Пайвандҳои дастрасӣ

Хабари нав

Мунтахаби Тоҷикистон барои бозии дӯстона бо Малайзия ба Куала-Лумпур расид


Дастаи мунтахаби футболи Тоҷикистон бо раҳбарии сармураббӣ Усмон Тошев шаби чоршанбеи 6-уми ноябр барои баргузор кардани бозии дӯстона бо мунтахаби Малайзия бо ҳавопаймо тавассути Дубай ба Куала-Лумпур расид.

Ба иттилои Федератсияи футболи Тоҷикистон, бозии дӯстона миёни тимҳои миллии Малайзия ва Тоҷикистон дар доираи омодагии футболбозони тоҷик ба бозиҳои марҳилаи интихобии қаҳрамонии ҷаҳон-2022 рӯзи шанбеи 9-уми ноябр дар Варзишгоҳи миллии Букит Ҷалили Куала-Лумпур соати 17:45 бо вақти Душанбе шуруъ мешавад.

Ба ҳайати дастаи мунтахаби Тоҷикистон 23 бозигар дохил аст, ки 7 нафарашон легионер мебошанд. Баъди танаффуси тӯлонӣ ба ҳайати тими миллии кишвар ҳимоятгари «Нефтехимик»-и Нижнекамски Русия Фарҳод Восиев ва нимҳимоятгари «Бухоро»-и Узбекистон Фатҳулло Фатҳуллоев даъват шуданд.

Ба ғайр аз онҳо, ба ҳайати дастаи мунтахаби Тоҷикистон боз панҷ легионер - ҳимоятгар Хуршед Бекназаров («ПС ТИРА», Индонезия), нимҳимоятгарон Парвизҷон Умарбоев («Локомотив», Пловдив, Булғористон), Нуриддин Давронов («Умон», Умон) ва Амирбек Ҷӯрабоев («Навбаҳор», Узбекистон), инчунин ҳамлагар Ҷаҳонгир Эргашев («Саиф Спортинг Клуб», Бангладеш) - дохиланд.

Давронов ва Эргашев имрӯз, 7-уми ноябр, ба дастаи мунтахаб мепайванданд. Се легионери дигар - Бекназаров, Восиев ва Умарбоев - ба даста 11-уми ноябр ҳамроҳ мешаванд, бинобар ин, дар бозии дӯстона бо Малайзия иштирок намекунанд.

Ҳайати дастаи мунтахаби миллии Тоҷикистон дар бозиҳо бо тимҳои миллии Малайзия, Мянмар ва Қирғизистон:

Дарвозабонҳо: Рустам Ятимов («Истиқлол»), Шоҳрух Қирғизбоев («Локомотив-Помир»), Фатҳулло Бобоев («Регар-ТадАЗ»);

Ҳимоятгарон: Хуршед Бекназаров («ПС ТИРА», Индонезия), Фарҳод Восиев («Нефтехимик», Русия), Аҳтам Назаров, Искандар Ҷалилов, Табрези Давлатмир (ҳарсе аз «Истиқлол»), Давронҷон Эргашев, Манучеҳр Сафаров (ҳарду аз «Хуҷанд»);

Нимҳимоятгарон: Парвизҷон Умарбоев («Локомотив», Пловдив, Булғористон), Нуриддин Давронов («Умон», Умон), Амирбек Ҷӯрабоев («Навбаҳор», Узбекистон), Фатҳулло Фатҳуллоев («Бухоро», Узбекистон), Алишер Ҷалилов, Эҳсони Панҷшанбе, Муҳаммадҷон Раҳимов, Комрон Турсунов (ҳама аз «Истиқлол»), Кароматулло Саидов («Кӯктош»);

Ҳамлагарон: Ҷаҳонгир Эргашев («Саиф Спортинг Клуб», Бангладеш), Шериддин Бобоев, Шаҳром Самиев (ҳарду аз «Истиқлол»), Манучеҳр Ҷалилов (бе бошгоҳ).

Сармураббӣ – Усмон Тошев.

Баъди бозии дӯстона бо Малайзия мунтахаби Тоҷикистон аз Куала-Лумпур ба Мандалай сафар менамояд. Бозии даври панҷуми марҳилаи интихобии қаҳрамонии ҷаҳон-2022 дар гурӯҳи "F" миёни тимҳои миллии Мянмар ва Тоҷикистон 14-уми ноябр дар Мандалай, дар варзишгоҳи «Mandalar Thiri Stadium», соати 15:30 бо вақти Душанбе оғоз меёбад.

Баъдан мунтахаби Тоҷикистон барои бозии даври шашуми марҳилаи интихобии қаҳрамонии ҷаҳон-2022 дар гурӯҳи "F" бо мунтахаби Қирғизистон озими Бишкек мешавад. Ин бозӣ 19-уми ноябр дар варзишгоҳи ба номи Долен Омурзоқов соати 19:00 бо вақти Душанбе шуруъ мешавад.

Ёдовар мешавем, мунтахаби Тоҷикистон дар ду бозии марҳилаи интихобии қаҳрамонии ҷаҳон-2022 дар гурӯҳи "F" бар дастаҳои Қирғизистон ва Муғулистон бо ҳисоби якхелаи 1:0 пирӯз шуда, аз мунтахаби Ҷопон бо ҳисоби 0:3 мағлуб гаштааст.

Мунтахаби Ҷопон ба ҷуз аз дастаи Тоҷикистон, дар ду бозии дигар тими Мянмарро бо ҳисоби 2:0 ва мунтахаби Муғулистонро бо ҳисоби 6:0 шикаст додааст.

Ба ин тартиб, мунтахаби Ҷопон, ки бо 9 имтиёз дар ҷадвали гурӯҳи “F” мақоми аввалро касб намудааст, довталаби асосӣ барои дарёфти роҳхат ба марҳилаи севуми мусобиқот мебошад.

Дастаҳои Қирғизистон ва Тоҷикистон шашимтиёзӣ гирифтаанд. Бо дарназардошти таносуби беҳтари тӯбҳо мунтахаби Қирғизистон дар ҷойи дувум ва мунтахаби Тоҷикистон дар ҷойи севум қарор доранд.

Мунтахаби Муғулистон бо се имтиёз дар ҷойи чаҳорум аст. Мунтахаби Мянмар бидуни имтиёз дар зинаи охирин – панҷум – ҷойгир шудааст.

Дар марҳилаи дувуми интихобии қаҳрамонии ҷаҳон-2022 ҳамагӣ 40 даста ширкат дорад. Ҳашт ғолиби гурӯҳ ва чаҳор дастаи нишондодҳояш хубтари ҷойҳои дувум ба марҳилаи севуми интихобии қаҳрамонии ҷаҳон-2022 роҳ пайдо мекунанд, инчунин соҳиби роҳхатҳо ба Ҷоми Осиё-2023 мешаванд.

Бозии дӯстона

9-уми ноябр (шанбе)

Оғози бозӣсоати 17:45 бо вақти Душанбе

Малайзия – Тоҷикистон

Куала-Лумпур, Варзишгоҳи миллии Букит Ҷалил

Қаҳрамонии ҷаҳон-2022. Мусобиқаи интихобӣ

Марҳилаи дувум. Гурӯҳи «F»

Даври 5-ум

14-уми ноябр (панҷшанбе)

Оғози бозӣ соати 15:30 бо вақти Душанбе

Мянмар – Тоҷикистон

Мандалай, варзишгоҳи «Mandalar Thiri Stadium»

Даври 6-ум

19-уми ноябр (сешанбе)

Оғози бозӣ – соати 19:00 бо вақти Душанбе

Қирғизистон Тоҷикистон

Бишкек, варзишгоҳи ба номи Долен Омурзоқов

Шарҳҳоро бинед

Назари хонандагон

Шарҳи нав расид
Идома
XS
SM
MD
LG