Дастаи мунтахаби ҷавонони то 20-солаи футболи Тоҷикистон (U-20) дар доираи омодагӣ ба марҳилаи ниҳоии Ҷоми Осиё-2023 дар мусобиқаи байналмилалии «International Thanh Nien Cup», ки аз 6-ум то 12-уми январи соли оянда дар Ветнам баргузор мешавад, ширкат меварзад.
Ба иттилои Федератсияи футболи Тоҷикистон, рақибони футболбозони ҷавони тоҷик дар ин мусобиқа дастаҳои мунтахаби ҷавонони Ветнам, Таиланд ва Малайзия мебошанд.
Ёдовар мешавем, мунтахаби ҷавонони Тоҷикистон (U-20) дар марҳилаи ниҳоии Ҷоми Осиё-2023, ки аз 1-ум то 18-уми марти соли оянда дар Узбекистон доир мегардад, дар гурӯҳи “С” бо дастаҳои Урдун (2-юми март), Умон (5-уми март) ва Кореяи Ҷанубӣ (8-уми март) бозӣ хоҳад кард.
Бар асоси қуръакашӣ 16 дастаи иштироккунандаи марҳилаи ниҳоӣ ба чаҳор гурӯҳи чордастаӣ тақсим шуданд. Аз рӯи натиҷагирии марҳилаи ниҳоии қаҳрамонии Осиё-2023 миёни ҷавонон чаҳор дастаи беҳтарин ба Ҷоми ҷаҳон, ки соли оянда дар Индонезия баргузор мешавад, роҳхат мегиранд.
Таркиби гурӯҳҳои марҳилаи ниҳоии Ҷоми Осиё-2023 миёни дастаҳои мунтахаби ҷавонони то 20-сола:
Гурӯҳи «А»: Узбекистон, Индонезия, Ироқ, Сурия.
Гурӯҳи «В»: Қатар, Австралия, Ветнам, Эрон.
Гурӯҳи «С»: Кореяи Ҷанубӣ, Тоҷикистон, Урдун, Умон.
Гурӯҳи «D»: Арабистони Саудӣ, Ҷопон, Чин, Қирғизистон.
Бояд гуфт, дастаи мунтахаби ҷавонони то 20-солаи футболи Тоҷикистон бо роҳбарии сармураббӣ Аҳлиддин Турдиев, ки дар марҳилаи интихобии Ҷоми Осиё-2023 дар гурӯҳи «I» дар Душанбе ғолиб шуд, ба марҳилаи ниҳоии қаҳрамонии қора роҳ ёфт.
Футболбозони ҷавони тоҷик бори панҷум ба марҳилаи ниҳоии Ҷоми Осиё роҳхат гирифтанд. Онҳо қаблан солҳои 2006, 2008, 2016 ва 2018 дар Ҷоми Осиё иштирок карда буданд. Мусобиқа то соли 2006 ҳамчун қаҳрамонии Осиё миёни ҷавонон ҳар сол доир мегашт, аз соли 2008 миёни ҷавонони то 19-сола дар ду сол як маротиба баргузор мешуд. Нахустин бор аст, ки Ҷоми Осиё миёни ҷавонони то 20-сола доир мегардад.
