Пайвандҳои дастрасӣ

Хабари нав

Парвози ду ҳавопаймои ҷангии Амрико дар наздикии соҳилҳои Эрон


Ду ҳавопаймои ҷангии бузурги Амрико бо шуморе аз ҳавопаймоҳои се кишвари Халиҷи Форс, аз ҷумла, Арабистони Саудӣ, рӯзи 10-уми декабр дар наздикии соҳилҳои Эрон барои чанд соат парвоз карданд.

Хабаргузории "Асошиэйтед пресс" бо такя ба мақомоти Амрико навишт, ки ҳадаф аз ин парвозҳо, паёмҳои боздоранда ба Эрон ва таъкид бар ин буд, ки Амрико ба ҳифзи субот дар минтақа пойбанд аст.

Ин ду ҳавопаймои "B-52" рӯзи чаҳоршанбе аз яке аз иёлатҳои Амрико барои анҷоми ин маъмурият, ки 36 соат тӯл кашид, парвоз карда буданд. Парвози онҳо дар наздикии осмони Эрон ду соат идома дошт.

Дар муддати камтар аз як моҳи гузашта ин дувумин бор аст, ки ин ҳавопаймоҳо дар фазои минтақа дида мешаванд. Расонаҳои амрикоӣ ҳафтаи гузашта гуфтанд, ки раиси ҷумҳур Доналд Трамп дар нишасте дар Қасри Сафед хостори баррасии эҳтимоли ҳамлаи низомӣ ба Эрон шуда буд. Дар пайи ин нишаст, ду ҳавопаймои "B-52" бар фарози Ховари Миёна парвоз доштанд.

Гузориши хабаргузории "Ассошиэйтед пресс" меафзояд, ки маъмурияти нави ин ҳавопаймоҳои ҷангӣ баёнгари нигаронии Амрико дар пайи кушта шудани Муҳсин Фахризода, донишманди ҳастаии Эрон ва аввалин солгарди кушта шудани Қосим Сулаймонӣ, фармондеҳи Сипоҳи Қудс мебошад.

Гузоришҳо мегӯянд, ки Амрико дар бораи парвози ин ду ҳавопаймои стратегии худ, ки тавони интиқоли бомбаҳои вазнин ва аслиҳаи атомиро доранд, ба ҳампаймонҳои худ дар минтақа хабар дода буд.

Чанд рӯзи пеш гуфта шуд, ки як киштии ҳавопаймобари Амрико бо се киштии дигари ҷангӣ хилофи ҷадвали аз қабл эълоншуда то мудати номаълум дар минтақа мемонад ва ба пойгоҳи худ боз нахоҳад гашт.

Шарҳҳо

Шарҳи нав расид
Идома
XS
SM
MD
LG