Русия, ки якбора зери зарбаи сахти поин рафтани қимати нафт ва сирояти коронавирус қарор гирифтааст, барои кумак ба иқтисоди ин кишвар чаҳор миллиард доллар ҷудо кард.
Сарвазири Русия Михаил Мишустин рӯзи 16-уми март гуфт, дар доираи ин иқдомот ба ширкатҳои ҳавопаймоӣ ва ҷаҳонгардӣ имтиёзҳои андозӣ медиҳанд.
Ҳамчунин, ба гуфтаи ӯ, ширкатҳои давлатии "Газпром" ва "Роснефт" ҳақ доранд, андоз аз фоида ё даромадҳоро ним сол дертар супоранд.
Дар буҷаи федеролии Русия барои соли 2020 дарёфти 7,4 миллиард доллар дивиденд ё андоз аз фоидаи ширкатҳои давлатӣ дар назар гирифта шудааст. Ширкатҳо ин навъи андозро маъмулан дар миёнаи сол месупоранд.
Иқтисоди Русия аз нархи нафт сахт вобаста аст. Нархи нафт рӯзи 9-уми март якбора поин рафт.
Дар буҷаи имсолаи Русия нархи як бушка нафтро чиҳил доллар ҳисоб кардаанд, ҳоло қимати он ба сӣ доллар баробар аст.
