СММ гуфт, ки 1,7 миллиард доллар ваъдаи донорҳои байналмилалӣ барои кӯмак ба Яман барои пешгирӣ аз гуруснагии шадид дар ин кишвари ҷангзада кифоят намекунад. Дар конфронсе, ки 1 март ба таври онлайнӣ баргузор шуд, Антонио Гутерреш, дабири кулли СММ дархост кард, ки соли ҷорӣ барои ёрӣ ба Яман 3,85 миллиард доллар ёрӣ дода шавад, чун ин кишвар дар ҳолати бӯҳрони бисёр шадиди башарӣ қарор дорад. Вале маблағи ваъдашуда назар ба соли гузашта ба маротиб камтар будааст. Гутерреш дар ҷаласа гуфт, “миллионҳо кӯдакону занон ва мардон дар Яман шадидан ба ёрӣ ниёз доранд, то ки зинда бимонанд. Коҳиши ёрӣ баробар бо ҳукми қатл аст”. СММ мегӯяд, ки тахминан 16 миллион сокини Яман, ки нисфи аҳолии ин кишвар мебошад, дар ҳолати гуруснагӣ мебошанд ва 5 миллион нафари онҳо дар фақри шадид ба сар мебаранд. Дар Яман, ки соли 2015 дучори ҷанги шаҳрвандӣ шуд, 130 ҳазор нафар кушта ва 3 миллион нафар беҷо шуданд.
Гутерреш гуфт, кӯмаки ваъдагӣ ба Яман кифоят намекунад
