Гуруҳи «Толибон» иддао дорад, ки пас аз таркиш дар масҷиди «Идгоҳ»-и Кобул як маркази гуруҳи тундрави «Давлати исломӣ» ё ДОИШ-ро дар Афғонистон пурра аз байн бурд.
Забеҳуллоҳ Муҷоҳид, сухангӯйи «Толибон», дар Твиттер навишт, аъзои марказ дар амалиёти шаби севуми октябр кушта шуданд.
Таркиш дар масҷиди «Идгоҳ»-и Кобул рӯзи 3-юми октябр ва дар ҳоле рӯй дод, ки намози ҷанозаи модари Забеҳуллоҳ Муҷоҳид, сухангӯи «Толибон»-ро мехонданд.
Ҳеч кас масъулияти ҳамларо ба дӯш нагирифтааст. Дар он ҳодиса аз 2 то 12 кас кушта ва 30 нафар захмӣ шуданд.
Бо вуҷуди ин, Забеҳуллоҳ Муҷоҳид рӯзи 3-юми октябр гуфт, таҳқиқоти аввал нишон медиҳад, ки эҳтимол дар ин ҳодиса ҷангҷӯёни гуруҳи «Давлати исломӣ» даст доранд.
Шохаи «Хуросон»-и гуруҳи «Давлати исломӣ» душмани «Толибон» аст. Пас аз он ки «Толибон» дар моҳи августи имсол назорат бар Афғонистонро ба даст гирифт, ҳамлаҳои ҷангҷӯёни ДОИШ афзудааст.