Пайвандҳои дастрасӣ

Хабари нав

Хабарҳо

Баҳси чопи навиштаҳои мақомот дар расонаҳои Тоҷикистон

Қироншоҳ Шарифзода.

Қироншоҳ Шарифзода, мунаққиди расонаҳо, гуфт, муҳаррирон бояд маводеро, ки мақомот барои нашр мефиристанд, таҳрир ва ибораҳои айбдоркунанда ва таҳқиркунандаро ислоҳ намоянд. Ин матлабро Шарифзода рӯзи 29-уми ноябр дар ҷаласаи Шӯрои Васоити Ахбори Омма баён дошт.

"Маводе, ки ба истилоҳи шумо, аз "боло" - аз мақомоти дигар барои нашр ирсол мешавад, бояд таҳрир шавад. Вагарна кори муҳаррирон куҷо мешавад? Дар маводе, ки аз "боло" меояд, эҳтимоли бегуноҳӣ риоя намегардад. Муҳаррир бояд ибораву мафҳумҳои айбдоркунандаро гирад. Гумон намекунам, ин кор мақомотро норозӣ кунад", - афзуд Қироншоҳ Шарифзода.

Дар ҷаласаи Шӯрои ВАО - як созмони ҷамъиятии танзимкунандаи фаъолияти расонаҳо – ки рӯзи 29-уми ноябр дар Душанбе бо ҳузури иддае аз рӯзноманигорон баргузор шуд, риоя гардидани меъёрҳои ахлоқии рӯзноманигорон аз сӯи расонаҳо баррасӣ гардид.

Шарифзода гуфт, Шӯрои ВАО дар шаш моҳи охир 250 ҳолати вайрон кардани меъёрҳои ахлоқиро аз сӯи расонаҳои Тоҷикистон сабт кардааст. Яке аз меъёрҳое, ки риоя нагардидааст, усули эҳтимоли бегуноҳӣ аст.

Ишораи Шарифзода ҳам ба ин буд, ки дар бештари маврид расонаҳо маводи аз сӯи мақомот ирсолшударо бе таҳрир нашр ва ба ин тартиб, бе қарори додгоҳ шахсиятҳои алоҳидаро дар содир кардани айбҳои гуногун муттаҳам мекунанд.

Қарор аст, дар ҷаласаи имрӯзии Шӯрои ВАО раиси нав ва аъзои нави Раёсати Шӯро интихоб гардад.

Шӯрои ВАО дар соли 2009 бо ҳадафи танзими ахлоқии расонаҳои Тоҷикистон таъсис шуд.

Ҳамаи хабарҳои имрӯзро дар инҷо бихонед

Русия ба пойгоҳаш дар Тоҷикистон 30 танки дигар фиристод

Танкҳои русӣ дар Беларус

Пойгоҳи 201-уми Русия, ки дар Тоҷикистон ҷойгир шудааст, рӯзи 6-уми декабр соҳиби 30 танки наву замонвии навъи Т-72Б3М шуд. Хабаргузории русии ТАСС бо такя ба изҳороти Вазорати дифои Русия менависад, ки ин танкҳо хусусиятҳои такмилшудаи ҷангӣ доранд. Танкҳои нав ҷои танкҳои қадимаро мегиранд. Танкҳои нав системаҳои дифоии беҳтар дошта, тавассути низоми мухобиротии "Акведук" ва ҳадафи бисёрсамтаи "Сосна-У" кор мекунад.

Пойгоҳи 201-уми Русия, ки бузургтарин пойгоҳи низомии ин кишвар дар хориҷа мебошад, 7 ҳазор сарбоз дошта, дар шаҳрҳои Душанбе ва Бохтар ҷойгир аст.

Баъди сари қудрат омадани "Толибон" дар Афғонистон, ки бо Тоҷикистон тахминан 1400 км марзи муштарак дорад, Русия ва дигар кишварҳои узви Созмони Паймони Амнити Дастаҷамъӣ аз паи афзоиши тамринҳои низомии муштарак ба хотири пешгирӣ аз ҳама гуна таҳдидҳои амниятӣ шудаанд.

Эҳтимол блогери ҷанҷолии тоҷикро аз Русия биронанд

Чоршанбе Чоршанбиев, блогер ва размкори муҳорибаҳои бидуни қоида ё ММА

Эҳтимол дорад, ки Чоршанбе Чоршанбиев, блогер ва размкори муҳорибаҳои бидуни қоида ё ММА-ро аз қаламрави Русия ихроҷ кунанд.

Ӯро рӯзи 3-уми декабри соли ҷорӣ бо иттиҳоми ҳаракати хатарнок бо мошин дар дохили тунели Лефортово дар Маскав боздошт карданд ва ба ҷавобгарии маъмурӣ кашиданд.

Манбаъҳо дар сохторҳои ҳифзи қонун ба хабаргузории ТАСС гуфтаанд, ки барои ин қонуншиканӣ Чоршанбиевро метавонанд аз Русия ихроҷ кунанд. Ҳукмро додгоҳи шаҳри Маскав содир хоҳад кард.

Худи Чоршанбиев дар бозпурсиҳо ҳаракат бо суръати баландро сари чанбари мошин эътироф кард, вале гуфт, ки навори видеоии саҳнаи ронандагиашро шояд бародаронаш дар интернет нашр кардаанд. Ӯ ба татфишот гуфтааст, ки ин навор нав нест ва он тобистон сабт шудааст.

Чоршанбиев зодаи вилояти Мухтори Кӯҳистони Бадахшони Тоҷикисттон аст ва аз соли 2016 бо муҳорибаҳои бидуни қоида машғул буда, чор бор ғалаба ба даст овардааст.

Ӯ замоне шинохта шуд, ки дар шабакаҳои иҷтимоӣ бо ҳарфҳои зидду нақизаш дар бораи тоҷикону тоҷикистониён ҷанҷол барангехт. Баъдан ӯ барои ин амалҳои ҷанҷолбарангезаш узр хост.

Узбекистон бо 8 қатора шаҳрвандонашро аз Русия меорад

"Роҳи оҳани Узбекистон" дар моҳи декабр барои овардани шаҳрвандонаш аз Русия 8 қатораи иловагӣ роҳандозӣ кардааст. Қатораи нахустин рӯзи 4 декабр ба роҳ баромадааст. Қатораҳои боқимонда рӯзҳои 6, 10, 13, 17, 20, 24 ва 27 декабр ба роҳ хоҳанд баромад. Билет барои ин қатораҳо танҳо аз як самт - аз Русия ба Узбекистон фурӯхта мешавад. Муштариҳо ҳамчунин метавонанд, билетҳоро ба таври электронӣ харидорӣ кунанд.

Дар кӯли Сарез шабакаи дидбонии кайҳонии Чин ба кор даромад

Акс аз маҷаллаи Академияи илмҳои Чин. 8 октябри соли 2021

Академияи илмҳои Чин эълом дошт, ки якҷоя бо Академияи илмҳои Тоҷикистон, Кумитаи ҳолатҳои фавқулода ва мудофиаи граждании Тоҷикистон ва дигар воҳидҳо Истгоҳи дидбонии сарбанди кӯли Сарезро дар Тоҷикистон ба кор даровард. Ин ниҳод аз чаҳор бахш иборат буда, ҳама гуна дигаргуниҳои сарбанди Сарезро дар сатҳи миллиметрӣ ба воситаи моҳвора хабар медиҳад. Он аз нерӯи офтоб барқ мегирад ва яке аз навтарин дастовардҳои технологии Чин дар хориҷ аз он кишвар шумурда мешавад.

Дар хабари расонаҳои Чин гуфта намешавад, ин маълумот ба воситаи моҳвора ба кадом ниҳодҳои кадом кишвар расонда мешавад, вале омадааст, ки шабакаи нави кайҳонӣ ба барномаи байнулмилалии "Як камарбанд, як роҳ" хидмат ва бехатарии Тоҷикистону кишварҳои поёнобро аз рахнаи эҳтимолӣ дар сарбанди Сарез дидбонӣ хоҳад кард.

Пештар мақомоти Тоҷикистон аз эҳтимоли насби таҷҳизоти нави дидбонии кӯли Сарез хабар дода буданд, вале нагуфтаанд, ки ин шабакаро Чин месозад. Моҳи июли имсол муовини раиси Кумитаи ҳолатҳои фавқулодаи Тоҷикистон, Эмомалӣ Иброҳимзода, гуфта буд, "дастгоҳҳои нав сад маротиба беҳтар буда", бо сармояи Бонки Осиёии Рушд аз сӯи як ширкати итолиёӣ сохта шудаанд.

Нашрияи Академияи илмҳои Чин мегӯяд, Маркази тадқиқоти экологии Осиёи Марказӣ дар ин академия даҳ соли охир ба тарҳрезӣ ва сохтани системаи огоҳкунандаи Сарез машғул буд ва моҳи октябри имсол тарҳро ба поён расонд. Онро хадамоти чинии Beidou сохтааст, ки ба дидбонии уствуории пулу роҳҳо, партовгоҳҳо, кӯҳпораҳои сарироҳӣ, бино ва сарбандҳо машғул аст.

Кӯли Сарез соли 1911 бар асари ярч ё кӯчидани кӯҳ миёни навоҳии Рӯшону Мурғоби имрӯз ба вуҷуд омада, ҳудуди 17 миллиард метри мукааб об дорад. Коршиносон мегӯянд, ки дар сурати рахна дидани кӯли Сарез, на танҳо сокинони рустоҳои Бадахшони Тоҷикистон, балки сокинони дигар кишварҳои поёноби минтақаи Осиёи Марказӣ низ бо хатар рӯ ба рӯ мешаванд.

Роҳбари мухолифони Мянмар ба 4 сол зиндон маҳкум шуд

Аун Сан Сучи, раҳбари мухолифони Мянмар.

Додгоҳи Мянмар мушовири пешини давлатӣ ва барандаи ҷоизаи Нобел Аун Сан Сучиро чаҳор сол зиндонӣ кард. Ӯро дар иғвогарӣ ва риоя накардани маҳдудиятҳои марбут ба вабои коронавирус айбдор карданд.

Ин нахустин ҳукм нисбати Аун Сан Сучи аст, ки баъди сари қудрат омадани низомиён эълом мешавад. Нисбати Суч чанд парвандаи дигар, бо айбҳои гуногун, таҳқиқ мешавад.

Аун Сан Сучи 76 сол дорад. Дар соли 2016 вай ба курсии мушовири давлатӣ нишаст ва амалан ҳукумати Мянмарро роҳбарӣ мекард.

1-уми феврали соли ҷорӣ низомиён ҳукумати Аун Сан Сучиро сарнагун карданд. Роҳбари низомиён гуфт, ҳизби "Лигаи миллӣ барои демократия"-и Сучи дар интихоботи моҳи ноябри соли 2020 бо роҳи тақаллуб пирӯз шудааст. Охири моҳи июли соли ҷорӣ натиҷаҳои интихоботи порлумонӣ бекор шуданд.

Баъди сари қудрат омадани низомиён дар Мянмар эътирозҳои мардумӣ ташкил шуданд. Ҳангоми пахши эътирозҳо бештар аз ҳазор кас кушта шуд.

Ду сокини Турсунзодаро барои ҷинояти 24 сол пеш зиндон карданд

Даромадгоҳи шаҳри Турсунзода.

Додгоҳи шаҳри Турсунзода, ду нафарро барои ҷиноятҳояшон дар замони ҷанги дохилӣ ба 15-солии зиндон маҳкум кардааст.

Додситонии кулл рӯзи 6-уми декабр бо нашри як баёнияи расмӣ гуфт, ки Исмоил Самиев ва Рамазон Мурадов, ки узви гуруҳи муташаккили ҷиноие будаанд, дар давоми солҳои 1996-1998 бо силоҳҳои гуногун мусаллаҳ шуда ва ҷиноятҳои махсусан вазнине ба мисли бандитизм, роҳзанӣ ва куштор содир кардаанд.

Назари адвокат ва пайвандони ин ду нафар маълум нест. Боздошти афроде, ки дар замони ҷанги шаҳрвандӣ ҷиноят содир кардаанд, чанд сол боз идома дорад. Мунтақидон мегӯянд, бо гузашти солҳо, мақомот аксаран ҷинояти ин афродро собит карда наметавонанд ва танҳо бар асоси шоҳидии ин ё он нафар боздошт мешаванд. Дар гузашта боздошти мухолифини собиқ низ бо чунин иттиҳом расонаӣ шуда буд, ки онро пайвандонашон як навъ қасосгирӣ унвон карда буданд.

Маъмулан, дар замони ҷанги шаҳрвандӣ ду тарафи даргир бо ҳам мусаллаҳ буданд.

Додситонӣ дар ин хабарномааш нагуфтааст, ки ин ду нафар ба кадом тарафи ҷанги дохилӣ таалуқ доштанд, вале навиштааст, ки онҳо 14 августи соли 1997 ба хонаи Чупонқул Ашӯров ва Валиҷон Ашӯров, сокинони деҳаи Кирови шаҳри Турсунзода ворид шуда, аз модари онҳо бо таҳдиди силоҳ 1200 доллари амрикоӣ ва 700 ҳазор рубли русӣ гирифта ва сипас ҳарду бародарро золимона кушта ва аз ҷойи ҳодиса ҳодиса ғайб задаанд.

Додситонӣ гуфтааст, ки Додгоҳи Турсунзода, Исмоил Самиев ва Рамазон Муродовро барои ин ҷиноятҳо ба 15 соли адои зиндон дар маҳбаси низомаш сахт маҳкум кард.

Ҷанги дохилии Тоҷикистон аз соли 1992 то соли 1997 идома кард ва дар он замон ҳазорон қатлу куштор ва дуздиву ғоратгарӣ сурат гирифтааст. Таҳқиқи парвандаҳои он замон то кунун идома доранд.

BYPOL: Хонаводаи Боқиев ба Лукашенко $1,6 млн пора додааст

Иттиҳоди қудратиҳои Белорус (BYPOL) 3-юми декабр дар бораи онҳое, ки ба президенти ин кишвар Александр Лукашенко ришва додаанд, таҳқиқотеро нашр кард.

Бино ба маълумоти иттиҳод, хонаводаи президенти пешин ва фирории Қирғизистон Курмонбек Боқиев, аз ҷумла ҳамсари писари хурдияш Айжан Кененбоева аз нигоҳи ҳаҷми пора дар рӯйхат дар мақоми дувум меистад.

Муаллифони таҳқиқот гуфтаанд, келини Боқиев соли 2018 ба Лукашенко мошини навъи Mercedes-Maybach S600 Pullman Guard "туҳфа" кардааст, ки на камтар 1,4 млн евро арзиш дорад.

Президенти фирории Қирғизистон ҳамчунин бе Лукашенко мототсикли "Harley-Davidson", ки 26, 5 ҳазор доллар арзиш дорад, туҳфа кардааст.

BYPOL қайд кардааст, ки туҳфаҳо барои "ҳимояту пинҳон доштани хонаводаи Боқиевҳо дар Белорус ва посухи рад додан ба дархостҳои истирдоди Бишкек" тақдим шудаанд.

Рӯзи 7-уми апрели соли 2010 дар Қирғизистон дувумин инқилоби мардумӣ аз замони касби истиқлоли он кишвар рух дод. Дар натиҷаи инқилоб президенти вақти он кишвар Қурмонбек Боқиев ҳамроҳ бо пайвандонаш аз Қирғизистон фирор кард.

Занозании муҳоҷирони қирғиз ва узбек дар Маскав

Акс аз бойгонӣ.

Як гуруҳи муҳоҷирони корӣ аз Қирғизистон ва Узбекистон дар ноҳияи Басмани Маскав занозанӣ кардаанд. Ба навиштаи "Коммерсант", ҳодиса 2-юми декабр дар кӯчаи ба номи Машкова рух додааст.

Пулис як рӯз баъд аз занозанӣ 11 нафар - 7 шаҳрванди Қирғизистон ва 4 сокини Узбекистонро дастгир кардааст. Дар натиҷаи занозанӣ се кас осеб дидаанд. "Зидди гумонбарон бо банди майдаавбошӣ санад тартиб дода шудааст. Санҷиши пешакӣ идома дорад", - навиштааст "Коммерсант".

Канали телеграмии "Mash" иттилоъ додааст, ки зидди муҳоҷирон сокинони маҳаллӣ шикоят кардаанд. "Як гуруҳи муҳоҷирон саҳни бино ва гуруҳи дигар бомро аз барф тоза мекарданд. Дар натиҷа миёни онҳо низоъ бархост", - омадааст дар иттилоия.

Ҳашт шаҳрванди Тоҷикистон барои ҳамлаи мусаллаҳона дар Русия зиндонӣ шуданд

Акс аз бойгонӣ.

Додгоҳе дар вилояти Москваи Русия 8 шаҳрванди Тоҷикистонро ба муҳлати аз 8,5 то 16 сол аз озодӣ маҳрум кард. Дар ин бора хабаргузории ТАСС бо истинод ба додситонии вилояти Москва хабар додааст. Ному насаби маҳкумшудаҳо оварда нашудааст.

"Додгоҳ муайян кард, ки шаш нафари гумонбарон узви гуруҳи мусаллаҳе буданд, ки ба хонаҳои соҳибкорон дар шаҳр ва вилояти Москва ҳамла мекарданд. Онҳо аз хонаҳо пул, ашёи гаронарзиш ва силоҳ медуздиданд. Ҳаҷми умумии хисорот ба беш аз 11,5 млн рубл мерасад", - омадааст дар иттилоияи додситонӣ.

Додгоҳи Русия моҳи майи имсол низ панҷ шаҳрванди Тоҷикистонро бо гуноҳи омодагӣ ба ҳамла ба Ситоди низомии ГРУ, Хадамоти иктишофии ин кишвар, аз 9 то 17 сол зиндон маҳкум карда буд. Нашрияи "Коммерсант" бо такя ба манобеи худ навишт, шахсони маҳкумшуда узви гуруҳи тундрави "Давлати исломӣ" будаанд.​

Вале хабаргузории "Интерфакс" иттилоъ дод, ки онҳо гуноҳро напазируфтанд ва яке аз маҳкумшудаҳо ҳангоми мурофиа фарёд зада, гуфтааст, парванда сохта аст ва онҳоро туҳмат карданд.

Мақомоти Русия гуфтанд, ки ин панҷ нафар ҳанӯз соли 2018 боздошт шуда буданд. Чор шаҳрванди дигари Тоҷикистон ҳамон сол бо айни чунин иттиҳом зиндонӣ шуданд. Онҳо низ парвандаашонро сохта унвон карда буданд. Коршиносон низ ба боздошти муҳоҷирони тоҷик бо иттиҳоми терроризм дар Русия ҳамеша бо шубҳа менигаранд.

Дар ИМА пешниҳоди омӯзиши коммунизм дар мактабҳои миёнаро карданд

Ҳайкали биринҷии Ленин дар як боми манзили зист дар Ню-Йорки ИМА.

Ҷумҳурихон дар палатаи намояндагони Иёлоти Муттаҳидаи Амрико пешниҳод кардаанд, ки дар мактабҳои миёна омӯзиши таърихи коммунизм ҷорӣ шавад.

Мария Салазар, узви палатаи намояндагон дар нишасте гуфт, ки бояд насли нави амрикоиҳо аз коммунизм бохабар бошанд. Ба гуфтаи ӯ, “ҳақиқат ин аст, ки коммунизм ин саратон аст ва камбизоатии баробар, гуруснагии баробарро ташвиқ мекунад”.

Дэн Креншоу, узви дигари палатаи намояндагони ИМА гуфт, ки мактаббачагони амрикоӣ бояд дар бораи марги 3,5 миллион украинӣ дар зиндонҳои Сталин огоҳ бошанд ва бидонанд, ки ҳоло ҳизби коммунист дар Шинҷони Чин ба уйғурҳои мусалмон чӣ гуна рафтор мекунад.

Ба гуфтаи ӯ, “коммунизм дар ахлотҷойи таърих қарор дорад, ҷое ки муносиби ин идеология аст”.

Ӯ гуфт, бояд мактаббачагон бидонанд, ки Че Гевари кист ва аз пушидани акси ӯ дар либосҳояшон худдорӣ кунанд.

Коммунизм, идеологияи аслии Иттиҳоди Шӯравӣ (СССР) буд, ки соли 1991 пас аз 70 соли ҳузур аз ҳам пошид. Ҳоло дар Чин бар асоси ин идеология ҳукумат мекунанд.

Озарбойҷон даҳ сарбози асири арманиро раҳо кард

Сарбозе дар марзи Арманистон

Озарбойҷон даҳ сарбози арманиро, ки нимаи моҳи ноябр дар пайи як задухӯрд боздошт карда буд, ба Арманистон супурдааст.

Арманистон дар иваз харитаи заминҳои минкоришуда дар чанд ноҳияи Қарабоғи Кӯҳиро ба Озарбойҷон дод, ки то соли гузашта зери назораташ буданд.

Мақомоти Озарбойҷон хабар дод, ки ин амал бо миёнаравии Вазорати мудофиаи Русия анҷом шудааст.

Рӯзи 16-уми ноябри соли ҷорӣ миёни низомиёни Озарбойҷон ва Арманистон задухӯрд рӯх дод. Ҷанг бо дахолати Русия хатм шуд.

Озарбойҷон аз ҳалокати 7 сарбоз ва Арманистон аз 6 сарбоз хабар дода буданд.

Никол Пашиниён, сарвазири Арманистон гуфта буд, ки эҳтимол наздики 30 сарбози Арманистон асир афтодаанд.

Соли гузашта низ дар пайи задухурд миёни ду кишвар даҳҳо нафар захмӣ ва кушта шуданд.

Кишварҳои ғарбӣ қатли низомиёни собиқ аз ҷониби Толибонро маҳкум карданд

Ҷангиёни Толибон дар вилояти Ҳироти Афғонистон.

Иёлоти Муттаҳидаи Амрико ва шарикони ғарибиаш қатли низомиёни собиқи афғон ба дасти Толибонро рафтори ваҳшиёна номиданд ва маҳкум карданд.

Дидбони ҳуқуқи башар ҳафтаи гузашта гузориш дод, ки дар 34 вилояти Афғонистон дар се моҳи ахир беш аз 100 низомии собиқи афғонистонӣ ба дасти Толибон кушта шудааст.

Дар баёнияе рӯзи 4-уми декабр ИМА, Иттиҳоди Аврупо ва 20 кишвари дигар қатли низомиёни собиқи афғонистониро маҳкум карданд. Дар баёния гуфта мешавад, ки Толибон ба аҳди худ барои афви умумӣ амал намекунанд.

Толибон нимаи моҳи август Кобулро тасарруф карданд ва ваъда доданд, ки низомиёни собиқро афв мекунанд. Бар асоси ёфтаҳои Дидбони ҳуқукқи башар ин гуруҳ ба ваъдаи худ амал намекунад.

Бо гузашти беш аз се моҳ ҳанӯз ҳукумати гуруҳи Толибонро ҳеҷ кишваре ба расмият нашинохтааст.

Байден ва Путин суҳбати видеоӣ мекунанд

Ҷо Байден, президенти ИМА ва Владимир Путин, президенти Русия

Ҷо Байден, президенти ИМА ва Владимир Путин, президенти Русия рӯзи 7-уми декабр дар тамоси видеоӣ мавзуи Украина ва дигар масоили мавриди назарро баҳс мекунанд. Кохи Сафед ва Кремл баргузории ин суҳбатро тасдиқ карданд.

Ин суҳбат дар ҳоле баргузор мешавад, ки кишварҳои ғарбӣ аз мустақар шудани ҳазорон нерӯи низомии Русия дар марзи Украина нигаронанд.

Кохи Сафед хабар дод, ки президент Байден ҳаракатҳои низомии Русия дар наздикии марзҳои Русияро бо Путин баҳс хоҳад кард.

Ду раҳбар ҳамзамон дар мавзуи силоҳи ҳастаӣ, ҳамлаҳои киберӣ суҳбат мекунанд.

Мақомҳои Украина аз наздик шудани низомиёни рус дар марз нигаронанд. Онҳо бар ин назаранд, ки Русия қасди ҳамла ба Украинаро дорад.

ИМА ҳамчун пуштибонӣ Украина Русияро ҳушдор додааст, ки аз иқдомҳои нооромкунандаи худ даст бикашад.

Даҳҳо ҳазор нафар дар Аврупо алайҳи маҳдудиятҳо барои КОВИД-19 эътироз карданд

Яке аз хиёбонҳои Вена, пойтахти Австрия.

Даҳҳо ҳазор нафар дар чанд кишвари аврупоӣ дар пайи ҷорӣ шудани маҳдудиятҳо ба хотири ҷилавгирӣ аз паҳншавии коронавирус эътироз карданд
Беш аз 40 ҳазор нафар дар Вена, пойтахти Австрия ба хиёбонҳо баромаданд. Австрия аз нахустин кишварҳои аврупоӣ буд, ки пас аз афзоиши гирифторони коронавирус 22-уми ноябр карантин эълон кард ва маҳдудиятҳо ҷорӣ намуд. Ин кишвар низ гирифтани ваксинаро барои сокинон ҳатмӣ кард ва қарор аст, ки ин амр аз моҳи феврал амалӣ шавад.

Даҳҳо ҳазор нафар дар чанд шаҳри Олмон низ аз маҳдудиятҳои ҷоришуда эътироз карданд. Олмон барои афроде, ки ваксина нагирифтаанд, маҳдудияти сахт ҷорӣ кардааст. Онҳо бе супурдани тест иҷозаи ба маконҳои ҷамъиятӣ ворид шуданро надоранд.

Сирояти коронавирус, ки аз моҳи январи соли 2020 дар ҷаҳон паҳн шуд, ҳанӯз коҳиш наёфтааст.

Боздошти беш аз 100 кас барои сӯзондани ҷасади марде дар Покистон

Покистон

Мақомоти Покистон дар пайванд ба латукӯб ва сӯзондани ҷасади як корманди корхонаи дӯзандагӣ дар он кишвар беш аз сад касро дастгир кардаанд. Ҷамъияти хашмгин рӯзи 3-юми декабр Приянта Кумараро бо гуноҳи "куфр" куштанд.

Сиёсатмадорону низомиён, чеҳраҳои динӣ ва намояндагони ҷомеаи шаҳрвандии Покистон ҳодисаро маҳкум карданд. Имрон Хон, сарвазири Покистон, онро дар Твиттер "ҳамлаи даҳшатноки мутаассибон" ва "як рӯзи шармовар барои Покистон" номид. Ӯ ваъда дод, ки гунаҳкорон ҷазо хоҳанд гирифт.

Масъалаи "куфр" ё "тавҳин ба муқаддасоти дини ислом" дар ин кишвари аксарияташ мусалмон мавзӯи ҳассос аст ва ҳатто иддаои исботнашуда дар ин робита метавонад, хушунат ва эътирозҳои бузургро ба вуҷуд орад.

Ҳасан Ҳавар, сухангӯи ҳукумати вилояти Панҷоб, рӯзи 4-уми декабр гуфт, дар амалиёт дар Сиалкот, ноҳияе дар 200-километрии Исломобод, 118 гумонбар боздошт шудаанд.

Ба гуфтаи пулис, коргарони як корхонаи дӯзандагӣ Приянта Кумара, мудири содиротро дастгир карда, ӯро бо шиканҷа ба қатл расонданд ва ҷасадро дар пеши чашми мардум сӯзонданд.

Як сокини маҳаллӣ ба Радиои Озодӣ гуфт, коргарони корхона иддао кардаанд, ки дар партовгоҳи кории Приятна Кумара саҳифаҳои Қуръонро ёфтаанд. Ӯ ҳамчун пайрави масеҳият муаррифӣ шудааст.

Русия хабарнигорони Озодиро "агенти хориҷӣ" номид, Флай маҳкум кард

Вазорати адлияи Русия 3-юми декабр чаҳор хабарнигори ҳозира ва пешини Радиои Озодиро "агентҳои хориҷӣ" номид. Мақомоти Русия ин истилоҳро нисбати созмонҳо ва шахсоне истифода мекунанд, ки ба бовари онҳо аз хориҷ маблағгузорӣ шуда, ба фаъолияти сиёсӣ машғуланд.

Вазорат гуфт, хабарнигорони бахши тоторӣ-бошқирдии Радиои Озодӣ ва тарҳи "Идел.Реалити" Алина Григорева, Андрей Григорев, Регина Ҳисамова ва ҳамкори пешинаи онҳо Регина Гималова ба рӯйхати "агентҳои хориҷӣ"-и Русия дохил карда шуданд. "Идел.Реалити" як тарҳи Радиои Озодӣ аст.

Қонуни баҳсбарангези "агенти хориҷӣ" дар Русия соли 2012 қабул шуда, бештар ба зидди мунтақидон ва расонаҳои озод истифода мешавад. Ин қонун аз созмонҳое, ки аз хориҷа ёрӣ мегиранд ва, ба бовари мақомот, ба фаъолияти сиёсӣ машғуланд, бояд худро ҳамчун “агентҳои хориҷӣ” номнавис кунанд.

Ҷейми Флай, президенти Радиои Озодӣ, ин иқдоми мақомоти Русияро маҳкум кард. Ӯ гуфт, бахши тоторӣ-бошқирдии Радиои Озодӣ ба гузориш додан ба мухотабони худ дар дохили Русия идома хоҳад дод ва рисолаташро "беш аз ҳарвақта муҳим" номид.

HRW аз Озарбойҷон хост, латукӯби "ваҳшатнок"-и мухолифинро санҷад

Тазоҳурот. Боку, 1-уми декабри 2021

Созмони Дидбони Ҳуқуқи Башар (Human Rights Watch) аз Озарбойҷон хостааст, қазияи бо хушунат пароканда кардани тазоҳуроти осоишта дар Боку ва латукӯби "ваҳшатнок"-и як сиёсатмадор ва овозхони мухолифи давлатро "беғаразона ва ҳамаҷониба" таҳқиқ кунад.

Иштирокдорони гирдиҳамоии 1-уми декабр дар пойтахти Озарбойҷон озодии як фаъоли мухолиф Солеҳ Рустамлиро талаб карданд. Ӯ бо гуноҳи “шустушӯи пул” ҳафт сол аз озодӣ маҳрум аст. Дидбони Ҳуқуқи Башар ҳукми Рустамлиро “сохта” номид. Худаш гуруснанишинӣ эълон кардааст.

Георги Гогия, ёвари мудири бахши Аврупо ва Осиёи Марказӣ дар созмони Дидбони Ҳуқуқи Башар, 3-юми декабр дар баёнияе гуфт, "мақомоти Озарбойҷон бори дигар ҳуқуқи мардумро барои баргузории тазоҳуроти осоишта бешармона таҳқир карданд. Онҳо барои пахши мухолифат аз зӯроварӣ истифода намуданд."

Сафорати Амрико дар Боку рӯзи 2-юми декабр дар Твиттер аз хушунат ба зидди тазоҳургарон изҳори нигаронии амиқ кард. Масъулони сафорат гуфтанд, аз "гирдиҳамоии осоишта ва озодии баён, ки дар Қонуни асосии Озарбойҷон зикр шудааст", пуштибонӣ мекунанд.

Дар миёни шахсоне, ки дар тазоҳуроти рӯзи 1-уми декабр дастгир шуданд, узви Ҳизби мухолифи "Мусовот", Тавфиқ Яъқублу, низ ҳаст. Ӯ захмҳои зиёде бардоштааст.

Яъқублуи 60-сола гуфтааст, пулис ҳангоми наворбардорӣ ӯро сахт зад ва хост, дар назди дурбин бигӯяд, ки танқиди раҳбарияти Озарбойҷонро бас мекунад.

"Бархурди ваҳшатнок бо Яъқублу ҳамла ба шахс ва ҳам ба ҳуқуқи гирдиҳамоии осоишта буд," -- гуфт Гогия ва илова кард: "Мақомот бояд тафтишоти беғаразонаро таъмин кунанд ва масъулонро ба ҷавобгарӣ кашанд."

Ҳукумати Озарбойҷон солҳо боз ба поймол кардани ҳуқуқи башар, аз ҷумла шиканҷа ва боздоштҳои худсарона, танқид мешавад.

WHO: Касе аз "Омикрон" нафавтидааст

Намояндагони Созмони Ҷаҳонии Тандурустӣ (WHO) рӯзи 3-юми декабр гуфтанд, ки то кунун дар бораи фавти одамон аз “Омикрон”, навъи ҷадиди коронавирус, гузориш нашудааст.

Ин навъи вирус бори аввал ҳафтаи гузашта дар Африқои Ҷанубӣ кашф шуда, дар чиҳил кишвари дунё паҳн гардидааст.

Далелҳои ибтидоӣ нишон медиҳанд, ки “Омикрон” зуд сироят мекунад, вале нишонаҳои беморӣ нисбат ба навъҳои қаблии коронавирус сабуктар аст. Бо ин вуҷуд, баъзе аз шахсони мубтало ба “Омикрон” дар шифохонаҳо бистарӣ карда шудаанд.

Ин навъи ҷадиди коронавирус дар ҳоле паҳн мешавад, ки шифохонаҳои баъзе аз кишварҳо бар асари “бедодгарӣ”-ҳои “Делта”, навъи қаблии коронавирус, зери фишор қарор доранд.

“Делта” сабаб шуд, ки ҳукуматҳо дар бисёре аз кишварҳо, аз ҷумла Аврупо, муқарраротеро чун истифода аз ниқоби тиббӣ, хонашинӣ ва риояи фосилаи ҷисмонӣ дигарбора ҳатмӣ кунанд. Талошҳои эмкунӣ ҳам афзудааст.

Байден гуфт, барои пешгирӣ аз нақшаи Русия тарҳеро дуруст мекунад

Ҷо Байден ва Владимир Путин. Акс аз моҳи июни 2021

Президенти Амрико гуфт, бар сари тарҳе кор мекунад, ки бино бар он ҳаракати низомии Русия алайҳи ҳамсояаш, Украина, бисёр душвор хоҳад шуд.

Ҷо Байден рӯзи 3-юми декабр ба хабарнигорон гуфт, ин тарҳ “ҳамаҷониба” аст. “Ба ҷаноби Путин бисёр мушкил хоҳад буд, ки ба корҳои худ, ки мардум аз анҷомаш тарс доранд, идома бидиҳад. Аммо ин нақша дар ҳоли таҳия шудан аст," – афзуд ӯ.

Байден дар ҳоле дар ин маврид суҳбат мекунад, ки бино бар хабарҳо Русия дар сарҳад бо Украина беш аз 90 ҳазор сарбоз ва ҳамчунон танкҳову силоҳҳои вазнинро ҷобаҷо кардааст. Киев аз ҳуҷуми эҳтимолии Маскав нигарон аст.

Раиси ҷумҳури Амрико гуфт, дар пайванд ба ин вазъият бо Украина ва муттафиқони аврупоияш мунтазам дар тамос аст. Юрий Ушаков, мушовири Кремлин, гуфтааст, Владимир Путин ва Ҷо Байден рӯзҳои наздик суҳбати онлайнӣ хоҳанд кард.

Пешниҳод шудааст, ки шумораи ҳарбиёнро дар марзи Тоҷикистону Қирғизистон кам кунанд

Мулоқоти намояндагони Тоҷикистону Қирғизистон дар гузаргоҳи "Кулунду". 3-юми декабри 2021

Бино ба хабари бахши қирғизии Радиои Озодӣ, мақомоти Тоҷикистон рӯзи 3-юми декабр дар мулоқот бо намояндагони Қирғизистон пешниҳод кардаанд, ки шумораи ҳарбиён дар сарҳади ду кишвар кам карда шавад.

Ҷониби Тоҷикистон ба таври расмӣ дар ин бора хабар надодааст.

Ба қавли муовини ваколатдори президенти Қирғизистон дар вилояти Бодканд, Маъруфхон Туллаев, ҷониби Тоҷикистон пешниҳод кардааст, тартибот дар минтақаҳои наздимарзӣ “тавассути нерӯҳои пулис таъмин карда шавад”.

“Ҳамчунин пешниҳод шуд, ки корҳои сохтмонӣ дар наздикии сарҳад танҳо бо розигии тарафҳо анҷом дода шавад,” – афзудааст ӯ.

Мулоқоти Раҷаббой Аҳмадзода, раиси вилояти Суғд ва Абдикарим Алимбоев, раиси вилояти Бодканд, рӯзи 3-юми декабр дар чорроҳаи Зарафшон, дар наздикии деҳаи Сомониён, макони баҳсӣ баргузор шудааст.

Рӯзи якуми декабр сокинони деҳаи Сомониёни ҷамоати Чоркӯҳи Исфара дар бораи рабуда ва латукӯб шудани як омӯзгори 59-сола дар марз бо Қирғизистон хабар доданд. Раиси деҳаи Куктоши ноҳияи Бодканди Қирғизистон баръакс иддао кард, ки шаҳрвандони Тоҷикистон як сокини ин деҳаро ҳангоми ҷустуҷӯи чорво задаанд.

Хадамоти марзбонии Қирғизистон шаби 1-уми декабр аз тирпарронӣ дар сарҳад хабар дод. Мақомоти Тоҷикистон ҳанӯз дар мавриди ҳарду ҳодиса ва ҷузъиёти музокирот шарҳе надодаанд.

Марзи Тоҷикистону Қирғизистон солҳо боз ба далели номуайян будани бахше аз сарҳад доғ ва мояи ҷанҷолу задухӯрдҳост. Низои мусаллаҳонаи моҳи апрели имсол, ки аз ду ҷониб даҳҳо кушта ва захмӣ бар ҷой гузошт, робитаи ду кишвари болооби Осиёи Марказиро сарду печида кард. Ҳарду тараф ҳамвора якдигарро ба сар задани муноқиша ва кӯшиши ноором кардани вазъ гунаҳкор мекунанд.

Матбуоти Туркия: Як зани тоҷик ҳангоми офати табиӣ дар Истанбул ҷон бохтааст

Боди сахт дар Истанбул. 29-уми ноябри 2021

Расонаҳои Туркия гузориш доданд, ки як зан аз Тоҷикистон ҳангоми бодҳои сахти охири моҳи ноябр дар шаҳри Истанбул ҷони худро аз даст додааст.

Нашрияи “Ҳуррият” аз ӯ Малоҳат Раҳимоваи 31-сола ном бурд, вале маълумоти дигаре надод. Чанде аз корбарони тоҷики шабакаҳои иҷтимоӣ бо нашри акси зан аз пайвандонаш хостаанд, ҷасади ӯро бигиранд.

“Ҳуррият” мегӯяд, Раҳимова дар зери боми кандашудае дар маҳаллаи Эсенюрти Истанбул монда, ба бемористон бурда шуд, аммо наҷот наёфт. Лаҳзаи ба фалокат дучор шудани ӯро дурбинҳои назоратӣ сабт кардаанд. Ҳодиса дар маҳаллаи Қироч, кӯчаи Истиқлол, рӯй додааст.

Расонаҳои туркӣ менависанд, он ҳангом Малоҳат Раҳимова аз роҳ мегузашт ва зери боми сарозершуда монд.

Бодҳои сахт рӯзи 29-уми ноябри имсол дар шаҳри Истанбул ва атрофи он боис ба марг ва захмӣ шудани чанд кас гардид.

Мақомоти Истанбул гуфта буданд, суръати бод дар шаҳри соҳилӣ то 130 километр дар соат мерасид. Дар наворҳое, ки тавассути телевизиону шабакаҳои иҷтимоӣ паҳн шуданд, саҳнаҳои афтодани бурҷи баландошёнае дар соҳилҳои Истанбул ва канда шудани боми биноҳо дида мешавад.

Дар Узбекистон ҷазоро барои фасодкорӣ сахттар мекунанд

Оҷонси мубориза бо коррупсияи Узбекистон тарҳи қонунеро ба палатаи қонунгузори ин кишвар пешниҳод кардааст, ки сахттар кардани ҷазоро барои фасодкорӣ пешбинӣ мекунад.

Раиси оҷонс Акмал Бурҳонов 2-юми декабр дар ин бора хабар дода, гуфт, дар лоиҳаи қонун мафҳуми "ҷинояти коррупсионӣ" муайян карда шудааст. Ба гуфтаи ӯ, ба он 15 навъи ҷинояткорӣ шомил мешавад.

Дар лоиҳаи қонун пешниҳод шудааст, ки гумонбар барои дуздӣ тавассути азхудкунӣ ё исрофкорӣ ва қаллобӣ бо суистифода аз мақом ба муҳлати то 10 сол аз озодӣ маҳрум карда шавад. Қонуни амалкунанда барои ин навъи ҷиноятҳо то 5 соли зиндонро пешбинӣ кардааст.

Ҳамчунин барои гирифтан ё додани ришва, миёнаравӣ дар ришвахорӣ то 20 соли зиндон пешбинӣ гаштааст.

Тибқи лоиҳаи қонун, шахсоне, ки бо ҷиноятҳои марбут ба ришвахорӣ зиндонӣ шудаанд, пеш аз муҳлат шартан озод намешаванд ва ҷазои онҳо низ сабуктар карда нахоҳад шуд.

Президенти Қирғизистон латукӯби Текебоевро кори авбошон донист

Омурбек Текебоев ва Содир Ҷабборов (Жапаров)

Президенти Қирғизистон, Содир Ҷабборов (Жапаров) дар суҳбат бо расонаи "Aryba.kg" ҳамла ба раҳбари Ҳизби мухолифи "Ота-Макон"-и ин кишвар Омурбек Текебоевро баъди напазируфтани натиҷаҳои интихоботи порлумонӣ шарҳ додааст.

Ҷабборов дар посух ба суоли он ки оё дастури латукӯби сиёсатмадори мухолифро мақомот додаанд, изҳор доштааст, ки "вақте роҷеъ ба фаъолияти Кумисюни марказии интихобот ва раъйпурсӣ сарусадоҳои зиёд аст, барои худ эҷод кардани мушкили иловагӣ маъное надорад".

"Шахсе, ки Текебоевро латукӯб карда, телефонашро дуздидааст, маълум шуд, як ғоратгари одӣ мебошад. Як касро дастгир карданд ва телефони Текебоевро баргардондааст. Гумонбар баёнот медиҳад, ки аз тазоҳуроти Текебоев "хаста шудааст". Дар аввал мо фикр кардем, ин корро худи Текебоев ташкил кардааст. Худи ӯ иддао дошт, ки кори мақомот аст. Аммо ду ҷониб бегуноҳ буданд ва он кори дасти авбошон будааст", - афзудааст Ҷабборов.

Омурбек Текебоев гуфт, ҳамла рӯзи 1-уми декабр дар тарабхонаи "Парк Отел"-и Бишкек сурат гирифт. Ба гуфтаи ӯ, тақрибан 70 марди ниқобпӯш ба онҷо рафта, се нафарашон ӯро задаанд. Текебоев бовар дорад, ки ҳамла ба фаъолиятҳои сиёсии ӯ рабт мегирад.

Пулиси шаҳри Бишкек шоми 1-уми декабр хабар дод, ки мардеро бо гумони ҳамла ба Омурбек Текебоев, раҳбари Ҳизби мухолифи "Ота Макон"-и Қирғизистон боздошт кардааст.

Ба огаҳии пулис, гумонбар сокини 23-солаи вилояти Чӯйи Қирғизистон мебошад. Ӯ телефони мобилиеро, ки аз Текебоев дуздида буд, ихтиёрӣ баргардонида, дар ҳоли ҳозир дар боздоштгоҳ қарор дорад.

Резников Русияро ба омодагӣ барои ҳамлаи эҳтимолӣ ба Украина муттаҳам кард

Алексей Резников

Алексей Резников, вазири мудофиаи Украина, мақомоти Русияро муттаҳам кард, ки бо ҷо ба ҷо кардани беш аз 94 ҳазор сарбоз дар наздикии марзи ин кишвар ба амалиёти низомии густардаи эҳтимолӣ омода мешаванд.

Ӯ рӯзи 3-юми декабр дар порлумони Украина гуфт, Киев ба танишҳо дар минтақа доман нахоҳад зад, аммо агар лозим бошад, мубориза хоҳад кард.

Резников афзуд, истихбороти Украина сенарияҳои эҳтимолиро баррасӣ мекунад ва ҳамзамон гуфт, Киев алоқаманди ҳалли сиёсӣ ва дипломатии масъалаҳост.

Гузоришҳо дар мавриди тақвияти ҳузури низомии Русия дар марзи Украина дар ҳафтаҳои охир сабаб шудааст, то Иёлоти Муттаҳида ва чанд муттафиқаш дар НАТО ба пуштибонии худ аз истиқлолу тамомияти арзии Украина таъкид кунанд.

Маскав гуфтааст, қасди иқдоми низомие алайҳи Украина надорад. Ҳукумати Русия соли 2014 нимҷазираи Қрими Украинаро ишғол карда, ба бахше аз қаламрави худ табдил додааст.

Чоршанбе Чоршанбиев ба ҷавобгарӣ кашида шуд

Хабаргузориҳои русӣ гуфтанд, дар Маскав Чоршанбе Чоршанбиев - як блогер ва размкори якҳарбаи бидуни қоида ваё ММА боздошт шуд. Ӯро барои ҳаракати босуръат ва бидуни риояи қонун дар нақби Лефортовои шаҳри Маскав ба ҷавобгарии маъмурӣ ҷалб кардаанд. Дафтари матбуоти раёсати корҳои дохилии шаҳри Маскав мегӯяд, Чоршанбиев дар бозпурсӣ эътироф кардааст, ки гоҳо сари чанбари мошин нишаста қоидаҳоро вайрон мекард. Ба гуфтаи ӯ, эҳтимолан сабти навори ҳаракати босуръати ӯ аз нақби Лефортоворо яке аз бародаронаш дар интернет ҷой додааст ва ин ҳодиса тобистон сабт шудааст. Ӯ гуфтааст, ки сари чанбари мошин сабт намекард ва шахсан худаш ҳеҷ навоерро ба интернет ҷой надода буд. Полис мошини "Тойота Камри"-и Чоршанбиевро дар як таваққуфгоҳи ҷаримавӣ ҷой дода, худи ӯро ба ҷавобгарии маъмурӣ кашид. Чоршанбиев 26 сол дошта, дар Маскав бо муҳорибаҳои бидуни қоида машғул аст.

Ёфтҳои бештар

XS
SM
MD
LG