Пайвандҳои дастрасӣ

Хабари нав

Мусовии мунтахаби Тоҷикистон бо ҳайати ҷавонони ССКА-и Маскав


Дастаи мунтахаби олимпии футболи Тоҷикистон (U-23) дар доираи ҷамъомади таълимиву тамринии даста дар Туркия бозии контролиро бо ҳайати ҷавонони бошгоҳи ССКА-и Маскави Русия бо ҳисоби мусовии 1:1 анҷом дод.

Бозии санҷишии мунтахаби олимпии Тоҷикистон (U-23) муқобили ССКА (U-21) рӯзи чоршанбеи 6-уми феврал дар варзишгоҳи «Эвренсеки»-и Анталия баргузор шуд. Ба голи низомиён дар ибтидои бозӣ, бозигари мунтахаби олимпии Тоҷикистон Сорбон Авғонов, ки дар нимаи дувуми дидор ба майдон омад, посух дод.

Бозии контролӣ

Мунтахаби олимпии Тоҷикистон (U-23) – ССКА (U-21, Москва, Русия) – 1:1

Голи Тоҷикистон: Сорбон Авғонов.

Тоҷикистон (U-23): Шоҳрух Қирғизбоев, Алишер Баротов, Доробҷон Эргашев, Ҳусейн Нурматов, Отабек Каримов, Далер Ёдгоров (Сорбон Авғонов, 77), Шервонӣ Мабатшоев, Алишер Мирзоев (Саидмухтор Азимов, 82), Кароматулло Саидов (капитан), Шарафҷон Солеҳов, Амирҷон Сафаров (Тоҳир Малодӯстов, 77).

6-уми феврал. Манавгат, Анталия. Варзишгоҳи «Эвренсеки». 50 тамошобин.

Бояд гуфт, ки сармураббии мунтахаби олимпии Тоҷикистон (U-23) Усмон Тошев, мутахассиси узбекистонӣ, ба ҷамъомади таълимиву тамринии даста дар Анталия бозигарони тимҳои «Истиқлол»-и Душанбе ва «Металлург»-и Бекободро даъват накардааст. Зеро ки дар ҳамин ҳол ҷамъомади таълимиву тамринии ҳарду даста дар Туркия ҷараён дорад.

Ба иттилои Федератсияи футболи Тоҷикистон, ҷамъомади таълимиву тамринии дастаи мунтахаби олимпии кишвар дар шаҳри Анталия то рӯзи 15-уми феврал идома хоҳад кард.

Футболбозони ҷавони тоҷик дар доираи омодагӣ ба мусобиқоти интихобии қаҳрамонии Осиё-2020 дар Анталия боз ду бозии контролӣ анҷом медиҳанд. Онҳо рӯзи 11-уми феврал бо ҳамсолони худ аз Камерун бозии санҷишӣ барпо мекунанд. Рақиби мунтахаби олимпии Тоҷикистон (U-23) дар бозии севуми санҷишӣ баъдтар маълум хоҳад шуд.

Ҷамъомади таълимиву тамринии мунтахаби олимпии Тоҷикистон (U-23) дар Туркия яке аз давраҳои омодагии даста ба мусобиқоти интихобии қаҳрамонии Осиё-2020 маҳсуб мешавад, ки аз 22-юм то 26-уми март дар шаҳри Тошканд барпо мегардад. Футболбозони тоҷик дар гурӯҳи «F» бо дастаҳои мунтахаби Ҳиндустон (22-юми март), Покистон (24-уми март) ва Узбекистон (26-уми март) рақобат хоҳанд кард.

Ҳайати дастаи мунтахаби олимпии Тоҷикистон дар ҷамъомади таълимиву тамринӣ дар Туркия:

Дарвозабонҳо: Фатҳулло Бобоев («Хатлон»), Шоҳрух Қирғизбоев («Барқчӣ»), Фирӯз Назаров (Академияи футболи ФФТ);

Ҳимоятгарон: Алишер Холмуродов («Пандҷшер»), Алишер Баротов («Хатлон»), Доробҷн Эргашев (ССКА «Помир»), Ҳусейн Нурматов, Ваҳдат Ҳанонов, Оятулло Сафаров, Манучеҳр Сафаров (ҳарчор – «Барқчӣ»);

Нимҳимоятгарон: Алишер Мирзоев («Сперанса», Молдова), Кароматулло Саидов («Хатлон»), Сорбон Авғонов («Панҷшер»), Отабек Каримов («Истаравшан»), Шарафҷон Солеҳов, Далер Ёдгоров, Шервонӣ Мабатшоев, Саидмухтор Азимов (ҳарчор – «Барқчӣ»);

Ҳамлагарон: Амирҷон Сафаров («Регар-ТадАЗ»), Тоҳир Малодӯстов («Барқчӣ»).

Сармураббӣ - Усмон Тошев.

XS
SM
MD
LG