Албек Иброҳимов, мири шаҳри Бишкек рӯзи 19 июл аз ҷониби КДАМ-и Қирғизистон боздошт шуд, ки дар фасодкорӣ гумонбар мешавад. Дар изҳороти КДАМ гуфта мешавад, ки Иброҳимов аз рӯи қазияи харидории мол барои ширкати “Достон”, ки бо таъмини маҳсулот барои бахши дифоӣ машғул аст, арзиши аз ҳад баланд пардохт кардааст.
Тафтишот мегӯяд, ки шаҳрдори Бишкек барои ин созишнома 270 ҳазор доллар подош гирифтааст. Дар парванда инчунин иттиҳомоти марбут ба фурӯши 100-дарсадии саҳҳоми осоишгоҳи “Солнечный берег” ва зарари молӣ дар ҳаҷми 152 миллион сом, фурӯши замин ба ашхоси алоҳида ва дигар мавридҳо зикр мешаванд.
Шаҳрдор Албек Иброҳимов расман аз 10 июл дар рухсатӣ қарор дорад. Дар ҷаласаи маҷлиси шаҳри Бишкек рӯзи 13 июл вакилон ба Иброҳимов раъи адами эътимод доданд. Худи Иброҳимов дар як изҳороташ ин парвандаро ҳамчун “дорои ангезаҳои сиёсӣ” маҳкум кардааст.
Қаблан, рӯзи 6 июл КДАМ-и Қирғизистон аз рӯи парвандаи тахсиси замин дар қисмати ҷанубии Бишкек муовини аввали раиси шаҳр Ренат Макеновро ва сардори раёсати захираҳои замини шаҳрдорӣ Урмат Мурзакановро боздошт кард.
