Дастаи “Хуҷанд”-и Хуҷанд, барандаи медалҳои нуқраи қаҳрамонии футболи Тоҷикистон, бозии хонагиашро дар плей-оффи Ҷоми АFC (Конфедератсияи футболи Осиё)-2020 рӯзи чоршанбеи 26-уми феврал дар Душанбе, дар Варзишгоҳи марказии ҷумҳуриявӣ, баргузор мекунад. Дар ин бора сомонаи Федератсияи футболи Тоҷикистон хабар додааст.
Ба иттилои ин манбаъ, бозӣ бо дархости бошгоҳи футболи «Хуҷанд» бинобар омодагӣ ба ҷашни Наврӯз дар варзишгоҳи «20-солагии Истиқлолияти Тоҷикистон»-и Хуҷанд ба Душанбе гузаронида шуд.
“Хуҷанд” бо раҳбарии сармураббӣ Никола Лазаревич, мутахассиси сербиягӣ, дар плей-оффи Ҷоми AFC-2020 бо ғолиби бозиҳои даври пешакӣ «Нефтчӣ»-и Қирғизистон ва «Аҳал»-и Туркманистон рақобат мекунад.
Бозии аввали даври пешакии Ҷоми AFC-2020 миёни дастаҳои «Нефтчӣ»-и Қирғизистон ва «Аҳал»-и Туркманистон бояд 5-уми феврал дар Ҷалолобод баргузор мешуд. Вале дастаи меҳмон, ноиби қаҳрамони Туркманистон - «Аҳал» - ба Қирғизистон наомад.
Ба иттилои расонаҳои хабарии Қирғизистон, «Аҳал» аз Конфедератсияи футболи Осиё хоҳиш кардааст, бозӣ ба иллати авҷ гирифтани коронавирус дар Чин, ки бо Қирғизистон ҳамсарҳад аст, ба муҳлати дигар гузаронида шавад. Вале дар AFC посух додаанд, ки ҳеҷ таҳдиде вуҷуд надорад ва бозӣ бояд дар муҳлати муқарраршуда доир гардад.
Тасмими ниҳоиро дар бораи бозии доирнашуда Конфедератсияи футболи Осиё хоҳад гирифт.
«Хуҷанд» аввалин бозиашро дар доираи плей-оффи Ҷоми АFC-2020 рӯзи 19-уми феврал дар сафар ва бозии ҷавобиро 26-уми феврал дар майдони худ анҷом медиҳад.
Дар мавриди пирӯзӣ «Хуҷанд» ба ҳаққи ширкат дар марҳилаи гурӯҳии ин мусобиқаи қитъавӣ мушарраф шуда, дар гурӯҳи «D» бо дастаҳои «Истиқлол» (Тоҷикистон), «Алтин Асир» (Туркманистон) ва «Дордой» (Қирғизистон) рақобат мекунад.
Ҷоми AFC-2020
Минтақаи Марказӣ
Плей-офф. Бозии аввал
19-уми феврал (чоршанбе)
Ғолиби ҷуфти «Нефтчӣ» (Қирғизистон)/«Аҳал» (Туркманистон) – «Хуҷанд» (Тоҷикистон)
Плей-офф. Бозии ҷавобӣ
26-уми феврал (чоршанбе)
Оғози бозӣ – соати 16:00
«Хуҷанд» (Тоҷикистон) – Ғолиби ҷуфти «Нефтчӣ» (Қирғизистон)/«Аҳал» (Туркманистон)
Душанбе, Варзишгоҳи марказии ҷумҳуриявӣ
Корбарони азиз!
Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
