FIFA бозиҳои интихобии Ҷоми ҷаҳонии футболро дар Осиё ба таъхир гузошт

Федератсияи байналмилалии футбол (FIFA) дар вебсайти расмии худ изҳорот дар бораи мавқуф гузоштани бозиҳои мусобиқаи интихобии Ҷоми ҷаҳонӣ-2022 дар қораи Осиёро нашр кард.

Дар изҳорот гуфта шудааст, FIFA дар машварат бо Конфедератсияи футболи Осиё (AFC) тасмим гирифт, ки бозиҳо дар ду равзана - 23-31 март ва 1-9 июни соли 2020 мавқуф гузошта шаванд. Беш аз 50 бозии мусобиқот ба таъхир афтод.

FIFA инчунин ба дастаҳои миллӣ иҷозат дод, ки бо риояи талаботи мукаммали амният ва пас аз тасдиқи пешакӣ аз ҷониби FIFA ва AFC, дар ин санаҳо мустақилона бозӣ кунанд.

Ёдовар мешавем, дастаи мунтахаби Тоҷикистон дар марҳилаи дувуми интихобии қаҳрамонии ҷаҳон-2022 дар гурӯҳи "F" бо тимҳои миллии Ҷопон, Қирғизистон, Мянмар ва Муғулистон рақобат мекунад.

Мунтахаби Ҷопон, ки бо 12 имтиёз мақоми аввалро касб намудааст, бешак, соҳиби роҳхат ба марҳилаи севуми мусобиқот мешавад.

Дастаҳои мунтахаби Қирғизистон ва Тоҷикистон, ки ҳафтимтиёзӣ гирифтаанд, барои ҷойи дувум талош доранд. Бо дарназардошти таносуби беҳтари тӯбҳо мунтахаби Қирғизистон ҷойи дувум ва мунтахаби Тоҷикистон ҷойи севумро касб намудаанд. Мянмар бо 6 имтиёз зинаи чаҳорум ва Муғулистон бо 3 имтиёз зинаи панҷумро ишғол кардаанд.

Бозиҳои боқимондаи мусобиқот дар гурӯҳи “F” имсол баргузор мешаванд. Мунтахаби Тоҷикистон мебоист 26-уми март дар Душанбе бо мунтахаби Муғулистон, 4-уми июн дар меҳмонӣ бо дастаи Ҷопон ва 9-уми июн дар майдони худ бо тими Мянмар рақобат мекард.

Дар марҳилаи дувуми интихобии қаҳрамонии ҷаҳон-2022 ҳамагӣ 40 даста ширкат дорад. Ҳашт ғолиби гурӯҳ ва чаҳор дастаи нишондодҳояш хубтари ҷойҳои дувуми гурӯҳҳо ба марҳилаи севуми интихобии қаҳрамонии ҷаҳон-2022 роҳ пайдо мекунанд, инчунин соҳиби роҳхатҳо ба Ҷоми Осиё-2023 мешаванд.