Хабарнигорони Goal.com рӯйхати мунтахаби рамзии Лигаи қаҳрамонҳоро барои мавсими 2019/2020 тартиб доданд. Рӯйхати бозигарони ба он дохилшударо дар сайти нашрия дастрас кардан мумкин аст.
Асоси дастаро бозигарони «Бавария»-и Мюнхени Олмон ташкил медиҳанд. Аз ин бошгоҳ ҳашт футболбоз ба мунтахаби Лигаи қаҳрамонҳо шомил шудааст: Мануэл Нойер, Йозуа Киммих, Давид Алаба, Алфонсо Дэвис, Серж Гнабри, Тиаго Алкантара, Томас Мюллер, Роберт Левандовски. Инчунин дар рӯйхат номҳои Дайо Упамекано («РБ Лейпсиг»), Эрлинг Ҳолланд («Боруссия»-и Дортмунд) ва Неймар («Пари Сен-Жермен») зикр шудааст.
Вале футболбозони машҳур - Лионел Месси, ҳамлагари “Барселона”-и Испания ва Криштиану Роналду, ҳамлагари “Ювентус”-и Турини Италия, дар ҳайати дастаи мунтахаби Лигаи қаҳрамонҳои УЕФА ҷой наёфтанд.
“Барселона” аз мусобиқа дар 1/4 финал хориҷ шуд ва “Ювентус” дар 1/8 финал мағлуб гашт.
Бозии ниҳоии Лигаи қаҳрамонҳо 23-юми август дар Лиссабони Португалия баргузор шуд. “Бавария” дар финал “Пари Сен-Жермен”-и Фаронсаро бо ҳисоби 1-0 шикаст дод. Голи ягонаро дар дақиқаи 59-ум ҳамлагар Кингсли Коман ба самар расонд.
Ин ғалаба барои «Бавария» дар Лигаи қаҳрамонҳо дар таърих шашум аст. «Бавария» дар мусобиқаи гузаштаи Лигаи қаҳрамонҳо дар ҳамаи 11 бозӣ ғолиб омадааст, ки ба чунин натиҷа пештар ягон даста мушарраф нашудааст.
Дар марҳилаи гурӯҳӣ “Бавария” дуборӣ «Тоттенҳэм»-и Англия, «Олимпиакос»-и Юнон ва «Срвена Звезда»-и Сербияро шикаст додааст. Дар 1/8 финал бар «Челси»-и Англия, дар чорякфинал бар «Барселона»-и Испания, дар нимфинал бар «Лион»-и Фаронса ғалаба кардааст.
