташудаҳо афзоиш ёбад".

Ин таркиш як рӯз баъд аз он рух дод, ки ҳукумати Афғонистон се раҳбари Толибон, бо шумули Анас Ҳаққонӣ, бародари хурдии раҳбари шабакаи Ҳаққониро бо шарти раҳоии ду профессори Донишгоҳи амрикоӣ дар Афғонистон озод кард.

Раҳоии онҳоро Ашраф Ғанӣ, раиси ҷумҳури Афғонистон эълон кард, аммо дар бораи сарнавишти асирони ғарбӣ маълумот надод. Мушаххас нест, онҳо кай ва дар куҷо озод хоҳанд шуд.

Кевин Кинг аз Амрико ва Тимоти Викс аз Австралия моҳи августи соли 2016 дар маркази Кобул рабуда шуданд.

Баъзе аз таҳлилгарон умедвор буданд, ки тасмими ахир метавонад хушунатҳоро дар Афғонистон коҳиш дода, роҳро барои музокироти сулҳ ҳамвор кунад. Аммо на Толибон ва на шабакаи Ҳаққонӣ то кунун дар бораи табодули зиндониён изҳори назар накардаанд.

Бархурди сарди Кремл ба пешниҳод дар бораи мулоқоти Путин бо Зеленский

Президенти пешини Қазоқистон Нурсултон Назарбоев пешниҳод кард, ки раҳбарони Украина ва Русия Владимир Зеленский ва Владимир Путин метавонанд, ки дар кишвараш гуфтугӯи мустақимеро анҷом диҳад.

Назарбоев 12-уми ноябр дар як ҳамоиш дар шаҳри Нурсултон гуфт, Зеленский барои иштирок дар чунин мулоқот розӣ шудааст. Вале зоҳиран, Кремл он қадар ҷонибдори ин пешниҳод нест.

Сухангӯи президенти Русия Дмитрий Песков рӯзи сешанбе ба рӯзноманигорон гуфт, Москва ҷонибдори баргаштани муносибатҳои Русияву Украина ба "ҳолати оддӣ" аст, вале ин бидуни "ҳамкории Украина имкон надорад".

"Бешубҳа, Путин бар ин аст, ки мулоқот барои мулоқот камтар суд меорад. Барои он бояд омодагӣ дид. Мо ба омодагиҳо барои "шакли нормандӣ" тамаркуз мекунем",-изҳор дошт Песков бо ишора ба шакли вохӯрие, ки раҳбарони Украина, Русия, Фаронса ва Олмонро ба ҳам меорад.

Муносибатҳои Москва ва Киев пас аз он бад шуданд, ки Русия дар соли 2014 нимҷазираи Қримро ишғол ва аз ҷудоихоҳон дар шарқи Украина ҷонибдорӣ кард. "Агар ба онҳо (Путину Зеленский) минбари бетараф лозим бошад, ман пешниҳод кардам",-гуфт Назарбоев.

Гумонбарон дар қатли тоҷири қирғиз боздошт шуданд

Гумонбарони қатли тоҷир Айеркен Саймаитӣ ангезаҳои ҷинояти содиркардаашонро ошкор карданд. Дар ин бора аз мақомоти пулиси Туркия хабар доданд.

"Шаҳрванди Сурия Алӣ Исбеҳ ва ду шаҳрванди Қирғизистон - Ҳусейн Акматалиев ва Абдуллоҳ Энвер боздошт шуданд. Шаҳрванди Сурия шиносномаи ҷаълӣ дошт. Онҳо дар Сурия бо ҳам ошно шудаанд. Қирғизистониҳо моҳе пеш ба Туркия омаданд. Боздоштшудаҳо дар бозпурсӣ гуфтанд, ки тоҷирро ба хотири мусалмон набуданаш куштаанд", - гуфт Атилла Килич, намояндаи пулиси Туркия.

Айеркен Саймаитӣ шоми 10 ноябр дар шаҳри Истамбули Туркия кушта шуд. Саймаитиро замоне куштанд, ки вай дар наздикии қаҳвахонае дар минтақаи Фотеҳи Истамбул нишаста буд. Қотил аз ҷои ҳодиса фирор кард.

Бахши қирғизии Радиои Озодӣ 29 майи соли равон таҳқиқоти рӯзноманигор Алӣ Тоқтакуновро зери унвони "Аз пайи миллионҳо доллари аз Қирғизистон бурдашуда" нашр кард, ки бар асоси он, тайи солҳои 2011- 2017 ҳудуди 700 млн доллар ба воситаи бонкҳои гуногун ба кишварҳои хориҷ, аз ҷумла ИМА ва Ҳонгконг интиқол дода шудааст.

Расидҳои бонкӣ нишон медиҳанд, ки соҳибкор Айэркин Саймаитӣ ҷамъан ба 13 кишвар, аз ҷумла Туркия, Бритониё, АМА, Олмон ва Русия садҳо миллион доллар фиристодааст. Худи Саймаитӣ солҳои 2015-2017 аз Туркия бо номи ҳамсараш ба ҳисоби бунёди хайрияи ба номи Исмоил Матраимов дар Қирғизистон $2 338 700 гузарондааст.

Ин бунёд ба номи Руслан Матраимов -- бародари хурдии муовини пешини раиси Хадамоти гумруки Қирғизистон Райимбек Матраимов сабти ном аст.

Пештар аз ин хабар дода шуд, ки бо гумони қатли Айеркен Саймаитӣ ду шаҳрванди Қирғизистон ва як шаҳрванди Сурия боздошт шудааст.

Захмӣ шудани 5 шаҳрванди Тоҷикистон дар садамаи нақлиётӣ дар Қазоқистон

Дар як садамаи нақлиётӣ дар Қазоқистон панҷ шаҳрванди Тоҷикистон маҷрӯҳ шудаанд. Ҳодиса дар вилояти Қарағанда рух додааст. Дар сомонаи "Каzakhstan today" омадааст, шаби 11-уми ноябр бинобар яхбандии роҳҳо ронандаи автобуси Ван Ҳул, ки шаҳрванди Қазоқистон будааст, ҳангоми ҳаракат ба самти Алмаато аз ӯҳдаи идораи мусофирбар набаромада, ба як мошини дигар бармехӯрад.

Дар натиҷа 7 мусофири автобус, ки 5 нафарашон зодагони Тоҷикистон буданд, маҷрӯҳ мешаванд. Шумораи умумии мусофирони автобус 15 нафар будааст. Маҷрӯҳон феълан дар бемористон қарор доранд. Садамаи мазкур аз сӯи мақомоти интизомӣ таҳқиқ мешавад.

Ҷудо кардани $300 млн барои таъмири маҷмааи мушакии ба номи Назарбоев

Аскар Мамин, сарвазири Қазоқистон дар ҷаласае дар шаҳри Нурсултони он кишвар гуфт, барои рушди маҷмааи мушакии муштараки Русияву Қазоқистон "Байтерек" 300 миллион доллар ҷудо хоҳад шуд. Моҳи сентябри имсол расонаҳои Русия хабар доданд, ки маҷмааи мазкур ба номи президенти пешини Қазоқистон Нурсултон Назарбоев гузошта шудааст.

"Моҳи апрели соли ҷорӣ дар доираи мулоқоти президенти Қазоқистон Қосимҷомарт Тоқаев бо ҳамтои русаш Владимир Путин ҷонибҳо ба хулоса расиданд, ки амалисозии тарҳи густарда дар Байконур - маҷмааи мушакии "Байтерек" муштаракан ба роҳ монда шавад",-нақли қавл кардааст хабаргузории "Интерфакс" аз Аскар Мамин.

Мамин муҳлати амалисозии тарҳро ошкор накард, аммо ба гуфтаи вай, корҳои сохтмонӣ ба зудӣ шуруъ мешаванд. Ба навиштаи "Интерфакс", бо ташаббуси Русия тарҳ номи "Оғози Назарбоев"-ро хоҳад гирифт.

Моҳи сентябри соли ҷорӣ президенти пешини Қазоқистон Нурсултон Назарбоев ба пешниҳоди президенти Русия Владимир Путин розӣ шуд, ки маҷмааи мушакии "Байтерек" ба "Назарбоев" табдили ном кунад.

Назарбоев ҳанӯз дар замони побарҷоии Иттиҳоди Шӯравӣ - дар соли 1991 - сари қудрат омада, танҳо баҳори имсол аз мақоми президентӣ истеъфо дод. Ҳомиёни ҳуқуқ ва мунаққидон борҳо изҳор доштанд, ки Назарбоев дигарандешонро таҳаммул надорад ва озодиҳову ҳуқуқҳои сокинонро маҳдуд мекунад.

Корея бемористонҳои Узбекистонро бо таҷҳизоти нав таъмин мекунад

"Эскимбонк"-и Кореяи Ҷанубӣ барои харидории таҷҳизоти нави тиббӣ дар бемористонҳои Узбекистон 74 миллион доллар ҷудо мекунад.

Вазорати сармоягузорӣ ва тиҷорати хориҷии Узбекистон 11 ноябр хабар дод, ки дар поёни мулоқот бо намояндагони "Эскимбонк" дар шаҳри Тошканд санади ҳамкорӣ измо шудааст.

Тарҳи мазкур муҷаҳҳаз сохтани бештар аз 150 муассисаи тиббиро дар навоҳии дурдаст ва деҳоти Узбекистон бо таҷҳизоти муосири тиббӣ пешбинӣ мекунад.

Ёфтҳои бештар

Гузоришҳои видеоӣ

Ба шаҳраки як замон машҳури Шӯроб чӣ шуд? ВИДЕО
лутфан мунтазир бошед

Феълан кор намекунад

0:00 0:03:01 0:00
XS
SM
MD
LG