20-уми апрел дар шаҳри Душанбе барои бори даҳум ниммарафони байналмилалӣ доир мегардад, ки дар он дар баробари варзишгарони тоҷик давандаҳои ҳирфаӣ аз 14 кишвар – Австралия, Австрия, Афғонистон, Британияи Кабир, Иёлоти Муттаҳидаи Амрико, Кения, Қазоқистон, Қирғизистон, Нидерланд, Русия, Узбекистон, Украина, Чин ва Эфиопия – ширкат хоҳанд кард.
Ниммарафони байналмилалӣ, ки бо тасмими раиси шаҳри Душанбе сар аз соли 2010 барпо мегардад, баҳри сазовор таҷлил намудани Рӯзи пойтахт, таъмини оммавияти тарбияи ҷисмонӣ ва варзиш, тарзи ҳаёти солим ва устувор намудани робитаҳои ҳамкорӣ бо бародаршаҳрҳо ва шаҳрҳои бо Душанбе ҳамкории судманди иқтисодиву иҷтимоӣ дошта доир мешавад.
Бояд тазаккур дод ниммарафони байналмилалии Душанбе, ки масофаи 21 километру 97 метрро дарбар мегирад, аз соли 2014-ум ба тақвими мусобиқоти байналмилалии дави ҷаҳонӣ шомил шудааст.
Шаҳрдорӣ барои баргузории ниммарафони X байналмилалӣ 387 803 сомонӣ (беш аз 40 ҳазор доллари ИМА) ихтисос додааст. Варзишгароне, ки дар ин ниммарафон миёни мардон ва занон ҷойҳои аз 1-ум то 6-умро мегиранд, бо ҷоизаҳои молӣ ба маблағи аз 13 ҳазору 350 сомонӣ то 31 ҳазору 150 сомонӣ сарфароз мешаванд.
Ғайрат Неъматов, сармураббии дастаи мунтахаби варзиши сабуки Тоҷикистон, ба Радиои Озодӣ гуфт, ки соли гузашта дар ниммарафони IX байналмилалӣ ҳудуди 50 варзишгар аз 18 кишвар ширкат дошт. Дар байни мардон Тефера Гоза аз Эфиопия ва дар миёни занон Даря Маслова аз Қирғизистон ғолиб шуданд.
“Натиҷаи беҳтарини варзишгарони тоҷик дар нӯҳ даври ниммарафони байналмилалӣ танҳо ҷойи чорум мебошад Ҳасан Ғаффоров ду бор (солҳои 2013 ва 2016) байни мардон ва Надима Мирзоева як маротиба (соли 2010 ) миёни занон ҷойи чорумро соҳиб шуда буданд. Умедворем, ки дар пойгаи имсола давандаҳои мо Меҳрубон Шамсиддинов, Меҳроб Одинаев ва Меҳрангез Назарова натиҷаҳои баланд ба даст меоранд”, - иброз дошт Ғайрат Неъматов.
Ғолибони ниммарафони байналмилалӣ (2010-2018):
Занон
2010 – Надежда Поволяева (Русия)
2011 – Алёна Самохвалова (Русия)
2012 – Камила Ханипова (Русия)
2013 – Александра Дулиба (Беларус)
2014 – Ситора Ҳамидова (Узбекистон)
2015 – Юлия Чиженко (Русия)
2016 – Даря Маслова (Қирғизистон)
2017 – Виктория Полюдина (Қирғизистон)
2018 – Даря Маслова (Қирғизистон)
Мардон
2010 – Тоҳир Мамашев (Қазоқистон)
2011 – Михаил Биков (Русия)
2012 – Андрей Петров (Узбекистон)
2013 – Андрей Петров (Узбекистон)
2014 – Роман Романенко (Украина)
2015 – Юрий Чечун (Русия)
2016 – Либога Вилсон (Кения)
2017 – Тилаҳун Гирма (Эфиопия)
2018 – Тефера Гоза (Эфиопия)
