Мусофири як метро дар шаҳри Маскав ҳангоми боздошти маъмурони пулис фавтидааст. Дар ин бора хабаргузории ТАСС бо такя ба маркази матбуоти Раёсати корҳои дохилӣ иттилоъ дод.
Ҳодиса шаби 26-уми декабр дар даромадгоҳи истгоҳи "Шугинская" рух додааст. Бино ба иттилои расмӣ, ҳалокшуда ҳангоми талоши шикастани банкомат дастгир шудааст. Дар Раёсати корҳои дохилии Маскав гуфтаанд, ӯ ба кормандони пулис муқобилият нишон дода, ҳангоми боздошт аз ҳуш рафт.
Дар канали “ЧП Москва” дар Телеграм навори ҳодисаро нашр карданд. Дар он дидан мумкин аст, ки дар амалиёти боздошт 6 маъмури пулис ҳузур доранд ва боздоштшуда талоши раҳо шуданро дорад, аммо зӯроварӣ нишон намедиҳад. Кормандони пулис ӯро ба замин хобондаанд ва ӯ дод мезанад, ки “таслим шудам”.
Муаллифи навор навиштааст, боздошти мард аз он шуруъ шуд, ки ӯ ниқоби тиббӣ надошт. Ба гуфтаи шоҳиди ҳодиса, пас аз он ки нисбат ба дастгиршуда зӯроварӣ истифода шуд, ӯ дод задааст, ки “ман Путинро интихоб кардам - ман озодиро интихоб кардаам”. Дар видео мушоҳида мешавад, як корманди пулисе ҳам, ки дар ин ҳодиса ҳузур дорад, ниқоби тиббӣ надорад.
