Вазири амнияти Туркманистон Яйлим Бердиев бо фармони президент Қурбонгулӣ Бердимуҳаммадов аз мақом барканор шуд.
Ба иттилои бахши туркмании Радиои Озодӣ, пеш аз барканорӣ рутбаи Бердиев аз генерал - полковник ба генерал - майор поин бурда шудааст. Манобеи радио мегӯянд, дар ин кишвар ба барканории мақомҳои баландпояи қудратиҳо омодагӣ дида мешавад.
Фармони барканории Вазири амнияти Туркманистон рӯзи панҷшанбе тариқи телевизионҳои давлатӣ хонда шудааст. Бино ба иттилои расмӣ, Бердиев гӯиё ба хотири гузаштан ба кори дигар аз мақомаш сабукдуш гардидааст. Вале дар бораи мансаби ояндаи ӯ чизе гуфта нашуд.
Президент Бердимуҳаммадов 22 январ дар ҷаласаи Шӯрои амнияти миллӣ Бердиевро ба хотири "роҳ додан ба камбудиҳо ҳангоми адои вазифаи хидматӣ" танбеҳи қатъӣ дода буд. Он рӯз рутбаи ӯ поин бурда шуда, аз шӯро ихроҷ шуд. Вазири дифои Туркманистон Бегенч Гундогдиев низ танбеҳ гирифта буд.
Чандин манбаъ гуфтанд, ки рӯзҳои наздик як қатор мақомҳои баландпояи қудратии Туркманистон аз мақом барканор хоҳанд шуд. Ин барканориҳо ба ислоҳоти конститутсионие рабт доранд, ки қарор аст, соли 2020 анҷом шавад ва ҳадафаш таъсиси порлумони дорои ду палата аст.
