Дар мусобиқаи байналмилалии ҷудо "Tbilisi Grand Slam 2021", ки рӯзҳои 26-28-уми март дар пойтахти Гурҷистон – Тбилиси - баргузор мешавад, Тоҷикистонро ду варзишгар - Шаҳбоз Саидаброров ва Комроншоҳи Устопириён - намояндагӣ хоҳанд кард.
Ба иттилои сомонаи расмии Федератсияи байналмилалии ҷудо (IJF), барои ширкат дар мусобиқаи "Tbilisi Grand Slam 2021" то имрӯз, 25-уми март, иштироки 494 варзишгар (270 мард ва 224 зан) аз 81 кишвари панҷ қораи ҷаҳон дар назар аст.
Тоҷикистонро дар сабқати мардон Шаҳбоз Саидаброров (дар вазни то 60 кг) ва Комроншоҳи Устопириён (дар вазни то 90 кг) намояндагӣ мекунанд.
Бар асоси қуръакашӣ Шаҳбоз Саидаброров дар даври аввал озод буда, дар даври дувум бо ҷоизадори қаҳрамонии ҷаҳон-2019 аз Узбекистон Шарофиддин Лутфуллоев рақобат мекунад.
Комроншоҳи Устопириён низ рақобатро аз даври дувум шуруъ хоҳад кард. Рақибаш ғолиби ҷуфти Абдураҳмон Диао (Сенегал) – Матиас Куусик (Эстония) мебошад.
Рӯзи аввали мусобиқа – 26-уми март – қувваозмоиҳо дар вазнҳои -60 кг, -66 кг миёни мардон ва -48 кг, -52 кг, -57 кг миёни занон баргузор мешавад. Рӯзи дувум – 27-уми март - гуштигирони вазнҳои -73 кг, -81 кг миёни мардон ва -63 кг, -70 кг миёни занон рақобат хоҳанд кард. Мусобиқа 28-уми март бо қувваозмоиҳо дар вазнҳои -90 кг, -100 кг, +100 кг миёни мардон ва -78 кг, +78 кг миёни занон ба поён мерасад.
Варзишгарон дар ин мусобиқаи байналмилалӣ ба ҷуз аз медал соҳиби имтиёзҳои олимпӣ хоҳанд шуд. Барои мақоми аввал 1000 имтиёз, барои ҷойи дувум 700 имтиёз ва барои ҷойҳои севум 500 имтиёз дода мешавад.
Инчунин ба беҳтаринҳо ҷоизаҳои молӣ тақдим мегардад. Дар ҳар як вазн ба ғолиб 5000 доллари ИМА, барои ҷойи дувум 3000 доллар ва барои ҷойҳои севум 1500-долларӣ супурда хоҳад шуд.
Зимнан, "Tbilisi Grand Slam 2021" чаҳорумин мусобиқа аз силсилаи чорабиниҳои Федератсияи байналмилалии ҷудо дар соли равон мебошад.
