Пайвандҳои дастрасӣ

Хабари нав

Хабарҳо

Муҳокимаи як мард бо гумони таҷовуз ва қатли духтари 9-сола дар Хатлон

Дар вилояти Хатлон муҳокимаи марде оғоз шудааст, ки ба таҷовуз ва қатли як духтари 9-сола гумонбар аст.

Хабаргузории “Азия-Плюс” 20-уми октябр бо такя ба манобеи худ дар Додгоҳи вилояти Хатлон навишт, мурофиаи Рустам Болтахонов, сокини ноҳияи Хуросон, чанд рӯз боз идома дорад.

Дар хабар омадааст, марди муттаҳам 18-уми августи имсол дар ҳолати мастӣ духтари ноболиғро таҷовуз карда, сипас куштааст.

Таҷовузи ноболиғон дар Тоҷикистон аҳёнан расонаӣ мешавад. Дар ним соли охир бори дувум аст, ки чунин ҳодиса рӯй медиҳад.

Дар оғози ҳафтаи ҷорӣ як сокини ноҳияи Рӯдакиро бо гуноҳи таҷовуз ва қатли духтари 8-сола ба ҳабси якумрӣ маҳкум карданд.

Ҳамаи хабарҳои имрӯзро дар инҷо бихонед

Дар Украина Қонуни баҳсбарангези забони давлатӣ ҳукми иҷро гирифт

Дарси забони украинӣ дар яке аз мактабҳои кишвар

Рӯзи 16-уми январ дар Украина қонуне ҳукми иҷро гирифт, ки бар асоси он бояд тамоми расонаҳои чопӣ бо забони расмии давлатӣ нашр шаванд, ки онро як талоше барои маҳдуд кардани истифодаи забони русӣ дар ҷомеа мешуморанд.

Бар асоси ин қонун, ки соли 2019 қабул шуд, нашри маҷалла ва ё рӯзномае ба забони русӣ манъ нест, вале соҳибонашон вазифадоранд, айни шумораро бо ҳамон теъдод ба забони украинӣ ҳам чоп кунанд. Дар шароити камхаридор шудани рӯзномаву маҷаллаҳо ин гуна кор барои онҳо зараровар мешавад.

Қонун дар бораи забони давлатӣ замоне ҳукми иҷро гирифт, ки таниш байни Украинаву Русия афзоиш меёбад. Санади мазкур дар аҳди Петро Порошенко, раиси ҷумҳури пешин ва соли 2019 қабул шуд. Тарафдорони санад мегӯянд, ки қонун барои тақвияти ҳуввияти миллии украиниҳо зарур аст, вале мухолифонаш мегӯянд, мумкин аст, мардуми русзабони Украинаро аз кишвар дилсард кунад.

Теннисбози рақами 1 ҷаҳонро аз Австралия ронданд

Новак Дҷокович дар фурудгоҳи Мелбурни Австралия

Новак Дҷокович, теннисбози рақами як дар ҷаҳон аз Австралия ихроҷ шуд. Ӯ рӯзи 16-уми январ ба ҳавопаймо нишаст ва як рӯз қабл аз ширкат дар мусобиқаи бози теннис дар Австралия.

Додгоҳи Олии ин кишвар рӯзе пештар ҳукми ихроҷи Новак Дҷоковичро, ки ваксинаи зидди коронавирусро нагирифтааст, бетағйир гузошт ва амр дод, ки ӯ аз Австралия хориҷ карда шавад.

Алекс Ҳоук, вазири муҳоҷират эълон кард, ки бо назардошти манфиати ҷомеа ва ваксина надоштани Новак Дҷокович, раводиди ӯ ба Австралияро беэътибор шуд. Теннисбози машҳур гуфт, ки аз қарори додгоҳ “фавқуллода маъюс” шудааст. Варзишгари 34-сола умедвор буд, ки бо ширкат дар мусобиқа бори чаҳорум низ унвони қаҳрамониашро дар инҷо ҳифз мекунад.

Скотт Моррисон, нахуствазири Австралия аз ҳукми додгоҳ истиқбол кард ва гуфт, ки ин қарор “марзҳои моро мустаҳкам ва мардуми Австралияро эмин нигаҳ медорад.”

Александр Вучич, раиси ҷумҳури Сербистон, ҳукумати Австралияро танқид кард, ба гуфтаи ӯ “беҳтарин теннисбози ҷаҳонро озор додаву бо ӯ бадрафторӣ кардаанд.” Новак Дҷокович бо баёнияҳои баҳсбарангезаш дар бораи ваксинаи зидди коронавирус танқиди зиёде шунидааст.

Барфу тарма дигарбора роҳи Душанбе-Чаноқро бастааст

Акс аз рӯзи 3-уми январи имсол аст.

Ширкати муттасаддии нигоҳубини шоҳроҳи Душанбе-Чаноқ эълон кард, ки ҳаракат дар ду қитъаи ин роҳро муваққатан манъ кардааст, зеро дар он ҷойҳо поккории роҳ аз барфу тарма идома дорад.

Дар эълоне, ки ширкати «Инновейтив Роуд Солюшн» дар саҳифааш дар Фейсбук нашр кард, омадааст: «Бинобар тармафароии зиёд дар километрҳои 48 то 73- юми роҳи Душанбе - Чанок, ҳаракати тамоми намуди нақлиёт аз километри 39 - самти Душанбе - Хуҷанд ва аз километри 81, ҷониби Хуҷанд - Душанбе муваққатан манъ карда шуд.”

Дар ин баёния ҳамчунин омадааст, ки дар ин гӯшаҳо роҳро аз барфу тарма покиза мекунанд ва маълум нест, ки кай дубора роҳ барои ҳаракат боз мешавад. Яке аз корбарони саҳифаи ширкат пурсидааст, ки бо зану кӯдакон дар километри 100-уми роҳ дармондаанд ва мехоҳанд, бидонанд, ки то кай бояд мунтазир бошанд.

Масъулони ширкат ҷавоб додаанд, ки “тарма бисёр зиёд аст” ва онҳо кӯшиш мекунанд, роҳ зудтар барои ҳаракат боз шавад. Роҳи Душанбе-Чаноқ, ки шимоли Тоҷикистонро бо марказ шаҳри Душанбе мепайвандад, ягона роҳи толлингӣ ва пулакӣ дар кишвар аст.

Истеъфои “домод”-ҳои Нурсултон Назарбоев

Ғайрат Шарифбоев

Ғайрат Шарифбоев ва Димаш Досанов, ду узви хонаводаи президенти пешини Қазоқистон, Нурсултон Назарбоев, рӯзи 15-уми январ аз раҳбарии ширкатҳои нафту газ истеъфо додаанд.

Назарбоев се даҳсола раёсати ҷумҳури Қазоқистонро ба уҳда дошт. Ӯ соли 2019 аз мансаб истеъфо дод, аммо ҳузури худро дар қударт ҳифз кард.

Раҳбари собиқи 81-сола аз замони сар задани тазоҳурот ва беназмиҳо дар Қазоқистон дар назди мардум ҳозир нашудааст. Дар куҷо ва дар чӣ вазъ будани ӯ маълум нест.

Ғайрат Шарифбоев ва Димаш Досанов аз мақоми роҳбари ширкати KazTransOil ва QazaqGaz истеъфо додаанд.

Писараш дар шабакаҳои иҷтимоӣ навишт, ки Шарифбоев бо Дариға Назарбоева, духтари калонии раисҷумҳури пешин, издивоҷ кардааст. На Шарифбоев ва на Дариға Назарбоева дар бораи робитаашон изҳори назар накардаанд.

Досанов шавҳари Алия Назарбоева, духтари хурдии Назарбоев аст. Сабаби истеъфои онҳо гуфта нашудааст.

ADC Memorial аз Созмони Милал хост, ба қазияи Бадахшон расидагӣ кунад

Тазоҳурот дар Хоруғ, моҳи ноябри 2021

Як созмони ҳомии ҳуқуқ аз ниҳодҳои Созмони Милали Муттаҳид хостааст, ки ба вазъи сокинон дар Вилояти Мухтори Кӯҳистони Бадахшон таваҷҷуҳ кунанд. Ин вилоят моҳи ноябри соли 2021 шоҳиди эътирози чаҳоррӯза буд. Мақомот мегӯянд, тафтиши ҳодиса идома дорад. Намояндагони ҷомеаи шаҳрвандӣ аз таҳқиқи, ба гуфтаашон, "якҷониба" нигаронанд.

Anti-Discrimination Centre Memorial (Маркази зидди табъизи "Мемориал"), қароргоҳаш дар Брюссел, 14-уми январ дар баёнияе гуфт, "ақаллияти қавмӣ ва мазҳабии помириҳо" пас аз эътирози моҳи ноябр даврони душвореро паси сар мекунанд. Созмон набудани Интернету алоқаи мобилӣ ва ҳузури афзояндаи низомиёнро дар минтақа номбар кардааст.

"Мақомоти Тоҷикистон бояд ҳарчи зуд алоқаи мобилиро барқарор карда, дар тамоми минтақаҳои Бадахшон дастрасии босифати Интернетро таъмин кунанд. Бояд миёни мақомот ва мардум гуфтушунид шуда, тафтишоти шаффоф ва саривақтии мавридҳои марги одамон дар ҷараёни амалиёти низомӣ ва эътирозҳо таъмин карда шавад," -- омадааст дар баёнияи созмон.

Мақомоти Тоҷикистон ҳанӯз ба изҳороти Anti-Discrimination Centre Memorial (Маркази зидди табъизи "Мемориал") вокуниш накардаанд.

Тазоҳурот дар шаҳри Хоруғ, маркази Вилояти Мухтори Кӯҳистони Бадахшон, рӯзи 25-уми ноябри соли гузашта пас аз он сар зад, ки Гулбиддин Зиёбеков, сокини ноҳияи Роштқалъа, ҳангоми боздошт кушта шуд. Мақомоти Тоҷикистон ӯро ба ҷиноятҳои сангин ба мисли гаравгонгирӣ муттаҳам карда, амалиёти боздошташро қонунӣ шумурданд.

Anti-Discrimination Centre Memorial (Маркази зидди табъизи "Мемориал") гуфтааст, сокинон моҳи ноябр ба зидди "амалҳои худсаронаи мақомоти қудратӣ" тазоҳурот карданд:

"Чунин ба назар мерасад, ки истифодаи аз ҳад зиёди чораҳо хатари муноқишаро ба вуҷуд оварда, дар сурати манипулятсия, ба даргирии байниқавмӣ оварда хоҳад расонд. Вазъияти ВМКБ вокуниши ниҳодҳои байнулмилалиро талаб мекунад. Мақомоти Тоҷикистон бояд ба вазъи иқтисодӣ ва фарҳангии минтақа таваҷҷуҳ зоҳир карда, аз саркӯб, табъиз ва поймол кардани қонун худдорӣ варзанд."

Созмон мегӯяд, ҳодисаҳои охири Қазоқистон, ки боиси хушунат ва вуруди нерӯҳои СПАД гардид, ин эҳтимолро бештар мекунад.

Амрико: Русия барои ҳамла ба Украина баҳона меҷӯяд

Украина

Иёлоти Муттаҳидаи Амрико мегӯяд, Русия бо нашри маълумоти нодуруст дар шабакаҳои иҷтимоӣ саргарми омодагӣ барои ҳамла ба Украина аст. Сухангӯи Кохи Сафед гуфт, маълумоти истихборотии Амрико инро нишон медиҳанд.

Ҳамзамон Ҷон Кирби, сухангӯи Вазорати дифои Амрико, ба хабарнигорон гуфт:

"Маълумоти дақиқ дорем, ки нишон медиҳанд, Русия пеш аз вақт ба ҳадафи ишғоли эҳтимолии Украина бар сари эҷоди баҳонае амалан кор мекунад. Ёфтаҳои мо нишон медиҳанд, онҳо гуруҳеро ҷобаҷо кардаанд, то корро оғоз кунанд. Мо инро амалиёти парчами дурӯғин мехонем. Онҳо ба василаи ин амалиёт мехоҳанд, нишон диҳанд, ки мардуми русизабони Украина мавриди ҳамла қарор гирифтаанд. Ин як баҳонаи хеле хандаовар аст."

Вай ҳамчунон афзуд, Амрико ин маълумоти истихборотиро бо муттаҳидони худ ҳам шарик сохтааст. Дар ин маълумот ҳамла бар Украина аз нимаи моҳи январ то нимаи моҳи феврали имсол пешбинӣ шудааст.

Дар ин ҳол, Украина ҳам гуфта, ки таблиғоти нодурусти Русияро назорат мекунад.

Тибқи баъзе гузоришҳо, Русия ба тозагӣ қариб сад ҳазор сарбозро дар наздикии марз бо Украина ҷойгир кардааст.

Бародарзодаи Назарбоев курсияшро дар Кумитаи амнияти Қазоқистон ҳифз кард

Самат Абиш

Самат Абиш, бародарзодаи президенти пешини Қазоқистон Нурсултон Назарбоев, дар мансаби муовини раиси Кумитаи амнияти миллии он кишвар монд. Дар ин бора ниҳоди мазкур 14-уми январ хабар дод.

Пештар аз ин, расонаҳо бо такя ба манобеи худ навиштанд, ки Абиш дар шаҳри Алмаато дастгир шудааст.

Овозаҳо дар мавриди боздошти Самат Абиш баъди хабари боздошти Карим Масимов, раиси ҳамакнун пешини Кумитаи амнияти миллии Қазоқистон, расонаӣ шуданд. Масимов ва чанде аз ҳамроҳонаш ба хиёнат ба давлат гумонбаранд.

Боздошти онҳо пас аз эътирозу беназмиҳо дар Қазоқистон сурат гирифт. Ин эътирозҳо бо нигаронӣ аз афзоиши нархи гази моеъ дар Жанаозен шуруъ шуда, баъдан дар Алмаато ба хушунат печид. Ҳукумати Қазоқистон барои саркӯби эътирозгарон, ки аз онҳо “террористони байнулмилалӣ” ном бурд, аз Созмони Паймони Амнияти Дастҷамъӣ мадад хост.

Мақомоти Қазоқистон дар бораи кушта шудани 18 низомӣ ва захмӣ шудани садҳо нафари дигар гузориш доданд. Як саҳифаи расмӣ дар Телеграм шумори эътирозгарони кушташударо 164 нафар навишт, вале дертар Вазорати тандурустӣ онро “хатои фаннӣ” номид.

Муҳоҷирати ғайриқонунӣ ба Чехия афзудааст

Муҳоҷирон дар марзи Маҷористон ва Сербистон. Акс аз бойгонӣ

Пулиси Ҷумҳурии Чех (Чехия) гуфтааст, ки муҳоҷирати ғайриқонунӣ ба ин кишвар дар соли 2021 ба таври чашмрас афзоиш ёфт.

Бино ба оморе, ки рӯзи 14-уми январ нашр шуд, зиёда аз ёздаҳ ҳазор кас ба хотири вуруд ё мондани ғайриқонунӣ дар ин кишвари узви Иттиҳоди Аврупо дастгир шудаанд.

Шумори боздоштшудаҳо ба иттиҳоми ба ин монанд дар соли 2020 ҳудуди чаҳор ҳазор нафар будааст.

Бар асоси омор, беш аз 53 дарсади боздоштшудаҳоро украиниҳо ташкил медиҳанд. Шаҳрвандони Молдова дар ҷойи дувум ҳастанд.

Гуфта шудааст, ки пулис беш аз 1300 касро, ки аксарашон қасд доштанд, ба Олмон бираванд, низ боздошт кард. Ин афрод асосан аз Афғонистон ва Сурия омадаанд.

Вебсайтҳои идораҳои ҳукуматии Украина мавриди ҳамлаи рахнагарон қарор гирифтанд

Шаҳри Киев

Дар ҳоле, ки таниш дар равобити Ғарбу Русия аз мустақар шудани нирӯҳои русӣ дар марз бо Украина боло мегирад, мақомоти Киев гуфтанд, чанд вебсайти ҳукуматӣ мавриди ҳамлаи ҳадафмандона қарор гирифтаанд. Аввал шуда дар бораи рахна шудани вебсайташ вазорати маорифи Украина дар Фейсбук хабар дод. Киев чанде баъд гуфт, ки ҳамлаи рахнагарон мазмуни вебсайтҳои ҳукуматиро тағйир надодааст ва ҳеҷ иттилои хусусӣ берун нарафтааст. Вазорат гуфт, ки шаби 13 ба 14-уми январи соли 2022 дар паи ҳамла ба вебсайти вазорати маорифу илми Украина он муваққатан аз кор монд. Ҳамлаи рахнагаронро Жозеп Боррел, дипломати калони Иттиҳоди Аврупо маҳкум кард ва аз кумитаи амнияти ин ниҳоди аврупоӣ хост, ки ба Киев дар расидагӣ ба ҳалли ин мушкил кӯмак кунад. Баъдан ҳукумати Украина гуфт, ки ба хотири пешгирӣ аз ҳамлаву масдудшавии вебсайтҳои дигар, ки дорои маълумот ва захираҳои ғании иттилоотӣ мебошанд, муваққатан чандин вебсайти идораҳои давлатиро мебандад.

Ҳангоми ҳамлаи рахнагарон дар вебсайти вазорати корҳои хориҷаи Украина паёме дида шуд, ки ба забонҳои украинӣ, русӣ ва полякӣ мегӯяд: “Битарсед ва ба ҳолати аз ин бадтар омода шавед”. Боррел, ки дар Фаронса бо журналистон сӯҳбат мекард, гуфт, феълан гуфтани ин ки чӣ касе масъули ин ҳамла аст, пеш аз вақт мебошад. “Ман далел надорам, вале ҳамаи мо дар ин замина андешаҳое дорем”, гуфт ӯ. Ҳанӯз ҳеҷ нафаре масъулияти ин ҳамларо ба дӯш нагирифтааст, вале дар гузашта рахнагарони руси вобаста ба Маскав дар ташкили ҳамлаҳои рахнагарӣ ба вебсайтҳои ҳукумати Украина муттаҳам шудаанд. Ғарб Русияро дар он муттаҳам кард, ки 100 ҳазор сарбозу танку тӯпхонаро дар хати сарҳад бо Украина мустақар карда, ба қавли НАТО, барои ҳамла ба Украина омода мешавад. Маскав гуфт, ки ҳеҷ нияти ҳамла ба Украинаро надорад.

"Барқи тоҷик" гуфтааст, ба Афғонистон ҳаҷми "хеле ками барқ" содир мешавад

Ноҳияи Шамсиддин Шоҳини Тоҷикистон дар марз бо Афғонистон ҷойгир аст

Намояндаи ширкати «Барқи Тоҷик» дар суҳбат бо «Азия-Плюс» гуфтааст, ҳоло ҳамагӣ 1 дарсади барқи Тоҷикистон ба Афғонистон содир мешавад. Мақомот гуфтаанд, ки ин миқдор барқ «барои дар ҳолати хуб нигоҳ доштани хатҳои интиқол ва таҷҳизот кофӣ буда, ба тавозуни умумии таъминоти барқи кишвар таъсире надорад». Манбаъ афзудааст, тибқи тавофуқи ширкатҳои энергетикии ду кишвар, ки дар охири моҳи декабр ҳосил шудааст, ҳаҷми интиқоли шабонарузии барқ ба Афғонистон 600-700 ҳазор киловатт-соатро ташкил медиҳад. Дар моҳҳои май то сентябри соли 2022 дар як шабонарӯз интиқоли то 9, 6 млн киловатт-соат барқи Тоҷикистон ба Афғонистон ба нақша гирифта шудааст. Як танқиди ҳамешагӣ аз мақомоти тоҷик ин аст, ки дар рӯзҳое, ки мардум дар дохили кишвар камбуди барқ доранд, фурӯши он ба Афғонистону кишварҳои дигари ҳамсоя ҳамчунон идома дорад. Тоҷикистон дар 11 моҳи соли гузашта аз ҳисоби фурӯши барқ 93,5 миллион доллар фоида гирифтааст. Таъмини мардум ва корхонаҳо бо барқ яке аз мушкилоти асосии ҳукумати Тоҷикистон мебошад, чун, ба қавли мунаққидон, бо вуҷуди бунёди нерӯгоҳҳои зиёд, то ҳол бӯҳрони энержӣ ҳалли худро наёфтааст.

Ёрии Исроил ба афғонистониҳои паноҳҷӯ дар Тоҷикистон

Фурудгоҳи Душанбе, пилотҳои паноҳҷӯи афғонистонӣ. 9 ноябри соли 2021

Ҳукумати Исроил гуфтааст, ба паноҳҷуёни афғонистонӣ, ки дар Тоҷикистон ҳастанд, дар ҳаҷми наздик ба 500 ҳазор доллар мадад мекунад. Вазорати корҳои хориҷии Исроил дар эъломияе ҳафтаи ҷорӣ гуфт, паноҳҷӯёни афғонистонӣ метавонанд барои харидани хӯрок, дору ва маводи дигари зарурӣ аз ин кумак истифода кунанд. Як мансабдори баландпояи Вазорати корҳои хориҷии Исроил гуфт, кишвараш ифтихор мекунад, ки барои афғонистониҳое, ки пас аз дубора сари қудрат омадани «Толибон» аз Афғонистон берун шудаанд, ёрӣ мерасонад. Пештар мақомоти Тоҷикистон гуфта буданд, ки 15 ҳазор паноҳҷӯи афғонро қабул кардаанд. Намояндаи Комиссариати олии Созмони Милали Муттаҳид ин шумораро тақрибан 12 ҳазор нафар гуфта буд. Қаблан баъзе аз паноҳҷӯён Тоҷикистонро барои бастани марзҳо ва роҳ надодани занону кӯдакон танқид карда буданд.

ВКД Русия: хориҷиҳо барои вайрон кардани тартиботи ҷамъиятӣ хориҷ шаванд

Вазорати корҳои дохилии Русия пешниҳод дорад, ки хориҷиёнро барои вайрон кардани тартиботи ҷамъиятӣ аз ин кишвар ихроҷ намоянд. Нашрияи “Коммерсант» аз қавли Валентина Казакова, раҳбари Сарраёсати умури муҳоҷират навиштааст, ки вазорат имкони депорти муҳоҷиронро барои ҳуқуқвайронкунии дағали маъмурӣ матраҳ дорад. Бо ин ҳадаф ворид кардани тағйирот ба қонунгузории Русия дар ҳоли баррасӣ мебошад. Гуфта мешавад, ин иқдом ба хотири таъмини амнияти ҷомеа амалӣ мегардад. Ҳамчунин дар доираи ислоҳоти қонунгузории муҳоҷират ҷорӣ кардани ҳуҷҷати ягонаи электронӣ, ки иттилооти хусусии нафари воридшуда дар он сабт мешавад, дар назар аст. Аз 29-уми декабри соли 2021 онҳое, ки ба муддати беш аз 90 рӯз ба Русия меоянд, бояд акс гирифта, изи ангуштонро супоранд. Вазорати корҳои дохилии Русия соли гузашта гуфта буд, 120 ҳазор тоҷикистониро, ки бо қарори ин ниҳод ва барои қонуншиканиҳои ночиз мамнуъулвуруд шуданд, авф кард.

Интиқоди Р.Эмомалӣ аз "интернети сусти ширкатҳои мобилӣ". Мунаққидон: сабаб дар дахолати давлат ба соҳа аст

Раиси шаҳри Душанбе Рустами Эмомалӣ аз кори ширкатҳои мобилӣ танқид кардааст. Шаҳрдории Душанбе навишт, дар рафти ҷаласаи ҳисоботии ин сохтор, ки 12-уми январ барпо шуд, аз фаъолияти панҷсолааш ба хадамоти ширкатҳои мобилӣ дахл карда, аз сифат ва суръати “бениҳоят сусти интернет” интиқод намудааст. Ӯ ба роҳбарони ширкатҳои мобилӣ мӯҳлат ва дастур додааст, ки дар фурсати наздик “барои ворид кардани таҷҳизоти замонавӣ, баланд бардоштани сифати алоқаву интернет ва бартараф намудани дигар камбудиҳои ҷойдошта чора андешанд”. Ин сӯҳбатҳо дар ҳолест, ки чандин сол аст дар Тоҷикистон огоҳони умур баръакс худи мақомотро барои маҳдуд кардани имкониятҳои рушди интернет танқид мекунанд. Интернет ва алоқаи мобилие, ки ҳанӯз оғози солҳои 2000-ум бо суръату сифат ва нархи муносибаш фарогир буду ситоиш мешуд, чандин соли охир маҳдуд шуда рукуд кардааст. Аксарияти сокинони Тоҷикистон аз он шикоят мекунанд ки пули зиёдро барои дастрасӣ ба интернет медиҳанд, вале сифату суръати он ва гуфтугӯ бо телефони мобилӣ қаноатбахш нест. Як муассисаи таҳқиқотӣ моҳи июни соли гузашта гуфта буд, ки суръати Интернет дар Тоҷикистон яке аз сусттаринҳо дар ҷаҳон аст. Сабабашро ба дахолати давлат ба кори ширкатҳои хусусии мобилӣ ва ба дасти ширкати давлатӣ додани ҳаққи тақсими Интернет рабт дод. Пештар ширкатҳои интернетрасони Тоҷикистон ҳақ доштанд мустақилона аз хориҷа Интернет бигиранд. Аз соли 2018 бозори Интернет зери назари ширкати давлатии "Тоҷиктелеком" гузашт.

Даъвати AI ва HRW ба мурооти ҳуқуқи инсон дар Қазоқистон  

7 январ, шаҳри Оқтеппаи Қазоқистон. Баъди эътирозу хушунатҳои ахир мақомот шаҳрро тоза мекунанд

Гурӯҳҳои ҳомии ҳуқуқи башар Amnesty International ва Human Rights Watch аз мақомдорони Қазоқистон даъват кардаанд, ки ба ҳуқуқи мардум эҳтиром гузоранд. Баъди эътирозҳои зиддидавлатии ҳафтаи гузашта, ки дар шаҳри Алмаато ба хушунат печид, мақомоти ин ҷумҳурии собиқ Шӯравӣ наздик ба даҳ ҳазор касро боздошт кардаанд. Эътирозҳо оғози соли равон бо баландравии нархи гази моеъ дар вилояти Мангистау шурӯъ шуда, ба зудӣ дар саросари Қазоқистон паҳн шуданд. Шаҳри Алмаато ба маркази муқовимат бо полис мубаддал шуд. Эътирозгарон биноҳои давлатиро ишғол намуда, чандин фурӯшгоҳро ғорат карданд. Дар гузориши солонаи Human Rights Watch, ки рӯзи панҷшанбе нашр шуд, гуфта мешавад, ки мақомоти Қазоқистон эҳтироми ҳуқуқи башарро дар ҷойи аввал нагузоштанд. Созмон аз мақомоти Қазоқистон даъват кардааст, ки фармони "кушодани оташи бидуни огаҳиро фавран аз эътибор соқит кунанд ва ҳуқуқи афроди боздоштшуда эҳтиром шавад”.

Ҳю Вилямсон, мудири бахши Осиёи Марказӣ дар Human Rights Watch мегӯяд, дар эътирозҳои хунини Қазоқистон эҳтимол садҳо тан кушта ва ҳазорҳо нафари дигар боздошт шудаанд. Ба қавли ӯ, мақомоти Қазоқистон бояд ба таври оҷил дар фикри рафъи нигарониҳо оиди эҳтироми ҳуқуқи башар бошанд.

Нерӯҳои сулҳофари тоҷикистонии СПАД Қазоқистонро тарк карданд

Нирӯҳои тоҷикистонии узви СПАД дар Қазоқистон. 11 январ, Алмаато

Нерӯҳои сулҳофари тоҷикистонии Созмони паймони амнияти дастаҷамъӣ аз Қазоқистон берун шуданд. Низомиёни тоҷик тариқи ҳавопймои Ил-76 аз Алмаато ба Тоҷикистон интиқол ёфтанд. Сарбозони тоҷикро дар ҳавопаймо як гурӯҳи 31-нафараи курсантҳои Донишкадаи ҳарбии нерӯҳои хушкигарди Қазоқистон ҳамроҳӣ намуданд, ки барои таътил ба ватан рафтанд. Нерӯҳои паймони таҳти раҳбарии Русия, аз ҷумла сарбозони тоҷик, ҳафтаи гузашта бо даъвати раҳбарони Қазоқистон ва баъди он ба Алмаатову дигар шаҳрҳо рафтанд, ки тазоҳурот ба зидди болоравии қимати гази моеъ ба ошӯбу хунрезӣ ва бархӯрди издиҳом бо маъмурони пулис кашид. Қосимҷомарт Тоқаев, раиси ҷумҳурии Қазоқистон, рӯзи 11-уми январ гуфт, раванди ихроҷи нерӯҳои СПАД на камтар аз даҳ рӯзро дар бар мегирад.

Дар Тоҷикистон ҳаҷми маошу нафақа зиёд шуд

Дар Тоҷикистон ҳаҷми маошу нафақа зиёд шуд. Бар асоси фармони раиси ҷумҳур, ки рӯзи 13-уми январ содир шуд, аз 1-уми январи имсол маоши хизматчиёни ҳарбӣ, кормандони ҳифзи ҳуқуқ ба андозаи 25 дарсад зиёд шуд. Маоши дигар кормандони ин ниҳодҳо 20 дарсад зиёд шудааст. Инчунин аз 1 июли соли 2022, ҳадди ақали музди меҳнат дар Тоҷикистон 600 сомонӣ ё 53 доллар дар як моҳ муқаррар шудааст. Феълан маоши ҳадди ақал дар кишвар 400 сомонӣ ё муодили қариб 36 доллар аст.

Бар асоси фармони президент, ҳамчунин маоши кормандони идораҳои давлатӣ, бахшҳои фарҳанг, варзиш, тандурустӣ, муассисаҳои соҳаи ҳифзи иҷтимоӣ, омӯзгорон ва дигар ташкилотҳои соҳаи ҳифзи иҷтимоӣ 20 дарсад зиёд хоҳад шуд. Идрорпулӣ ё стипендияҳои донишҷӯён ва дигар намудҳои стипендия ба ғайр аз курсантҳои муассисаҳои олии ҳарбӣ ва Академияи Вазорати корҳои дохилӣ, 20 дарсад афзоиш ёфт. Андозаи нафақаи нафақагирони ятим ва ноболиғон, ки аз саробон маҳрум шудаанд, 25 дарсад зиёд карда мешавад.

Дар пасманзари боло рафтани нархи маҳсулот ва роҳкиро бисёриҳо талаб доранд, ки маошу нафақа ҳам зиёд карда шавад. Эмомалӣ Раҳмон рӯзи 21-уми декабр зимни ироаи паём ба Маҷлиси олӣ дар бораи боло рафтани маошу нафақа хабар дода буд.

Саҳифаҳои Алия Назарбоеваро аз шабакаҳои иҷтимоӣ пок карданд

Алия Назарбаева, духтари Нурсултон Назарбоев.

Саҳифаҳои Алия Назарбоева, духтари хурдии Нурсултон Назарбоев, президенти пешини Қазоқистон аз "Фейсбук" ва "Инстаграм" пок шудаанд. Дастнорас шудани саҳифаҳои Назарбоева баъди чанд соати нашри изҳороташ дар бораи эътирозҳои Қазоқистон сурат гирифт. Поёни навиштаи Назарбоева шарҳҳои манфӣ хеле зиёд навишта шуд.

Рӯзи 13-уми январ Назарбоева ҳаводиси ибтидои моҳи ҷориро дар кишвараш "фоҷеа" унвон кард ва ба хонаводаи кушташудаҳо ҳамдардӣ баён намуд. Расонаҳо навиштанд, ки Алия Назарбоева аз Имороти Муттаҳидаи Арабӣ вориди интернет шудааст.

Эътирозҳои мардумӣ дар Қазоқистон рӯзи 2 январ шуруъ шуданд ва сокинон бо шиори "Пирамард, бирав!", ки зоҳиран манзурашон Нурсултон Назарбоеви 81-сола буд, ба кӯча бароманд. Назарбоев баъди канор рафтан аз курсии президентӣ раиси Шӯрои амнияти кишвараш боқӣ мондаву давлатро назорат мекард.

Президенти Туркманистон дастур дод, иттилоъ дар интернет маҳдудтар шавад

Қурбонқулӣ Бердимуҳаммадов, президенти Туркманистон.

Қурбонқулӣ Бердимуҳаммадов, президенти Туркманистон дар як ҷаласа рӯзи 12 январ ба мақомоти кишвараш дастур додааст, ки вазъи сиёсиву низомӣ ва амниятии минтақаро талҳлил ва таъсири онро ба Туркманистон баҳо диҳанд.

Вай дар ин ҷаласа ҳамзамон ба мақомоти кишвараш супориш додааст, ки фаъолиятро дар самти маҳдудсозии сарчашмаҳои иттилоъ дар интернет тақвият бахшанд.

Бердимуҳаммадов бо натиҷагирӣ аз фаъолияти ниҳодҳои низомӣ ва ҳифзи ҳуқуқи Туркманистон дар соли 2021 гуфтааст, "назорати интернет ба таври бояду шояд сурат нагирифтааст".

Ин дар ҳолест, ки шабакаҳои маъруфи иҷтимоӣ, аз ҷумла Facebook, Twitter ва YouTube, инчунин хабаргузориҳои мустақил, ки мавзуҳои Туркманистонро инъикос мекунанд, дар ин кишвар дастнорасанд. Ба илова, Туркманистон дар баҳогузории суръати интернет аз тамоми дунё ақиб уфтодааст.

Ҳамакнун Бердимуҳаммадов ба вазорати амнияти миллии кишвараш дастур додааст, манобеъро дар интернет пайдо кунад, ки зидди сохти конститутсионии Туркманистон, афкори иҷтимоӣ хабарпароканӣ мекунанд ва терроризму тундгароӣ, миллатгароӣ ва фаъолияти дигари ғайриқонуниро таблиғ менамоянд.

Як рӯзноманигорро дар Қазоқистон барои "пурсиш аз Тоқаев" 10 рӯз ҳабс карданд

Нурҷон Баймулдин, хабарнигори қазоқ.

Нурҷон Баймулдин, сармуҳаррири бахши русии сомонаи "Кокшетау Азия"-ро барои пурсишҳои маҷозӣ аз президенти Қазоқистон 10 рӯз ба ҳабси маъмурӣ гирифтанд. Дар ин бора шоми 12-уми январ вай дар "Фейсбук" хабар дод.

"10 рӯзи ҳабс барои пурсиш аз Тоқаев. Пулисро интизорам, соат 23 шаб, аз соати 12 рӯз бе обу нон. Гурусна. Бо роҳи фиреб муовини сардори пулис даъват кард. Бештар аз 3 соат бе вакили мудофеъ нигаҳ доштанд. Муфаттишон даро-баро мекарданд ва ҳар дафъа бо суолҳои нав ворид мешуданд", - навишт Баймулдин.

Дертар расонаҳои Қазоқистон навиштанд, ки додгоҳ Баймулдинро дар "рафторе, ки дар ҳолатҳои изтирорӣ боиси барҳам задани тартибот мешавад", айбдор кардааст. Додгоҳ ҳуқуқвайронкуниро дар навиштаи Нурҷон Баймулдин аз 10-уми январ дар шабакаи "Фейсбук" пайдо кардааст. Додгоҳ гуфтааст, дар он навишта "шарҳе ба амалҳои президенти Қазоқистон мавҷуд аст, ки манбаи расмӣ надорад".

Рӯзноманигор дар саҳифаи "Фейсбук" навишта буд, ки "чаро президенти Қазоқистон дар бораи ташкили ҳукумати нав дар ҷаласаи СПАД хабар дод ва чаро Тоқаев дар назди Путин ҳисобот дод?"

Эътирози садҳо муаллим дар шаҳрҳои Эрон

Эътирози омӯзгорон дар Исфаҳон. 13-уми январи 2022

Садҳо муаллим дар бештар аз 50 шаҳру минтақаи Эрон бо талаби маоши баланд ва шароити беҳтари кор эътироз кардаанд.

Раҳпаймоии онҳо дар Теҳрону Исфаҳон, Шероз, Машҳад, Рашт, Қум ва шаҳрҳои дигари ин кишвар гузашт. Бино ба гузоришҳо, дастикам се кас дастгир шудаанд.

Муаллимон аз ончи “бетафовутии давлат нисбат ба омӯзиш” меноманд, танқид карда, дар айни ҳол хоҳонии озодии ҳамкорони боздоштшудаи худ гардиданд.

Бино ба наворҳое, ки паҳн шудаанд, омӯзгорон бо нидои “Бархезед, бархезед!” шиор медиҳанд.

Дар ҳафтаҳои охир муаллимон дар чанд шаҳри Эрон эътирозҳоеро баргузор карданд. Аммо нерӯҳои амниятӣ бо равишҳои гуногун ва боздошти иштирокдорон ба ин эътирозҳо аксулмамали тунд нишон доданд.

Таваррум дар Эрон ба хотири таҳримҳои Амрико ва мудирияти нодуруст дар ин кишвар ба авҷи худ расидааст.

Amnesty International аз Қазоқистон хост, хабарнигорону фаъолонро раҳо кунад

Гирдиҳамоии эътирозӣ дар Қазоқистон рӯзи 2-юми январ шуруъ шуд

Афви Байнулмилал (Amnesty International) аз мақомоти Қазоқистон хостааст, хабарнигорону фаъолонеро, ки ҳангоми эътирозҳои густарда ва баъди он дастгир кардаанд, ҳарчи зудтар раҳо кунанд.

Созмони ҳомии ҳуқуқи башар 12-уми январ гуфт: "Афроде, ки ҷиноят содир накарда, танҳо ба далели нақзи қонуни ҷанҷолии Қазоқистон дар мавриди гирдиҳамоӣ дастгир шудаанд, бояд фавран озод карда шаванд."

Мақомот дар Қазоқистон мегӯянд, баъд аз эътирозҳо дар бораи баланд рафтани нархи гази моеъ дар Жанаозен, ғарби ин кишвар, ки сипас ба шаҳрҳои дигар, аз ҷумла Алмаато печид, тақрибан 10 ҳазор кас дастгир шуданд.

Ба иттилои расмӣ, дар ин ҳодисаҳо 18 нерӯи амниятӣ кушта шудаанд, вале теъдоди эътирозгарони кушташуда маълум нест.

Як саҳифаи марбут ба ҳукумати Қазоқистон дар Телеграм рӯзи 10-уми январ навишт, ки дар ҷараёни нооромиҳо 164 ғайринизомӣ ҷон бохтаанд, вале Вазорати тандурустӣ гуфт, ин рақам дуруст нест ва ба далели хатои фаннӣ нашр шудааст.

Амрико таҳримҳои Кореяи Шимолиро сахттар кард

Акс аз бойгонӣ

Иёлоти Муттаҳида нисбати шаш шаҳрванди Кореяи Шимолӣ, як шаҳрванди Русия ва як ширкати русӣ таҳримҳои нав ҷорӣ кард.

Амрико ин афрод ва ширкатро дар интиқоли мавод барои барномаи ҳастаии Кореяи Шимолӣ муттаҳам медонад.

Таҳримҳои нав дар ҳоле ҷорӣ шуданд, ки Кореяи Шимолӣ озмоиши нави мушакӣ анҷом додааст.

"Тасмими имрӯзӣ - қисме аз талошҳои Амрико аст, ки ба хотири пешгирӣ аз рушди барномаи сохтани силоҳи қатли ом ва озмоиши мушакҳои болдор роҳандозӣ шудааст," -- гуфт Брайан Нелсон, муовини вазири молияи Амрико.

Вай илова кард, ки Кореяи Шимолӣ истифодаи намояндагиҳои хориҷиро барои дастрасии маводи барномаи ҳастаӣ идома медиҳад.

Эрон як муҳаққиқи фаронсавиро зиндонӣ кард

Фиребо Одилхоҳ

Эрон бори дигар Фиребо Одилхоҳ, муҳаққиқи фаронсавии эрониаслро зиндонӣ кардааст. Дар ин бора Вазорати корҳои хориҷии Фаронса рӯзи 12-уми январ хабар дод. Фиребо Одилхоҳ як сол дар ҳабси хонагӣ буд. Ӯро соли 2019 дар фурудгоҳи Теҳрон дастгир ва ба иттиҳоми таблиғ алайҳи низом ва тавтеа алайҳи амнияти миллӣ гунаҳкор карданд. Мақомҳои эронӣ то ҳанӯз дар мавриди дубора зиндонӣ кардани хонум Одилхоҳ чизе нагуфтаанд.

Роҳбари Чеченистон таҳдиди "ғасби деҳаҳо"-и Ингушистонро кард

Рамазон Қодиров

Рамазон Қодиров, роҳбари Чеченистони Русия, дар як муроҷиати видеоӣ аз сокинони Ингушистон талаб кард, ки давоми се рӯз даъвоҳояшонро нисбат ба вай мушаххас кунанд. Агар даъвоҳо беасос ва таҳқиркунанда бошанд, ба гуфтаи вай, қонуне монеаш нахоҳад шуд ва хостаашро амалӣ хоҳад кард.

Қодиров дар навор мегӯяд, "афродеро, ки шарафу номуси мардуми ӯ, хонавода ва худи ӯро доғдор мекунанд, ба ҳоли худ намегузорад". Вай илова кард, ки посухро се рӯз мунтазир мешавад. Узрпурсии сардори идораи умури дини Ингушистон Яҳё Ҳоҷиев хашми Рамазон Қодировро ба бор овард. Вай барои бағалкашӣ бо Қодиров узр пурсид.

Қодиров дар муроҷиаташ бори дигар таҳдид кард, ки марзҳои Чеченистон бо Ингушистонро бозбинӣ мекунад. Вай гуфт, бино ба созишномаи 26-уми сентябри соли 2018, дар Ингушистон чанд деҳаи Чеченистон мондааст.

"Бо номи Худо савганд, ки агар дурӯғ гӯям: ман тарзе рафтор кардам, ки роҳбари шумо дархост карда буд. Ман гузашт кардам, деҳаҳоямонро мондам. Ҳоло ба он иғвогарон муроҷиат мекунам. Ман заминҳои шуморо ба он хотир гирифтам, ки шуморо одам ва мард намеҳисобам. Деҳаҳои дигари боқимондаро ҳам мегирам, зеро то замоне, ки ман ин корро накунам, шумо ором намегиред", - гуфт Қодиров.

Созишномаи соли 2018 дар мавриди тақсими марзҳо боиси эътирозҳои мардуми дар Ингушистони Русия шуд. Сокинони Ингушистон гуфтанд, марзҳо одилона тақсим нашудаанд.

Низомиёни Қирғизистон рӯзи 14 январ аз Қазоқистон бармегарданд

Низомиёни қирғиз. Акс аз бойгонӣ.

Низомиҳои Қирғизистон, ки дар доираи маъмурияти ҳифзи сулҳи Созмони паймони амнияти дастҷамъӣ (СПАД) ба Қазоқистон фиристода шуда буданд, рӯзи 14-уми январ ба Қирғизистон бармегарданд.

Дар ин бора Вазорати мудофиаи Қирғизистон хабар дод. Пештар хабар дода шуд, ки низомиҳои Қирғизистон маркази гармидиҳии шаҳри Алматоро муҳофизат мекунанд.

Президенти Қазоқистон Қосимҷомарт Тоқаев рӯзи 11-уми январ гуфт, беруншавии нерӯҳои СПАД 13-уми январ шуруъ шуда, 10 рӯз давом мекунад.

Вакилони порлумони Қирғизистон рӯзи 7-уми январ ба ирсоли нерӯҳои қирғизистонӣ ба Қазоқистон ризоият доданд. Қамчибек Тошиев, раиси Кумитаи давлатии амнияти миллии Қирғизистон, он замон гуфт, ба Қазоқистон 150 низомӣ мефиристанд.

Иддае аз сокинони Қирғизистон талаб карданд, ки ба Қазоқистон низомӣ ирсол нашавад.

Ёфтҳои бештар

XS
SM
MD
LG