Пайвандҳои дастрасӣ

Хабари нав

Медали нуқраи варзишгари тоҷик дар қаҳрамонии каратэи Осиё


Умед Сафаров, варзишгари тоҷик, дар мусобиқаи қаҳрамонии Осиё оид ба каратэ, ки рӯзҳои 18-22-юми декабр дар шаҳри Алматои Қазоқистон баргузор шуд, медали нуқра ба даст овард.

Ӯ дар ин мусобиқаи қитъавӣ дар вазни 84 кило ба финал роҳ ёфт, вале дар қувваозмоии ниҳоӣ ноком шуд ва барои ҷойи дуюм бо медали нуқра сарфароз гашт.

Мусобиқаи қаҳрамонии каратэи Осиё миёну занон ва мардон сурат гирифт. Ба иттилои сомонаи Кумитаи олимпии Қазоқистон, дар ҳисоби умумидастаӣ мунтахаби Эрон бо касби 39 медал (14 тилло, 10 нуқра и 15 биринҷӣ) мақоми аввлро соҳиб шуд.

Дастаи мизбон - мунтахаби Қазоқистон, ки 32 медал (11 тилло, 8 нуқра ва 13 биринҷӣ) гирифт, мақоми дуюмро касб кард. Мунтахаби Ҷопон бо касби 10 медал (8 тилло, 1 нуқра ва 1 биринҷӣ) дар зинаи сеюм ҷойгир шуд.

Тоҷикистон бо як медали нуқра ҷойи 16-умро азони худ кард. Умуман, варзишгарони 21 кишвар медалҳои қаҳрамонии Осиёро ба даст оварданд, аз он ҷумла намояндагони 12 кишвар бо медалҳои тилло мукофотонида шуданд.

Ба ғайр Қазоқистон ва Тоҷикистон, аз кишварҳои Осиёи Марказӣ Қирғизистон бо касби 11 медал (2 тилло, 1 нуқра ва 8 биринҷӣ) дар ҷойи 9-ум ва Узбекистон бо касби як медали нуқраю як биринҷӣ дар ҷойи 15-м қарор гирифтанд.

Каратэ-до дар Тоҷикистон, бахусус миёни наврасону ҷавонон маъруфият пайдо кардааст. Ин ҳунари размии ҷопонӣ, ки маънояш муҳориба бо дастони холист, дар Тоҷикистон пас аз таъсиси Федератсияи каратэ-до (соли 1992) роҳандозӣ шудааст.

Федератсияи миллӣ узви Федератсияи ҷаҳонии каратэ ва Федератсияи каратэи Осиё мебошад. Дар айни ҳол дар Тоҷикистон беш аз 3000 нафар наврасону ҷавонон ба ин намуди варзиш мунтазам машғуланд.

Ҳафт варзишгари тоҷик дар мусобиқоти қаҳрамонии ҷаҳон дар равияи “шотокан” ва чаҳор нафар дар равияи “шиторю” ба унвони қаҳрамонӣ даст ёфтаанд.

XS
SM
MD
LG