Владимир Путин, раисиҷумҳури Русияро муваққатан аз мақоми президенти фахрии Федератсияи байнулмилалии дзюдо (IJF) барканор кардаанд. Шӯрои ҷаҳонии дзюдо 27-уми феврал тасмими худро ба ҳуҷуми Русия ба Украина пайванд дод.
"Федератсияи байнулмилалии дзюдо, бо назардошти ҷанг дар Украина, мақоми Владимир Путинро ҳамчун президенти фахрӣ ва сафири Федератсия бозмедорад," – гуфта шудааст дар изҳороти IJF.
Ҳафтаи гузашта Федератсияи байнулмилалии дзюдо гуфт, ки мусобиқаи Grand Slam-2022-ро дар Қазони Русия бекор кардааст. Ин чорабинии варзиширо рӯзҳои 20-22-юми майи имсол ба нақша гирифта буданд.
