Пайвандҳои дастрасӣ

Хабари нав

Ду медали варзишгарони тоҷик дар қаҳрамонии Осиё дар Малайзия


Акс аз бойгонӣ.
Акс аз бойгонӣ.

Варзишгарони тоҷик дар мусобиқоти 18-уми қаҳрамонии Осиё оид ба каратэ (WKF) миёни наврасону навҷавонон ва ҷавонони то 21-сола, ки рӯзҳои 26-28-уми апрел дар шаҳри Кота-Кинабалуи Малайзия баргузор шуд, ду медали биринҷӣ ба даст оварданд.

Дар ин мусобиқоти қитъавӣ ҳудуди 500 варзишгар аз 33 кишвари Осиё ширкат дошт. Ба ҳайати дастаи Тоҷикистон 6 варзишгар дохил буд: Нодирбек Қулматов, Асадбек Фаттоев, Умед Сафаров (миёни ҷавонони то 17-сола), Муҳаммад Тешаев, Ҳоҷиқурбон Маҳмадов, Абдулваҳҳоб Шаропов (миёни ҷавонони то -21-сола).

Аз байни онҳо ду нафар медал гирифтанд. Асадбек Фаттоев дар вазни зери 68 кило ва Умед Сафаров дар вазни зери 76 кило миёни навҷавонони то 17-сола бо медалҳои бирнҷӣ мукофотонида шуданд.

Инчунин Нодирбек Қулматов дар вазни зери 61кило миёни 17-солаҳо ҷойи 7-умро азони худ кард. Муҳаммад Тешаев дар байни ҷавонони то 21-сола натиҷаи беҳтар нишон дода, дар вазни зери 55 кило ҷойи панҷумро соҳиб шуд.

Ҳамагӣ варзишгарони 23 кишвар бо медалҳои мусобиқоти 18-уми қаҳрамонии Осиё оид ба каратэ (WKF) миёни наврасону навҷавонон ва ҷавонони то 21-сола сарфароз гаштанд. Намояндагони даҳ кишвар медалҳои тилло ба даст оварданд.

Дар ҳисоби умумидастаӣ аз рӯи шумораи медалҳо бо дарназардошти сифати онҳо мунтахаби Ҷопон бо касби 29 медал (16 тилло, 7 нуқра ва 6 биринҷӣ) ҷойи аввалро соҳиб шуд.

Мунтахаби Қазоқистон бо касби 17 медал (4 медали тилло, 8 медали нуқра ва 5 медали биринҷӣ) дар ҷойи дуюм қарор гирифт. Мунтахаби Арабистони Саудӣ бо касби 10 медал (4 медали тилло, 1 медали нуқра ва 5 медали биринҷӣ) ҷойи сеюмро ишғол намуд. Мунтахаби Тоҷикистон бо ду медали биринҷӣ ҷойи 15-умро соҳибӣ кард.

XS
SM
MD
LG