Пайвандҳои дастрасӣ

Хабари нав

Иштироки Комроншоҳи Устопириён дар мусобиқаи ҷудо Paris Grand Slam 2022


Комроншоҳи Устопириён, паҳлавони шинохтаи тоҷик.

Дар мусобиқаи ҷудо Paris Grand Slam 2022, ки рӯзҳои 5-6-уми феврал дар пойтахти Фаронса – Порис - баргузор мешавад, Тоҷикистонро танҳо як варзишгар Комроншоҳи Устопириён - намояндагӣ хоҳад кард.

Ба иттилои сомонаи расмии Федератсияи байналмилалии ҷудо (IJF), дар Paris Grand Slam 2022 ширкати 308 варзишгар (166 мард ва 142 зан) аз 54 кишвари панҷ қитъаи олам дар назар аст.

Ёдовар мешавем, Комроншоҳи Устопириён, паҳлавони шинохтаи тоҷик, дар Grand Prix Portugal 2022, ки рӯзҳои 28-30-юми январ дар шаҳри Алмадаи Португалия баргузор шуд, дар вазни то 90 кило медали биринҷӣ ба даст овард. Ӯ дар ин мусобиқа ягона варзишгар аз Тоҷикистон буд.

Комроншоҳ ба рақобат аз даври дуюм пардохт. Паҳлавони тоҷик баъди ду пирӯзӣ ба рақибонаш Достон Мейлиев (Узбекистон) ва Артём Бубир (Украина) ба даври ниманиҳоӣ роҳ ёфт. Вале Комроншоҳ дар нимфинал аз Кристиан Парлати (Италия) мағлуб шуд. Баъдан барои ҷойи севум Имеда Гоголадзеро аз Гурҷистон шикаст дод ва соҳиби медали биринҷӣ, инчунин ҷоизаи молӣ ба маблағи як ҳазор евро гардид.

Комроншоҳи Устопириён баъди Grand Prix Portugal 2022 дар радабандии ҷаҳонӣ дар вазни то 90 кило як зина боло шуд ва дар ҳамин ҳол бо касби 2360 имтиёз мақоми 11-умро азони худ кардааст.

Дар вазни то 90 кило то ҳоло 25 варзишгар барои ширкат дар мусобиқаи дувуми байналмилалии имсола дар Порис номнавис шудаанд. Дар рӯйхат бар асоси радабандии ҷаҳонӣ номи Комроншоҳ баъди Давлат Бобонов (Узбекистон), Маммадалӣ Меҳдиев (Озарбойҷон) ва Бека Гвиниашвили (Гурҷистон) дар сатри чорум зикр шудааст.

Барномаи мусобиқа:

5-уми феврал (шанбе). Қувваозмоиҳо дар вазнҳои -48 кг, -52 кг, -57 кг, -63 кг миёни занон; -60 кг, -66 кг, -73 кг миёни мардон.

6-уми феврал (якшанбе). Қувваозмоиҳо дар вазнҳои -70 кг, -78 кг, +78 кг миёни занон; -81 кг, -90 кг, -100 кг, +100 кг миёни мардон.

Соли гузашта дар Paris Grand Slam 2021 Тоҷикистонро танҳо Сомон Маҳмадбеков намояндагӣ кард. Ӯ дар вазни то 73 кило мақоми панҷумро касб намуд. Сомон баъди се пирӯзӣ бар рақибонаш аз Муғулистон, Испания ва Озарбойҷон ба даври ниманиҳоӣ роҳ ёфт, вале ӯ дар нимфинал аз рақиби фаронсавиаш Тео Рикуин мағлуб шуд ва баъдан барои медали биринҷӣ қувваозмоиро ба Александру Райку аз Руминия бохт.

Шарҳҳо

Шарҳи нав расид
Идома
XS
SM
MD
LG