Пайвандҳои дастрасӣ

Хабари нав

Дар чанд ҷумла

Трамп Покистонро аз миллионҳо доллар кумаки низомӣ маҳрум кард

Доналд Трамп

Президенти ИМА Доналд Трамп аз қарори маъмурияташ барои маҳрум кардани Покистон аз миллионҳо доллар кумаки низомӣ пуштибонӣ ва Исломободро ба ин муттаҳам кард, ки кореро барои Амрико анҷом надодааст.

Трамп наздик ба 800 миллион долларро, ки мебоист Исломобод имсол дарёфт кунад, надод ва гуфт, ки ин кишвар барои маҳви пинҳонгоҳҳои Толибони Афғонистон ва шабакаи Ҳаққонӣ дар марзҳояш, ба андозаи кофӣ талош намекунад.

Президенти Амрико рӯзи 18 ноябр дар сӯҳбат бо шабакаи телевизионии Fox News Покистонро ба пинҳон кардани раҳбари Ал-Қоида Усома Бин Лоден муттаҳам кард. Раҳбари Ал Қоидаро нируҳои дарёии Амрико дар пинҳонгоҳаш дар Аббутободи Покистон бомдоди 2 маи соли 2011 ба қатл расонданд.

Хонае, ки Бин Лоден дар он солҳо пинҳон буд, дар фосилаи кӯтоҳ аз Академяи низомии Покистон қарор дошт.

Авоили соли 2018 Трамп дар твиттер навишт, ки "Ийолоти Муттаҳидаи Амрико дар 15 сол ба Покистон беш аз 33 миллиард доллар дод ва онҳо дар ҷавоб ба мо ҷуз дуруғу фиреб чизе надоданд ва раҳбарони моро аҳмақ хаёл мекарданд".

Покистон ин иттиҳомро, ки барои мубориза бо терроризм талоши кофӣ анҷом намедиҳад ва ба ҷангиёни Афғонистон пагоҳгоҳ медиҳад, рад мекунад.

Ҳамаи хабарҳои имрӯзро дар инҷо бихонед

Душанберо шаҳри арзон барои зиндагии хориҷиён донистанд

Як хиёбони шаҳри Душанбе

Бар асоси пажӯҳиши нави "Cost of Living Survey", ки аз сӯи ширкати байналмилалии машваратии "Mercer", омода шудааст, Душанбе ҳам ба феҳрасти кишварҳое дохил шудааст, ки зиндагӣ барои хориҷиҳо дар онҳо арзон аст.

Назарпурсӣ бо назардошти қурби асъор, нархи молҳои асосии истеъмолӣ, хидматрасонӣ, сатҳи таваррум ва пули иҷора миёни мутахассисоне анҷом шудааст, ки дар кишварҳои гуногун кору зиндагӣ мекунанд.

Ду шаҳри Туркия, Анқара ва Истанбул, дар садри даҳгонаи кишварҳое қарор гирифтааст, ки барои кору зиндагии коргарони хориҷӣ арзон аст.

Дар ин пажӯҳиш вазъ дар миёни 227 кишвар таҳқиқ шудааст.

Зиндагӣ дар пойтахти Тоҷикистон, Душанбе ва Бишкеки Қирғизистон ҳам барои хориҷиҳо арзон будааст. Ба ин феҳраст ҳамчунин ду шаҳри Покистон, шаҳрҳои Қазоқистону Узбекистон ҳам ворид шудааст.

Иштироки мунтахаби Тоҷикистон дар мусобиқаи "King’s Cup 2022" дар Тайланд

Дастаи мунтахаби миллии футболи Тоҷикистон.

Дастаи мунтахаби миллии футболи Тоҷикистон бо роҳбарии мутахассиси хорватӣ Петр Сегрт дар доираи омодагӣ ба марҳилаи ниҳоии Ҷоми Осиё-2023 дар мусобиқаи байналмилалии «King’s Cup 2022» («Ҷоми шоҳ-2022») дар шаҳри Чиангмайи Тайланд иштирок хоҳад кард, хабар медиҳад сомонаи Федератсияи футболи Тоҷикистон.

Ба иттилои манбаъ, ба ғайр аз мунтахаби Тоҷикистон дар мусобиқаи «King’s Cup 2022», ки аз 20-ум то 26-уми сентябри имсол доир мегардад, тимҳои миллии Тайланд, Малайзия, инчунин Тринидад ва Тобаго ширкат меварзанд.

Бар асоси дастури мусобиқа, 22-юми сентябр бозиҳои 1/2 финал баргузор мешаванд. Ғолибони нимфинал 25-уми сентябр дар финал рақобат мекунанд, дастаҳои мағлубшуда барои медалҳои биринҷӣ мубориза хоҳанд бурд.

Ёдовар мешавем, дастаи мунтахаби миллии футболи Тоҷикистон моҳи июни соли равон дар марҳилаи интихобии Ҷоми Осиё-2023 дар гурӯҳи «F» дар Бишкеки Қирғизистон бо касби 7 имтиёз ғолиб гардид ва ба марҳилаи ниҳоии қаҳрамонии қора, ки аз 16-уми июн то 16-уми июли соли 2023 ба нақша гирифта шудааст, роҳ ёфт. Зимнан, тими миллии Тоҷикистон бори аввал дар таърихи худ ба марҳилаи ниҳоии Ҷоми Осиё роҳхат гирифт.

Марҳилаи ниҳоии Ҷоми Осиё-2023 бояд дар Чин баргузор мешуд, вале ин кишвар аз гузаронидани мусобиқа даст кашид. Дар куҷо баргузор шудани марҳилаи ниҳоииҶоми Осиё-2023 рӯзи 17-уми октябри имсол дар ҷаласаи кумитаи иҷроияи Конфедератсияи футболи Осиё (AFC) маълум хоҳад шуд.

Ба марҳилаи ниҳоии Ҷоми Осиё-2023 шаш ғолиби гурӯҳҳо ва панҷ дастае, ки бо натиҷаҳои хубтар дар ҷойҳои дувум қарор гирифтанд, роҳ пайдо карданд: Урдун, Фаластин, Узбекистон, Тайланд, Ҳиндустон, Ҳонконг, Баҳрайн, Малайзия, Тоҷикистон, Қирғизистон ва Индонезия.

Бояд гуфт, ки қаблан тимҳои миллии Эрон, Ҷумҳурии Корея, Имороти Муттаҳидаи Араб, Лубнон, Ироқ, Сурия, Арабистони Саудӣ, Ҷопон, Австралия, Умон, Ветнам, Чин ва Қатар ба марҳилаи ниҳоии Ҷоми Осиё-2023 роҳхат гирифтанд.

Ба ин тартиб, дар марҳилаи ниҳоии Ҷоми Осиё, ки тобистони соли оянда баргузор мешавад, 24 дастаи беҳтарини қора ширкат хоҳад кард.

Додгоҳи Қирғизистон қарори ихроҷи донишҷӯи тоҷикистониро содир кард

Додгоҳе дар Қирғизистон қарор содир кард, ки Исмоилхон Усмонов, донишҷӯ тоҷикистонӣ ба далели убури ғайриқонунии марз аз он кишвар ихроҷ шавад.

Сомонаи "Сводка" (АКИpress) менависад, бо қарори додгоҳи ноҳияи Якуми майи шаҳри Бишкек рӯзи 5-уми август Исмоилхон Усмонов, донишҷӯи 24-сола аз Тоҷикистон дар убури ғайриқонунии сарҳади Қирғизистон гунаҳгор дониста шуд. Расонаҳо менависанд, Усмонов донишҷӯи риштаи дандонпизишкии факултаи тиббии Донишгоҳи славянии Қирғизистону Русия ба номи Б.Н.Елтсин аст.

Бо сабаби эълони пандемияву таҳсили фосилавӣ ӯ рӯзи 7-уми апрели соли 2021 ба Тоҷикистон рафт. Охири он моҳ дар сарҳади Тоҷикистону Қирғизистон низои мусаллаҳона рух дод ва ҳукумати Қирғизистон ба таври якҷониба марзашро баст.

Сентябри он сол дар донишгоҳ таҳсили ҳузурӣ барқарор шуд ва донишҷӯёнро ба идомаи хониш ба Бишкек даъват карданд, вале бо сабаби баста будани марз, донишҷӯи тоҷик натавонистааст аз сарҳад гузарад.

"Сводка" бо такя ба парвандаи додгоҳӣ мегӯяд, ки ин донишҷӯи соли охири донишгоҳ бо мақсади идомаи таҳсилу супурдани имтиҳонҳо дар шароити баста будани марз моҳи январи соли 2022 "ғайриқонунӣ" вориди Қирғизистон шудааст.

Ба навиштаи ин манбаъ, дар мурофиаи додгоҳӣ ҳам шаҳрванди Тоҷикистон ин ҳолатҳоро эътироф карда гуфтааст, ки "ба хотири хатми донишгоҳ маҷбур шуд ба ин кор равад".

Додгоҳ дар қарори рӯзи 5-уми августаш шаҳрванди Тоҷикистонро барои “убури ғайриқонунии сарҳади Қирғизистон” айбдор ва ӯро ба пардохти 80 ҳазор сом (963 доллар) вазифадор кард. Бо қарори додгоҳ, баъди пардохти ҷарима ин шаҳрванд бояд ба ватан ихроҷ шавад. Вале маълум нест, ки акнун таҳсили ин ҷавон дар донишгоҳ чӣ мешавад ва то куҷо ӯ метавонад бозбинии ҳукмро талаб кунад.

Тоҷикистону Қирғизистон, ки бо ҳам беш аз 900 км марз доранду беш аз нисфаш ҳанӯз аломатгузорӣ нашудааст, охири апрели соли 2021 шоҳиди муноқишаи пурхушунати мусаллаҳона гардид, ки дар натиҷаи он аз ҳарду тараф 55 нафар кушта ва даҳҳо нафар захмӣ шуд. Ҳарду ҷониб ҳамдигарро дар рӯй додани ин муноқиша айбдор карданд. Баъди ин робитаҳои сиёсиву иҷтимоии ду ҳамсоя якбора бад шуд.

Баъди ним соли баста шудани сарҳади Қирғизистон барои шаҳрвандони Тоҷикистон, рӯзи 21-уми октябр Бишкек гуфт, ки нуқтаҳои мушаххаси марзӣ барои гурӯҳҳои муайяни шаҳрвандони Тоҷикистон, аз ҷумла, донишҷӯёну омӯзгорон боз мешавад.

Вале мақомоти вазорати маориф ва вазорати корҳои хориҷи Тоҷикистон ба донишҷӯёни тоҷикистонии муассисаҳои олии Қирғизистон машварат доданд, ки аз сафар ба ин кишвар муваққатан худдорӣ кунанд, чун ҳолатҳои монеагузории сунъӣ ба таҳсилу ҳаракати шаҳрвандони Тоҷикистон дар Қирғизистон ҷой дорад.

Ба маълумоти вазорати маорифи Тоҷикистон, соли таҳсили 2020-2021 дар донишгоҳҳои шаҳрҳои Бишкек, Ботканд ва Ӯши Қирғизистон 1932 донишҷӯи тоҷикистонӣ таҳсил мекарданд. Маълум нест чӣ миқдори ин донишҷӯҳо тавонистанд ба таҳсили худ идома диҳанд.

Дар соли хониши 2020-2021 дар Донишгоҳи славянии Қирғизистону Русия ба номи Б.Н.Елтсин 79 донишҷӯ аз Тоҷикистон таҳсил мекард. Ба иттилои ин муассисаи олӣ, дар маҷмӯъ, ин донишгоҳро "500 мутахассиси соҳаҳои гуногун барои Ҷумҳурии Тоҷикистон" хатм кардаанд.

Дар Хатлон як марди 80-сола ба "бадахлоқӣ ва дастдарозӣ" айбдор шуд

Марди 80-соларо бо гумони "бадахлоқӣ ва дастдарозӣ ба занон" боздошт кардаанд.

Дар ноҳияи Қубодиён як марди 80-соларо бо гумони "бадахлоқӣ ва дастдарозӣ ба занон" боздошт кардаанд.

Биноба иттилои Вазорати корҳои дохилӣ, сокини як деҳа дар Қубодиён худро ба мардум муллои ҷинбарор муаррифӣ карда, ба кирдорҳои шармовар даст мезадааст.

Мавқеи ин мард ва наздикони ӯ маълум нест, вале дар гузашта наздикони афроде, ки бо чунин айб боздошт шуда буданд, онро тӯҳмат номида буданд. Мақомоти тоҷик чанд сол боз аз тариқи телевизион аз боздошти афроде бо муаррифии "мулло" ё "ҷодугар", бо ҷурми бадахлоқӣ, намоиш медиҳанд. Коршинсон инро як маъракаи бадномсозии рӯҳониён дар ҷоема ва коҳиши нуфузи онҳо медонанд.

Дар хабари ВКД гуфта мешавад, ки марди 80-сола дар пайи шикояти як зани сокини ноҳияи Носири Хусрав боздошт шудааст. Зан гуфтааст, пирамард нисбати ӯ ҳаракатҳои шаҳвонӣ анҷом дод.

Ба иттилои мақомоти интизомӣ, мард бо роҳи фиреб ва бо ваъдаи даво бахшидан занонро ба худ ҷалб ва ба онҳо пешниҳоди ҳамхобагӣ мекардааст. Дар наворе, ки Вазорати корҳои дохилӣ дар бораи ин марди 80 сола нашр кардааст, ӯ мегӯяд, кораш нодуруст буд.

Нисбати ӯ барои иҷрои “ҳаракати бадахлоқонаи шаҳвонӣ” бо модаи 142, қисми 1, парвандаи ҷиноятӣ боз шудааст. Ин модда аз 2 то 5 соли зиндонро пешбинӣ мекунад.

Вазорати корҳои дохилӣ пайваста бо нашри навор аз ошкор шудани ҷинояти аз сӯйи муллоқои ба қавли ин ниҳод “шаҳватпараст” хабар медиҳад. Муннақидоини ҳукумат мегӯянд, чунин наворҳо барои бадном кардани мухолифин низ истифода мешавад.

Раҳбари ҳизби мамнӯъ дар Тоҷикистон ба дабири кулли СММ нома навишт

Соли 2015 ин Ҳизб дар Тоҷикистон мамнӯъ дониста шуд.

Ҳизби дар Тоҷикистон мамнуи Наҳзати исломӣ аз Созмони Миллали Мутаҳид хостааст, дар масъалаи созмони террористӣ шинохтани он аз тарафи Русия дахолати бевосита кунад.

Рӯзи 11-уми август дар як муроҷиатномаи Муҳиддин Кабирӣ, раиси ҳизб, ба Антонио Гуттериш, дабири кулли СММ, хоҳиш кардааст, ки аз федератсияи Русия талаб кунад, то аз қабули чунин қарори мухолиф ба рӯҳияи созишномаи “Сулҳи тоҷикон” худдорӣ кунад.

Дар ин нома зикр шудааст, ки Созмони Миллал гурӯҳи кории махсусро барои баррасии ҷараёни иҷроиши созишномаи “Сулҳи тоҷикон” ва натиҷаҳои он таъсис диҳад.

Дар идомаи он гуфта мешавад, ки амалӣ шудани ин дархости Тоҷикистон, яъне созмони террористӣ эътироф кардани ҲНИТ, метавонад оқибатҳои нохуш барои даҳҳо ҳазор аъзо ва ҷонибдорони мухолифини тоҷик, на танҳо дар Русия, балки дар тамоми кишварҳои пасошӯравӣ дошта бошад.

Ҳанӯз Созмони миллали мутаҳид ба ин муроҷиати Ҳизби дар Тоҷикистон мамнуи наҳзати исломӣ вокуниш накардааст.

Аз ин пеш, Игор Краснов, додситони кулли Русия, рӯзи 26-уми июли соли равон дар Душанбе ва дар мулоқот бо президент Раҳмон гуфтааст, "додситони кулли Тоҷикистонро дар бораи баррасии дархосташ барои террористӣ эътироф кардани баъзе созмонҳо дар Русия хабардор мекунам."

Вай афзудааст, "мо аллакай алайҳи Ҳизби наҳзати исломии Тоҷикистон ба додгоҳ шикоят бурдем." Сомонаи расмии Додситонии кулли Русия навишт, Краснов бо даъвати ҳамтои тоҷикистонияш, Юсуф Раҳмон, ба Душанбе рафт.

Бо вуҷуди дархостҳои Тоҷикистон дар ҳафт соли гузашта кишварҳои собиқи Шӯравӣ, аз ҷумла Русия, дар мавриди ҲНИТ тасмиме нагирифта буданд.

Даргириҳои сахт дар шаҳраки Пескии Украина

Шаҳри Пески, Украина.

Дар шаҳраки Пескии Украина, воқеъ дар даҳ километрии шаҳри Донетск бархӯрдҳои шадид идома доранд. 11-уми август ҷудоихоҳони рӯ ба Маскав дар шабакаҳои иҷтимоӣ навиштанд, ки Пески зери назорати онҳо аст ва дар баъзе маҳаллаҳои шаҳрак муқовимати сарбозони украинӣ ханӯз ҳам мушоҳида мешавад.

Аммо низомиёни Украина ин иддаоро рад карда ва гуфтанд, ки ин шаҳрак таҳти тасарруфи онҳо қарор дорад. Мушовири президенти Украина Олексий Арестович иброз доштааст, ки ҳамлаи ҷудоихоҳон ба ақиб зада шуд ва Пески зери назорати нерӯҳои украинӣ аст.

Назари манбаъҳои мустақил дар бораи таҳаввулоти ахири Пески дастрас нест.

Дар Фарғонаи Узбекистон коргари корхонае,ки худро оташ зада буд, фавтид

Фарғона, Узбекистон.

Субҳи 10 август Санобархон Ҳайдароваи 47-сола дар беморхона фавтид, ки дар корхонаи коркарди нафти Фарғонаи Узбекистон кор мекард. Вай рӯзи 2 август худро оташ зада буд. Зан ба нишони эътироз аз сабукдушшавиаш худро оташ зада буд. Додситонии шаҳри Фарғонаи Узбекистон таҳқиқро шуруъ кардааст.

Пештар аз ин дар корхонаи коркарди нафт гуфтанд, Санобархон Ҳайдароваро аз кор ҷавоб надода буданд, балки вай рухсатномаашро бо худ наоварда буд ва ба ин далел, ба коргоҳ роҳ наёфт. Ба иттилои корхона, зан ба далели низои хонаводагӣ худро оташ задааст.

Хешовандони зан дар суҳбат бо расонаҳо гуфтанд, муҳофизи коргоҳ Ҳайдароваро иҷборан аз корхона берун кардааст.

Ин зан чаҳор духтар дошт, ки хурдиашон дар синфи 9 таҳсил ва се духтари дигараш шавҳар кардаанд.

Коргарони корхонаи коркарди нафти Фарғона ба таври мудовим аз маоши кам ва сабукдушсозиҳо шикоят мекунанд. Солҳои пеш дар ин корхона чанд маротиба корпартоиҳо сурат гирифта буд.

Русия қисме аз низомиҳои захиравиашро ба марзи Украина интиқол медиҳад

T

Рӯзи 9-уми август қисме аз сарбозони эҳтиётиеро дар Русия барои "омодагии низомӣ" ба марзи Украина интиқол додаанд, ки дар шаҳри Санкт-Петербург ва вилояти Ленинград истиқомат мекунанд. Дар ин бора расонаҳо бо такя ба ҳомиёни ҳуқуқ ва сарбозони эҳтиётӣ хабар доданд.

"Мегӯянд, мо техникаҳоро таъмир мекунем", - гуфтааст яке аз сарбозони эҳтиётӣ дар суҳбат бо нашрияи "Вёрстка".

Ҳомиёни ҳуқуқ хабар доданд, ки 10 тан аз сарбозони эҳтиётӣ ба онҳо шикоят овардаанд. Сарбозони эҳтиётиро ба идораҳои низомӣ даъват ва маҷбур ба имзо гузоштан зери санаде кардаанд. Баъди ин, онҳоро ба вилояти Белгороди ҳаммарз бо Украина интиқол медиҳад.

"Шиносномаҳо, билети ҳарбиро мегиранд ва ба қисми низомӣ мефиристанд - аз он ҷо ба вилояти Белгород, тавре ба мо гуфтанд, барои таъмири техника ва ҷобаҷо кардани "снарядҳо". Сарбозони эҳтиётӣ синну соли гуногун доранд: 26, 30, 40-сола ҳастанд", - гуфтанд ҳомиёни ҳуқуқ.

Бино ба қонунгузории Русия, сарбозони эҳтиётӣ ҳақ доранд, ки дар омодагиҳои низомӣ ширкат накунанд.

Сокини Турсунзода барои ғорат кардани "Айфон 13 Промакс" боздошт шуд

Акс аз як мағозаи фурӯши "Айфон"

Орзӯи соҳиби телефони “Айфон - 13” шудан пойи як сокини шаҳри Турсунзодаро ба зиндон кашид.

Бино ба иттилои Вазорати корҳои дохилии Тоҷикистон, марди 44-сола барои аз худ кардани телефони гаронарзиши "Айфон-13 Промакс" ба як зан ҳамла кардааст.

Ҳодиса рӯзи 5-уми август рух додааст. Мард соҳиби Айфонро латукӯб намуда, телефонашро ғорат кардааст. Ҳоло ӯ дар боздошт аст ва таҳқиқи қазия шурӯъ шудааст. Зарари расонидаи ӯ 16 ҳазор сомонӣ ҳисоб шудааст.

Навъи нави “Айфон” ки нархаш барои аксарият дар Тоҷикистон дастнорас аст? дафъаҳои ахир сабабгори содир шудани ҷиноят мешавад. Мисли аксар кишварҳои дигари дунё дар Тоҷикистон ҳам бисёриҳо мехоҳанд соҳиби "Айфон 13" шаванд, аммо ба далели хеле гарон будани нархи он ин орзу барои аксарият дастнорас мемонад. Бархе ҳам барои иҷрои хоҳиши худ даст ба ҷиноят мезананд. Як рӯз қабл Вазорати корҳои дохилаи кишвар аз ғорати шудани "Айфон" дар як мағозаи Душанбе хабар дода буд. Дар ин ҳодиса як сокини Варзоб гумонбар аст.

Пулиси Олмон се шаҳрванди Тоҷикистонро боздошт кардааст

Кормандони пулиси Олмон. Акс аз бойгонӣ

Пулиси Олмон дар марз бо Полша ё Лаҳистон 9 паноҳандаи ғайриқонунӣ, аз ҷумла 3 шаҳрванди Тоҷикистонро, боздошт кардаанд.

Ҷавонони боздоштшуда, аз 22 то 37 сол дошта, бе ягон санади расмӣ ба ин кишвар ворид шудаанд.

Дар ин бора расонаҳои русӣ бо такя ба иттилои мақомоти интизомии Олмон хабар додаанд.

Пулис Олмон ҳамчунин дар марз бо Лаҳистон паноҳандаҳои ғайриқонунии эрониро боздошт кардааст, ки бо визаи Русия ба ин кишвар омадаанд. Муҳоҷирон бо худ ба ҷуз шиноснома дигар ягон иҷозатнома барои будубоши расмӣ дар Олмонро надоштаанд.

Дар ин кишвар шумори зиёди муҳоҷирону паноҳандаҳои тоҷик кору зиндагӣ мекунанд.

Аз моҳи январ то июли соли 2021 беш аз 190 шаҳрванди Тоҷикистон барои дарёфти паноҳандагӣ ба мақомоти Олмон муроҷиат карда, аз ин миён 45 дархост қабул ва 127 дархост рад шудааст.

Ҳушанги Соя, шоири маъруфи эронӣ, даргузашт

Ҳушанги Соя, шоир

“Имшаб ба қиссаи дили ман гуш мекунӣ, Фардо маро чу қисса фаромуш мекунӣ," сарояндаи ин шеъри маъруф, Ҳушанги Соя шаби 10- уми август дар сини 94-солагӣ даргузашт.

Ялдо Ибтиҳоҷ, духтари шоири маъруфи эронӣ, бо интишори байте аз падараш дар Телеграм навишт: “Сояи мо бо ҳазорсолагон сар ба сар шуд”

Бахши Фардои Радиои Озодӣ бо нашри ин хабар рӯзи 10-уми август навишт, сабаби даргузашти Ҳушанги Соя ҳанӯз эълом нашудааст.

Дар моҳи июли соли равон ба далели бемории гурда чанд рӯзе дар яке аз беморхонаҳои шаҳри Кёлни Олмон, шаҳре, ки дар он зиндагӣ дошт, бистарӣ будааст.

Шеъри Ҳушанги Соя мисли дигар аз сурудаҳои шоирони номдори муосири Эрон, ба мисли Нимо Юшиҷ, Нодирпур, Фуруғи Фаррухзод, Шаҳриёр, ва Симини Беҳбаҳонӣ, дар Тоҷикистон маъруф аст.

Аҳли адаби тоҷик ва алоқамандони шеъри Соя дар саҳифаи иҷтимоии интернети рузи 10-уми август аз даргузашти шоири бузурги Эрон сугномаҳои худро нашр кардаанд.

Субҳон Аъзамзод, адабиётшиноси тоҷик навиштааст: “Ин бор дигар лаби Соя барои ҳамешагӣ хомӯш монд. Имрӯз ҳам ҷо рӯзи қиссаи Соя аст, Сояе, ки ҳаргиз фардо фаромӯш нахоҳад шуд.”

Ҳушанг Ибтиҳоҷ соли 1928 дар шаҳристони Рашт (дар шимоли Эрон) чашм ба ҷаҳон кушод ва пас аз он, ки таҳсилоти худро дар он шаҳр ба поён расонид, ҳамроҳи хонаводааш ба Теҳрон меравад. Ӯ бо тахаллуси Соя ба шеър навиштан пардохта буд ва ашъори ӯ дар маҷмӯаҳои "Нахустин нағмаҳо", "Сароб", "Сиёҳмашқ", "Шабгир", "Замин", "Чанд барг аз ялдо", "Сиёҳмашқи 1, 2, 3", "Ойина дар ойина", "Ёдгори сарви хун", "Девони ашъор" ба нашр расидааст.

Ҷо Байден узвияти Финландия ва Шветсияро ба НАТО тасдиқ кард

Ҷо Байден рӯзи 9 август санадро имзо кард.

Президенти ИМА Ҷо Байден рӯзи 9 август санадеро имзо кард, ки бар асоси он Вашингтон узвияти Финландия ва Шветсияро ба НАТО тасдиқ мекунад.

Дар суханрониаш президенти ИМА гуфт, ки ду кишвари Аврупои Шимолӣ "ҳампаймонони нави боқудрат, боэътимод ва тавоное" хоҳанд шуд, ки "масъулияти муқаддас"-еро дар доираи эътилофи фароатлантикӣ ба уҳда мегиранд.

Ба гуфтаи Байден, Русия таҳти роҳбарии Владимир Путин бо ҳамлааш ба Украина "сулҳу амниятро дар Аврупо барҳам зад". "Путин фикр кард, ки метавонад, моро аз ҳам ҷудо созад... Дар иваз вай он чизеро дарёфт кард, ки аз он фирор мекард", - афзуд президенти ИМА.

Рӯзи 4 август Сенати ИМА ба ҷонибдорӣ аз шомилшавии Финландия ва Шветсия ба НАТО раъй дод. Ин 23-умин кишвар аз маҷмуъи 30 кишвари узви НАТО буд, ки узвияти ду давлати навро ба эътилофи низомӣ тасдиқ кард.

Барои узвияти комили Финландия ва Шветсия бояд ҳамаи 30 давлати узви НАТО раъйи мусбат диҳанд.

Мақомоти Русия дар шарҳи шомилшавии ду давлати нав ба НАТО аз як ҷониб ин иқдомро маҳкум, аз ҷониби дигар гуфтанд, бо ин иқдом ҳеч мушкиле надоранд, зеро Русия бо ин ду давлат баҳси марзӣ надорад. Бо ин вуҷуд, Русия ваъда кардааст, ки агар зерсохторҳои НАТО дар Финландия ва Шветсия ҷо дода шаванд, ҷониби Русия иқдоми ҷавобие рӯи даст хоҳад гирифт.

Амрико ва панҷ кишвари минтақа дар Тоҷикистон машқи низомӣ анҷом медиҳанд

Тамрини низомии “Ҳамкории минтақавӣ 22”, ки аз 10 то 20-уми август дар Тоҷикистон баргузор мешавад.

Иёлоти Муттаҳидаи Амрико дар ҳамкорӣ бо Тоҷикистон ва ҷалби панҷ кишвари дигари минтақа тамрини 10-рӯзаи низомӣ анҷом медиҳанд.

Дар тамрини низомии “Ҳамкории минтақавӣ 22” , ки аз 10 то 20-уми август дар Тоҷикистон баргузор мешавад, намояндаҳои Қазоқистон, Қирғизистон, Муғулистон, Покистон ва Узбекистон ширкат мекунанд.

Рӯзи 10-уми август сафорати ИМА дар Душанбе хабар дод, ки ҳадафи баргузории тамрин бо ҷалби кишварҳои минтақа таъмини амният, мубориза бо терроризм ва рушди ҳамкориҳои муштарак аст. Ин машқҳо дар маркази омӯзишии Фахробод баргузор мешаванд.

Тамрини “Ҳамкории минтақавӣ 22” бо ҷалби кишварҳои минтақа ва ИМА аз соли 2004 баргузор мешавад. Имсол макони баргузории он Тоҷикистон интихоб шудааст.

Парвандаи ҳодисаҳои моҳи июни соли 2010 дар Қирғизистон ба додгоҳ рафт

Ёдгории қурбониёни ҳодисаҳои моҳи июни соли 2010 дар Қирғизистон.

Парвандаи ҷиноии марбут ба ҳодисаҳои моҳи июни соли 2010 дар Қирғизистон ба додгоҳ ирсол шуд.

Сергей Слесарев, вакили мудофеи президенти пешини Қирғизистон Алмосбек Отамбоев гуфт, нафари таҳти ҳимояи ӯро дар сӯистифода аз мақом айбдор мекунанд. "Дар додгоҳи ноҳияи Якуми майи шаҳри Бишкек рӯзи 15-уми август ҷаласаи аввалини додгоҳӣ сурат мегирад",-гуфт вакили мудофеъ.

Кумитаи давлатии амнияти миллии (КДАМ) Қирғизистон моҳи апрели соли 2021 хабар дод, ки парвандаи ҳодисаҳои соли 2010 дубора баррасӣ мешавад.

Додситонии кулли Қирғизистон пештар хабар дод, ки ин бор 15 кас - мансабдорони пешин ва кунунии Қирғизистон, аз ҷумла президенти амалкунанда Содир Ҷабборов, раиси КДАМ Қамчибек Тошиев бозпурсӣ мешаванд.

Моҳи майи соли ҷорӣ додситонӣ се узви ҳукумати муваққати Қирғизистон - Кенешбек Дуйшобоев, Исмоил Иҳоқов ва Бектур Асановро огоҳ кард, ки дар "Сӯистифода аз мақоми хидматӣ" гумонбар мешаванд. Ҳар се узви ҳукумати муваққати Қирғизистон аз мунтақидони ҳукумати кунунӣ ҳастанд.

Даргирии байниқавмӣ дар вилоятҳои Ӯш ва Ҷалолободи Қирғизистон 10 июни соли 2010 байни қирғизҳо ва узбектаборон сар зад ва чанд рӯз давом кард. То он даргириҳо, дар моҳи апрели ҳамон сол дар натиҷаи инқилоби мардумӣ Ҳукумати муваққат рӯи кор омада буд.

Бино ба иттилои расмӣ, дар натиҷаи ҳодисаҳои моҳи июни соли 2010 466 кас кушта, қариб 2 ҳазор каси дигар ҷароҳат бардоштаанд. Ҳамчунин 57 кас дар он ҳодисаҳо бенишон шуда буданд, ки 19 нафарашон то кунун пайдо нагардидаанд.

Иттиҳоди Аврупо ва Бритониё хариди ангишти Русияро қатъ карданд

Ангишти Русия. Акс аз бойгонӣ.

Дар Иттиҳоди Аврупо шуруъ аз 10 август комилан қатъ кардани хариди ангишти Русия ба иҷро даромад. Иттиҳод ин тасмимро моҳи апрели имсол дар доираи бастаи панҷуми таҳримҳои зидди Русия, ба далели ҷанги зидди Украина, ҳамоҳанг карда буд. Бритониё низ аз 10 август аз хариди ангишти Русия даст кашид.

Бино ба баҳогузории Комиссияи Аврупо, қатъи хариди ангишт чаҳоряки содироти ангишти Русияро дар бар мегирад, ки фурӯши он ба Иттиҳоди Аврупо барои Русия солона 8 миллиард евро даромад меовард.

Баъди он, ки Иттиҳоди Аврупо қатъи вориди ангишти Русияро эълом кард, Москва ангишташро ба Ҳинду Туркия ирсол кард. Дар ҳамин ҳол, Русия маҷбур аст, ангишташро бо нисфи қимат ба фурӯш барорад.

То охири соли ҷорӣ кишварҳои аврупоӣ тасмим доранд, қисман аз нафти Русия низ даст кашанд.

ИМА воридоти газ, нафт ва ангишти Русияро ҳанӯз ибтидои моҳи марти соли ҷорӣ қатъ карда буд.

Дар семоҳаи дувуми имсол 1,5 млн шаҳрванди Узбекистон ба Русия рафтааст

Муҳоҷирони узбек.

Дар семоҳаи дувуми имсол 3 миллиону 120 ҳазор кас барои кор ба Русия рафтаанд. Ин нишондиҳанда нисбати ҳамин давраи соли гузашта 25 дарсад бештар арзёбӣ мешавад ва дар шаш соли охир рақами рекордӣ ба ҳисоб меравад. Дар ин бора мақомоти корҳои дохилии Русия хабар доданд.

Бино ба омори вазорати корҳои дохилии Русия, 49,6 дарсади муҳоҷирон, ки моҳҳои апрел, май ва июни исоли вориди Русия шудаанд, шаҳрвандони Узбекистон, 30 дарсад шаҳрвандони Тоҷикистон ҳастанд. 40 дарсади онҳо дар шаҳри Москва ва вилояти Москва кор пайдо кардаанд.

Бино ба омори расмӣ, аз Узбекистон ба Русия 1 миллиону 544 ҳазору 900 кас ва аз Тоҷикистон 953 ҳазор кас, аз Арманистон 108,2 ҳазор, аз Озарбойҷон 79 ҳазор, аз Белорус 42 ҳазор, аз Чин 32,2 ҳазор, аз Украина 28,2 ҳазор ва аз Молдова 17,2 ҳазор кас ворид шудаанд.

Оҷонси муҳоҷирати хориҷии Узбекистон хабар медиҳад, ки назарпурсиҳо нишон додаанд, 40 дарсади шаҳрвандон гуфтаанд, ба далели бекорӣ ва ноустувории бозори арз мехоҳанд, ба Узбекистон баргарданд.

Ҷасади тоҷике, ки дар ҷанги Украина ширкат дошт, ба ватан интиқол ёфт

Меҳрубон Амонов афсари артиши Русия буд.

Ҷасади афсари тоҷиктабори артиши Русия, ки пас аз бозгашт аз ҷанг дар Украина, дар садамае фавтид, ба Душанбе интиқол дода шуд.

Меҳрубон Амонови 22-сола, зодаи шаҳри Конибодоми Суғд, рӯзи 6-уми август, ҳамроҳ бо холааш, Нигина Шароповаи 44­-сола, дар садамае дар ҳудуди вилояти Иркутск ба ҳалокат расиданд.

Мақомоти Тоҷикистон ва Русия ширкати тоҷикон дар ҷанги Русия бо Украинаро тасдиқ намекунанд, вале пас аз марг ё кушта шудан номи беш аз 20 нафари онҳо расонаӣ шудааст.

Пайвандони Меҳрубон Амонов гуфтанд, ки бар асоси қарордод пас аз панҷ моҳи ҷанг ин афсар ва садҳо ҳамроҳашро ба истироҳати муваққатӣ фиристода буданд.

“Гуфтаанд, ки равед, як моҳ истироҳат кунед ва дубора ба ҷанг баргардед. Меҳрубон як ҳафта аз истироҳаташ гузашта буд,”—гуфт ӯ.

Таҳқиқоти расонаҳои мустақил нишон додааст, ки мисли Меҳрубон даҳҳо ҷавони тоҷик дар ҷанги Украина аз ҷониби Русия ширкат доранд. Танҳо пас аз марг хабари ширкати шаҳрвандони кишварҳои Осиёи Марказӣ дар расонаҳо пайдо мешавад. Русия ҳам моҳҳо боз теъдоди сарбозони кушташудааш дар Украинаро эълон намекунад. Охири моҳи июл дар таҳқиқоте ББС кушта шудани беш аз 4 ҳазор сарбозу афсари русро ошкор карда буд.

Русия рӯзи 24-уми феврал бесабаб ба Украина ҳамла кард. Дар ин ҷанг ҳазорон нафар куштаву миллионҳо нафар фирорӣ шуданд. Ҳоло хабарҳое нашр мешаванд, ки Русия шаҳрвандони муҳоҷири кишварҳои Осиёи Марказӣ, аз ҷумла тоҷиконро ба ҷанг ҷалб мекунад.

Шумораи шаҳрвандони Украина, ки кишварашонро тарк кардаанд ба "10 млн нафар" расид

Марзи Украина ва Лаҳистон.

Тибқи тозатарин гузориши Комиссариати олии Созмони Милали Муттаҳид дар умури паноҳандагон, аз оғози ҳамлаи Русия ба Украина дар 24-уми феврали соли ҷорӣ, беш аз 10 миллиону 500 ҳазор нафар аз шаҳрвандони ин кишвар аз марзҳои мухталиф аз кишварашон берун рафтаанд.

Хуруҷи беш аз даҳ миллион нафар аз як кишвари аврупоӣ дар таърихи ин қора дар даҳаҳои ахир бесобиқа будааст.

Бештари ин афрод дар кишварҳои ҳамсояи Украина -- Лаҳистон, Руминия, Маҷористон, Молдова ва Словакия ҷобаҷо шудаанд ва чандин миллион нафар ҳам ба кишварҳои дигари аврупоӣ, Амрико ва Канада рафтаанд.

Ҳудуди се моҳ пас аз оғози ҷанг ва хуруҷи нерӯҳои Русия аз Киев ва минтақаҳои атрофи он, даҳҳо ҳазор нафар аз паноҳҷӯён ба кишварашон баргаштанд, вале бештари онҳо дар интизори поёни ҷанг ҳастанд.

Русия рӯзи 24-уми феврали имсол ба Украина ҳамла кард. То кунун бар асари ин ҷанг ҳазорон нафар аз ду ҷониб кушта шудаанд.

Мутахассисони СММ аз он нигарон ҳастанд, ки дар пайи ҷанги беасоси Русия дар хоки Украина шумораи мардуми беҷошуда аз замони Ҷанги Дуюми Ҷаҳон ба сатҳи бесобиқа баланд афзоиш ёфт ва ба мушкили бе ин ҳам сахти муҳоҷират афзуд.

Муттаҳам дар куштори блогнависи узбекистонӣ 16,5 сол зиндонӣ шуд

Додгоҳе дар шаҳри Тошканди Узбекистон рӯзи 9 август ҳукми муттаҳам дар куштори блогнавис Асал Хоҷаевро содир кард, ки бо номи Asalhoney маъруф буд.

Дар ин куштор Каримберган Шоназаров, зодаи вилояти Хоразми Узбекистон, соли таваллудаш 1997, дар асоси моддаҳои "Куштори барқасдона" ва "Ғорат бо вуруди ғайриқонунӣ ба манзил ва расонидани зарари вазнини ҷисмонӣ" айбдор дониста шуд.

Ҷасади Асал Хоҷаев рӯзи 18 марти соли ҷорӣ дар манзилаш дар ноҳияи Яшнободи шаҳри Тошканд пайдо шуда буд.

Пешниҳоди таъсиси гурӯҳ барои ҷанг дар Украина. Ҷамъияти узбекони Русия қабул мекунад?

Роҳбари "Ҷомеаи узбекони Осиёи Марказии кишвари Перм" Ҷаҳонгир Ҷалолов пешниҳод кард, ки барои ҷанг дар Украина гуруҳе бо номи Темурланг таъсис дода шавад. Навори суханронии вай дар телевизиони Vetta нашр шуд.

"Фарзандони мо ба боғча мераванд, дар мактабу донишгоҳҳо мехонанд. Мо дар Русия зиндагиву кор мекунем. Мо на танҳо бояд, балки вазифадорем, нонеро ҳалол кунем, ки истеъмол мекунем. Пешниҳод мекунам, гуруҳи ихтиёриёне таъсис ва номашро ба номи Амир Темур - Темурланги бузург гузорем", - гуфт Ҷалолов.

Вай аз касоне, ки дар суханрониаш ҳузур доштанд, даъват кард, ӯро дастгирӣ ва ба гуруҳ бипайванданд.

Нашрияи "Коммерсант"-и Русия пештар навишт, дар минтақаҳои он кишвар то кунун бештар аз 40 гуруҳҳои ихтиёриён барои ҷанг дар Украина сохта шудааст.

Ба иттилои нашрия, сохтани чунин гуруҳҳо дар минтақаҳои Русия аз баҳор шуруъ шуда, дар бораи онҳо дар расонаҳо ва шабакаҳои иҷтимоӣ хабар дода мешавад. Гуруҳҳо бар асоси минтақаҳое номгузорӣ мешаванд, ки онҷо ҷамъоварӣ шудаанд.

Ба ин тартиб, дар Санкт-Петербург гуруҳҳои ихтиёриёни "Кронштадт", "Нева" ва "Павловск", дар Ёқутистон — "Боотур", дар Приморе — "Тигр", дар Қазон — "Алга" ва "Тимер", дар Чувашистон — "Атал", дар кишвари Перм — "Парма" ва "Молот", дар вилояти Амур — "Амурский", дар вилояти Ленинград — "Невский" ва "Ладожский" таъсис шудааст.

Манобеи нашрия гуфтаанд, ки сохтани гуруҳҳо бар асоси минтақаҳо ба он хотир аст, ки бо ихтиёриён ба ин шева кор кардан асон аст. Мансабдорони федеролӣ аз мақомоти минтақаҳои Русия хостаанд, кӯмаки иттилоотӣ ва молӣ расонанд.

Расман ихтиёриён бо вазорати мудофиаи Русия барои чанд моҳ шартнома имзо мекунанд ва мақоми низомии шартномавиро соҳиб мешаванд. Вобаста ба минтақаашон, ба онҳо моҳона аз 130 ҳазор то 300 ҳазор рубл пардохт мешавад.

Ин дар ҳолест, ки ҳафтаи гузашта бештар аз 40 ихтиёрӣ аз Чувашистони Русия ба мақомот шикоят карданд, ки маблағҳои ваъдашударо ба онҳо напардохтаанд.

Ҷалби ихтиёриён дар Русия ба яке аз гузинаҳои "даъвати саросарӣ" табдил шудааст. Ихтиёриёнро на танҳо кумитаҳои низомӣ, балки ширкатҳои низомии хусусӣ, аз ҷумла "ЧВК Вагнер" низ ҷалб мекунад.

Чин бо ҳадафи муҳосираи ҷазираи Тайван размоиш оғоз мекунад

Артиши Чин эълом кард, ки бо ҳадафи муҳосира ва мудофиаи ҷазираи Тайван размоиш баргузор мекунад. Дар ин бора нашрияи South China Morning Post хабар дод. Замони анҷоми размоишҳо эълом нашудааст. Нозирони байналхалқӣ аз эҳтимол дур намедонанд, ки Чин метавонад, размоишҳои низомиро дар Тайван ба таври мудовим баргузор кунад.

Пештар аз ин неруҳои мусаллаҳи Тайван размоишҳои низомиро бо истифода аз "снаряд"-ҳои ҷангӣ шуруъ карда буданд. Онҳо дар ин размоиш пасгардонии ҳамла ба ҷазираро машқ карданд. Мақомоти Тайван гуфтанд, Чин дар ҷараёни размоишҳои худ ҳамла ба ҷазираро тамрин мекунад.

Рӯзи 4 август Чин размоишҳои низомиашро бо тирпарронӣ дар обҳои атрофи Тайван шуруъ кард. Ин размоиш баъди сафари раиси Маҷлиси Намояндагони ИМА Нэнсӣ Пелосӣ ба Тайван шуруъ шуд. Пелосӣ дар 25 соли охир баландмақомтарин сиёсатмадори ИМА буд, ки ба Тайван рафт. Чин гуфт, сафари Пелосиро барҳамзанандаи истиқлолаш арзиёбӣ мекунад. Размоишҳои аввал рӯзи 7 август анҷом шуданд, аммо Чин 8 август аз оғози размоишҳои нав хабар дод.

Мақомоти Чин Тайванро қаламрави худ медонанд ва қасд доранд, онро ба ҳудуди худ шомил созанд. ИМА ба фарқ аз аксари кишварҳои узви СММ истиқлоли Тайванро эътироф намекунад, аммо зидди он аст, ки Чин ҷазираро бо зӯр шомили қаламрави худ гардонад.

Як ҷавон дар Панҷакент ҳангоми аксбардорӣ ба ҷарӣ сарозер шуд

Як деҳаи Панҷакент. Акс аз бойгонӣ

Талоши аксбардорӣ аз тулӯъи офтоб ва манзараҳои зебои табиат дар Тоҷикистон бо марги як ҷавон анҷом ёфт.

Ба иттилои Кумитаи ҳолатҳои фавқулода, сокини 18 солаи деҳаи Падруди Панҷакент, субҳи барвақти рӯзи 6-уми август, бо ҳадафи суратгирӣ ба кӯҳи Тарҳ рафт ва ба ҷарӣ сарозер шуда, фавтидааст.

Дар пайи муроҷиати наздикони ҷавон, наҷотбахшон ба ҷустуҷӯи ӯ баромада, баъд аз як рӯз ҷасадашро 300 метр поинтар аз ҷойи ҳодиса пайдо кардаанд.

Кумитаи ҳолатҳои фавқулода гуфтааст, ин ҳодисаи бесобиқа аст ва аз сокинон хостааст, зимни сафар ба кӯҳҳо бехатариро ҷиддан риоя кунанд.

Шавҳари зане, ки дар Рашт худро ба Сорбоғ партофт, боздошт шудааст

Лаҳзаи ба рӯдхона партофтани Маҳина дар дурбини назоратии як мағоза сабт шудааст.

Кормандони пулис дар ноҳияи Рашт Султони Абдувоҳид, сокини деҳаи Хоҷаалии ин ноҳияро, ки ҳамсараш худро ба рӯди Сорбоғ партофт, боздошт кардаанд.

Маҳинаи Холаҳмад, ҳамсари 23-солаи ин мард, рӯзи 5-уми август худро аз болои пуле ба рӯдхонаи Сорбоғ партофтааст.

Як манбаъ аз Шуъбаи корҳои дохилаи ноҳияи Рашт ба Радиои Озодӣ гуфт, пас аз омӯзиши далелҳо шавҳари ӯ бо гумони “ба худкушӣ расонидани ҳамсараш” боздошт шуд.

Наздикони Султони Абдувоҳид ҳодисаро шарҳ надоданд.

Лаҳзаи ба назди пули деҳа омадан ва худро ба об андохтани зани ҷавон дар дастгоҳи видеоии мағозае сабт шудааст, ки нусхаи он дастраси Радиои Озодӣ шуд.

Як сокини деҳаи Хоҷаалии ҷамоати Боқӣ Раҳимзодаи Рашт, ки нахост номашро зикр кунем, ба Радиои Озодӣ гуфт, ҳодиса соати 9-и рӯзи 5-уми август пас аз он рух додааст, ки шавҳараш ин занро талоқ медиҳад. “Баъди ҷанҷол хушдоманаш кӯдаки нӯҳмоҳаашро бо зӯр аз дасташ мегирад. Ӯ ночор меравад ва аз телефони як ҳамсоя ба падараш занг зада мепурсад, ки ба сараш ҳамин ҳолат омад, аммо падараш, бехабар аз ҷузъиёти ҷанҷол, ба хотири идомаи зиндагии хонаводагии духтараш, розӣ намешавад, ки ба хонаи волидайнаш баргардад. Маҳина дигар ба самти дарё меравад,”—гуфт, ӯ.

Пас аз ин, тавре дар навори видеоӣ дида мешавад, Маҳина ба лаби дарё меояд ва пас аз каме андеша аз болои пул худро ба мавҷи дарё мезанад.

Ин манбаъ гуфт, дар ҳоли ҳозир тафтишоти пешакӣ идома дорад ва то имрӯз ҷасади Маҳина ёфт нашудааст.

Ҳодисаи худро ба дарё партофтани занон дар дигар минтақаҳо низ сабт шудааст. Мақомот сабаби асосиро дар хушунат ва муносибати нохуби хонаводаи шавҳар бо арӯсони хонадон медонанд.

Русия ба Украина зарбаи сахт заданист

Нерӯҳои Русия дар Донетск

Ситоди кулли нерӯҳои мусаллаҳи Украина мегӯяд, нерӯҳои Русия ҳамлаҳо дар самти шаҳрҳои Авдеевка ва Бахмути вилояти Донетскро бо ҳадафи зарбаи сахт ба сарбозони ин кишвар идома медиҳанд.

9-уми август, нерӯҳои Украина, бо ҳамлаи ҷавоби русҳоро дар шаҳрҳои Ивано-Дариивка, Бахмут ва Зайтсев ба ақиб гардонданд. Ба ин тартиб, ҳамла ба Авдеевка ва Красноҳоривка хунсо карда шудааст.

То ҳанӯз назари манбаҳои мустақил дар ин бора нашр нашудааст.

Дар ин байн, нигаронииҳои байналмилалӣ аз бомбаборони бузургтарин нерӯгоҳи ҳастаии Аврупо, Запорожия, зиёд садо медиҳад.

Раиси оҷонсии нерӯи ҳастаии Украина пешниҳод кардааст, ки минтақаи гирду атрофи нерӯгоҳи ҳастаии Запорожия минтақаи озод аз силоҳ эълон карда шавад. Намояндаи мақомоти рӯ ба Маскави Запорожия рӯзи 8-уми август ба хабаргузориҳои Русия иттилоъ дод, ки нерӯгоҳи ҳастаӣ дар режими маъмулӣ кор мекунад.

Русия 13 гумонбарро ба Тоҷикистон истирдод кардааст

Бинои Додситонии кулли Русия

Додситонии кулли Русия 13 фарди гумонбар дар ҷиноятро ба Тоҷикистон истирдод кардааст.

Дар ин бора хабаргузории ТАСС бо истинод ба маркази матбуоти Додситонӣ хабар додааст. Онҳоро мақомоти Русия боздошт ва барои адои ҷазо ба ниҳодҳои масъули Тоҷикистон супурдаанд.

Яке аз истирдодшудаҳо Зафар Қурбоналиев будааст, ки дар дузддии маблағ бо ҳаҷми калон гумонбар дониста мешавад. Ба иттилои Додситонии Русия, Қурбоналиев аз 25 уми феврал то 4-уми майи соли 2021 замони фаъолият ба ҳайси сардори маркази хизматрасонии “Тавҳидбонк” 1 миллион сомонӣ ва қариб 90 ҳазор долларро дуздидааст.

Охири моҳи гузашта Додситони кулли Русия Игор Краснов дар Душанбе бо президент Эмомалӣ Раҳмон ва ҳамтои тоҷикаш Юсуф Раҳмон мулоқот дошт.

Дар Душанбе Додситони кулли Русияву Тоҷикистон барномаҳои ҳамкорӣ, аз ҷумла дар самти муборизаи муштарак алайҳи ҷинояткорӣ ва таҳдидҳое мисли тероризму ифротгароиро имзо кардаанд.

Ёфтҳои бештар

XS
SM
MD
LG