Рӯзи 22 октябр дар Душанбе мулоқоти вазири корҳои хориҷии Тоҷикистон Сироҷиддин Муҳриддин ва муовини Ёвари Котиби давлатии ИМА оид ба минтақаи Осиёи Ҷанубӣ ва Марказӣ хонум Эмилиа Пума баргузор шуд. Вебсайти вазорати хориҷаи Тоҷикистон гуфт, ки дар ин мулоқот ҷонибҳо масоили мухталиф, аз ҷумла, густариши ҳамкориҳои иқтисодию тиҷоратӣ, муколамаи сиёсӣ, гуманитарӣ ва амниятиро миёни ду кишвар мавриди баррасӣ қарор доданд.
Ин мулоқот дар остонаи ҷаласаи ҳарсолаи машваратии ИМА ва Тоҷикистон баргузор мешавад. Дар хабаре, ки рӯзи 19 октябр нашр шуд, гуфта мешавад, ки ҳамроҳ бо кордори Сафортаи ИМА Кевин Коверт, ҳайати байниидоравӣ масъалаҳои гуногуни ҳамкориҳои стратегии дуҷонибаро бо ҳамтоёни тоҷики худ баррасӣ мекунанд. Дар ин ҷаласа мубориза бо ифротгароии хушунатомез, қочоқи маводи мухаддир ва мусоидат ба ҳамгироии минтақавию рушди иқтисодӣ баррасӣ мешавад.