Дастаи мунтахаби наврасони футболи Тоҷикистон (U-16) ба Туркия рафт

Дастаи мунтахаби наврасони футболи Тоҷикистон (U-16) дар доираи омодагӣ ба мусобиқаи интихобии Ҷоми Осиё-2022 субҳи панҷшанбеи 20-уми январ барои доир кардани ҷамъомади таълимиву тамринии дуҳафтаина ба Туркия парвоз намуд, хабар медиҳад сомонаи Федератсияи футболи Тоҷикистон.

Ба иттилои манбаъ, сармураббии мунтахаби наврасони Тоҷикистон (U-16) Зайниддин Раҳимов ба ҷамъомади таълимиву тамринии даста дар Туркия, ки аз 20-уми январ то 4-уми феврал идома хоҳад кард, 20 бозигар – 2 дарвозабон, 6 ҳимоятгар, 8 нимҳимоятгар ва 4 ҳамлагарро даъват кардааст.

Дар доираи ҷамъомади таълимиву тамринӣ дар Анталия чаҳор бозии санҷишӣ дар назар аст. Дар бораи ҳарифони мунтахаби наврасони Тоҷикистон дертар маълумот дода мешавад.

Дастаи мунтахаби наврасони Тоҷикистон (U-16) пас аз анҷоми ҷамъомади таълимиву тамринӣ дар Туркия озими Беларус шуда, дар 18-умин мусобиқаи байналмилалии “Ҷоми рушд”, ки аз 5-ум то 14-уми феврал дар шаҳри Минск баргузор мешавад, ширкат хоҳад кард.

Ҳайати дастаи мунтахаби наврасони Тоҷикистон (U-16) дар ҷамъомади таълимиву тамринӣ дар Туркия:

Дарвозабонҳо: Суннатулло Исмоилов, Абубоқир Маҳмудов (ҳарду аз Академияи футболи ФФТ);

Ҳимоятгарон: Диловари Ҷамшедзода, Муҳаммадҷон Орипов, Баракатулло Неъматуллозода, Абубакр Саидов, Муҳаммадҷони Тоҳирӣ, Бахтиёр Махсумов (ҳама аз Академияи футболи ФФТ);

Нимҳимоятгарон: Абубакр Сулаймонов, Аҳмадҷони Абусатторӣ, Нарзулло Сангалиев, Абдуманнон Ҳоҷӣ Нуъмонзода, Беҳрӯз Хуҷаев, Меҳрубон Ҳамидов, Бахтовар Ғаюров, Муҳаммад Қурбонов (ҳама аз Академияи футболи ФФТ);

Ҳамлагарон: Билол Бобоев, Масрур Ғафуров, Диловар Азизов, Мусо Қаҳҳоров (ҳама аз Академияи футболи ФФТ).

Сармураббӣ – Зайниддин Раҳимов.