Амрикову Аврупо боздошти ҳазорон эътирозгарро дар Русия маҳкум карданд. АКС

Амрикову Иттиҳоди Аврупо боздошти эътирозгаронро дар Русия маҳкум карда, хоҳони раҳоии тазоҳургарон ва хабарнигорон шуданд.

Ҳангоми тазоҳуроти рӯзи 23-юми январ, ки бо талаби раҳоии Алексей Навалний, мухолифи сарсахти Кремлин, дар сартосари Русия баргузор шуд, ҳазорон нафар дастгир шуданд. Вашингтон ончиро, ки рафтори хашини пулис бо эътирозгарон номид, маҳкум кард.

Бино ба гузоришҳо, беш аз 3 ҳазор кас дастгир шудаанд.

Пулиси Русия дар ҷараёни эътирозҳо аз боздошти мунаққиди сиёсатҳои Кремлин Алексей Навалний зиёда аз 2100 касро боздошт кард. Намоишҳои рӯзи шанбеи 23 январ дар чандин шаҳри Русия аз бузургтарин эътирози солҳои охир дониста шуд.

Сухангӯйи Вазорати корҳои хориҷии Амрико гуфт, шахсоне, ки боздошт шуданд, аз ҳуқуқи асосии худ барои тазоҳурот истифода мекарданд. Вай ҳамзамон хостори раҳоии беқайду шарти Навалний шуд.

Иттиҳоди Аврупо низ боздошти тазоҳургаронро дар Русия маҳкум кард. Ҷозеп Борел, раиси идораи сиёсати хориҷии Иттиҳоди Аврупо дар Твиттер бо ибрози нигаронӣ гуфт, ба хотири боздошти эътирозгарон ва истифодаи нобаробари зӯр мутаассуф аст.