Парвандаи хабарнигори бахши қирғизии Радиои Озодӣ Идрис Исоқов, ки пештар қатъ гашта буд, дубора боз карда шудааст. Дар ин бора Раёсати пулиси Ӯш хабар дод.
Ба иттилои пулис, сокини Ӯш 30 сентябр дубора ба пулис муроҷиат карда, гуфтааст, ки хабарнигор аз ӯ маблағи калон талаб дорад ва ду шоҳид низ бо худ бурдааст. Исоқов гӯиё таҳдид кардааст, ки агар 5 ҳазор доллар ё мошини "Лексус"-ашро надиҳад, зиддаш мавод нашр мешавад.
Ин сокини Ӯш 4 апрели соли равон низ айнан бо ҳамин даъво ба пулис шикоят бурда буд, вале дертар парванда ба хотири набудани далел қатъ карда шуд. Худи хабарнигор даъвои сокини Ӯшро туҳмат меномад. Ӯ 1 октябр дар саҳифаи фейсбукиаш навишт, "ин одам фаромуш кардааст, ки полковники милитсия аст ва барои соҳибкор Жалил Отамбоев кор мекунад". "Агар раҳбараш гӯяд, ки сабаберо пайдо карда, шикоят кун, чи гуна ӯ метавонад рад намояд? Бинобар ин, одамеро, ки мегӯяд, Идрис пул талаб кард, сарзаниш накунед. Танҳо вайро дарк кунед", - навишт ӯ.
Бахши қирғизии Радиои Озодӣ 17 апрел матлаберо зери унвони "Ош: салыктан буйтаган ишкерлер" нашр кард. Дар матлаб сухан аз ҳолатҳои "гурез"-и соҳибкор Жалил Отамбоев аз пардохти андоз меравад. Видеои таҳқиқотро дар Youtube дар 2 ҳафта 378 ҳазор кас тамошо кард.
Хадамоти давлатии мубориза бо ҷиноятҳои иқтисодии Қирғизистон 22 апрел хабар дод, ки дар робита ба ҳолатҳои дар таҳқиқот зикршуда парвандаи ҷиноӣ боз ва тафтишот оғоз шудааст.
Сипас Жалил Отамбоев, ки яке аз сарватмандтарин сокинони вилояти Ӯши Қирғизистон шумурда мешавад, зидди хабарнигор шикоят бурда, ҷубронпулӣ талаб кард. Вале дертар аз даъвояш даст кашид.
