Ҳай Давидов, ҳунарпешаи исроилӣ ва муассиси театри мазҳакавии “Ханда-ханда”-и яҳудиҳои бухороӣ, бо студияи "Узбекфилм" ёддошти тафоҳум дар бораи наворгирии филми муштараке бо номи “Тӯй муборак” имзо кард.
Маросим рӯзи 16-уми сентябр дар Тошканд барпо шуд ва зери ин санад Ҳай Давидов, ба ҳайси ҳаммуаллифи филм ва аз ҷониби Узбекистон Фирдавс Абдухолиқов, раиси кулли Оҷонси синамогарони Узбекистон имзо гузоштанд.
Дар қадами баъдӣ созишномаи ҳамкорӣ ба тасвиб мерасад ва нақша ин аст, ки соли оянда ин филм наворгирию таҳия шавад. Коргардони филм Одед Раз ва яке аз продюсерҳо Адар Шафран аз Исроил мебошанд. Харҷи пардохти филм миёни ду кишвар тақсим мешавад.
Ҳай Давидов, ки дар Исроил дар оилаи яҳудиҳои Бухоро тарбия ёфтааст, мегӯяд, аз имконияти ҳамкорӣ бо синамогарони Узбекистон интизороти хубе дорад. Ӯ мегӯяд, мазҳакаи тахайюлӣ бо ширкати бародараш Ронен Давидов ва эҷодкорони дигари яҳудӣ таҳия шуда, саргузаштҳои солҳои 1990-91-уми замони тарки Иттиҳоди Шӯравӣ кардани ҷамъияти яҳудиҳои Бухороро тасвир мекунад.
Қисса аз ишқи духтаре - овозхони яҳудӣ ва ҷавони мусиқинавози мусалмон қисса мекунад, ки ҳарду дар як ансамбли ҳунарӣ бо ҳам кор мекунанд. Баъди як сол меваи ин ишқ – писаре дар Исроил чашм ба дунё мекушояд.
Ҳай Давидов, ки ҳамроҳ бо Ронен муаллифи сенарияву ҳампродюсерҳои ин филм мебошад, дар як суҳбаташ бо Радиои Озодӣ рӯзи 17-уми сентябр гуфт, дар зиндагии воқеӣ “ишқи як яҳудиву як мусалмон имконпазир ҳам бошад, издивоҷи ин ду ба хотири анъанаву расму русумҳои муҳофизакоронаи диниашон шояд мушкил аст”.
“Вале мо бо ин филм мехоҳем, нишон бидиҳем, ки инсон дар ҳар ҷойи дунё ҳамон инсон аст, - гуфт Ҳай Давидов. - Мо, яҳудиҳои бухороие, ки дар Тоҷикистону Узбекистон зиндагӣ кардаем, бо ин мардум якҷону якдил ҳастем, мисли бародар ҳастем, меҳру муҳаббати баланд дорем бо ин ду халқ. Вале қиссаи ишқи ин ду ҷавон дар филм роҳҳале дорад, ки ман онро махфӣ нигоҳ медорам ва вақте фурсаташ расид, тамошобин худ онро мебинад”.
Давидов дар баробари кор дар театри “Ханда-ханда”-аш инчунин дар филмҳои зиёде дар Исоил нақш бозӣ кардааст ва яке аз охирин филмҳо бо иштироки ӯ моҷарои ҷосусии “Теҳрон” аст, ки соли 2020, дар авҷи давраи пандемияи коронавирус дар шабакаи Netflix нашр шуд.
Ӯ мегӯяд, баъди марҳилаи сангини пандемия, ки ба нақшаҳои сафараш ба Тоҷикистон ҳам осеб расонид, умедвор аст, ки ниҳоят ба дидор бо ҳаводоронаш ба Душанбе ҳам меравад. Ин сафар, ки бо мусоидати ширкати JM-и бародарон Муродовҳо барпо хоҳад шуд, то баҳори соли оянда ба нақша гирифта шудааст. Ӯ гуфт, пазмони тамошобинони тоҷикистониаш шудааст ва умедвор аст, ки ин нақшааш бе ҳеҷ садду мушкиле ҷомаи амал мепӯшад.
Гуфтугӯ