Муборизаи муштзанҳои тоҷик барои Ҷоми президенти Қазоқистон

Июл 17, 2019

Нарзуллоҳи Латиф

Варзишгарони тоҷик дар мусобиқаи VII байналмилалӣ оид ба бокс барои Ҷоми президенти Қазоқистон, ки 16-уми июл дар шаҳри Нурсултон шуруъ шуд, ширкат доранд.

Ба иттилои сомонаи inbusiness.kz дар Ҷоми президенти Қазоқистон ҳамагӣ 155 муштзан (122 мард ва 33 зан) аз Алҷазоир, Булғористон, Гурҷистон, Қазоқистон, Қирғизистон, Муғулистон, Русия, Сурия, Тоҷикистон, Узбекистон, Филиппин, Ҳиндустон ва Чин номнавис шудаанд.

Ба ҳайати дастаи мунтахаби Тоҷикистон 7 муштзан дохил аст:
Бахтовар Сагизов (57 кг), Баҳодур Усмонов (63 кг), Бахтиёр Мирзомуҳаммад (75 кг), Шаббос Неъматуллоев (81 кг), Сиёвуш Зуҳуров (+91 кг) миёни мардон, Миҷгона Самадова (57 кг) ва Шоира Зулқайнарова (60 кг) миёни занон.

Дар рӯзи аввали мусобиқа – 16-уми июл - ду варзишгари тоҷик пирӯзӣ ба даст оварданд. Бахтовар Сагизов бар Аррат Байан аз Булғористон бо ҳисоби 3:2 дастболо гардид. Қаҳрамони Осиё Баҳодур Усмонов ба иллати аз сабқат даст кашидани рақибаш Шалва Питсхелаури аз Гурҷистон бидуни рақобат ғолиб дониста шуд.

Давр даври дувуми мусобиқа имрӯз, 17-уми июл, Бахтовар Сагизов бо Миразизбек Мирзоҷалилов (Узбекистон) ва Баҳодур Усмонов бо Дилмурод Маҷидов (Қазоқистон) рақобат мекунанд.

Имрӯз инчунин боз панҷ муштзани тоҷик вориди рақобатҳо мешаванд. Дар сабқати мардон Бахтиёр Мирзомуҳаммад бо Юнус Немоучӣ (Алҷазоир), Шаббос Неъматуллоев бо Ерлик Алжанов (Қазоқистон) ва Сиёвуш Зуҳуров бо Нурболат Сермаҳанов (Қазоқистон) қувваозмоӣ мекунанд.

Дар сабқати занон Миҷгона Самадова бо Сония Султонқизӣ (Қазоқистон) ва Шоира Зулқайнарова бо Ронг Жанг (Чин) рӯбарӯ мешаванд.

Мусобиқа аз рӯи ҳашт вазн миёни мардҳо ва панҷ вазн миёни занон то рӯзи 20-уми июл идома хоҳад кард. Ғолибон дар ҳар як вазн бо ҷоизапулӣ ба маблағи 2000 доллари ИМА сарфароз мегарданд. Барои ҷойи дуюм 1000 доллар ва барои ҷойҳои сеюм 500-долларӣ супурда мешавад.