Владимир Путин, раиси ҷумҳурии Русия ва ҳамтои суриягиаш Башор Асад дар Маскав роҷеъ ба ҳамкориҳои низомӣ алайҳи минтақаҳои таҳти ишғоли мухолифони ҳукумати Сурия гуфтугӯ кардаанд.
Дар ин бора расонаҳои давлатии Сурия рузи 14-уми сентябр хабар доданд.
Дар ҷанги даҳсолаи Сурия, Русия ва Эрон аз ҳукумати Башор Асад пуштибонӣ мекарданд.
Ҷанги дохилии Сурия дар моҳи марти 2011, пас аз фишорҳо ба эътирозҳои зиддиҳукуматӣ оғоз шуд. Дар ин ҷанг беш аз 400 ҳазор нафар ҷон бохта, миллионҳо нафар овора шуданд.
Русия дар моҳи сентябри соли 2015 ба пуштибонӣ аз нерӯҳои ҳукумати Башор Асад вориди ин ҷанг шуд. Дар ҳоли ҳозир аксар қаламрави Сурия зери назорати нерӯҳои Асад қарор дорад.
Бо ин ҳол, қисматҳои аз қаламрави ин кишварро нерӯҳои курди мухолифи Башор Асад идора мекунанд. Ин нерӯҳо аз сӯи Амрико ҳимоят мешаванд ва дар қисмати шарқӣ ва шимоли шарқи Сурия ҷойгир мебошанд.
Садҳо нерӯи Русия пас аз сентябри соли 2015 ба Сурия фиристода шуданд ва Маскав дар шаҳри Лозиқия пойгоҳи низомӣ бунёд кард. Русия ҳамчунин дар шаҳри бандарии Тартус барои ҳимояти нерӯҳои ҳавоияш ва низ нерӯҳои заминӣ, пойгоҳ сохт.
Путин ва Асад бори охир дар моҳи январи соли 2020 дар Димишқ, пойтахти Сурия, мулоқот карда буданд.
