Пайвандҳои дастрасӣ

Хабари нав

Кӯдакон -- қурбониёни ҷангҳо дар Сурия, Яман ва Афғонистон


Гузориши нави Созмони Милали Муттаҳид нишон медиҳад, ки соли гузашта беш аз 12 ҳазор кӯдак дар ҷараёни ҷангҳо ва кашмакашҳои мусаллаҳона дар ҷаҳон кушта ва захмӣ шудаанд, ки ба маънои сабти рекорди нав аз талафоти кӯдакон аст. Афғонистон, Сурия, Яман ва Фаластин дар садри ин гузориш қарор доранд.

Тибқи ин гузориш, бадтарин ҷой барои кӯдакон Афғонистон будааст. Ин кишвар бо 3062 мавриди сабтшуда аз кушта ва захмиҳо, дар садри гузориши "Кӯдакон дар набардҳои мусаллаҳона"-и СММ, қарор дорад. Кӯдакон наздик ба 30 дарсади кулли талафоти ғайринизомӣ дар он кишварро ташкил медиҳанд.

Дар Сурия ҳамлаҳои ҳавоӣ, таркиши мина, бомбаборони мардум бо бомбаҳои хӯшаӣ, ба кушта ва захмӣ шудани 1854 кӯдак анҷомидааст. Ҳукумати Сурия ва ҳомии аслии он дар ҳамлаҳои ҳавоӣ -- Русия, ҳамлаҳои ҳавоӣ ба ғайринизомиёнро рад кардаанд.

Бо ин вуҷуд, ҳатто пеш аз гузориши Созмони Милали Муттаҳид низ Сандуқи Кӯдакони СММ ё ЮНИСЕФ гуфта буд, шумораи кӯдакони кушташуда дар ҷангҳои Сурия беш аз соли гузашта аст ва теъдоди ҳамлаҳо ба мактабҳо ва бемористонҳо афзоиш ёфтааст.

Дар Яман ҳадди ақал 1689 кӯдак дар ҷараёни ҷангҳои заминӣ ва ҳамлаҳои эътилоф бо раҳбарии Арабистони Саудӣ кушта ва захмӣ шудаанд. Эътилоф ба раҳбарии Арабистони Саудӣ бо интиқоди шадиде дар ин замина рӯбарӯ аст.

Мудири СММ дар Созмони Дидбони ҳуқуқи башар ба хабаргузории "Ассошиэйтед пресс" гуфтааст, "эътилофи Саудӣ аз соли 2015 ба ин сӯ хушунатҳои ваҳшатноке алайҳи кӯдакон дар Яман анҷом додааст.

Аммо сафири Арабистони Саудӣ дар Созмони Милали Муттаҳид ба хабаргузории "Рейтерз" гуфтааст, гузориши ахир ба талошҳои эътилоф барои ҳифзи кӯдакон дар ҷанги Яман ишора кардааст ва аз назари Риёз "ҷони ҳар кӯдаке гаронбаҳо аст". Сафири Арабистони Саудӣ айни ҳол манбаъҳоеро, ки ин гузоришро омода кардаанд, зери суол бурда ва мегӯяд, дар пешниҳоди омор ба зиёдравӣ роҳ дода шудааст.

Хабаргузории "Рейтерз" гузориш дода буд, ки номи гурӯҳи Ҳусӣ, ки аз сӯи Эрон ҳимоят мешавад, дар паҳлӯи гурӯҳҳои ниманизомии тарафдори Арабистони Саудӣ низ дар ин феҳрист қарор дорад.

Бинобар гузориши "Кӯдакон дар набардҳои мусаллаҳона", дар соли 2018 панҷоҳу нӯҳ кӯдаки фаластинӣ аз сӯи Исроил кушта ва беш аз 2750 кӯдаки дигар захмӣ шудаанд. Дар ҳамин марҳила, шаш кӯдаки исроилӣ низ захмӣ шудаанд.

Антонио Гутерриш, дабири кулли СММ аз афзоиши ҷароҳатҳо аз истифодаи гази ашковар дар ҷараёни кашмакашҳо, ибрози нигаронии амиқ кардааст. Илова бар ин, СММ дар мавриди афзоиши ҳамла ба мактабҳо ва бемористон иброзӣ нигаронӣ намудааст.

Соли гузашта дастикам 225 ҳамла ба мактабҳо ва марказҳои имдодӣ сабт шудааст, ки баландтарин омор аз оғози ҷанги дохилии Сурия аст. Дар Афғонистон низ мактабҳо ва марказҳои кӯмакрасонӣ беш аз 250 бор ҳадафи ҳамла қарор гирифтаанд.

Гузориши Созмони Милали Муттаҳид "Кӯдакон дар набардҳои мусаллаҳона", аз соли 2005 ба ин сӯ, ва ба дархости Шӯрои Амнияти Созмони Милали Муттаҳид, таҳия ва ба ин Шӯро пешниҳод мешавад. Омори соли гузашта бадтарин омор аз замони ироаи ин гузориш то кунун аст.

Шарҳҳоро бинед

XS
SM
MD
LG