Бар асари заҳролудшавӣ аз "консерваи бодирингу помидор" дар ноҳияи Данғараи вилояти Хатлон 7 нафар заҳролуд шуда, рӯзи якуми ноябр яке аз онҳо фавтидааст. Дар Хадамоти назорати санитарию эпидемологии ноҳияи Данғара ба Радиои Озодӣ гуфтанд, ки ҳоло ҳамаи беморон таҳти назорати табибон қарор доранд. Афроди заҳролудшуда ҳама сокинони деҳаи Меҳробод будаанд.

Бобоҷон Ғуломзода, сардори Хадамоти назорати санитарӣ ва эпидемиологии ноҳияи Данғара сешанбеи 3-юми ноябр дар суҳбат ба Радиои Озодӣ гуфт, аввалин нафаре, ки бо нишонаҳои заҳролудшавӣ ба бемористон ворид шуда буд, ба пурсиши табибон ҷавоб намедод ва пинҳон мекард. Ба гуфтаи ӯ, ин амр дар ниҳоят боиси фавти як нафар шуд. Мақомот аз шахси фавтида Насим Саъдуллоев ном бурданд, ки 23 сол умр доштааст.

Дар ҳоли ҳозир ҳафт тан аз афроди хонаводаи Бахтиёр Қаюмови 37-сола дар ҳолати вазнин ба Бемористони ҷумҳуриявии ноҳияи Данғара интиқол ёфта, зери муоинаи табобат қарор доранд. Қаҳрамон Камолов, сартабиби Бемористони ҷумҳуриявии Данғара ба Радиои Озодӣ гуфт, ки ҳоло худи Бахтиёр Каюмов дар бахши эҳё қарор дорад ва табибон талош доранд ӯро наҷот диҳанд.

Ҳамзамон аз Раёсати тандурустии Хатлон гуфтанд, ки панҷ нафар ҳоло дар бемористони марказии ноҳияи Данғара ва як нафар дар Бемористони ҷумҳуриявӣ воқеъ дар ҳамин ноҳия бистарӣ мебошанд.

Ҳафт узви як хонавода дар Данғара дар ҳоле заҳролуд шуданд, ки ҳоло сокинони Тоҷикистон бо далели гарон ва камчин шудани меваву сабзавот дар зимистон, дар фасли тобистон ин маҳсулотро дар шакли консерва захира мекунанд. Мутахассисон мегӯянд, агар консерва то андозае мушкили захираи ғизоро ҳал мекунад, вале хатар ҳам дорад.

Дар сурати риоя нашудани меъёрҳои тозагӣ, истифода аз маҳсулоти дорои маводи кимиёии зиёд, дар дохили консерва таҷзияҳои кимиёӣ мегузарад ва ғизои хушхӯр ба заҳр табдил шуда метавонад.

Моҳи декабри соли 2017 чаҳор узви як хонавода дар Кӯлоб дар натиҷаи истеъмоли ғизои олуда заҳролуд шуда буданд.

Соли 2012 дар ноҳияи Зафарободи вилояти Суғд бар асари истеъмоли консерваи заҳролуд як нафар ҷони худро аз даст дод. Соли 2016 низ 3 нафар дар Кӯлоб аз заҳролудшавӣ ҷон бохтанд.

Теъдоди парвандаҳои хиёнат ба давлат дар Русия дар се моҳи аввали соли 2026 назар ба соли 2025 бист дарсад бештар шудааст.

Ин омор аз забони Дмитрий Заир-Бек, мудири лоиҳаи “Первий отдел” дар нишасте дар Берлин садо дод.

Ба иттилои манбаъ, баъд аз 24-уми феврали соли 2022, ки Русия ба Украина ҳамла кард, Хадамоти федеролии амният ё ФСБ бо иттиҳомҳои хиёнат ба давлат, ҷосусӣ, ҳамкории пинҳонӣ бо давлати хориҷӣ ва кумак ба душман зиёда аз 1500 парванда боз кардааст.

“Комилан мантиқист, ки ин ҳолат рӯй медиҳад. Масъалаҳои амниятӣ дар мадди аввал гузошта шудаанд. Аз ин рӯ, эҳтимол ин раванд идома ёфта, ҳатто ба нишондиҳандаҳои бесобиқа ва рекордӣ мерасад”, -- афзуд ин ҳомии ҳуқуқ.

Додгоҳҳои Русия дар соли 2025-ум 468 нафарро бо иттиҳоми хиёнат ба давлат ва ҷосусӣ маҳкум карданд, ки аз соли 1997 рекордӣ ба ҳисоб меравад.

Ба гузориши ҷамъияти Parubets Analytics, аз замони оғози ҷанги Русия алайҳи Украина 1006 нафар дар Русия бо гуноҳи хиёнат ба давлат ва ҷосусӣ зиндонӣ шудаанд. Ин дар ҳолест, ки аз соли 1997 то феврали 2022 фақат 196 касро бо ин иттиҳомҳои вазнин маҳкум карда буданд.

Мақомоти интизомии Тоҷикистон мегӯянд, фақат дар як рӯз ду зани ҷавон бо як шева қасди ҷони худ кардаанд. Ҳарду ҳам худро ба дарё андохта, вале раҳгузарон наҷот додаанд.

Раёсати умури дохилии шаҳри Душанбе рӯзи 8-уми июн дар баёнияе гуфт, ду ҷавонеро, ки нагузоштаанд, занони ҷавон даст аз ҷони худ бишӯянд, бо сипоснома ва подоши молӣ қадрдонӣ карданд.

Дар баёния аз ин ҷавонон Азимҷон Валиев ва Фаридуншоҳ Ваҳҳобов ном бурдаанд, ки аввали духтареро аз рӯдхонаи Душанбе ва дувумӣ аз рӯдхонаи Кофарниҳон берун кашидаанд.

Ному насаби духтарон нагуфтаанд, аммо дар хабар омадааст, ки ҳарду ҳодиса рӯзи 1-уми июн сурат гирифтааст.

Тибқи омори расмӣ, соли 2025 дар Тоҷикистон беш аз дусад зан худкушӣ ё қасди ҷони худ кардаанд. Зӯроварӣ ба занро, ки дар ҷомеаи Тоҷикистон ба қавле “расм” шудааст, як сабаби асосии худкушии бонувон медонанд.

Артиши Исроил субҳи 8-уми июн хабар дод, ки ин кишвар ҳадафи ҳамлаи мушакии Эрон қарор гирифтааст.

Эфи Дефрин, сухангӯйи артиши Исроил, гуфт, "чанде пеш режими террористии Эрон ба самти давлати Исроил мушак андохт. Мо ба ҳимоят аз он омодаем. Нерӯи дифоии Исроил ба ҳифзи кишвар омодагиии қавӣ гирифта, ҳозир аст, ҳамлаи ҷавобӣ роҳандозӣ кунад."

Артиши Исроил ба мардуми ин кишвар дастур дод, ки дар паноҳгоҳҳо ҷойгир шуда, мунтазири дастурҳои баъдӣ бошанд.

Ба қавли низомиёни Исроил, тамоми мушакҳои эронӣ хунсо шудаанд, вале хадамоти вазъияти фавқулодаи Исроил наворе пахш намуда, гузориш додааст, ки боқимондаи мушакҳои хунсошудаи эронӣ ба як хона дар маҳаллаи яҳудинишини соҳили ғарбии рӯди Урдун исобат намудааст.

Хабарнигори "Рейтерс" мустақилона макон ва замони ин наворро ташхис накардааст.

Embed ба дигарон фиристед

Эрон ҳамла кард ва Исроил ҷавоб дод

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:44 0:00

Линки мустақим

• 240p | 6.8MB
• 360p | 10.5MB
• 480p | 17.1MB
• 720p | 30.5MB
• 1080p | 58.1MB

Дар пайи ҳамлаҳо президенти Амрико Доналд Трамп гуфт, ӯ дар суҳбат бо сарвазири Исроил аз Бенямин Нетаняҳу хостааст, ки Исроил ба ҳамлаҳои эронӣ ҷавоб надиҳад.

Дар ҳамин ҳол, низомиёни Исроил тасдиқ мекунанд, ки субҳи душанбе нерӯҳои ҳавоии ин кишвар минтақаҳои ғарбӣ ва марказии Эронро ба таври густурда оташборон кардаанд.

Артиши исроил дар шабакаи "Х" навиштааст, ки "ахиран пойгоҳҳои дифоӣ дар саросари Эрон барқарор карда шуданд, то имконоти барҳамзадашудаи режими Эрон эҳё гарданд. Зарбаи мо боиси маҳви ин пойгоҳҳо гардид."

Ба нақли телевизиони давлатии Ҷумҳурии Исломӣ, таркишҳо дар Теҳрону Караҷ, Табрез ва Исфаҳон сабт шуд.

Сипоҳи посдорони инқилоби исломии Эрон мегӯяд, мушакборони Исроил ҳушдор аст, ки давлати яҳудӣ бояд ҳамлаҳоро ба ҷануби Лубнон бас кунад. Эрон борҳо таъкид кардааст, ки созишаш бо Амрико ба ҳифзи оташбас дар Лубнон иртиботи ҷиддӣ дорад. Дар моҳи март Исроил ба хоки Лубнон убур намуд.

Артиши Исроил иброз доштааст, то замоне ки "Ҳизбуллоҳ" шимоли Исроилро оташборон мекунад, амалиёти Исроил дар саросари Лубнон идома хоҳад кард.

"Ҳизбуллоҳ" як гурӯҳи ниманизомӣ ва ҳизби сиёсӣ аст, ки бахши калоне аз ҷануби Лубнонро зери назар дорад. Амрико ин гурӯҳро созмони террористӣ медонад ва Иттиҳоди Аврупо танҳо шохаи низомии онро дар феҳристи сиёҳ қарор додааст.

Амалиёти Амрикову Исроил дар Эрон 28-уми феврали имсол оғоз ёфта буд. 7-уми апрел ҷонибҳои даргир оташбас эълон намуданд. Ҳафтаи гузашта ҳам чанд ҳамлаи пароканда миёни низомиёни Иёлоти Муттаҳида ва Эрон ҷой дошт.

Мақомоти идораи оташнишонии Тоҷикистон ба таҳқиқи сӯхтори бинои дуошёна дар шаҳри Норак шуруъ кардаанд. Ҳодиса 7-уми июн рух дод.

Рӯзи 8-уми июн дар дафтари матбуоти Сарраёсати оташнишонӣ ба Радиои Озодӣ гуфтанд, ки мутахассисон сабабҳои рух додани ҳодиса ва зарари онро муайян доранд. Ҳамсуҳбати мо гуфт, баъди ошкор шудани сабаби сӯхтор ба расонаҳо гузориш медиҳанд.

Дар ҳукумати Норак ба Радиои Озодӣ гуфтанд, муовини аввали раиси шаҳр дар ҷойи ҳодиса қарор дорад ва раванди рафъи пайомадҳои ин ҳодисаро назорат мекунад.

Навори сӯхтори ин бинои дуошёна дар шаҳри Норак шоми 7-уми июн ба шабакаҳои иҷтимоӣ роҳ ёфт. Ин бино пурра аз чӯб сохта шудааст.

Як корбари Радиои Озодӣ навишт, дар пайи ин ҳодиса зиёда аз 16 оила бе хонаву дар мондаанд.

Ҳар сол бар асари сар задани сӯхтор ба шаҳрвандон ва корхонаҳои кишвар миллионҳо сомонӣ зарар мерасад.

Навор дар Инстаграм:

Никол Пашинян, сарвазири Арманистон аз пирӯзии ҳизбаш дар интихоботи порлумонии 7-уми июн хабар дод.

Пашинян дар нишасти хабарии баъд аз эълони натиҷаҳои интихобот гуфт, "ин ғалабаи таърихӣ аст, ки бешубҳа устуворӣ ва рушди Арманистонро таъмин мекунад".

Кумисюни марказии интихоботи Арманистон пас аз ҳисоби 91 дарсад аз баргаҳои раъй хабар дод, ки ҳизби "Паймони шаҳрвандӣ" 50,1; эътилофи рӯ ба Русияи “Арманистони пурқувват” 23,4 ва эътилофи “Арманистон” 9,8 дарсади овозҳоро гирифтаанд.

Бар асоси натиҷаҳои ибтидоӣ, ҳизби Пашинян аз 105 курсии порлумон 61-63 курсиро ба даст меорад ва аксариятро соҳиб хоҳад шуд. Албатта, агар натиҷаҳои интихобот то ҳисоби охирин баргаи раъй сахт дигар нашавад. Натиҷаҳои ниҳоии интихобот 14-уми июн эълон мешаванд.

Тибқи омори Кумисюни марказии интихобот, 2,5 миллион шаҳрванди ҳаққи раъй сабти ном шудаанд ва 59 дарсади онҳо овоз доданд.

Қариб 400 нозир аз дохил ва хориҷи кишвар ҷараёни овоздиҳиро назорат кардаанд.

Ба гузориши хабарнигорони бахши армании Радиои Озодӣ, кумисюнҳои интихоботӣ ва нозирон чанд мавриди қонуншиканиро дар ҷараёни овоздиҳӣ сабт кардаанд.

Дар пайи як садама ё тасодуфи нақлиётӣ дар ноҳияи Фархор чор ҷавон ба ҳалокат расидаанд. Ба иттилои расмӣ, ҳодиса 7-уми июн дар роҳи ҷамоти Ватани ин ноҳия рух додааст.

Вазорати корҳои дохилӣ дар шарҳи ҳодиса гуфт, Файзалӣ Шарифови 58-сола “муқобили самти ҳаракат баромада”, ба нақлиёти тамғаи “Опел” задааст.

Дар ин ҳодиса чор мусофири нақлиёти "Опел" ҷароҳати сахт бардошта, дар шифохона ҷон додаанд. Фавтидагон аз 15 то 31-сола ва сокинони деҳаи Садоқат будаанд.

Навори дафни фавтидагон дар шабакаҳои иҷтимоӣ пахш шуд.

Мақомот гуфтанд, ҳодисаро таҳқиқ доранд.

Ҳар сол дар садамаҳои нақлиётӣ дар Тоҷикистон садҳо кас кушта ва маъюби якумрӣ мешаванд. Тибқи иттилои расмӣ, соли 2025 дар пайи садамаҳои нақлиётӣ дар Тоҷикистон 643 нафар ҷон бохтаанд.

Субҳи 7-уми июн дар Арманистон овоздиҳӣ дар интихоботи порлумонӣ оғоз шуд.

Нуқтаҳои овоздиҳӣ соати 8-и субҳ боз шуданд ва қарор аст овоздиҳӣ то соати 20 идома кунад.

Вазорати корҳои дохилии Арманистоон гуфт, дуюним миллион шаҳрванди ҳаққи раъй сабти ном шудаанд.

Комиссияи марказии интихоботи Арманистон гуфт, натиҷаҳои пешакӣ 24 соат баъди баста шудани нуқтаҳои раъй ва натиҷаи ниҳоии овоздиҳӣ 14-уми июн эълон мешаванд.

Дар интихобот 18 эътилофи ҳизбҳои сиёсӣ ширкат доранд. Тибқи назарпурсиҳои пешакӣ, ҳизби нахуствазир Никол Пашинян дар қиёс ба аҳзоби тарафдори Русия пешсаф аст.

Ин интихобот нишон медиҳад, ки дар пасманзари ҷанги Қарабоғи Куҳӣ, наздикӣ ба Ғарб ва кам кардани вобастагӣ аз Русия, боварии мардуми Арманистон ба Никол Пашинян чӣ қадар аст.

Равобити Русия ва Арманистон дар моҳҳои ахир ба сардӣ гароидааст. Моҳи май Русия воридоти чанд маҳсулот аз Арманистонро маҳдуд кард. Дар оғози моҳи май Арманистон мизбони нишасте бо ҳузури роҳбарони Аврупо, аз ҷумла президенти Украина буд.

Додгоҳи федеролӣ дар Вашингтон маҳдудиятҳои ҷорикардаи маъмурияти Доналд Трамп барои муҳоҷирати қонуниро манъ кард.

Ин маҳдудиятҳо моҳи ноябри соли 2025 ва баъди ҳамла ба хизматчиёни ҳарбии Горди миллӣ ҷорӣ шуд. Тибқи ин қарор, қоидаҳои гирифтани паноҳгоҳ, иҷозатномаи кор ва грин-корт барои шаҳрвандони 39 кишвари Африқо, Осиё, Амрикои Лотинӣ ва Ховари Миёна сахтар мешавад.

Додрас Ҷон Макконнелл ин қарорро ғайриқонунӣ хонд ва навишт, сиёсати маҳдудият барои муҳоҷирати қонунӣ "ҳаёти муҳоҷиронеро, ки дар Иёлоти Муттаҳида зиндагӣ мекунанд, дар вазъияти номуайяни ҳуқуқӣ қарор дод".

Ба андешаи Макконнелл, Хадамоти шаҳрвандӣ ва муҳоҷирати ИМА бо баҳонаҳои сохтаи марбут ба амнияти миллӣ талош карданд, ки рӯҳияи зиддимуҳоҷиратиро пинҳон кунанд. Ӯ қайд кард, ки бинобар ин тадбирҳо ҳазорон нафар ним сол боз танҳо ба сабаби маҳалли таваллуди худ бе мақоми ҳуқуқӣ ва кор мондаанд.

Даъво бо талаби бекор кардани маҳдудиятҳо моҳи март аз ҷониби эътилофи созмонҳое пешниҳод шуд, ки ба муҳоҷирон кӯмак мерасонанд.

Оҷонсии назорати маводи нашъаовари Тоҷикистон аз ошкор шудани ду махфигоҳи маводи мухаддир дар шаҳри Панҷакент хабар додааст.

Дафтари матбуоти ин ниҳод навишт, аввали моҳи июн зимни амалиёте як сокини 44-солаи шаҳри Панҷакент бо гумони "муомилоти ғайриқонунии маводи нашъаовар" дастгир шуд.

Ба гуфтаи манбаъ, ин мард дар ҳудуди заминҳои кишоварзии як хоҷагии деҳқонӣ дар ҷамоати "Фароб", миқдори зиёди ҳашишро пинҳон кардааст.

Назари фарди боздоштшуда ва наздиконаш ба ин иттиҳом маълум нест.

Дар хабари Оҷонсӣ омадааст, аз махфигоҳи аввал 31 килограм ва аз махфигоҳи дуввум зиёда аз 1 килограм маводи мухаддири навъи ҳашиш пайдо карданд. “Ҳамин тариқ, вазни умумии маводи мусодирашуда зиёда аз 32 килограммро ташкил дод”, - гуфтанд дар Оҷонсии назорати маводи нашъаовар.

Мақомот алайҳи ин сокини Панҷакент, ки падари чор фарзанд ва муваққатан бекор будааст, бо иттиҳоми қочоқи маводи мухаддир дар ҳаҷми калон (қисми 4 моддаи 200 Кодекси ҷиноятӣ) парванда боз кардаанд. Ин банди қонун аз 12 то 20 сол зиндонро пешбинӣ мекунад.

Мақомоти Тоҷикистон ҳамасолона аз мусодираи даҳҳо килограм маводи мухаддир хабар медиҳанд. Ба омори расмӣ, танҳо дар соли 2025 Оҷонсии назорати маводи нашъаовар 689 килограм маводи мухаддир мусодира кардааст, ки дар қиёс ба як соли пеш 37 дарсад бештар аст.

Тоҷикистон бо Афғонистон беш ҳазор километр хатти марз дорад. Мақомот ҳамеша аз боздошт ё занозанӣ бо кочоқбарон дар ин хатти марз хабар медиҳанд.

Вазирони корҳои дохилии Тоҷикистон ва Покистон аз вуҷуди паноҳгоҳҳои террористӣ ва афзоиши тавлиди маводи мухаддир дар Афғонистон, нигаронӣ кардаанд.

Мулоқоти Рамазон Раҳимзода ва Муҳсин Нақавӣ рӯзи панҷуми июн дар шаҳри Бишкек дар ҳошияи ҷаласаи навбатии вазирони корҳои дохилӣ ва амнияти ҷамъиятии кишварҳои аъзои Созмони Ҳамкории Шанхай, баргузор шудааст.

Дафтари матбуоти вазири корҳои дохилии Покистон эълон кард, ки вазири корҳои дохилии ин кишвар дар мулоқот бо Рамазон Раҳимзода дар бораи вуҷуди "пойгоҳҳои террористӣ" дар дохили Афғонистон гуфтугӯ кардааст.

Дар ин баёния омадааст, "ҳар ду вазир тавофуқ карданд, ки урудгоҳҳои террористӣ ва тавлиди маводи мухаддир дар Афғонистон таҳдидҳои ҷиддӣ барои минтақа эҷод мекунад".

Ба иттилои манбаъ, ҷонибҳо гуфтаанд, ки ҳудуди 25 созмони террористии гуногун дар ҳоли ҳозир дар Афғонистони зери назорати Толибон, фаъол ҳастанд ва ин масъала ҳамаи минтақаро ба хатар андохтааст.

Тоҷикистон бо Афғонистон ҳамсоя мебошад ва бар хилофи бархе дигар аз аъзои Созмони Ҳамкориҳои Шанхай, бо ҳукумати Толибон чандон робитаҳои наздики дипломатӣ ва сиёсӣ надорад. Душанбе нигарони фаъолиятҳои гурӯҳи "Ансоруллоҳ" ва "Шохаи Хуросон"-и ДОИШ мебошад.

Покистон ҳам ҳукумати Толибонро ба паноҳ додан ба ҷангҷӯёни Таҳрики Толибони Покистон муттаҳам мекунад.

Дафтари матбуоти Вазорати корҳои дохилии Тоҷикистон навишт, ки Рамазон Раҳимзода дар Бишкек инчунин бо ҳамтоёни худ аз Эрон, Русия, Узбекистон, Белорус ва низ муовини вазири бехатарии ҷамъиятии Ҷумҳурии мардуми Хитой Лю Утсин ва дабири кулли "Интерпол" Валдеси Уркиза, дидор ва гуфтугӯ кардааст.

Созмони Милали Муттаҳид дар Афғонистон хабари марги Фаришта Имодӣ, корманди UNFPA ё Сандуқи аҳолии СММ-ро тасдиқ кард.

Ин созмон рӯзи 5 июн бо нашри паёме дар шабакаи Х даргузашти Фаришта Имодиро тасдиқ кард ва бо хонавода, дӯстон ва ҳамкорони ӯ ҳамдардӣ кардааст.

Ин дар ҳоле аст, ки дар рӯзҳои ахир шуморе аз расонаҳои Афғонистон гузориш доданд, ки Фаришта Имодӣ, корманди Созмони Милали Муттаҳид дар яке аз минтақаҳои шаҳри Кобул аз сӯи афроди ношинос кушта шудааст.

Бархе фаъолони ҳуқуқи зан низ гуфтанд, ки Фаришта Имодӣ ҳадафи ҳамлаи афроди ношинос қарор гирифта ва ҷон бохтааст.

Бо ин ҳол, Созмони Милали Муттаҳид дар бораи сабабҳо ва чигунагии марги ӯ ҷузъиёт ироа накардааст.

Мақомҳои Толибон низ то замони нашри ин хабар дар ин маврид изҳори назар накардаанд.

Эрон ва Амрико субҳи шанбеи 6 июн аз ҳамлаҳо ба нерӯҳо ва пойгоҳҳои якдигар хабар доданд.

Фармондеҳии марказии артиши Амрико мегӯяд, ки шаш мушаки партобшуда аз сӯи Эрон раҳгирӣ шуда ва мушаки ҳафтум ба ҳадафи худ нарасидааст. Ба гуфтаи СЕНТКОМ, дар ҳоли ҳозир ҳеч гузорише дар бораи осеб дидани низомиёни Амрико дар ин ҳамлаҳо вуҷуд надорад

Дар баёнияи Фармондеҳии марказии артиши Амрико омадааст, "нерӯҳои ИМА дар 5 июн чандин мушаки баллистикии эронӣ ва паҳподи партобшуда аз сӯи Эрон ба тарафи тангаи Ҳурмуз ва ҳамсоягонро раҳгирӣ карданд. Эрон чанд соат пас аз он, ки Фармондеҳии марказии ИМА чаҳор паҳподи интиҳории эронии партобшуда ба тарафи тангаи Ҳурмузро сарнагун кард, ҳафт мушаки баллистикӣ ба тарафи Кувайт ва Баҳрайн партоб кард. Ин паҳподҳо таҳдиди фаврӣ барои рафтуомади баҳрӣ дар минтақа эҷод карданд. Нерӯҳои ИМА ба дунболи он барои дифоъ дар баробари ҳамлаҳои баҳрии бештар, сайтҳои радари нерӯҳои баҳрии Эронро дар Горук ва ҷазираи Кишм ҳадаф қарор доданд".

Сипоҳи посдорони Эрон субҳи 6 июн бо нашри баёнияе эълон кард, ки дар пайи ҳамлаҳои артиши Амрико ба ҷазираи Кишм, пойгоҳҳои амрикоӣ дар минтақа мавриди ҳамлаҳои мушакӣ қарор гирифтанд.

Артиши Кувайт ҳам субҳи 6 июн эълон кард, ки системаи дифои ҳавоии ин кишвар дар ҳоли муқобила бо ҳамлаҳои мушакӣ ва паҳбодӣ аст. Ҳамзамон, субҳи 6 июн Вазорати корҳои дохилии Баҳрайн аз фаъол шудани системаи дифои ҳавоии он кишвар хабар дод.

Хабаргузории "Франс-пресс" аз рух додани таркишҳо дар наздикии фурудгоҳи Кувайт ва ҳамчунин дар Баҳрайн хабар дод.

Тими миллии футболи Тоҷикистон зери раҳбарии Игор Ангеловский, мутахассиси 50-сола аз Мекодонияи Шимолӣ, дар бозии аввали дӯстона мунтахаби Ҳиндустонро бо ҳисоби 3:1 шикаст дод.

Ин бозӣ дар доираи рӯзҳои расмии FIFA (Федератсияи байналмилалии футбол) шаби ҷумъаи 5-уми июн дар варзишгоҳи «ТАЛКО-Арена»-и шаҳри Турсунзода бо ҳузури беш аз 10 ҳазор тамошобин баргузор шуд.

Дар ибтидои дидор, дар дақиқаи ҳаштум, ҳамлагари мунтахаби Тоҷикистон Шериддин Бобоев аз пеналти ё ҷаримаи 11-метрӣ ҳисобро боз кард. Голи дувумро ҳимоятгар Меҳрубон Каримов дар дақиқаи 62-юм аз ҷаримагоҳ бо зарбаи сар зад. Баъди панҷ дақиқа нимҳимоятгар Эҳсони Панҷшанбе низ аз ҷаримагоҳ голи севумро ба самар расонид.

Голи ягонаи меҳмононро Фаррух Ҳоҷӣ Қасам, бозигари мунтахаби Ҳиндустон, дар дақиқаи 89-ум ба дарвозаи мизбонон ворид намуд.

Дидор бо мунтахаби Ҳиндустон дар Турсунзода нахустин бозии тими миллии Тоҷикистон бо сарварии Игор Ангеловский дар мақоми сармураббӣ ба ҳисоб мерафт.

Дар умум, ин бозии ҳаштум миёни мунтахабҳои Тоҷикистону Ҳиндустон дар тули 18 сол буд. Дар чаҳор бозӣ футболбозони тоҷик, дар ду дидор бозигарони ҳинду ғалаба кардаанд ва ду бозӣ мусовӣ шудааст.

Холид Ҷамили 49-сола аз Кувайт, ки вазифаи сармураббии тими миллии Ҳиндустонро ба зимма дорад, соли гузашта ҳам дастаашро ба Тоҷикистон оварда буд. Мунтахаби Тоҷикистон дар нахустин бозиаш дар мусобиқаи байналмилалии “Ҷоми миллатҳои CAFA-2025” дар гурӯҳи «В», ки моҳи сентябри порсол дар Варзишгоҳи марказии шаҳри Ҳисор доир шуд, аз тими миллии Ҳиндустон бо ҳисоби 1:2 шикаст хӯрда буд.

Ҳарчанд мунтахаби Тоҷикистон дар бозии аввали дӯстона тими миллии Ҳиндустонро мағлуб кард, коршиносону мухлисон аз ҳунарнамоии футболбозони тоҷик чандон хушҳол нашуданд. Зеро рақиб яке аз дастаҳои заиф буда, дар радабандии FIFA (Федератсияи байналмилалии футбол) нисбат ба мунтахаби Тоҷикистон 33 зина поин, дар ҷойгоҳи 136-ум, қарор дорад.

Бозии дувуми дӯстона байни тимҳои миллии Тоҷикистону Ҳиндустон рӯзи сешанебеи 9-уми июн дар Варзишгоҳи марказии шаҳри Ҳисор барпо гардида, соати 20:00 оғоз меёбад.

Бояд зикр намуд, бозиҳои дӯстона бо тими миллии Ҳиндустон як марҳилаи омодагии мунтахаби Тоҷикистон ба қисми ниҳоии Ҷоми Осиё-2027 мебошад. Рақибони футболбозони тоҷик дар гурӯҳи «D» тимҳои миллии Австралия, Ироқ ва Сингапурнд, ки хеле қавианд. Австралия ва Ироқ дар Ҷоми ҷаҳон-2026 бозӣ хоҳанд кард ва ин аз сатҳи баланди онҳо шаҳодат медиҳад. Дарвоқеъ, мунтахаби Ироқ бозии дӯстонаро муқобили тими миллии Испания бо натиҷаи мусовии 1:1анҷом дод.

Бинобар ин, хуб мебуд тими миллии Тоҷикистон барои бозиҳои дӯстона ё санҷишӣ рақибони пурқувватро интихоб мекард.

Ризо Вализода, хабарнигори пешини Радиои Фардо, бахши форсии Радиои Озодӣ, дар як файли савтӣ ё садоӣ аз дохили зиндони "Эвин"-и Эрон аз ҳукумати Амрико хостааст, барои ӯ ва амрикоиҳои дигари маҳбус дар Ҷумҳурии Исломӣ "кумаки пизишкӣ фароҳам кунад".

Вализода дар ин файли савтӣ, ки Радиои Фардо онро дар ихтиёр дорад, гуфтааст: "Агар ҳатто дармони бемориҳои мо хостаи бузурге бошад, дастикам мешавад аз мақомоти эронӣ хост, ки на ҳамаи фишорҳои ҷисмӣ ва шиканҷаҳои равонӣ, балки ҳадди ақал бахше аз онро коҳиш диҳанд."

Вай ҳамзамон ба се шаҳрванди амрикоии дигар, ки дар зиндони "Эвин" ҳастанд, ишора карда, гуфтаааст, онҳо аз "бемориҳои гуногун ранҷ мебаранд ва аз хадамоти воқеии пизишкӣ маҳруманд."

Радиои Фардо натавонистааст ҷузъиёти марбут ба се амрикоии дигареро, ки Вализода мегӯяд дар зиндони "Эвин" ҳастанд, таъйид кунад.

Ризо Вализода пас аз даҳ сол кор дар Радиои Фардо, моҳи ноябри соли 2022, аз ин расона рафт. Пас аз муддате будубош дар хориҷ ба дидори наздиконаш ба Эрон баргашт ва моҳи октябри соли 2024 боздошт шуд. Наздиконаш гуфтаанд, Ризо Вализода ба як “доми амниятӣ” уфтод.

Худаш дар паёми охирин дар шабакаи “Х” навишта буд, ки бо Созмони иттилооти Сипоҳи посдорон музокироти нотамом дошт, аммо дар ниҳоят бе ягон замонатнома, на хаттӣ ва на шифоҳӣ, ба Эрон баргашт. Маълум нашуд, ӯ дар чӣ шароит ин навиштаро нашр карда буд.

Додгоҳи инқилоб дар Теҳрон, моҳи декабри соли 2024 Ризо Вализодаро бо иттиҳоми "ҳамкорӣ бо ҳукумати Амрико", ки Ҷумҳурии Исломӣ "душман" мехонад, гунаҳкор донист ва ду сол аз озодӣ маҳрум кард.

Кумитаи ҳолатҳои фавқулодаи Тоҷикистон ҳалокати ду наврасро дар ноҳияи Шамсиддин Шоҳин шарҳ дод.

Дафтари матбуотии Кумита ба Радиои Озодӣ гуфт, бегоҳи 3-юми июн бародарон Билол ва Салмоншоҳ Ғафурзодаҳо дар деҳаи Дараи об ба нигоҳбини чорво машғул буданд, ки борони сахт борид.

Ба қавли манбаъ, Салмоншоҳ Ғафурзодаи 11-сола “ба бориши шадиди борон тоб наоварда, дар натиҷа аз карахтшавии бадан (сармозадагӣ)” дар чарогоҳ ба ҳалокат расидааст.” Бародари ин наврасро ба бемористон интиқол додаанд ва пизишкони аҳволи ӯро хуб гуфтаанд.

Мақомот гуфтанд, шомгоҳи 3-юми июн ҳамчунин Шамил Ҳошимзодаи 9-сола қурбони сел шуд. Ин наврас ҳамроҳи падараш дар чарогоҳ будааст ва мақомот мегӯянд, ҷасади ӯро як километр поёнтар аз ҷойи ҳодиса ёфтанд.

Дар бораи ҳалокати ин ду наврас нахуст Радиои Озодӣ 4-уми июн хабар дода буд.

ИНЧУНИН, БИХОНЕД:

"Ду наврас ҷон бохт." Пайомади сел дар ноҳияи Шамсиддини Шоҳин

Селу обхезӣ, ки баҳори имсол дар Тоҷикистон бисёр зиёд мушоҳида шуд, фақат дар моҳи май камаш 4 нафарро дар шаҳрҳои Кӯлоб ва Турсунзода ҳалок кард ва панҷ каси дигарро захмӣ шуданд.