Мақомоти тоҷик мегӯянд, ки бинобар таниш миёни Ҳинд ва Покистон, убуру мурури ҳавопаймоҳои кишварҳои дигар аз ҳарими ҳавоии Тоҷикистон коҳиш ёфтааст.
Тайи се рӯзи гузашта дар минтақаи Кашмир миёни Ҳинд ва Покистон даргириҳо идома дорад ва ҷонибҳо иддао карданд, ки ҳавопаймоҳои ҷангии якдигарро низ сарнагун кардаанд.
Шуморе аз кишварҳо ва ширкатҳои ҳавонавардӣ парвозҳои худ ба Покистонро ба таври муваққатӣ қатъ карданд.
Масъулони Раёсати авиатсияи граждании Тоҷикистон рӯзи 28-уми феврал дар сӯҳбат бо Радиои Озодӣ гуфтанд, ки "бинобар маҳкам шудани фазо хатсайрҳое, ки аз ҳарими ҳавоии Тоҷикистон убур мекарданд, равуо барои як мӯҳлати муайян кам шуд".
Шералӣ Ганҷалзода, муовини вазири нақлиёти Тоҷикистон ҳам рӯзи 28-уми уми феврал ба Радиои Озодӣ гуфт, бинобар таниши бамиёномада дар минтақа, ҳавопаймоҳои кишварҳое, ки аз ҳарими ҳавоии Тоҷикистон убур менамуданд, кам ва дар бархе ҳолатҳо муваққатан манъ шуд.
Ба гуфтаи оқои Ганҷалзода, ин хатсайрҳо имкон дорад масири ҳаракаташонро иваз кунанд. Тавре ин масъули вазорати нақлиёти Тоҷикистон гуфт, ҳавопаймоҳои Русия, Олмон ва кишварҳои дигар аз ҳарими ҳавоии Тоҷикистон ба ҷануб-шарқи Осиё парвоз мекунанд.
Расонаҳои Русия ҳам навиштанд, ки ширкатҳои ҳавопаймоии Русия дастур гирифтаанд, ки ҳангоми тарҳрезии парвозҳо, масъалаи қатъ шудани ҳарими ҳавоии Афғонистону Покистон ва Ҳиндро ба эътибор гиранд.
Қаблан миёни Тоҷикистон ва Покистон парвозҳои мустақим вуҷуд дошт ва "Сомон Эйр" ба шаҳри Лоҳур парвозҳо анҷом медод, аммо бинобар набуди мусофирон, парвозҳо дар ин хатсай қатъ шуд. То чанд моҳи пеш "Тоҷик эйр" ба Деҳлӣ парвозҳо анҷом медод, аммо зоҳиран пас аз рӯбарӯ шудани ин ширкат бо мушкили молӣ, ин парвозҳо ба пойтахти Ҳинд низ қатъ шудаанд.
Идораи авиатсияи граждании Афғонистон ҳам гуфтааст, то замоне, ки танишҳо миёни Покистон ва Ҳинд аз байн наравад, парвозҳо миёни Кобул ва Деҳлӣ мутаваққиф хоҳад буд. Ба гуфтаи мақомоти афғон, рӯзи чаҳоршанбе Покистон ба як ҳавопаймои ширати "Kam air", ки аз Кобул ба сӯи Деҳлӣ парвоз карда буд, иҷозаи парвоз бар ҳарими ҳавоиашро надод. Мақомҳои афғон гуфтаанд, ки имкон дорад, ки парвозҳо ба Ҳиндро тариқи фазои Эрон аз сар бигиранд. Аммо ин масир ба ҷои 2 соат парвоз фазои Покистон, 5 соатро дар бар хоҳад гирифт.
Дар пайи танишҳо байни Исломобод ва Деҳлӣ, Покистон рӯзи чаҳоршанбеи 27-уми феврал эълон кард, ки ҳарими ҳавоии худро ба рӯи ҳама ҳавопаймоҳои низомӣ ва ғайринизомӣ бастааст. Созмони ҳавонавардии Покистон ба ҳама ширкатҳои ҳавоии ин кишвар хабар додааст, ки ба таври муваққат ҳамаи парвозҳои худро дар Покистон лағв кунанд.
Ин тасмим пас аз он гирифта шуд, ки Покистон эълон кард як ҳавопаймои нерӯҳои ҳавоии Ҳиндро рӯзи чаҳоршанбе дар ҳарими ҳавоии худ сарнагун кард ва ду халабони ҳиндиро боздошт намуд. Ҳинд ҳам сарнагунии яке аз ҳавопаймоҳои ҷангии худ дар хоки Покистон таъйид кард ва гуфт, ки як халабони худро аз даст додааст. Дар ҳамин ҳол, тибқи гузоришҳо дастикам панҷ фурудгоҳи Ҳинд низ фаъолияти худро ба таври муваққатӣ қатъ кардаанд ва шумораи зиёде аз парвозҳо дар ин кишвар лағв шудаанд.
Шумораи зиёде аз кишварҳо ва ширкатҳои ҳавонавардӣ парвозҳои худ ба Покистонро мутаваққиф намуданд. Аз ҷумла ширкатҳои ҳавонавардии "Emirates", "Gulf", Air Canada, British Airlines, Qatar Airlines, Airflot, ширкатҳои ҳавоии Сингапуру Тайланд ва бархе дигар аз ширкатҳо, ки ба Покистон парвозҳо анҷом медиҳанд ё аз ҳарими ҳавоии он убур мекунанд, низ парвозҳояшонро мутаваққиф кардаанд.
