Дар ҳоле, ки маъмурияти президент Ҷо Байден талош дорад бо мавҷи азими паноҳҷӯёни Ҳаити муқобила кунад, як мақоми СММ аз чунин амали мақомоти амрикоӣ интиқод кард. Филиппо Гранди, раиси оҷонсии СММ оид ба умури паноҳандагон гуфт, ки аз дидани навору шароити будубоши беш аз 14 ҳазор паноҳҷӯ, ки давоми чанд рӯзи гузашта аз як кишвари воқеъ дар соҳилҳои Карриб ба хоки ИМА ворид шуда, зери пули Дел Риои Техас хайма задаанд, “таконзада” шудааст. Грандӣ рӯзи 21-уми сентябр дар як изҳороташ инчунин Моддаи 42-и қарори соли 2020 содиршуда дар ИМА-ро интиқод кард, ки мегӯяд, аксар паноҳҷӯёне, ки ба марзҳои ҷанубии ИМА мерасанд, бо сабабҳои ин ки метавонанд боиси паҳншавии коронавирус гарданд, ба кишвар роҳ дода намешаванд. Ӯ гуфт, ки вазъи паноҳҷӯёнро носанҷидаву танҳо бар асоси Моддаи 42 аз кӯмакву пуштибонӣ маҳрум кардани онҳо бо қонунҳои байналмилалӣ дар ихтилоф аст.

Вазорати умури дохилии ИМА рӯзҳои истироҳати гузашта ба бозпас фиристодани шаҳрвандон ба кишвари Ҳаити шурӯъ кард. Баъди моҳи гузашта кушта шудани президенти Ҳаити ва зилзилаи пуршиддати моҳи августи имсол мавҷи азими паноҳҷӯён аз Ҳаитӣ ба ИМА ҳаракат кард. Вазъият баъди он пуршиддат шуд, ки дар шабакаҳо ва матбуот саҳнаҳои бо шеваи бераҳмонаву дағалона ба сӯи Рио Гранде тела кардани паноҳҷӯён аз ҷониби ходимони полиси аспсавор намоиш дода шуд.

Дар паи таркише дар назди як автобуси мактабие дар вилояти Балуҷистони Покистон панҷ нафар, аз ҷумла се кӯдак куштаву 35 кас маҷрӯҳ шудааст. Вилояти Балуҷистон, ки аз канданиҳои фоиданоки табиӣ бой аст, дар ҷанубуғарби Покистон ҷойгир буда, давоми чоряк қарни ахир макони задухӯрдҳои гурӯҳҳои ҷудоиталаб дониста мешавад.

Дар изҳороти артиши Покистон гуфта мешавад, ки таркиш дар наздикиҳои меҳонхонаи “Рахшан”-и ноҳияи Хуздар рух додааст.

Бо гузашти як рӯз аз ҳодиса, касе ё гурӯҳе масъулияти ин ҳамларо ба дӯш нагирифтаат, вале дар гузашта ҳамлаҳои пурхушунат ва таркишҳои мисли инро гурӯҳҳои ҷудоиталаб ба дӯши худ гирифтаанд.

Ин минтақаи стратегӣ бо Афғонистон ва Эрон ҳамсарҳад аст ва аксар сокинонаш ҳам аз қавми балуҷ мебошанд.

Дар ҳоле, ки амалиёти низомии Исроил дар Ғазза тавсеа меёбад, рӯзи сешанбе Бритониё музокира бо Исроилро дар мавзӯи тиҷорати озод боздошт, сафири ин кишварро фаро хонда дар бораи ҷорӣ кардани таҳримҳои иловагӣ ба мардуми кӯчида ба соҳилҳои ғарбии рӯди Урдун ҷорӣ намуд. Девид Лэмми, вазири корҳои хориҷии Бритониё вазъ дар Ғаззаро “даҳшатнок” номид.

Ҳафтаи гузашта низомиёни исроилӣ гуфтанд, ки дар Навори Ғазза амалиёти нави зидди гурӯҳи ифротии Ҳамосро ба роҳ мемонанд. Ин созмонро дар ИМА ва Иттиҳоди Аврупо террористӣ меноманд. Ҳадафи дигари ин амалиёт, ба қавли Исроил, озодкунии гаравгонҳо мебошад, ки аз октябри соли 2023 дар дасти ҷангиёни Ҳамос қарор доранд.

Вазорати беҳдошти Ғаззаи зери назари Ҳамос гуфт, ки дар ҳашт рӯзи гузашта дар натиҷаи ҳамлаҳои Исроил беш аз 500 нафар кушта шудааст. Тасдиқи ин омор тавассути манобеи мустақил имкон надорад.

Исроил инчунин ба Ғазза ворид кардани маводи тиббӣ, ғизо ва сӯзишвориро аз моҳи март ба ин сӯ масдуд карда, бо ин амалаш мавриди интиқоду маҳкумият шудааст. Девид Лэмми масдудкунии Ғаззаро аз ҷониби Исроил интиқод карда аз маъмурияти Бенямин Нетаняҳу тақозо намуд, ки ба чунин амалаш хотима диҳад.

Дар сомонаи ҳукумати Бритониё рӯзи 19 май изҳороти муштараки раҳбарони Бритониё, Фаронса ва Канада оид ба вазъ дар Ғазза ва соҳилҳои ғарбии рӯди Урдун нашр шуд. “Мо ба шиддат мухолифи тавсеаи амалиёти ҳарбии Исроил дар Навори Ғазза ҳастем. Азиятҳои мардуми Ғазза ғайри қобили таҳаммул аст. изҳороти дирӯзаи Исроил, ки гуфт, миқдори ҳадди аққали ғизоро ба Ғазза ворид мекунад, аслан муносиб нест”. Раҳбарони ин кишварҳо аз ҳукумати Исроил тақозо карданд, ки амалиёташро дар Ғазза билофосила хотима дода, вуруди ёриҳои башардӯстона ба минтақа иҷоза диҳад.

Дар идомаи ин изҳорот, инчунин омадааст: “Мо забони нафратангези аъзои ҳукумати Исроилро маҳкум мекунем, ки таҳдид кардаанд, мардуми ноумедшудаи мулкӣ аз тахриб шудани Ғазза ба кӯчидан шурӯъ мекунанд. Тарки маҷбурӣ ва пайвастаи макони зист нақзи қонунҳои башарии байналмилалӣ мебошад”.

Дар идома омадааст, “мо дар канор истода амалҳои даҳшатноки ҳукумати Нетаняҳуро тамошо намекунем. Агар Исроил ҳуҷумҳои ҳарбии худро хотима надиҳад ва масдудияти таъмини кӯмакҳои башариро бекор накунад, мо дар посух иқдомҳои мушаххасе хоҳем гирифт”.

Айни замон, муаллифони изҳорот аз ҳамлаи бераҳмонаи Исроил аз ҷониби Ҳамос дар таърихи 7 октябри соли 2023 ёдовар шуда, ҳақи Исроилро барои дифоъ аз терроризм дастгирӣ кардааст. Аз Ҳамос даъват шудааст, ки ҳама гаравгонҳои исроилиро ҷавоб диҳанд.

Хабаргузории Reuters айни замон мавқеи ВКХ Исроилро нашр кардааст. Дар ин ниҳод гуфта шудааст, ки аз соли 2022, замони сари кор омадани муҳофизакорон, Бритониё як муддат аз пешбурди музокираҳои тиҷоратӣ худдорӣ намудааст.

Намояндаи ВКХ Исроил гуфтааст, “фишори беруна Исроилро аз роҳи дифои мавҷудияти ин кишвар ва аз душманоне, ки дар талоши нобудсозии он ҳастанд, бознамедорад”.

Дар ҳамин ҳол, рӯзи сешанбе хабаргузории нидерландии ANP навишт, ки Кая Каллас, раҳбари сиёсати хориҷии Иттиҳоди Аврупо қарор кардааст, ки созишнома оид ба ҳамкории миёни ИА ва Исроил ва инчунин қарордод дар бораи тиҷорати озод бо Исроил бо сабаби маҳдуд шудани ёриҳо ба Ғазза бозбинӣ шавад.

Бошгоҳи «Соро компания»-и Душанбе, ки аз рӯи натиҷаҳои се бозии силсилаи ниҳоии Суперлигаи футзали Тоҷикистон-2024/2025 бар тими “Истиқлол”-и Душанбе бо ҳисоби умумии 3:0 пирӯз шуд, ба унвони қаҳрамонӣ даст ёфт.

Силсилаи ниҳоии Суперлигаи футзали Тоҷикистон то се пирӯзии яке аз дастаҳо идома кард. Ду бозии аввали силсилаи ниҳоӣ рӯзҳои 12-13-уми май дар маҷмааи варзишии Кумитаи андози Тоҷикистон воқеъ дар шаҳри Душанбе доир гардид. Ҳарду бозӣ ба суди «Соро компания” бо натиҷаҳои 3:2 ва 5:2 ба охир расид.

Бозии сеюми силсилаи ниҳоӣ миёни дастаҳои “Истиқлол” ва “Соро компания” шоми сешанбеи 20-уми май дар маҷмааи варзишии «Кохи Олимп»-и Душанбе доир гардаид. “Соро компания” бо ҳисоби 4:1 пирӯз шуд.

Қаблан дар силсилабозиҳои ниманиҳоӣ “Истиқлол” бар дастаи “Амонатбонк”-и Душанбе бо натиҷаҳои 4:2 ва 2:1 пирӯз шуда, ба финал баромад.

Дастаи “Соро компания” бошад, дар силсилабозиҳои ниманиҳоӣ бар тими “Сипеҳр”-и Хуҷанд бо натиҷаҳои 6:3 ва 3:1 ғалаба карда, ба ҳаққи ширкат дар даври ниҳоии Суперлигаи футзали Тоҷикистон мушарраф шуд.

Ба ин тартиб, “Соро компания” зери раҳбарии сармураббӣ Пайрав Воҳидов бори панҷум бо Ҷоми қаҳрамонӣ, медалҳои тиллои Суперлигаи футзали Тоҷикистон ва ҷоизаи молӣ ба маблағи 50 ҳазор сомонӣ сарфароз гашт. Аз ин пеш “Соро компания” солҳои 2018, 2019, 2021 ва 2022 қаҳрамони Тоҷикистон шуда буд.

Ба дастаи «Истиқлол» бо роҳбарии сармураббӣ Александр Дзабирадзе, мутахассиси гурҷӣ, медалҳои нуқра ва ҷоизаи молӣ ба маблағи 30 ҳазор сомонӣ тақдим гардид.

Дастаҳои “Сипар”-и Хуҷанд ва “Амонатбонк”-и Душанбе барои ба даст овардани нишонҳои биринҷӣ рақобат карданд. Бозии аввал дар Душанбе бо ҳисоби 4:2 ба фоидаи “Сипар” хотима ёфт. Бозии дуюм низ дар шаҳри Хуҷанд бо пирӯзии “Сипар” бо ҳисоби 5:4 ба поён расид.

Суперлигаи футзали Тоҷикистон-2025

Силсилаи ниҳоӣ. Бозии аввал

«Соро компания» - «Истиқлол» – 3:2

12-уми май. Душанбе. Маҷмааи варзишии Кумитаи андози ҶТ. 2000 тамошобин.

Силсилаи ниҳоӣ. Бозии дуюм

«Соро компания» - «Истиқлол» – 5:2

13-уми май. Душанбе. Маҷмааи варзишии Кумитаи андози ҶТ. 2000 тамошобин.

Силсилаи ниҳоӣ. Бозии сеюм

«Истиқлол» - «Соро компания» - 1:4

20-уми май. Душанбе, “Кохи олимп”. 1200 тамошобин.

Ҳисоби силсилаи ниҳоӣ – 3:0 ба суди “Соро компания”.

Барои ҷойи сеюм, бозии аввал

«Амонатбонк» (Душанбе) – «Сипар» (Хуҷанд) – 2:4

Барои ҷойи сеюм, бозии дуюм

«Сипар» (Хуҷанд) - «Амонатбонк» (Душанбе) –– 5:4

Иттиҳоди Аврупо барои ироаи 5,5 миллион евро маблағ ба ҳайси кӯмаки изтирорӣ ба Радиои Аврупои Озод/Радиои Озодӣ (РАО/РО) мувофиқат кардааст. Дар ин бора рӯзи 20 май Кая Каллас, раиси сиёсати хориҷии Иттиҳоди Аврупо (ИА) хабар дод. Каллас гуфт, вазирони корҳои хориҷии кишварҳои узви ИА барои додани бастаи кӯмакпулиҳо барои дастгирии “кори ҳаётан зарури РАО/РО ба созиш расиданд”. Каллас гуфтааст, “маблағгузории кӯтоҳмуддат як амнияте барои журналистикаи мустақил мебошад”.

Каллас дар нишасти хабарӣ дар Брюссел дирӯз гуфт, ки ин маблағҳо тавассути созмони ғайридавлатии “Бунёди Аврупо барои демократия” ироа хоҳанд шуд. Ҳукумати Чехия, ки қароргоҳи РАО/РО дар пойтахти он – шаҳри Прага ҷойгир аст, талошҳо барои сармоягузории ин муассисаро ҳамоҳанг мекунад.

Айни замон, Каллас гуфтааст, ки Иттиҳоди Аврупо наметавонад пурра камбуди маблағгузории ин идораро дар ҳолати имрӯзааш таъмин кунад. «Тамаркузи мо бояд сари кору фаъолияти РАО/РО дар кишварҳое равона шавад, ки дар ҳамсоягии мо қарор доранду аз хабарҳои РАО/РО - дар Қафқоз ё Осиёи Марказӣ воқеан ҳам вобаста ҳастанд”, гуфт раиси сиёсати хориҷии ИА. Ӯ гуфт, баъди ин як қароре барои кӯмаки кӯтоҳмуддат, кишварҳои узв бояд роҳҳои маблағгузории дарозмуддати ин расонаро пайдо кунанд.

Президенти РАО/РО Стивен Капус дар вокунише аз ин қарори мақомоти аврупоӣ истиқбол кард. Ӯ гуфт, “мо аз ироаи ёрии изтирории ИА, ки барои истодагарии ташкилоти мо мусодиат мекунад, сипосгузор ҳастем. Ба шарофати талошҳои Кая Каллас, вазири корҳои хориҷии Чехия Ян Липавский ва сиёсатмадорони дигар, мо фаъолияти рӯзноманигории худро идома дода метавонем ва ҳамзамон талошамонро барои гирифтани пулҳои аллакай аз ҷониби Когресси ИМА ҷудошуда идома хоҳем дод. РАО/РО то замоне, ки ин пулҳо дар ихтиёри мо вогузор нашаванд, дар хатар боқӣ мемонад”, гуфт Капус.

РАО/РО ҳамоно барои гирифтани буҷаи молии соли 2025 бо Оҷонсии ИМА оид ба расонаҳои ҷаҳонӣ (USAGM) дар додгоҳ баҳсашро давом медиҳад. Ин маблағҳоро Конгресс ихтисос додааст. Рӯзи 14 март президенти ИМА Доналд Трамп қароре имзо кард, ки бар асоси он фаъолият ва буҷаи ҳафт оҷонсии давлатӣ, аз ҷумла USAGM ихтисор мешавад.

Дар пай USAGM, ки маблағгузории РАО/РО тавассути ҳамин идора дарёфт мешавад, гуфт, ки тахминан 75 миллион доллар пулҳои ҷудошуда барои ин расонаро масдуд мекунад. Ин пулҳо фаъолияти РАО/РО-ро то охири сентябри соли 2025 дар бар мегиранд. Қарорро раҳбарияти муваққатии USAGM қабул кард, ки мутобиқи дастури президент Трамп гуфт, дар талоши кам кардани хароҷот мебошад.

Дар натиҷа, фаъолияти бахшҳои РАО/РО маҳдудтар шуд, як бахши хабарнигорон ба истироҳати маҷбурӣ фиристода шуда, кор бо кормандони кироя ё фрилансерҳо қатъ шудааст. Бо ин вуҷуд, РАО/РО ҳамарӯза иҷрои рисолатҳои касбии худ барои расонидани хабарҳои саривақтӣ ва муҳимро дар 23 кишвари ҷаҳон, аз ҷумла Тоҷикистон идома медиҳад.

Аҳволи ду муҳоҷири тоҷик, ки рӯзи 20-уми май дар Қазоқистон ба садама дучор шудаанд, вазнин будааст. Дар ин ҳодисаи мудҳиш 6 нафар ба ҳалокат расида, 5 тани дигар захмӣ шуданд. Ҳамаи онҳо шаҳрвандони Тоҷикистон ва сокинони ноҳияи Қубодиён ҳастанд.

Тибқи иттилои дарёфтии Радиои Озодӣ аз Ҷамъияти тоҷикони Қазоқистон, аҳволи ду нафар аз захмиён вазнин будааст. Ба гуфтаи ин ҳамсӯҳбати мо, ин ду нафарро ба беморхонаи марказии вилояти Қустанай интиқол додаанд. Ронанда ва ду мусофири дигарро дар бемористони марказии ноҳияи Қарабалик бистарӣ кардаанд.

Мошини "Форд Транзит", ки аз Тоҷикистон ба Русия мерафт, субҳи 20-уми май ба як мошини боркаши DAF бархӯрд. Дар ин ҳодиса шаш кас ҳалок шуданд, ки як нафарашон зан буд. Фавтидаҳо аз 24 то 67 сол доштанд.

Ба гузориши расонаҳои маҳаллии Қазоқистон, ронандаи мошин дар бозпурсиҳои аввал эътироф кардааст, ки садама бо айби ӯ рух дод. Ронанда гуфтааст, ки ӯро дар сари фармони мошин хоб бурд.

Дар ҳамин ҳол, як манбаъ дар ҳукумати ноҳияи Қубодиён гуфт, ҷасади қурбониён рӯзи 21-уми май ба ватан интиқол дода мешавад.

Ба гуфтаи ин ҳамсӯҳбати мо, қариб ҳамаи фавтидаҳо хешу табор буданд ва дар деҳаи Зиракии ҷамоати Чорбоғ зиндагӣ мекарданд.

Намояндагони Ҷамъияти тоҷикони Қазоқистон ба Радиои Озодӣ гуфтанд, барои интиқоли ҷасадҳо ба Тоҷикистон ёрӣ мерасонанд.

Бо сабаби гарон будани билети ҳавопаймо, бархе муҳоҷирони тоҷик талош мекунанд аз тариқи роҳҳои заминӣ ба Русия раванд.

Дар гузашта ҳам шаҳрвандони Тоҷикистон дар роҳ ба Русия ба садама дучор шуда, ҷонашонро аз даст дода буданд.

Думаи давлатии Русия бо қабули қонуни нав муҳоҷиронро муваззаф кард, ки дар шаҳр ва вилояти Маскав макони ҷойгиршавии худро ҳар рӯз ба пулис хабар диҳанд. Қонун рӯзи 20-уми май қабул шуд.

Бар асоси ин санад, аз 1-уми сентябри имсол дар шаҳри Маскав ва вилояти ҳамноми он, таҷрибаи нав дар бораи макони ҷойгиршавии муҳоҷирон ҷорӣ мешавад.

Ин тартиб муҳоҷиронро муваззаф мекунад, ки тариқи барномаи махсуси телефонӣ, дар куҷо будани худро ба сохторҳои Вазорати корҳои дохилӣ хабар диҳанд.

Агар мақомоти Русия дар муддати се рӯз ё бештар аз он дар бораи дар куҷо будани муҳоҷир маълумот нагиранд, пас ин шаҳрванди хориҷӣ ба рӯйхати шахсони зери назорат ворид карда мешавад. Ворид шудани номи шахс ба ин рӯйхат будубоши ӯро дар Русия манъ мекунад.

Ба ҷуз муҳоҷирон, тартиби нав барои ҳама шаҳрвандони хориҷие амалӣ карда мешавад, ки ба муддати зиёда аз 90 рӯз вориди Маскав ва вилояти ҳамноми он мешаванд. Дипломатҳо, хонаводаи онҳо ва шаҳрвандони Белорус аз ин иҷрои ин муқаррарот озоданд.

Ин тартиб дар навбати аввал ба муддати чор сол ва танҳо дар вилоят ва шаҳри Маскав амалӣ мешавад. Дар назар аст, ки сар аз соли 2029 ин муқаррарот дар тамоми Русия ҷорӣ шавад.

Баъди соли 2024 Русия барои муҳоҷирон қонунҳои сахтгирона ҷорӣ кард.

Мақомоти Тоҷикистон мегӯянд, раванди сармоягузории Бонки исломии рушд ба неругоҳи "Роғун" оғоз шудааст.

Дафтари матбуотии Вазорати рушди иқтисод мегӯяд, ин мавзӯъ дар дидори вазир Завқӣ Завқизода бо намояндагони Бонки исломии рушд, дар Ҷумҳурии Алҷазоир, баррасӣ шудааст.

Бонки исломии рушд як сол пеш аз сармоягузорӣ ба неругоҳи “Роғун” хабар дода буд.

Қарор аст ин ниҳоди молии байнулмилалӣ барои "Роғун" 550 миллион доллар ҷудо кунад, ки 150 миллион аз ҳисоби худи бонк ва боқимонда 400 миллион доллари дигар аз ҳисоби фондҳои рушди арабӣ мебошад.

Аммо маълум нест, ки ин маблағ бо кадом шарту шароит ба Тоҷикистон дода мешавад.

Ҳукумати Тоҷикистон талош дорад барои то охир сохтани нерӯгоҳи "Роғун" аз хориҷ сармоя дарёфт кунад.

То ин вақт Бонки Ҷаҳонӣ ҳам аз сармоягузорӣ ба сохтмони "Роғун" хабар дода буд.

Раиси Кумитаи тафтишоти Русия Александр Бастрикин гуфт, ки ба муффаттишони ин ниҳод супориш дод, ки ҳамроҳ бо кормандони ВКД ва Росгвардия дар рейдҳои «маҳалли таҷаммӯи муҳоҷирон» иштирок карда, онҳоеро, ки шаҳрвандии Русияро гирифта худро ба қайди ҳарбӣ надаровардаанд, мушаххас кунанд.

Бастрикин, ки бо шеваи бисёр бераҳмонаву гоҳо ғайриқонунии саркӯби муҳоҷирон аз кишварҳои Осиёи Марказӣ кор мекунад, рӯзи 20 май дар ҳамоиши ҳуқуқшиносони Петербург суханронӣ кард. Ӯ аз ҷумла, гуфт, 80 ҳазор «чунин шаҳрвандони Русия» аллакай «қапида шудаву» 20 ҳазор «шаҳрванди ҷавони Русия, ки бо чӣ сабабе зиндагӣ дар Узбекистон, Тоҷикистон, Қирғизистонро хуш надоранд, дар ҷабҳа қарор доранд».

Инчунин, раҳбари Кумитаи тафтишот гуфт, ба Русия таҳти номи муҳоҷирон «ҷинояткорони оянда» сафар мекунанд ва онҳоро «қапида» ба ватанашон баргардонидан лозим аст, то ки «ҷиноятро он ҷо, на дар Русия содир кунанд».

Сохторҳои ҳифзи қонуни Русия ҳар сари чанд вақт рейди зидди муҳоҷиронро барпо карда, ба онҳое, ки шаҳрвандии Русияро қабул кардаанд, ба дасташот даъватномаи хидмати ҳарбиро супурда ба ҷанг мефиристанд. Баъзе ҳолатҳое ҳам ҳаст, ки онҳоро бо тарсу таҳдиди бекор кардани шаҳрвандиашон ба имзои созишнома бо вазорати дифоъ маҷбур мекунанд.

Соле пеш Бастрикин гуфт, ки ходимони ҳифзи қонун беш аз 30 ҳазор муҳоҷирро «қапидаанд», ки шиносномаи Русияро гирифта, вале худро ба қайди ҳарбӣ нагузоштаанд. Ӯ гуфт, тахминан 10 ҳазор нафари онҳо ба воҳидҳои ақибгоҳ барои «хандақканӣ ва сохтани такягоҳ» бурда шудаанд.

Ду бародари тоҷик, ки дар Русия барои зӯроварӣ ба маъмурони пулис ва задани онҳо паси панҷара рафтанд, баъди адои ҳукм озод шудаанд. Дар ин бора падари онҳо Расулҷон Чориев рӯзи 20-уми май ба Радиои Озодӣ хабар дод.

Ӯ гуфт, Садиакрами 24-сола тобистони соли гузашта ва Умари 22-сола моҳи марти ҳамин сол озод шуда ба Тоҷикистон баргаштаанд ва ҳарду ҳоло дар зодгоҳашон - Шаҳритус кору иқомат мекунанд.

Бародарон Саидакрам ва Умар Чориевро рӯзи 17-уми феврали соли 2022 дар истгоҳи метрои "Тулская" барои муқовимат ба афсарони пулис ҳангоми боздошт дастгир карданд.

Дар навор аз маҳалли ҳодиса он вақт дида мешуд, ки ду маъмури пулис Саидакрамро ба шикам хобонда, кӯшиши бастани дастонашро доранд. Умар аҳволи бародарашро дида ба кормандони пулис ҳамла мекунад.

Барои ин кор додгоҳи Маскав моҳи августи соли 2022 Умар Расулҷонзодаро ба 3,5 сол ва бародараш Саидакрам Ҳамроевро ба 2,5 соли зиндон маҳкум кард. Расулҷон Чориев аз Радиои Озодӣ ва сафорати Тоҷикистон дар Русия изҳори сипос кард, ки дар инъикоси ҳодиса ва ҳимоят аз ҳуқуқи фарзандонаш мусоидат кардаанд.

Бадрафтории милисаҳои рус бо муҳоҷирони тоҷик дар Русия, ба қавли ҳомиёни ҳуқуқ як кори маъмулӣ шудааст ва видеоҳои зиёде дар ин бора зуд-зуд дар шабакаҳои иҷтимоӣ нашр мешаванд.

Собиқ ҳамлагари мунтахаби футболи Инглистон Гари Линекер баъди узрхоҳиаш аз як иттиҳоми вобаста ба яҳудиситезӣ корашро дар шабакаи садову симои Би-би-си тарк мекунад. Ӯ аз соли 1999 барномаи пуртарафдореро дар бораи футбол барандагӣ мекард ва қарор буд соли 2026 ҳам дар пахши зинда ба ҳайси шореҳи Ҷоми ҷаҳонӣ кор кунад.

Линекер дар саҳифааш дар Инстаграм як навори видеоиеро бо суханронии ҳуқуқшиноси фаластиниасли канадаӣ Диана Будду бознашр кард, ки он ҷо ӯ амалҳои Исроилро танқид мекунад. Дар ин навори видеоӣ ишораи калламуше ҳам дида мешавад, ки одатан дар шарҳҳои зиддияҳудӣ ба кор меравад. Ба ин чиз созмони «Маъракаи зидди яҳудиситезӣ» таваҷҷӯҳ зоҳир намуд.

Намояндаи Линекер гуфт, ки барандаи телевизион ин ишораро надидааст. Худи журналист гуфт, ки барои мазмуни ин навор маъзарат мехоҳад, чун огоҳона ҳеҷ гоҳ маводи зиддияҳудӣ нашр намекунад. Дар ин бора бахши русии Би-би-си хабар додааст. Ин навори видеоиро аз Инстаграм пок карданд. Вале бо ин вуҷуд, раҳбарияти ширкати садову симои Бритониё ба ин хулоса омад, ки рафтори Линекер ба обрӯи ширкат зарба мезанад.

Линекер давоми ҳафт сол баландтарин маошро дарёфт мекард. Соли 2024 даромади ӯ 1,8 миллион долларро ташкил дод. Тим Дейв, раҳбари кулли ширкати Би-би-си бо нашри изҳороте аз Линекер барои саҳмаш дар журналистикаи варзишӣ изҳори сипос кард. Қарор аст охири ҳафтаи ҷорӣ охирин рӯзи кории ӯ дар Би-би-си мешавад.

Линекер барои "Лестер", "Тоттенҳем", "Эвертон" ва "Барселона" бозӣ карда дар 446 мусобиқа иштирок ва 243 гол задааст.

Дар Русия раиси як ноҳияро барои таҳдиди духтараш ба як ҷавонписаре бо мазуни ин ки ӯро ба ҷанги Украина мефиристанд, аз мақомаш барканор карда шуд. Георгий Филимонов, раиси вилояти Волгоград гуфт, ки бо як қарораш ба ҷои Юлия Шевтсова ба мақоми раиси ноҳия Нюксен як собиқадори ҷанги зидди Украинаро таъин хоҳад кард.

Духтари Юлия Шевтсова дар TikTok як матлабе нашр кард ва ба ҷавоне, ки хост бо ӯ шинос шавад, гуфт: “Ҳой, бача, раҳгум задӣ? Модари ман кист, медонӣ? Шаҳрдор! (Мо туро ба амалиёти вижа мефиристем)”.

Филимонов гуфт, ки ин ҳарфҳоро духтар дар посух ба ҷавоне нашр кард, ки зоҳиран батакрор ба ӯ пешниҳоди шиносоӣ мекард. Ин навор дар миёни корбарон сарусадои зиёд кард, Шевтсова барои ин кори духтараш узр пурсид ва гуфт, ки “кӯдакон хато мекунанд”.

Бо вуҷуди ин, Филимонов қарор кард, ки барои чунин рафтори ба гуфтааш хилоф бо меъёрҳои ахлоқӣ ва “идеологияи кори тими ҳукумат дар Волгоград” Шевтсоваро аз вазифа барканор мекунад. Юлия Шевтсова октябри соли 2024 ба мақоми раиси ноҳия таъин шуда буд.

Президентони ИМА ва Русия - Доналд Трамп ва Владимир Путин дар сӯҳбати телефонии рӯзи 19 май имкони ташкили мулоқоти ҳузуриро баррасӣ карданд.

Дар ин бор Кохи Сафед хабар додааст. Трамп ба саволи хабарнигорон дар бораи ин ки оё ӯ дар сӯҳбаташ бо Путин имкони дидори рӯбарӯро баррасӣ кардааст ё на, гуфт, «албатта, ман бо ӯ дар ин бора сӯҳбат кардам».

Аз ин пеш ёвари Путин Юрий Ушаков дар сӯҳбат бо «Ведомости» гуфт, ки ҳарду ҷониб дар баргузор шудани чунин мулоқот ҳавасманд ҳастанд.

Трамп бори дигар гуфт, ки ба бовари ӯ, Путин хоҳишманди хатми ҷанг мебошад. Қаблан Трамп гуфта буд, ки мулоқоти шахсии ӯ бо Путин метавонад дар музокира бо Украина ҳалкунанда шавад ва ҳар вақте, ки Вашингтон ва Маскав онро ташкил карда тавонистанд, барпо мешавад.

Кремл гуфтааст, ки ташкили чунин мулоқот омодагии бештар мехоҳад. Мулоқоти охирини президентони ИМА ва Русия соли 2021 баргузор шудааст.

Дар Қазоқистон собиқ муовини вазири фарҳангу варзиш Ерлан Кожагапанов барои дуздии як миллиард танга маблағ (муодили наздики 2 миллион доллар) ба се соли зиндон маҳкум шуд. Додгоҳи шаҳри Остона дар қарораш гуфт, ки мақомдори пешин аз вазифаи давлатиаш сӯиистифода карда, як миллиард танга пулро азхуд кардааст.

Ба Ерлан Кожагапанов тамоми умр ишғоли вазифаҳои давлатӣ, кор ба ҳайси додрас ваё дар сохторҳои Бонки миллии Қазоқистон манъ карда шудааст. Айбдоршавандаи дигар аз рӯи ин парванда - раҳбари ширкати Success К - Лаззат Кӯкқозоваро аз рӯи моддаи “қаллобӣ” ба панҷ соли ҳабс маҳкум карданд.

Радиои Азаттиқ – Бахши қазоқии Радиои Озодӣ мегӯяд, айбдоркунандаи давлатӣ талаб карда буд, ки собиқ муовини вазир ба ҳафт ва Кӯкқозова ба ҳашт соли ҳабс маҳкум шаванд, вале додрас ҳолатҳои сабуккунандаро ба эътибор гирифта ҳукмро нармтар кардааст.

Ин ду нафарро барои роҳ додан ба камбудиҳо ҳангоми ташкили Ҳамоиши 15-уми ҳамкориҳои Русия ва Қазоқистон дар соли 2018 муҳокима карданд. Он замон Кожагапанов муовини вазири фарҳангу варзиши Қазоқистон буд. Ӯ дар додгоҳ гуфт, ки иттиҳоми зидди ӯ “сохтакорӣ” шуда, айбдоркунандаи давлатиро дар “кори ғайрикасбӣ” гунаҳгор кард.

Сафорати Тоҷикистон дар Қазоқистон ҳалокати шаҳрвандони Тоҷикистонро дар садамаи мудҳиши нақлиётӣ дар ҳудуди вилояти Қустанай тасдиқ намуд. Ин ҳодиса субҳи 20 май дар натиҷаи бархӯрди ду мошин дар шоҳроҳи Алмаато-Екатеринбург рух дод ва дар ин ҳодиса шаш шаҳрванди Тоҷикистон ба ҳалокат расида, панҷ нафар ба беморхона интиқол дода шуданд.

Дар посухи намояндагии дипломатии Тоҷикистон дар Остона тавассути почтаи электронӣ рӯзи 20 май гуфта мешавад, ки кормандони сафорат «оиди ин ҳодиса бо намояндагони ҷамъияти тоҷикон дар Қустанай дар тамос буда, барои расонидани кӯмаки ҳуқуқӣ ва ё ҳалли дигар масъалаҳои ҷорӣ омодагии худро изҳор намудааст. Сафорат ин фоҷиаи мудҳишро зери назорати худ гирифта, бо дастрас шудани маълумоти иловагӣ иттилоъ хоҳад дод».

Сафорати Тоҷикистон дар Қазоқистон рӯйхати шахсони фавтидаро дар ихтиёри Радиои Озодӣ гузошт. Инҳо:

• Аҳтам Каримови 36-сола;
• Назрулло Боқиеви 24-сола;
• Бахтигул Боқиеваи 40-сола;
• Юсуф Солиҳови 67-сола;
• Фаёзиддини Солиҳзодаи 35-сола;
• Маҳмадюнус Аминзодаи 33-сола.

Аз ин пеш дафтари матбуотии Вазорати корҳои хориҷӣ ба Радиои Озодӣ навишт, "аз ҷониби сафир, ҷиҳати дарёфти маълумоти иловагӣ кормандони масъул муваззаф шудаанд". Ҷузъиёти аз ин беш нашр намешавад.

Дар ҳукумати ноҳияи Қубодиён ба Радиои Озодӣ гуфтанд, муҳоҷирони фавтида сокинони деҳаи Зиракии ҷамоати Чорбоғ мебошанд.

Хабари дар садама кушта шудани шаҳрвандони Тоҷикистонро нахуст манбаъҳои Радиои Озодӣ аз ҷои ҳодиса ва баъдан полиси Қазоқистон ҳам тасдиқ намуданд. Аз ҷумла, нисфирӯзии сешанбе навбатдори раёсати полиси вилояти Қустанай ба хабаргузории "Интерфакс-Қазоқистон" тасдиқ кард, ки ҳама шахсони ҷондода шаҳрванди Тоҷикистон буданд.

Ҳодиса субҳи сешанбе дар ҳудуди вилояти Қустанай дар наздикии марз бо Русия рух додааст. Ба навиштаи расонаҳои Қазоқистон, ронандаи мошини "Форд Транзит", ки дар дохилаш даҳ шаҳрванди хориҷӣ қарор доштанд, ба мошини боркаши DAF бархӯрд. Панҷ нафари зиндамонда ба бемористони марказии ноҳияи Қарабалик интиқол ёфтанд.

Дар идораи пулиси вилояти Қустанай ба Радиои Озодӣ гуфтанд, ки аз рӯи ин ҳодиса тибқи банди 4-уми моддаи 345-и Кодекси ҷиноии Қазоқистон, яъне "Вайрон кардани қоидаҳои ҳаракат дар роҳ, ки боиси марги зиёда аз ду нафар шудааст", парвандаи ҷиноӣ боз гардидааст.

Дар ҳамин ҳол, навореро аз маҳалли фоҷеа корбарон дар ихтиёри Радиои Озодӣ вогузор карданд. Мусоҳибон дар сӯҳбат бо Радиои Озодӣ гуфтанд, ҳамаи мусофирони мошин сокинони ноҳияи Қубодиён буданд, ки аз Тоҷикистон ба Русия мерафтанд.

Қазоқистон кишвари ҳамсояи Русия мебошад ва шаҳрвандони Тоҷикистон, ки бо мақсади кору зиндагӣ ба он кишвар мераванд, аз ҷумла, ба хотири сарфаи маблағи сафар бо роҳҳои ҳавоӣ, аз роҳҳои нақлиётӣ истифода мебаранд.

Садамаҳои нақлиётӣ бо иштироки шаҳрвандони Тоҷикистон дар роҳҳои Қазоқистон дар гузашта ҳам рух додааст.

Роҳбарони Амрико ва Русия рӯзи 19-уми май дар гуфтугӯи телефонӣ роҳҳои қатъи ҷанг дар Украинаро баррасӣ карданд. Суҳбати Доналд Трамп ва Владимир Путин зиёда аз ду соат давом кардааст.

Путин гуфтугӯ бо Трампро "созанда" ва "муассир" хонд. Раиси ҷумҳури Русия гуфт, мисли гузашта барои Маскав муҳим "аз байн бурдани омилҳои буҳрон аст." Ба гуфтаи Путин, Русия "омодаи ҳамкорӣ" бар сари таҳияи ёддошти сулҳ бо Украина аст.

Доналд Трамп дар шарҳи суҳбаташ бо Путин гуфт, Русия ва Украина “фавран” ба гуфтугӯҳо дар бораи оташбас ва қатъи ҷанг оғоз мекунанд. Аммо Трамп санаи мушаххасро ба забон наовард.

Трамп ҳамчунин гуфт, Русия мехоҳад бо ИМА тиҷорати васеъ дошта бошад ва ӯ ҳам бо ин розӣ аст. Доналд Трамп ҳамчунин навиштааст, ҷузъиёти суҳбаташро бо раиси ҷумҳури Украина ва дигар роҳбарони Аврупо дар миён гузоштааст.

Дар ҳамин ҳол баъзе расонаҳо гузориш доданд, ки президенти Украина аз Доналд Трамп хостааст, алайҳи Русия таҳримҳои нав ҷорӣ кунад, агар ин кишвар дар фурсатҳои наздик ба оташбас тан надиҳад. Зеленский дар суҳбат бо Трамп, бори дигар ба ҷорӣ шудани оташбас таъкид кардааст.