Рӯзи 15-уми март бар асари ҳамлаи террористӣ ба ду масҷид дар шаҳри Крайстчерчи Зеландияи Нав, 49 нафар кушта ва даҳҳо тани дигар захмӣ шудаанд. Тибқи гузоришҳо то ба ҳол 4 нафар -- се мард ва як зан дар ин робита боздошт шудаанд.
Хабаргузории "Франс-пресс" ба нақл аз нахуствазири Австралия навишт, ки яке аз ҳамлаварон ба ин масҷидҳо, як "террористи ифротии ростии зодаи Австралия" будааст. Ҳамлаҳо чанд лаҳза қабл аз намози ҷумъа сурат гирифтааст. Нахуствазири Зеландияи ин рухдодро "ҳамлаи террористӣ" хондааст.
Нахуствазири Зеландияи Нав ин рӯзро яке аз сиёҳтарин рӯзҳо дар таърихи ин кишвар гуфтааст.
Дар наворҳои нашршуда дар шабакаи "Фейсбук", ки аз сӯи яке аз гумонбаршудаҳо нашр шудааст, дида мешавад, ки яке аз ҳамлаварон бо силоҳи автоматикӣ ба масҷид дохил мешавад ва ба сӯи намозгузорон, ки дар интизори адои намози ҷумъа буданд, тирандозӣ мекунад.
Ҳамчунин Дар "Твиттер" видеое мунташир шудааст, ки тибқи гузоришҳо лаҳзаи боздошти яке аз гумонбарони ҳамла ба масоҷидро нишон медиҳад. Индонезия нахустин кишваре аст, ки ин ҳамлаҳоро маҳкум кардааст. Раиси ҷумҳури Туркия Раҷаб Таййиб Эрдуғон ҳам ин ҳамларо ба шиддат накӯҳиш намудааст.
Чанд соат пас аз он, ки расонаҳои Зеландияи Нав гузориш доданд, ки байни 9 то 27 нафар дар ин ҳамлаҳо ҷони худро аз додааст, нахуствазири ин кишвар шумораи қурбониёни ҳодисаро 49 тан гуфт. Дар ҳамин ҳол пулиси Зеландияи Нав аз ҳама масҷидҳо хостааст, то дарҳои худро баста нигаҳ доранд.
Ҳамлаи афроди мусаллаҳ рӯзи 15-уми март дар оғоз ба ба масҷиди "Нур" дар шаҳри Крайстчерчи Зеландияи Нав сурат гирифт. Ин ҳамла замоне рух дод, ки мардум барои баргузории намози ҷумъа дар масҷиди "Нур" ҷамъ омада буданд. Ҳамла чанд дақиқа пеш аз ворид шудани дастаи миллии крикети Бангладеш ба масҷиди "Нур", рух додааст. Гуфта мешавад, ки дар ин ҳамла ҳеҷ яке аз аъзои ин даста осеб надидааст.
Тибқи бархе гузоришҳо, дар як масҷиди дигари атрофи ин шаҳр низ як ҳамлаи дигар сурат гирифтааст. Нахуствазири Зеландияи Нав ин рӯзро яке аз сиёҳтарин рӯз дар таърихи ин кишвар гуфтааст. Комиссари пулиси ин кишвар низ аз кашфи бомбаҳои дастсоз дар наздикии ду масҷид хабар додааст.
Мусалмонон дар Зеландияи Нав ҳудуди як фоизи аҳолии ин кишварро ташкил медиҳанд. Аҳолии Зеландияи Нав тақрибан 5 миллион нафар мебошад ва тибқи омори ҳукумати он кишвар аз соли 2013, дар ин кишвар 50 ҳазор мусалмон ба сар мебаранд. Дар ин кишвар дар баробари мусалмонон ҳамчунин масеҳиён, ҳиндуҳо ва буддоиҳо зиндагӣ мекунанд.
Андешаи Шумо
Намоиши шарҳҳо