Президенти ИМА Доналд Трамп рӯзи якшанбеи 23-юми феврал гуфт, агар оташбаси ибтидоӣ дар Афғонистон иҷро шавад, омодааст, бо гуруҳи Толибон созишномаи сулҳро имзо кунад.
"Ба назари мо, онҳо (Толибон) мехоҳанд созиш кунанд. Мо ин созишро мехоҳем. Фикр мекунам, ҳама чиз иҷро мешавад, мебинем", - изҳор дошт Трамп 23-уми феврал пеш аз сафараш ба Ҳиндустон.
Пештар, моҳи равон ҷонибҳо ҳафтаи "низоми коҳиши сатҳи хушунат"-ро эълом карданд, ки аз 22-уми феврал ба иҷро даромад.
Оташбаси мазкур бояд барои имзои созишномаи сулҳе шароитро фароҳам созад, ки бурунрафти нерӯҳои амрикоӣ аз Афғонистонро дар пай хоҳад дошт. "Тавре шумо огаҳед, мо муҳлати муайяни бидуни хушунатро дорем. Нимрӯз гузашт. Бубинем, минбаъд чӣ мешавад", - афзуд Трамп. Ӯ ҳамчунин илова кард, ки пас аз "19 соли ҷанг" замони баргашти нерӯҳои амрикоӣ ба ватан фаро расидааст.
Ҳоло дар Афғонистон ҳудуди 12 ҳазор сарбози амрикоӣ ҳузур доранд.
Расонаҳои афғонӣ хабар доданд, ки Толибон дар давоми ду рӯзи ахир чандин ҳамлаи кучак ба нуқтаҳои назоратие дар вилоятҳо анҷом додаанд, ки сарбозони маҳаллӣ қарор доранд.
