Дар шаҳри Тифлиси Гурҷистон рӯзи душанбеи 10-уми май додгоҳ роҳбари "Ҳаракати ягонаи миллӣ" Никанор (Никӣ) Мелияро дар ивази гарав аз зиндон озод кард. Иттиҳоди Аврупо ин иқдомро барои ҳалли буҳрони сиёсӣ дар Гурҷистон "қадами муҳим" арзёбӣ кард.
Мелия аз 23 феврал ба ин сӯ - ба далели напардохтани гарави парвандаи марбут ба эътирозҳои соли 2019 дар ҳабс буд. Созишномаи озодии вай аз ҳабс таҳти сарпарастии раиси Шӯрои Аврупо Шарл Мишел ҳосил шуд.
Ба навиштаи расонаҳо, Никанор Мелия дар доираи парвандаи ҳамла ба порлумон дар моҳи июни соли 2019 айбдор мешавад. Шаби 20 ба 21 июни соли 2019 мухолифони гурҷӣ зидди даъвати ҳайати порлумони Русия ба порлумони Гурҷистон эътироз карданд. Раиси ҳайати Думаи давлатии Русия Сергей Гаврилов он замон ба курсии раиси порлумони Гурҷистон нишаста буд.
Никанор Мелия дар даст доштан дар ташкили хушунати дастаҷамъӣ ва иштирок дар он айбдор мешавад. Ин мухолифи ҳукумати Гурҷистонро дар сурати исботи айб нуҳ соли зиндон таҳдид мекунад.
