Ийолоти Муттаҳидаи Амрико аз иштирок дар Конфронси ҳалли мусолиҳатомези низои Афғонистон, ки Русия ташкил кардааст, даст кашид. дар ин бора намояндаи Департаменти давлатии ИМА хабар додааст. Deusche Welle рӯзи 22 август аз қавли ин намоянда гуфт, гумон аст, ки нишасти Маскав сулҳу суботро дар Афғонистон барқарор кунад.
Нишасти байналмилалии ҳалли мусолиҳатомези низои Афғонистон ба рӯзи 4 сентябр барномарезӣ шудааст. Русия ба ин маърака намояндагони 12 кишварро даъват кард. Афғонистон аз ширкат дар нишаст даст кашид. Вазорати корҳои хориҷии Афғонистон гуфт, ки раванди сулҳсозӣ бояд таҳти раҳбарии Кобул анҷом шавад ва ҳукумати Афғонистон мехоҳад бо Толибон мустақиман, бидуни ҷалби давлати хориҷӣ музокирот кунад,- гуфт хабаргузории Reuters аз қавли вазорат.
Ҳамзамон ба гуфтаи Reuters, ҳади ақал чаҳор намояндаи Толибон -ҷумбиши тундрави исломӣ, ки дар Русия мамнуъ аст, дар мулоқот иштирок мекунад.
Баъди хуруҷи бахши умдаи нерӯҳои НАТО дар соли 2014 аз Афғонистон, низои дохилӣ дар ин кишвар авҷ гирифт. Ҳафтаи гузашта Толибон даъвати ҳукуматро барои эълони оташбаси семоҳа беҷавоб гузошт. Пентагон борҳо гуфтааст, ки Русия бо баҳонаи кӯмак дар саркӯб кардани ДИИШ, аз Толибон пуштибонӣ мекунад. Вазорати хориҷии Русия ин иттиҳомро беасос хондааст.
