Мусобиқаи қаҳрамонии Осиё оид ба велосипедронӣ байни наврасон, ҷавонон, калонсолон, бонувон ва шахсони имконияташон маҳдуд аз 25-ум то 29-уми марти соли равон дар роҳҳои пойтахти Тоҷикистон ва шоҳроҳи Душанбе – Рӯдакӣ - Хуросон – Бохтар – Душанбе баргузор мешавад, хабар медиҳад сомонаи мақомоти иҷроияи ҳокимияти давлатии шаҳри Душанбе.
Ба иттилои манбаъ, масъалаи баргузор кардани мусобиқаи қаҳрамонии Осиё оид ба велосипедронӣ соли 2022 дар Тоҷикистон моҳи июни соли гузашта дар мулоқоти раиси шаҳри Душанбе Рустами Эмомалӣ ва президенти Конфедератсияи велосипедронии Осиё Шайх Усома Аҳмад Ал-Шафар мувофиқа шуда буд.
Тибқи қарори раиси шаҳри Душанбе аз 5-уми марти соли ҷорӣ барои гузаронидани мусобиқаи мазкур аз ҳисоби маблағҳои озоди буҷети шаҳрӣ 532 500 сомонӣ ихтисос дода шудааст.
Ба гуфтаи Озодхон Давлатшоев, раиси Федератсияи велосипедронии Тоҷикистон, ин аввалин чорабинии варзишии сатҳаш баланд дар кишвар дар давраи пас аз пандемияи COVID-19 мебошад, ки дар он ширкати варзишгарон аз 25 кишвари Осиё дар назар аст.
Зимнан, велосипедронӣ дар замони шӯравӣ дар Тоҷикистон яке аз намудҳои маъмулу пешқадами варзиш маҳсуб мешуд. Варзишгарони тоҷик дар ин риштаи олимпӣ ба дастовардҳои бузург мушарраф шуда буданд. Намояндагони Тоҷикистон Станислав Шепел, Саид Гусейнов ва Николай Макаров дар ҳайати дастаи мунтахаби Иттиҳоди Шӯравӣ борҳо дар мусобиқоти ҷаҳонӣ пирӯзӣ ба даст овардаанд.
Вале солҳои Истиқлолияти Тоҷикистон велосипедронӣ қариб аз байн рафта буд ва пас аз таъсиси Федератсияи велосипедронии кишвар (соли 2009) ин намуд дар ҷумҳурӣ азнав эҳё шуд.
