Русия барои муқобила бо артиши Украина дастикам ҳазор сарбозро аз минтақаҳои ишғолӣ бароварда, ба вилояти Курск фиристодааст. Дар ин бора шабакаи CNN бо такя ба чанд манбаи наздик ба хадамоти ҷосусии ғарбӣ хабар додааст. Аммо ба гуфтаи ин расона, неруҳои асосии Русия ҳамчунон дар минтақаҳои ишғолӣ дар Украина қарор доранд.
"Русия барои ҷанг алайҳи Украина садҳо ҳазор сарбозро сафарбар кардааст ва барои ҳамин интиқоли чанд ҳазор низомӣ дар вақтҳои наздик ягон пайомади ҷиддӣ надорад,"-гуфтаанд ҳамсуҳбатони CNN.
Ба гуфтаи ҳамсуҳбатони ин шабака, ба назар мерасад Русия асосан сарбозони қарордодиро ба вилояти Курск мефиристад.
Артиши Украина 6-уми август ба вилояти Курски Русия ҳамла кард. Мақомоти украинӣ мегӯянд, даҳҳо нуқтаҳои аҳолинишин, аз ҷумла маркази ноҳияи Судҷа дар зери назорати артиши ин кишвар аст. Ҳукумати Русия ин гуна хабарҳоро рад мекунад ё шарҳ намедиҳад.
