Пайвандҳои дастрасӣ

Хабари нав

Хабарҳо

Як ҷавон дар Душанбе барои беэҳтиромӣ ба модараш муҷозот шуд

Аҳмад Қараев. Акс аз вебсайти пулиси Душанбе.

Як сокини шаҳри Душанберо барои беэҳтиромӣ нисбати модар ҷазо доданд. Аҳмад Қараеви 35-сола бо қарори додгоҳ 10 рӯз ба ҳабс гирифта шудааст. Бино ба иттилои Раёсати умури дохила дар шаҳри Душанбе ин сокини пойтахт дар ҳолати мастӣ бо модараш муноқиша намуда, ӯро дар ҳузури ҳамсоҳо мавриди дашному ҳақорат қарор додааст.

Пулиси шаҳри Душанбе дар бораи ин ҳодиса дар сомонаи расмии худ хабар дода гуфтааст, ҷавон бо ин амали худ шабонгаҳ тартиботи ҷамъиятиро вайрон карда, "шаъну шарафи модарро дар назди атрофиён паст задааст".

Ба иттилои мақомот, нисбати Қараев Аҳмад парвандаи маъмурӣ бо моддаи 460 (майдаавбошӣ) боз шуда, бо қарори додгоҳ ӯро ба муҳлати 10 шабонарӯз ҳабс кардаанд. Назару мавқеи худи ҷавон маълум нест.

Пулиси шаҳри Душанбе менависад "нисбати афроде, ки ба волидайни худ беэҳтиромӣ зоҳир намуда онҳоро мавриди озор қарор медиҳанд, тибқи қонунгузорӣ ҷазо пешбинӣ шудааст".

Ин бори аввал нест, ки аз муҷозот барои беэҳтиромӣ ва азияти модар хабар дода мешавад.

Ҳамаи хабарҳои имрӯзро дар инҷо бихонед

Талаби 10 сол зиндон ба маъмури пешини амният, ки зани ҳамҷинсгароро задааст

Виктория Беркхоҷаева

Додситонии вилояти Алматои Қазоқистон барои корманди пешини Кумитаи амнияти миллии он кишвар, ки дар хушунати ҷинсӣ ва латукӯби як ҳамҷинсгаро айбдор мешавад, 10 соли зиндон талаб кард.

Аз зани ҷабрдида, ки ҷинсашро иваз кардааст, Виктория Беркхоҷаева ном бурда мешавад.

Додситон ҳамчунин аз додгоҳ хостааст, ки айбдоршаванда аз ишғоли мансабҳои давлатӣ пурра маҳрум карда шавад.

Корманди пешини Кумитаи амнияти миллӣ дар додгоҳ айбҳои эъломшударо рад кардааст.

Парвандаи ҷиноӣ барои хушунат ва латту куби Виктория Беркхоҷаева тобистони соли 2019 боз ва моҳи октябри ҳамон сол корманди пешини мақомоти амният боздошт шуд.

Тоҷикистон низ чашм ба ваксинаи русӣ дӯхтааст, вале мунтазири натиҷаи озмоишҳост

Мақомоти Тоҷикистон гуфтанд, ки мунтазири натиҷаҳои ниҳоии озмоиши ваксинаи русӣ ба зидди COVID-19 ҳастанд ва сипас бар сари хариди он суҳбат хоҳанд кард.

Самариддин Ализода, муовини вазири тандурустии Тоҷикистон, рӯзи 30-юми сентябр дар як нишаст дар Душанбе гуфт, "феълан бо Русия дар бораи харидани ваксинаи зидди коронавирус гуфтугӯ надоранд". Вай афзуд, танҳо баъд аз онки ваксинаи зидди коронавирус дар Русия ҳама зинаҳои санҷишро гузарад, дар бораи харидани он меандешанд.

Чунин изҳори назари муовини Вазорати тандурустии Тоҷикистон дар ҳолест, ки қаблан манбаъҳо дар ҳамин вазорат гуфта буданд, ҳукумати Тоҷикистон бо мақомоти Русия шароити харидани ваксинаи зидди бемории COVID-19-ро баррасӣ мекунад.

Як мақомои баландпояи Вазорати тандурустӣ ва ҳифзи иҷтимоии Тоҷикистон рӯзи 21-уми сентябр дар суҳбат бо Радиои Озодӣ гуфт, "айни замон миёни Тоҷикистон ва Русия ба сари ваксина музокирот идома дорад".

Русия рӯзи 11-уми август эълон кард, ки ваксинаи зидди COVID-19-ро расман сабт кардааст, вале як идда пажӯҳишгарон ба коромад будани он шубҳа доранд. Русия маъракаи эмкуниро дар бадани 40 ҳазор нафар шуруъ кард ва ин як марҳилаи санҷишӣ аст.

Ҳоло даҳҳо маркази тадқиқотӣ дар ҷаҳон беш аз сад ваксинаро озмоиш мекунанд. Бино бар эъломияҳо, Амрико, Чин ва Бритониё беш аз дигар кишварҳо дар роҳи ҳосил кардани ваксинаи коромад ва собитшуда наздиканд.

Бино ба иттилои Вазорати тандурустӣ, аз 30-уми апрел то санаи 29-уми сентябр дар Тоҷикистон 9 726 нафар ба короновируси нав сироят ёфтанд. Шумораи қурбониён аз ин беморӣ 75 нафар будааст.

Аммо бинобар мушоҳидаҳои корбарони фаъоли шабакаҳои иҷтимоӣ, омори расмии мақомот миқёси воқеии сирояти беморӣ ва талафот дар Тоҷикистонро нишон намедиҳад ва теъдоди беморону фавтидагон бештар аз он аст, ки Вазорати тандурустӣ мегӯяд.

Додгоҳи Амрико як ҳакери русро ба 7 сол зиндон маҳкум кард

Евгенний Никулин. Акс аз бойгонӣ. Соли 2012.

Евгений Никулин, як марди рус, барои ҳамлаҳои киберӣ ба LinkedIn, DropBox ва чанд ширкати дигар ба ҳафт сол зиндон маҳкум шуд. Ин ҳукм аз сӯи як додраси додгоҳи федералӣ дар Сан-Франсиско рӯзи 29-уми сентябр эълон шуд.

Додрас гуфт, ин ҳукми 88-моҳа тақрибан чаҳор солеро, ки Никулин пушти панҷараҳои зиндон, таъсири пандемияи COVID-19, мушкили забонӣ ва системаи додгоҳиеро, ки вай бо он ошно нест, дар назар мегирад.

Додрас ҳамчунин гуфт, ки Никулин дар Русия як духтари 10-сола дорад ва модараш, мумкин аст, он қадар зинда намонад, ки ӯро дубора бубинад. Ваколатдори ӯ Валерий Нечай гуфтааст, модари Никулин дар солҳои ахир чаҳор бор амалиёти ҷарроҳии сутунмуҳраро паси сар карда, се бор сактаи мағзӣ кардааст.

Муҷозоти Никулин раванди тақрибан чаҳорсолаеро, ки бо боздошти вай дар Ҷумҳурии Чех дар октябри соли 2016 оғоз шуд, ба поён мерасонад.

Никулин тирамоҳи соли 2016 дар Ҷумҳурии Чех боздошт шуд. Амрико ӯро дар ҳамлаҳои киберӣ ба сомонаҳои ширкати LinkedIn, Dropbox ва Formspring гумонбар медонист.

Русия низ ба зидди Никулин парванда дорад, аммо сарфи назар аз дархости Маскав барои истирдод, Ҷумҳурии Чех 30-юми марти соли 2018 ӯро ба Амрико истирдод кард. Евгений Никулин худро гунаҳкор намешуморад.

Шӯрои амният аз Арманистону Озарбойҷон хост, фавран ба даргирӣ хотима диҳанд

Нишонае аз ҷанги нирӯҳои Арманистону Озарбойҷон

Шӯрои амнияти Созмони Милали Муттаҳид аз нирӯҳои Арманистону Озарбойҷон хостааст, ки фавран ба ҷанг бар сари минтақаи Қаробоғи Кӯҳӣ поён диҳанд. Ин даъват пас аз се рӯзи даргириҳо дар марзи ду кишвар садо дод. Дар изҳороте аз 29-уми сентябр кишварҳои узви Шӯрои амният аз даъвати дабири кул Антонио Гуттереш пуштибонӣ кардаанд, ки аз ҷонибҳо хостааст, шиддати ташаннуҷро поин биоранд ва ба музокирот пардозанд. Шӯрои амният аз гузоришҳо дар бораи иқдомоти густардаи низомӣ дар минтақаи Қаробоғи Кӯҳӣ ибрози нигаронӣ карда, истифода аз зӯрро ба шиддат маҳкум намудааст. Низои ахир байни Арманистону Озарбойҷон шадидтарин низоъ аз соли 2016 ба ин тараф номида мешавад. Ҳарду тараф гуфтаанд, дар даргириҳои рӯзҳои гузашта чандин нафар куштаву захмӣ шуданд.

Белорус "Tut.By"-ро аз унвони Воситаи Ахбори Умум маҳрум кард

Акс аз бойгонӣ

Вазорати иттилооти Белорус хабар дод, ки нашрияи онлайнии "Tut.By" аз 1-уми октябри имсол ба муҳлати се моҳ аз унвони воситаи ахбори ом маҳрум карда шуд.

Фармонро вазири иттилооти Белорус Игор Лутской имзо кардааст. Дар "Tut.By" гуфтанд, ки ба монанди пешин ҳамчун расонаи онлайнӣ фаъолият хоҳанд кард.

Масъулони Tut.By мегӯянд, сабти номи сомонаи интернетӣ дар Белорус ҳамчун нашрияи онлайнӣ хусусияти ихтиёрӣ дошта, ба расона чанд имтиёз медиҳад. Аз ҷумла, кормандони он қонунӣ ҳақ доранд, ки дар минтақаи задухӯрдҳои мусаллаҳона, вазъияти фавқулода, чорабиниҳои оммавӣ ва маконҳои дигари таҷаммӯи одамон ҳозир шуда, аз онҷо хабар диҳанд.

Tut.By ҳамчун воситаи ахбори ом дар Белорус танҳо моҳи январи соли гузашта ба қайд гирифта шуд. Он аз замони таъсисаш дар соли 2000 то ин дам бидуни ин мақом фаъолият мекард.

Сомонаи хабарии мустақили Tut.By маъракаҳои ахири пешазинтихоботии Белорус ва ҳамоишҳои эътирозӣ бо талаби бознигарии натиҷаи интихоботро фаъолона бозтоб мекард. Он ҳамарӯза дар бораи баромадҳои мухолифони президенти Белорус Александр Лукашенко ва боздоштҳои бераҳмонаи эътирозгарон хабар нашр мекунад.

ВУХ-и Узбекистон кушода шудани марзи Русияро бо Қазоқистон аз 1 октябр рад кард

Марзи Русия бо Қазоқистон

Вазорати корҳои хориҷии Узбекистон бо нашри як изҳорот хабарҳоро дар бораи онки гуиё марзи Русия ва Қазоқистон аз 1-уми октябр боз шуда, муҳоҷирони дармондаи узбек метавонанд тавассути Қазоқистон ба ватан баргарданд, беасос номид.

Дар иттилоияи Ситоди фаврии вазорат, аз ҷумла омадааст, “хоҳиш мекунем, ба чунин ҳангомаҳо дода нашавед. Убури марзи Русия ва Қазоқистон бо мошин барои шаҳрвандони хориҷӣ то қарори махсуси ҷонибҳо дар ин замина номумкин мемонад.”

Ситод афзудааст, дар ҳоли ҳозир узбекистониҳои дармондае, ки мехоҳанд ба ватан баргарданд, тавассути парвозҳои чартерӣ, қатор ва мусофирбарҳои махсус интиқол дода мешаванд. Билети онҳо онлайнӣ фурӯхта мешавад.

Ҳамчунин аз шаҳрвандони Узбекистон хоҳиш шудааст, ки дар давраи пандемияи коронавирус аз ҳама гуна таҷаммуъ худдорӣ ва карантинро риоя карда, ҷони худро дар хатар нагузоранд.

Амири Кувайт дар 91-солагӣ даргузашт

Шайх Сабоҳ Ал-Аҳмад Ас-Сабоҳ, амири Кувайт

Шайх Сабоҳ Ал-Аҳмад Ас-Сабоҳ, амири Кувайт, дар 91-солагӣ даргузашт. Шайх Алӣ Ҷарроҳ Ас-Сабоҳ, вазири умури шоҳии ин кишвар, рӯзи 29-уми сентябр тавассути телевизион дар бораи марги амир хабар дод. Сарусадо дар бораи вазъи саломати ӯ моҳҳо боз матраҳ буд. Шайх Сабоҳро аз соли гузашта ба ин тараф чанд дафъа ба шифохона бурда буданд. Вай дар соли 2006 масъулияти раҳбарии Кувайтро ба уҳда гирифт.

Дар Хуҷанд аз қасди худкушии духтари 17-сола пешгирӣ кардаанд

Як духтари 17-соларо аз ғарқшавӣ дар дарёи Сир, дар шаҳри Хуҷанд, наҷот додаанд. Масъулони идораи ҳолатҳои фавқулода гуфтанд, ки ҳодиса 28-уми сентябр рух дод ва духтар зоҳиран қасди худкушӣ дошт.

Ба иттилои расмӣ, духтарро Сӯҳроб Мирзоеви 18-сола, донишҷӯи соли аввали Донишгоҳи тиҷорат ва Баҳриддин Шарифов, маъмури наҷот аз об берун овардаанд.

Суҳроб Мирзоев ба ҳайси ихтиёрӣ ба кормандони ҳолатҳои фавқулода ёрӣ мекунад. “Аввал ӯро аз об берун кашидем ва сипас ёрии аввалро расонидем”, -- нақл кард Баҳриддин Шарифов.

Ба иттилои наҷотдиҳандагон, духтаре, ки онҳо аз об берун кашиданд, 17-сола ва аз шаҳри Гулистон аст. Шаҳзода Буттаева, сухангӯи идораи ҳолатҳои фавқулода гуфт, баъди аз об берун овардан духтар дар ҳолати «шок» қарор дошт.

Ӯ афзуд, “ба кормандони мо маълум гардид, ки дар оилааш муноқиша рух додааст ва духтар қасди худкушӣ дошт”.

Ба иттилои идораи ҳолатҳои фавқулодаи вилояти Суғд, аз оғози сол бори шашум аст, ки занону духтарон бо ин роҳ мехоҳанд даст ба худкушӣ зананд.

Дороии мансабдорони пешини Қирғизистон санҷида мешавад

Бинои Додгоҳи олии Қирғизистон.

Талошҳо барои рӯёнидани ҷуброни зарар дар доираи парвандаи фасодкорӣ ҳангоми бозсозии Маркази гармидиҳии шаҳри Бишкеки Қирғизистон идома доранд.

Дар хадамоти матбуотии Департаменти судиҷрочиёни Қирғизистон гуфтанд, дар ҳоли ҳозир дороӣ ва ҳисобҳои бонкии маҳкумшудаҳо муайян карда мешавад.

Тибқи қарори додгоҳ, ҳар як маҳкумшуда, ки дар гузашта мансабдори баландпоя буд, бояд ба давлат 680 миллион сом (беш аз 8,5 млн доллар) ҷуброн пардозад.

Баъди садамаи 26 январи соли 2018 дар маркази гармидиҳии Бишкек се парвандаи ҷиноӣ боз шуд. Яке аз ин парвандаҳо марбут ба фасодкорӣ ҳангоми интихоби ширкати кироякор аст. Тафтишот мегӯяд, шахсони масъул аз манфиатҳои ширкати TBEA ҷонибдорӣ кардаанд.

Ҳашт тан аз мансабдорони баландпояи Қирғизистон - аз ҷумла сарвазирони пешин Сафар Исҳоқов ва Жантор Сотиболдиев, вазири пешини энержӣ, раиси пешини Холдинги миллии энержӣ, роҳбари ширкати пойгоҳҳои барқӣ, вазири молияи Қирғизистон дар доираи парвандаи мазкур маҳкум ба зиндон шуданд.

7 шаҳрванди Қазоқистон барои низоъи байниқавмӣ зиндонӣ шуданд

Муноқиша миёни қазоқҳо ва дунгантаборон рух дода буд.

Додгоҳи низомии шаҳри Алматои Қазоқистон рӯзи 29 сентябр ҳафт шаҳрвандро барои низоъи байниқавмии қазоқҳо бо дунгантаборон дар ноҳияи Кордайи вилояти Ҷамбили он кишвар зиндонӣ кард.

Ин ҳафт шаҳрванд бо айбҳое чун "ширкат дар бетартибиҳои оммавӣ", "дуздӣ", "такроран содир кардани ҷинояти вазнин", "ғоратгарӣ дар ҳаҷми махсусан калон" ва ғайра аз 7 то 3 сол зиндонӣ шуданд.

Шаби 8 феврали соли ҷорӣ байни қазоқҳо ва дунгантаборон дар деҳаҳои Масанчӣ, Сортоба, Аухаттӣ ва Дулар-батири ноҳияи Кордай низоъ сар зад. Дар он низоъ 11 кас кушта ва беш аз 100 кас маҷруҳ шуд. Ҳазорон сокини дигар маҷбур шуданд, ки ба Қирғизистон фирор кунанд. Ҳукумати Қазоқистон баъдтар хабар дод, ки қисме аз фирориҳоро ба хонаҳояшон баргардонидаанд.

Баъди низоъ ҳокими вилояти Ҷамбил истеъфо дод ва чанд мансабдори дигар аз мақом ронда шуданд.

Мақомоти интизомии Қазоқистон дар пайи низоъи байниқавмӣ бештар аз 12 парвандаи ҷиноӣ боз карданд.

Ереван: "F-16"-и туркӣ "Су-25 "-и Арманистонро сарнагун сохт

Ереван мегӯяд, зарбазани туркии "F-16" як ҳавопаймои низомии "Су-25 "-и нерӯҳои ҳавоии Арманистонро дар ҳарими ҳавоии ин кишвар сарнагун сохт.

Вазорати умури хориҷии Арманистон хабар дод, ки дар натиҷа халабони Су-25 ҷон бохт. Вале ба иттилои Би-Бӣ-Сӣ, Туркия ин хабарро аллакай расман рад кардааст.

Ёвари президенти Туркия Фахриддин Алтун рӯзи сешанбе гуфта буд, ки Анқара омодааст дар бозпас гирифтани Қарабоғи Куҳӣ ба Боку кумак кунад.

Вазири умури хориҷии Туркия Мавлуд Човушлоғлу ҳангоми боздид аз сафорати Озарбойҷон дар Анқара гуфт, ягона роҳи ҳалли низоъ атрофи Қарабоғ бурунрафти Арманистон аз ин минтақаи худмухтор аст.

Туркия субҳи 27 сентябр, дар пайи оғози дубораи низоъ дар Қарабоғи Куҳӣ хабар дод, ки ба Озарбойҷон кумак мекунад. Русия, ҳампаймони Арманистон дар доираи Созмони Паймони Амнияти Дастаҷамъӣ аз мақомоти турк даъват кард, ки аз дастгирии оммавии Боку худдорӣ карда, ба ҳалли дипломатии буҳрон кумак расонад.

Даъво бар сари Қарабоғи Куҳӣ ҳанӯз аз замони шӯравӣ давом дорад. Озарбойҷон идораи минтақаро, ки бештари бошандагонаш арманитабор ҳастанд, аз солҳои 1990 аз даст додааст. Дар солҳои 1990 бар асари даргарӣ на камтар аз 30 ҳазор кас кушта ва садҳо ҳазори дигар гуреза шуданд. Низои ахир шадидтарин низоъ аз соли 2016 ба ин тараф номида мешавад.

Кишварҳои миёнарав аз ҷумла Русияву ИМА ба хатми ҷанг даъват доранд.

Фаъолони “Гурӯҳи 24” аз Русия дар бораи дар куҷо будани Шобудин Бадалов маълумот хостаанд

Шобудин Бадалов

Фаъолони созмони дар Тоҷикистон мамнӯи “Гурӯҳи 24” дар назди бинои сафорати Русия дар Олмону Бритониё тазоҳурот кардаанд. Тазоҳурот рӯзҳои 24 ва 28-уми сентябр баргузор шуд.

Мегӯянд, аз қазияи, ба иддаои онҳо, рабуда шудани фаъоли гуруҳ Шобудин Бадалов дар Русия ва эҳтимоли ба дасти мақомоти Тоҷикистон супурда шудани ӯ нигаронанд.

Дафтари матбуоти “Гуруҳи 24” дар изҳороте гуфт, Шобудин Бадалов дар Русия ҳаққи паноҳандагӣ дошт, вале ӯро рӯзи 1-уми сентябр дар шаҳри Нижний Новгород дастгир кардаву ба самти номаълум бурдаанд.

Пештар масъулони Вазорати корҳои дохилии Тоҷикистон истирдод шудани Шобудин Бадаловро аз Русия ба Душанбе рад карда буданд. Ниҳодҳои дигари қудратии Тоҷикистон дар бораи қазияи ӯ то ҳанӯз изҳори назар накардаанд.

Маълум нест, ӯ дар ҳудуди Русия аст, ё ба Тоҷикистон оварда шудааст. Мақомоти Русия дар ин замина расман чизе намегӯянд.

“Гурӯҳи 24” мегӯяд, бори аввал нест, ки аъзову тарафдоронаш дар ҳудуди Русия дастгир ва бархе аз онҳо ба ҷониби Тоҷикистон супурда шудаанд. Дар ин миён сарнавишти Эҳсон Одинаев, ки соли 2015 дар шаҳри Санкт-Петербург дастгир шудааст, то ҳанӯз номаълум аст.

Бори дувум аст, ки Шобудин Бадалов, намояндаи "Гуруҳи 24" дар Русия боздошт мешавад. Пеш аз ин моҳи июни имсол ӯро баъд аз пикети эътирозӣ дар ҷараёни сафари раиси ҷумҳури Тоҷикистон Эмомалӣ Раҳмон ба Маскав дастгир ва ба 15 рӯз ҳабс маҳкум карда буданд.

"Гурӯҳи 24", ки соли 2012 таъсис ёфтааст, соли 2014 бо қарори Додгоҳи олии Тоҷикистон як созмони экстремистӣ ва мамнуъ эълон шуд. Дар пайи он даҳҳо нафар дар Тоҷикистону Русия ва кишварҳои дигари пасошӯравӣ бо иттиҳоми тарафдорӣ аз "Гурӯҳи 24" боздошту зиндонӣ шуданд.

Дар таркиши мошине дар Афғонистон 14 нафар ҷон дод

Кобул, баъди таркиши маргталабе. Акс аз бойгонӣ

Мақомот дар Афғонистон гуфтанд, ки дар паи таркиши бомбаи сарироҳӣ дар вилояти марказии Дайкундӣ дастикам 14 мулкӣ кушта шуд. Бо ин ки дар Қатар ҳукумат ва Толибон музокироти сулҳ барпо кардаанд, хушунат дар саросари кишвар кам намешавад. Сухангӯи волии Дайкундӣ Насрулло Ғӯрӣ дар сӯҳбат бо бахши Афғонии Радиои Озодӣ гуфт, ки ҳафт зан, панҷ кӯдак ва ду мард ҳангоме ҷон доданд, мошинашон ба як маводи сарироҳии тарканда бархӯрд. Дар ҳодисаи рӯзи 29-уми сентябр инчунин се мусофир маҷрӯҳ шудааст. То ҳол ҳеҷ гурӯҳ ё нафаре масъулияти ин ҳодисаро ба дӯш нагирифтааст, вале сухангӯи вазорати дифои Афғонистон Тариқ Ориён гуфт, ки ин кори Толибон аст.

Помпео Арманистону Озарбойҷонро ба хатми низоъ даъват кард

Майк Помпео, котиби давлатии ИМА

Котиби давлатии ИМА Майк Помпео рӯзи 29-уми сентябр аз Арманистону Озарбойҷон, ки ҳамоно дар минтақаи ҷудоиталаби Қаробоғи Кӯҳӣ даргир ҳастанд, тақозо кард, ки низоъҳоро хотима бидиҳанд. Қаробоғи Кӯҳӣ, ки аксар сокинонаш арманитабор мебошанду аз ҷониби Арманистон пуштибонӣ мебинанд, дар дохили қаламрави Озарбойҷон ҷойгир аст. Соли 1990 ин минтақа истиқлолияти худро эълон кард, вале ҳеҷ кишваре инро ба расмият нашинохт. Помпео, ки бо як сафари корӣ дар ҷазираи Крит қарор дорад, мавзӯи Қаробоғи Кӯҳиро бо вазири хориҷаи Юнон Никос Дендиас ҳам баррасӣ кард. Ӯ дар нишасти матбуотӣ гуфт:

“Вазири хориҷа ва ман ба мавзӯи Қаробоғи Кӯҳӣ муроҷиат кардем. Ҳарду ҷониб бояд хушунатро хотима дода бо Гурӯҳи Минск ҳамкорӣ бикунанд, то ки ҳарчи зудтар сари мизи гуфтугӯ баргарданд”.

Гурӯҳи Минск дар оғози солҳои 1990-ум бо талоши САҲА ташкил шуд ва ҳадафаш ҳам ҳалли низои Қаробоғи Кӯҳӣ мебошад. Ба ин гурӯҳ Фаронса, Русия ва ИМА ҳамраисӣ мекунанд.

Ду сокини Беларус барои занозанӣ бо полис ба беш аз 3 соли зиндон маҳкум шуданд

23 август, шаҳри Молодечно. Мардум ба намоиши эътирозӣ мераванд

Додгоҳе дар Беларус ду мардро, ки ҳангоми ширкат дар намоишҳои эътирозии зидди Александр Лукашенко бо полис занозанӣ карданд, ба зиндон маҳкум кард. Рӯзи 29-уми сентябр додгоҳе дар шаҳри Молодечно, ки дар наздикии Минск қарор дорад, ҳукм кард, ки Павел Песков ва Владислав Евстигнеев барои ба таври хушунатомез итоат накардан ба полис маҳкум ба зиндон мешаванд. Додрас Виктория Полошук ҳукм кард, ки Песков ба 3 солу 3 моҳи зиндон ва Евстигнеев ба 3 соли зиндон маҳкум мешаванд. Ин нафарон дар он гунаҳгор шуданд, ки дар намоишҳои эътирозии рӯзи 19-уми сентябр дар шаҳри Молодечно, ки истеъфои Лукашенкоро талаб мекарданд, бо полис заноназанӣ карданд. Дар ҷараёни ин эътирозҳо ширкатдорон, аз ҷумла Песков ва Евстигнеев полисро маҷбур карданд, ки як эътирозгари боздоштшударо озод бикунанд. Саркӯби эътироз аз ҷониби полис, ки видеояш ба шабакаҳо роҳ ёфт, хашми зиёди мардумро овард, чун яке аз кормандони ОМОН бо тапончае дар даст ба эътирозгарон таҳдид мекард. Дар Беларус рӯзи 9 август интихоботи президентӣ барпо ва Александр Лукашенко бо 80 дарсади раъйҳо баранда эълон шуд, вале ин натиҷаҳоро на мухолифон ва на садҳо ҳазор сокинони Беларус ҳамчун тақаллубшуда эътироф накарда, аз роҳи ширкат дар намоишҳои эътирозӣ ба чолиш кашиданд.

Ширкати байналмилалии ҳавоии Украина парвозаш ба Арманистонро боздошт

An-225, ҳавопаймои борбари украинӣ

Дар паи даргириҳои нав дар минтақаи ҷудоиталаби Қаробоғи Кӯҳӣ ширкати байналмилалии ҳавоии Украина парвози нақшавӣ ба Ереванро боздошт. Ширкати ҳавоӣ дар изҳороте гуфт, бо нигарониҳои амниятӣ аз парвоз бар фарози Арманистону Озарбойҷон худдорӣ мекунад. Парвоз ба Ереван, пойтахти Арманистон дар таърихи 2 ва 3 октябр ва ба пойтахти Озарбойҷон – шаҳри Боку 4 октябр ба нақша гирифта шудааст. Дар изҳорот омадааст, ки тасмим дар бораи ин парвозҳо дертар гирифта мешавад. Арманистон рӯзи 27 сентябр гуфт, баъди, ба қавли Ереван, ҳамлаҳои Озарбойҷон ба минтақаи Қаробоғи Кӯҳӣ, муқаррароти низомӣ ва сафарбаркунии оммавиро ҷорӣ кард. Дар низоъҳои се рӯзи ахир ҳавопаймоҳои бесарнишин, чархболу тонкҳо истифода шуд. 8-уми январ як ҳавопаймои ширкати украинӣ дар авҷи ихтилофҳои Теҳрону Вашингтон тасодуфан аз ҷониби нирӯҳои мусаллаҳи Эрон суқут дода шуд. Ин ҳавопаймо бо даҳҳо мусофир мавриди ҳамлаи ду мушаки эронӣ қарор гирифт. Он замон Эрон дар посух ба куштори генерали нирӯҳои Қудс хост ба самти пойгоҳи низомии амрикоиҳо дар Ироқ мушак партоб кунад, вале, тавре баъдан эътироф кард, тасодуфан ба ҳавопаймои мусофирбаи украинӣ расид.

Дар Будапешт гулгаште бо номи Чингиз Айтматов бунёд мешавад

Будапешт, пойтахти Маҷористон

Дар шаҳри Будапешт бо ширкати ҳайати Қирғизистон маросими кушоиши боғи ба номи нависандаи маъруф Чингиз Айтматов баргузор мешавад. Дар ин бора хадамоти матбуотии президенти Қирғизистон иттилоъ медиҳад.

Сооронбой Ҷеенбеков рӯзи 28 сентябр бо сафари расмӣ ба Маҷористон (Венгрия) рафт.

Ҷеенбеков дар ин сафар бо сарвазири Венгрия Виктор Орбан мулоқот мекунад. Ду мақомдор эъломияи шарикии стратегӣ, тафоҳумномаи бунёди рушди Қирғизистону Маҷористон ва дигар санадҳои ҳамкории дуҷонибаро ба имзо мерасонанд.

Ҷеенбеков ҳамзамон бо президенти Маҷористон Янош Адер ва раиси порлумони он кишвар Ласло Кёвер мулоқот хоҳад кард.

Пеш аз сафар ба Маҷористон президенти Қирғизистон ба Русия рафт ва бо ҳамтои руси худ Владимир Путин мулоқот кард.

COVID-19 дари мактабҳои Москваро барои ду ҳафта баст

Шаҳрдории Москва Сергей Собянин эълом кард, ки дар робита ва авҷгирии вабои COVID-19 хонандагони мактабҳо аз 5 октябр то 18 октябр ба таътил фиристода мешаванд. Дар ин бора сомонаи шаҳрдории Москва хабар додааст.

Одатан таътили тирамоҳӣ дар мактабҳои Русия як ҳафта идома мекунад. "Бо тавсияи пизишкон ва бо назардошти авҷгирии бемориҳои хоси мавсими тирамоҳ ва афзоиши сабти ҳолатҳои нави гирифторӣ ба вабои коронавирус тасмим гирифта шуд, ки таътили тирамоҳӣ ду ҳафта эълом шавад", - омада аст дар изҳороти Собянин. Аммо ин таътил ба боғчаҳои кӯдакон рабт надорад.

Собянин аз волидон даъват кардааст, ки дар ин муддат кӯдаконро бештари вақт дар хона нигаҳ доранд ва барои қадам задан танҳо ба наздиктарин боғ ё гулгашти назди хона бароранд. "Дар ин рӯзҳо бештари гирифтороне, ки ҳеч нишонае надоранд - кӯдакон ҳастанд. Онҳо аз кӯча ба хона меоянд ва ба содагӣ бемориро ба аъзои калони хонавода интиқол медиҳанд",-омадааст дар хабар.

Рӯзи 25 сентябр мақомоти Москва расман аз сокинони 65-сола боло хостанд, ки бидуни зарурат аз хона набароянд. Ин хоҳиш ба касоне, ки бемории музмин доранд ва ҳамчунин занони ҳомила дахл дошт. Ба ин тартиб, амалан "низоми худинзиво", ки баҳори имсол дар Москва эълом шуда буд, дубора барқарор гардид. Ба илова, ба ширкатҳои бузург тавсия шуд, ки ба кори фосилавӣ гузаранд.

Ба навиштаи расонаҳо, мақомоти Русия эҳтимоли барқарории карантинро баррасӣ доранд. Расонаҳо менависанд, ин эҳтимол ба афзоиши шуморfи гирифторони вабои коронавирус рабт дорад.

Мавзӯи андозсупориҳои Трамп дар меҳвари дебати интихоботиаш бо Байден қарор мегирад

Ҷо Байден аз чап ва Доналд Трамп аз рост

Рӯзи 29-уми сентябр қарор аст нахустин музоҳираи интихоботии Доналд Трамп ва Ҷо Байден баргузор шавад. Нашрияи New York Times дар як таҳқиқот андозсупориҳои президент Доналд Трампро таҳқиқ кард ва ҳоло интизор меравад, ки дар ҷараёни баҳси 90-дақиқагии ду номзад ҳамин масъала авлавият хоҳад дошт. Нашрия гуфт, ки давоми 17 соли охир Трамп аз роҳи гузориш додани ин ки даромадашро аз даст додааст, ба давлат андози хеле кам пардохт кардааст ваё аслан андоз надодааст. Таҳқиқоти журналистӣ мегӯяд, ки барои кам кардани масъулиятҳои андозсупориаш Трамп даромадашро ночиз нишон додааст. Нашрия гуфт, ки солҳои 2016 ва 2017, ки тоза президент интихоб шуд, ба давлат ҳамчун андози федеролӣ танҳо дар ҳаҷми 750-долларӣ маблағ супурдааст ва дар давоми 15 соли аз ин пеш давоми 10 солаш аслан андози федеролӣ насупурдааст. Дар як видеои таблиғотии тими Байден, ки билофосила баъди нашри таҳқиқоти New York Times таҳия шуд, нишон дода шудааст, ки чӣ гуна амрикоиҳои қаторӣ соле ба маротиб бештар назар ба Трамп андоз месупоранд. Трамп дар Твиттери худ навишт, ки “миллионҳо доллар андоз супурдааст ва мисли ҳар як нафари дигар ба сабукиҳои молиётӣ ҳақ дорад”. Интизор меравад, ки музоҳираи интихоботии Трамп ва Байденро дар шаҳри Кливланди аёлати Оҳайо 100 миллион амрикоӣ тамошо бикунанд.

ВКД: "Раҳматилло Зойировро сагаш ба ҷӯй афтонд". Раиси ҲСДТ: "Ду нафари ношинос заданд." ВИДЕО

Раҳматилло Зойиров дар назди хонааш. Рӯзи 24-уми сентябри 2020

Мақомоти Вазорати корҳои дохилии Тоҷикистон рӯзи 29-уми сентябр дар баёнияи расмӣ гуфтанд, ки Раҳматилло Зойиров, раиси Ҳизби сотсиал-демократро касе назада, балки сагаш ба даруни ҷӯйбор афтондааст.

Раҳматилло Зойиров дар вокуниш ба баёнияи Вазорати корҳои дохилӣ гуфт, "чунин назар бепоя ва пур аз иштибоҳ аст. Дар зудтарин фурсат дар ин замина баёнияи расмӣ нашр мекунем”.

Вай пештар гуфта буд, ки шоми 22-юми сентябр шахсони ношинос дар наздикии хонааш дар шаҳри Душанбе ба ӯ ҳамла карда, ба сару чашмаш осеб расонданд. Ба қавли Зойиров, ҳамлаварон ду нафар буданд ва "аз пушт зарба заданд".

Масъулони ВКД мегӯянд, бино ба ташхиси тиббиву додгоҳӣ "дар сари ӯ ягон осеби ҷароҳат ёфт нашуд". Вазорат аз қавли Қобилҷон Давлатхоҷаев, ҳамчун шоҳиди ҳодиса, овардааст: "Санаи 22-юми сентябри соли 2020 бегоҳирӯзӣ ҳамсояаш Зойиров Р.Ҳ.-ро вохӯрд, ки номбурда бо сагаш сайругашт менамуд. Дар ин маврид саг Зойиров Р.Ҳ.-ро ба як тараф кашид ва дар натиҷа номбурда ба дохили ҷӯйбори бетонӣ афтид."

Раҳматилло Зойиров рӯзи 29-уми сентябр гуфт, воқеан мавриди ҳамла қарор гирифтааст ва дар ин замина ба ташхиси тиббиву додгоҳӣ муроҷиат кардааст. "ВКД як нусхаи ин ташхисро дастрас кардааст, аммо чунин хулосаи ВКД комилан бепоя аст", -- афзуд ӯ.

Раҳматилло Зойиров дар суҳбат бо Радиои Озодӣ гуфт, "шоми 22-юми сентябр, соати шашуними бегоҳ, як-ду одамро гусел карда, каме дар сари кӯча истодам. Рафтанӣ будам, ки аз пушти сар ва гарданам заданд. Ҳамон лаҳза касе бо тамоми ҷуссааш маро тела дод. Бо китфи чапам ба роҳрав зада, ба дохили ҷӯй афтодам."

Дар се соли ахир бори дувум аст, ки раиси ҲСДТ мавриди ҳамлаи шахсони ношинос қарор мегирад. Зоиров мегӯяд, ҳамлаи ахир баъд аз бозгашти ӯ аз баъзе шаҳру ноҳияҳои кишвар сурат гирифт. Ҷое, ки ба қавли худаш дар бораи "тақаллубкорӣ"-и раисони баъзе аз шаҳру ноҳияҳои кишвар ҳангоми пешвози раиси ҷумҳурии Тоҷикистон маълумоти зиёде ҷамъ оварда буд.

Ҳодисаи ахир дар ҳоле сурат гирифтааст, ки Тоҷикистон дар остонаи интихоботи президентӣ қарор дорад ва Ҳизби сотсиал-демократ онро таҳрим ё бойкот кардааст. Шӯрои сиёсии ҳизб гуфт, таъини интихоботи президентӣ дар санаи 11-уми октябр "ғайриқонунӣ" аст ва раиси ҷумҳур Эмомалӣ Раҳмон ҳақ надорад, раиси ҳизби сиёсӣ бошад.

Видеои суҳбат бо Раҳматилло Зойировро дар инҷо бинед:

Зойиров гуфт, ки афроди ношинос ӯро задаанд
лутфан мунтазир бошед

Феълан кор намекунад

0:00 0:04:51 0:00

Президенти Фаронса Эммануэл Макрон бо Светлана Тихановская мулоқот кард

Светлана Тихановская баъди мулоқот бо президенти Фаронса Эммануэл Макрон ба саволҳои журналистон посух дод

Президенти Фаронса Эммануэл Макрон баъди мулоқот бо раҳбари мухолифони Беларус Светлана Тихановская дар Литва ваъда дод, ки Аврупо дар бӯҳрони сиёсии Беларус миёнҷигӣ мекунад. Ӯ гуфт, ки “мо, аврупоиҳо, беҳтарин талошамонро барои миёнҷигӣ ба харҷ медиҳем”. Тихановская баъди ин дидор ба хабарнигорон гуфт, ки президенти Фаронса “ба мо ваъда дод, ки барои барпо кардани музокирот дар ин давраи бӯҳрони сиёсии кишварамон кӯмакашро дареғ намедорад ва ӯ инчунин барои озод кардани ҳама зиндониҳои сиёсӣ мусоидат хоҳал кард”. Манобеъ гуфтанд, ки музокироти ду ҷониб 35 дақиқа идома дошт. Тихановская қаблан гуфт, ки худи ӯ дархости баргузории мулоқот ва миёнҷигии Макрон дар бӯҳрони сиёсии Беларусро кардааст. Ӯ дар мусоҳиба бо AFP гуфт, ки Беларус ҳоло ба барпо кардани муколамаи миёни ҳукумат ва мухолифон бисёр ниёз дорад, то ки пеши роҳи “хунрезии бештар” гирифта шавад. Макрон рӯзи 28-уми сентябр зимни суханронӣ дар Вилнюс пойфишорӣ кард, ки Аврупо бояд бо Русия дар амри бунёди сулҳ дар Аврупо ҳамкорӣ кунад. Ӯ инчунин аз САҲА хост, ки дар масъалаи Беларус миёнҷигӣ барпо кунад ва гуфт, ки Париж “тамоми талошашро ба харҷ медиҳад, то ки ин миёнҷигӣ шурӯъ шавад”. Ӯ афзуд, ки президенти Русия Владимир Путин аз ин ташаббус пуштибонӣ кардааст. Тихановская, ки дар интихоботи президентии Беларус иштирок карду мағлубшуда эълон шуд, баъди он ба Литва рафт ва фаъолияти худро ба унвони раҳбари мухолифон аз он ҷо идома медиҳад. Тихановская гуфтааст, ки натиҷаҳои интихоботи президентиро, ки Лукашенкоро баранда эълон кардааст, эътироф намекунад.

Рӯзи сеюми даргириҳо дар Қаробоғи Кӯҳӣ

Харитаи Қаробоғи Кӯҳӣ

Даргириҳои миёни нирӯҳои Арманистону Озарбойҷон дар қаламрави минтақаи баҳсии Қаробоғи Кӯҳӣ рӯзи сеюм – 29-уми сентябр ҳам идома дошт ва бо вуҷуди даъватҳои байналмилалӣ барои хатми ҷанг, ҳарду ҷониб ҳамдигарро дар доман задани низоъ гунаҳгор карданд. Дар ҷараёни даргириҳои ахири миёни ду ҷумҳурии Қафқози Ҷанубӣ даҳҳо нафар ҷон додааст. Вазорати дифои Озарбойҷон гуфт, ки низомиёни арманӣ минтақаи Дашкесянро ҳадаф қарор доданд, ин иттиҳомро Ереван ҳамчун “дурӯғи маҳз” рад кард. Дар изҳороти вазорати дифои Озарбойҷон гуфта шуд, ки “шаби 28 ба 29-уми сентябр дар тамоми хати ҷанг даргириҳои тунд идома дошт”. Манзури вазорат хати тамос дар марз аст, ки Арманистону Озарбойҷонро аз ҳам ҷудо мекунад. Вазорати дифои Арманистон гуфт, ки “низоъ бо шиддати гуногун идома дошт”. Қарор аст шоми 29-уми сентябр Шӯрои амнияти СММ ҷаласаи изтирориро барои баррасии ин низоъ барпо кунад, чун хатари ҷалби қудратҳои минтақавии Русияву Туркия ҳам ба миён омадааст. Дар изҳороти муштараки вазирони хориҷаи Бритониёву Канада рӯзи 28-уми сентябр аз “амалиёти васеъмиқёси низомӣ” дар Қаробоғи Кӯҳи изҳори нигаронӣ шудааст.

Полша панҷ шаҳрванди Тоҷикистонро истирдод кард

Варшава, пойтахти Полша

Аз кишвари аврупоии Полша ахиран панҷ шаҳрванди Тоҷикистон бо гумони иртибот бо гурӯҳи тундрави “Давлати исломӣ” истирдод шуданд. Radio Poland навиштааст, ки ин нафарон дар ҷалби шаҳрвандони Полшаву Украина ба амалҳои террористӣ дар қаламрави Полша гумонбар мешуданд. Исми ин шаҳрвандон нашр намешавад.

Вале гуфта мешавад, ки чор шаҳрванди Тоҷикистонро моҳи маи соли ҷорӣ боздошт карданд. Нафари панҷумро дар чаҳорчӯби як амалиёти байналмилалии зиддитеррористӣ дастгир карданд. Ин нафар моҳи декабри соли 2019 аз хоки Полша фирор карда буд. Оҷонсии амнияти дохилии Полша гуфт, ки ин шахс мехост ба Сурия барои ширкат дар ҷиҳод ва барпо кардани робитаҳои хуб бо аъзои созмони террористии марбут ба “Ал-Қоида” сафар кунад. Панҷ шаҳрванди истирдодшудаи Тоҷикистон аз Полша баъди ин ҳақ надоранд, ки ба кишварҳои ҳавзаи Шенген ворид шаванд.

Ин хабар дар ҳолест, ки моҳи апрели соли 2020 полис дар Олмон гуфт, ки чаҳор шаҳрванди Тоҷикистонро бо гумони омодагӣ ба анҷоми амали террористӣ боздошт кард. Тафтишот гуфт, ки нафарони боздоштшуда январи соли 2019 ба узвияти “Давлати исломӣ” шомил шуданд. Дар хабар гуфта шуд, ки онҳо бо раҳбарони созмони террористӣ дар Сурия ва дигар кишварҳо дар тамос буданд. Тафтиши қазияи ин шаҳрвандони Тоҷикистон ҳанӯз анҷом нашудааст.

Сафари сарвазири Узбекистон ба Тоҷикистон

Абдулло Орипов, нахуствазири Узбекистон.

Абдулло Орипов, нахуствазири Узбекистон қабл аз зуҳри сешанбе дар раъси як ҳайати баландпоя вориди пойтахти Тоҷикистон шуд.

Қарор аст имруз дар қароргоҳи ҳукуматӣ дар шаҳри Душанбе ҷаласаи 7-уми Комиссияи байниҳукумати Тоҷикистон оид ба ҳамкориҳои тиҷоратӣ ва иқтисодӣ баргузор шавад. Тибқи иттилои расмӣ, ҳайати Тоҷикистонро дар ин гуфтугӯҳо сарвазир Қоҳир Расулзода раҳбарӣ хоҳад кард.

Рушди ҳамкориҳои иқтисодӣ, тиҷоратӣ, нақлиёт, энерживу кишоварзӣ ва низ фарҳангӣ аз масоили мавриди гуфтугӯи ҷонибҳо хоҳанд буд. Дар назар аст, ки дар чаҳорчӯбаи сафари ҳайати Узбекистон ҳамоишҳои тиҷоратӣ низ баргузор шаванд.

Тоҷикистону Узбекистон ду даҳсолаи ахир ва дар замони раёсати Ислом Каримов муносибати чандон хуб надоштанд. Баъди ба қудрат расидани Шавкат Мирзиёев дар соли 2016 яхи муносибатҳо об шуд ва ҳоло ду ҷониб аз беҳбуди равобит сухан мегӯянд.

Соли 2018 ва пас аз сафари Шавкат Мирзиёев ба Душанбе миёни Тоҷикистону Узбекистон низоми раводид миёни ду кишвар бекор шуда, парвозҳои мустақим оғоз шуд.

Академик Мӯсо Диноршоев даргузашт

Мӯсо Диноршоев.

Мӯсо Диноршоев, файласуфи маъруфи тоҷик, рӯзи 29-уми сентябр дар 86-солагӣ дар шаҳри Душанбе даргузашт. Яке аз наздиконаш ба Радиои Озодӣ гуфт, маросими видоъ бо ӯ соати 12-и рӯзи сешанбе дар маҳаллаи маъруф ба "7-ум километр"-и пойтахт баргузор мешавад.

Мӯсо Диноршоев 7-уми ноябри соли 1934 ба дунё омада, доктори илмҳои фалсафа, академики Академияи илмҳои Тоҷикистон ва дорандаи Ҷоизаи давлатии ба номи Абуалӣ ибни Сино буд.

Ӯ хатмкардаи Донишгоҳи давлатии Тоҷикистон буда, солҳо дар Фарҳангистони улуми Тоҷикистон кор кард ва то мақоми мудири Пажӯҳишгоҳи фалсафа ва муовини президенти Академия расид. Фарзанди ӯ Зарина Диноршоева ҳам аз пайи падар рафта, рисолаи докториашро дар фалсафа дифоъ кардааст.

Ёфтҳои бештар

XS
SM
MD
LG