Варзишгарони тоҷик дар мусобиқаи байналмилалӣ ба хотираи мураббии хизматнишондодаи Қазоқистон Галим Жарилгапов, ки рӯзҳои 17-21-уми декабр дар шаҳри Қарағанда баргузор шуд, ду медали тилло ба даст оварданд.
Ба иттилои дафтари матбуоти Кумитаи миллии олимпии Қазоқистон, мусобиқаи XXXVI байналмилалӣ ба хотираи Галим Жарилгапов дар Маркази бокси ба номи Серик Сапаеви Қарағанда бо иштироки варзишгарони Қазоқистон, Қирғизистон, Муғулистон, Русия, Тоҷикистон, Узбекистон, Финляндия ва Чин аз рӯи 13 вазни олимпӣ (8 вазн миёни мардон, 5 вазн миёни занон) сурат гирифт.
Муштзани тоҷик Бахтиёри Мирзомуҳаммад дар рақобатҳо дар вазни то 75 кило бар Бекболат Абдукарим, Ерсултан Советов (ҳарду аз Қазоқистон) ва Артур Захарченко (Русия) пирӯз шуда, ба финал баромад. Ӯ дар қувваозмоии ниҳоӣ бар Беринбай Нуримбетов (Қазоқистон) ғолиб омада, ҷойи аввалро соҳиб гашт.
Медали дувуми тиллоро ба Тоҷикистон Шаббос Неъматуллоев овард. Ӯ дар вазни то 81 кило бар Баҳром Фозилов (Узбекистон), Денислом Абдешов, Жанилбек Картбоев (ҳарду аз Қазоқистон) дастболо шуда, ба даври ниҳоӣ роҳ пайдо кард. Шаббос дар финал Эркебулан Акимбайро аз Қазоқистон шикаст дод.
Ҳамчунин муштзанҳои тоҷик дар аввалин мусобиқаи Гранд Слами Осиё оид ба бокс, ки рӯзҳои 18-22-юми декабр дар шаҳри Сиамени Чин баргузор шуд, ду медали нуқра гирифтанд. Медалҳои нуқраро Наврӯз Ҷафоев дар рақобатҳо дар вазни то 81 кило миёни мардон ва Фарида Самиева дар вазни то 51 кило миёни занон ба даст оварданд.
Дар аввалин мусобиқаи Гранд Слами Осиё оид ба бокс дар Сиамени Чин муштзанҳо аз ёздаҳ кишвар - Австралия, Имороти Муттаҳидаи Арабӣ, Малайзия, Муғулистон, Непал, Сингапур, Тайланд, Тайпейи Чин, Тоҷикистон, Филиппин ва Ҳиндустон ширкат доштанд. Қувваозмоиҳо аз рӯи 13 вазни олимпӣ (8 вазн миёни мардон, 5 вазн миёни занон) доир шуд.
