Пирӯзии мунтахаби ҷавонони Тоҷикистон (U-20) дар бозии дуюми санҷишӣ дар Туркия

Дастаи мунтахаби футболи ҷавонони Тоҷикистон (U-20) дар бозии дуюми санҷишӣ дар доираи ҷамъомади таълимиву тамринӣ дар Туркия тими «Фремад Амагер» (U-20)-и Данияро бо ҳисоби 2:1 шикаст дод, хабар медиҳад сомонаи Федератсияи футболи Тоҷикистон.

Ба иттилои манбаъ, ин бозии санҷишӣ 16-уми феврал дар маҷмааи варзишии «Титаник»-и шаҳри Қадрия доир гардид. Голҳои мунтахаби ҷавонони Тоҷикистонро Асадбек Зиёзод ва Абдулло Шарипов ба самар расониданд.

Аҳлиддин Турдиев, сармураббии тими мунтахаби ҷавонони то 20-солаи Тоҷикистон, ки ин бозиро низ бо ду ҳайати мухталиф баргузор намуд, ҳамаи бозигарони дар ихтиёри даста бударо озмоиш кард.

Ёдовар мешавем, бозии аввали санҷишии футболбозони ҷавони тоҷик дар Туркия бо тими «Ворскла» (U-20)-и Украина бо ҳисоби 0:0 анҷом ёфта буд.

Дастаи мунтахаби футболи ҷавонони Тоҷикистон (U-20) бозии сеюми санҷиширо дар доираи ҷамъомади таълимиву тамринӣ дар Туркия 18-уми феврал бо тими «Чертаново», ки дар лигаи ҷавонони Русия бозӣ мекунад, доир менамояд.

Бозии санҷишӣ

Тоҷикистон (U-20) – «Фремад Амагер» (Дания, U-20) – 2:1

Голҳои Тоҷикистон: Асадбек Зиёзода, Абдулло Шарипов.

Тоҷикистон (U-20): Сафармад Ғаффоров (Суҳробхуҷа Юсупов, 68), Раҳматшо Раҳматзода (Содиқҷон Қурбонов, 64), Фахриддин Аҳтамов (Рузимуҳаммад Абдураҳмонов, 57), Меҳрубон Каримов (Меҳрубони Абдурауф, 46), Асадбек Зиёзода (Шаҳриёри Иноятулло, 46), Меҳроб Асоев (Фатҳулло Олимзода, 46), Азизбек Ҳаитов (Ҳамзаҷон Аҳтамов, 46), Кабир Салимшоев (Азизбек Далиев, 46), Алиҷони Айнӣ (Аббос Андалебов, 64), Ҳамадонӣ Камолов (Абдулло Шарипов, 64), Абдулфаттоҳ Худойдодзода (Хуршед Давлатзода, 46, Суннатулло Азизов, 72).

16-уми феврал. Қадрия, Туркия. Варзишгоҳи «Титаник».

Бозиҳои боқимондаи санҷишии мунтахаби ҷавонони Тоҷикистон (U-20) дар ҷамъомад дар Туркия:

18-уми феврал (ҷумъа)

Тоҷикистон (U-20) – «Чертаново» (Русия, U-20)

19-уми феврал (шанбе)

Тоҷикистон (U-20) – «Криля Советов» (Русия, U-20)

22-юми феврал (сешанбе)

Тоҷикистон (U-20) – Туркия (U-20)