Додгоҳи Қазоқистон ба хабарнигори телевизиони Настояшее Время амр дод, кишварро тарк кунад ва ӯро 5 сол аз ҳаққи баргашт ба кишвар маҳрум кард. Додгоҳ рӯзи 5-уми июл гуфт, ки Жазгул Эгамбердиева хабарнигори қирғиз муқаррароти иқомат дар Қазоқистонро риоят накардааст ва 10 рӯз фурсат дорад, кишварро тарк кунад.
Мақомоти Қазоқистон мегӯянд, ки ӯ ба идораи пулис гузориш надодааст, ки бештар аз 30 рӯз мемонад. Телевизиони Настояшее Время гуфт, ки сабабҳои амри додгоҳро таҳқиқ мекунад. Жазгул Эгамбердиева аз рӯзи 3-уми май барои инъикоси интихоботи президентӣ ба Қазоқистон рафт. Интихобот рӯзи 9-уми июн баргузор шуд ва дар он Қосимҷомарт Тоқаев вориси Нурсултон Назарбоев, раиси ҷумҳури пешин пирӯз шуд. Нозирони байналмилалӣ гуфтанд, ки интихобот бо қонуншиканиҳои зиёд олуда буд.
