Кумитаи байнулмилалии паралимпӣ (IPC) ба далели фишори намояндагони кишварҳои дигари ширкаткунандаи мусобиқот дар пасманзари амалиёти вижаи низомии Русия дар Украина тасмими аслии худро тағйир дод. IPC дархости варзишгарони Русия ва Беларусро барои ширкат дар Бозиҳои паралимпии соли 2022 дар Пекин рад кард.
Ин тасмимро рад кардани дастаҳои зиёде аз рақобат бо варзишгарони Русия ва Беларус, ҳамчунин хоҳиши ҷилавгирӣ аз моҷароҳо дар ҷараёни Бозиҳо ангеза додааст.
Ба иттилои sportbox.ru, ба ин тартиб, ба варзишгарони Русия ва Беларус барои ширкат дар Бозиҳои зимистонаи паралимпӣ, ки имрӯз, 4-уми март, оғоз мешаванд, иҷоза намедиҳанд.
- Таъмини бехатарӣ ва ҳифзи варзишгарон барои мо ахамияти аввалиндарача дорад, вазъият дар деҳаи олимпӣ тезу тунд шуда, ҳоло шиддат гирифтааст. Пеш аз ҳама, мо вазифадорем дар доираи миссияи паралимпӣ, ки дар конститутсия қайд шудааст, ташкили бомуваффақияти Бозиҳои паралимпиро кафолат диҳем ва назорат кунем, то ки дар варзиш рӯҳияи бозии одилона, бе зӯроварӣ ва хатар ба саломатии варзишгарон, ҳукмфармо бошад.
Беҳбудии варзишгарон хамеша барои мо вазифаи калидӣ буд. Қарори имрӯза бевосита ба 83 варзишгар - паралимпичӣ дахл дорад. Аммо агар варзишгарон - паралимпичиёни Русия ва Беларус дар Пекин боқӣ монанд, кишварҳои боқимонда эҳтимол дорад, ки бозиҳоро тарк кунанд. Ва он гоҳ, ба эҳтимоли зиёд, мо Бозиҳои қобили амал нахоҳем дошт. Агар ин рӯй диҳад, оқибаташ хеле бад хоҳад буд, - гуфт президенти IPC Эндрю Парсонс.
Бозиҳои зимистонаи паралимпӣ-2022 рӯзҳои 4-13 март дар Пекин баргузор мешаванд. Дар Паралимпиада шаш намуди варзиш дохил аст: лижаронии кӯҳӣ, биатлон, пойгаи лижаронӣ, ҳоккей дар чана, сноуборд ва кёрлинг дар аробачаи маъюбон. Дар маҷмӯъ, варзишгарони маълул аз 49 кишвар барои 78 маҷмӯи медалҳо мубориза мебаранд.
