Раҷаб Тайиб Эрдуғон, раиси ҷумҳури Туркия гуфтааст, кишвараш қасд дорад, барои баррасии муноқиша дар Сурия ва дигар масоили минтақавӣ, раҳбарони Фаронсаву Олмон ва Русияро моҳи сентябр дар Истанбул гирди ҳам биёрад.
Расонаҳои Туркия аз қавли Эрдуғон навиштанд, ки қарор аст, мулоқот рӯзи 7-уми сентябр сурат бигирад. Раиси ҷумҳури Туркия дар бораи ҷузъиёти масоили мулоқот чизе нагуфтааст.
Фаронсаву Олмону Русия ҳанӯз ин хабарро тасдиқ накардаанд. Русияву Эрон дар муноқишаи 7-солаи Сурия, ки садҳо ҳазор нафарро кушт, аз раиси ҷумҳур Башшор Асад ҳимоят мекунанд. Туркияву Олмону Фаронса тарафдори гуруҳҳои алоҳидаи ошӯбгароне ҳастанд, ки ба зидди нерӯҳои ҳукуматӣ меҷанганд.
Раҷаб Тайиб Эрдуғон гуфтааст, ки дар ояндаи наздик бо Ҳасан Рӯҳонӣ, раиси ҷумҳури Эрон мулоқот мекунад, вале санаи дақиқашро эълон накардааст. Ду раҳбар аввали моҳи апрел дар Анкара гуфтӯгу доштанд.