Пайвандҳои дастрасӣ

Хабари нав

Хабарҳо

Русия-Арабистони Саудӣ: 5:0 АКС

Александр Головин, нимҳимоятгари дастаи мунтахаби Русия дар дақиқаи 94-уми бозӣ зарбаи ҷаримавиро ба ҳадаф расонд ва ҳисоби бозиро бо ҳисоби 5:0 ба нафъи кишвараш тағйир дод.

Ин бозии нахустин дар чаҳорчӯби Ҷоми Ҷаҳон оид ба футбол 2018 аст, ки миёни Русия ва Арабистони Саудӣ мегузарад.

Денис Черишев дар дақиқаи иловагии 91-ум голи чорумро ба дарвозаи Арабистони Саудӣ зад.

Дар дақиқаи 71-ум голи севвумро ба дарвозаи саудиҳо Артём Дзюба зад. Дзюба дар ҳоле тавонист голро ба ҳадаф расонад, ки тоза ба майдон баромада буд ва Фёдор Смоловро иваз кард. Дзюба дар клуби "Арсенал"-и Тула бозӣ мекунад.

Ӯ ҳамлагари марказии мунтахаби Русия аст.

Дар дақиқаи 43-ми қисми аввали бозӣ Денис Черишев голи дуввум ва голи аввалро дар дақиқаи 12-ум Юрий Газинский заданд. Черишев бозигари дастаи "Вилярреал"-и Испания дар ҳайати мунтахаби Русия бозӣ мекунад. Черишев баъди он ба майдон баромад, ки ҳамлагари Русия Алан Дзагоев ҷароҳат бардошт ва майдонро тарк кард.

Аввалин голро нимҳимоятгари мунтахабаи Русия Юрий Газинский ба дарвозаи мунтахаби Арабистони Саъудӣ зад. Голи Газинский бо партоби Александр Головин муяссар гашт. Юрий Газинский бозигари дастаи Краснодари Русия ва Головин бозигари ССКА Москав ҳастанд.

Ёдовар мешавем нахустин сабқати ҷомаи ҷаҳони футбол миёни мутахабҳои Русия ва Арабистони Саъудӣ дар варзишгоҳи Лужникии Маскав идома дорад.

Ҳамаи хабарҳои имрӯзро дар инҷо бихонед

Дархости фиристодаи вижаи Амрико аз раҳбарони Сербия ва Косово

Ричард Гренелл ва Ҳошим Тачи. Приштина. 22-юми январи соли 2020

Фиристодаи вижаи Иёлоти Муттаҳида барои Сербия ва Косово аз раҳбарони ҳарду кишвар хостааст, ки ихтилофҳои худро канор гузоранд ва ба пешрафти иқтисод диққат диҳанд. Ричард Гренелл 22-юми январ ҳангоми сафари худ ба Приштина, пойтахти Косово ва пеш аз гуфтугӯҳо бо президент Ҳошим Тачи гуфт, “мехоҳем дар ин минтақа, дар Косово ва Сербия, дар ҷабҳаи иқтисод пешрафт кунем." Гренелл ҳамзамон сафири Амрико дар Олмон аст.

Вай ба хабарнигорон гуфт: "Ҷавонон ба кор ниёз доранд – ин як хостаи давлати Трамп аст. Халқи Косово сазовори ҷойҳои нави корӣ ва ояндаи дурахшон мебошад. Мо ният дорем, ҳарду кишвар, роҳбарони Косово ва Сербияро водор кунем ва гӯем, ки "ба мардум нигоҳ кунед, бо кор ба пеш равед." Фиристодаи вижаи Амрико барои Сербия ва Косово ҳушдор дод, ки “ҷомеаи тиҷоратӣ дар Иёлоти Муттаҳидаи Амрико, ҷомеаи соҳибкорони Аврупо мехоҳанд, ба ин минтақа бештар ворид шаванд, аммо шумо наметавонед ин корҳоро анҷом диҳед, агар аз тарафи ниҳоди сиёсӣ кашмакашҳо бошад.”

Гренелл моҳи октябри соли 2019 аз сӯи Трамп бо мақсади наздик кардани ду рақиби сарсахт, ҳамчун фиристодаи вижаи Иёлоти Муттаҳида барои Косово ва Сербия таъйин шудааст.

Иттиҳоди Аврупо узвияти Сербияро бо хостаҳои худ дар бораи дуруст кардани муносибатҳои Белград бо Косово, ки пас аз ҷанги НАТО дар соли 1999 аз Сербия ҷудо шуда буд, пайванд додааст.

"Ҳа"-и вакилони Думаи давлатии Русия ба тарҳи ислоҳҳои Путин

Вакилони Думаи давлатӣ, палатаи поёнии порлумони Русия. 23-юми январи соли 2020

Қонунгузорони Русия дар нахустин хониш лоиҳаи нави ислоҳи қонуни асосиро, ки аз сӯи президент Владимир Путин пешниҳод шудааст, якдилона қабул карданд.

Ҳамаи 432 вакили Думаи Давлатӣ рӯзи 23-юми январ, танҳо пас аз се рӯзи пешниҳод шудани дигаргунӣ ба порлумон, ба тарафдории қонун овоз доданд.

Пас аз овоздиҳӣ сухангӯи Дума Вячеслав Володин гуфт: “Ин як намоиши тавонои ягонагӣ буд.” Володин гуфт, хондани дувум дар 11-уми феврал пешбинӣ шудаааст.

Ин лоиҳа сипас ба хониши сеюм рӯбарӯ хоҳад шуд, аммо дар порлумон, ки қонунгузорони вафодори Кремл бартарӣ доранд, ба гумон аст, он ба фишори зиёд дучор ояд.

Агар лоиҳа аз хониши сеюм дар Дума гузарад, пеш аз имзо шуданаш аз тарафи Путин ба Шӯрои Федератсия – палатаи болоии парлумон фиристода мешавад.

Рӯзи 15-уми январ Путин дар бораи ислоҳот дар паёми давлатии худ эълом кард, ки зуд бо истеъфои ҳукумати сарвазир Дмитрий Медведев ва пазируфтани сарвазир ва кабинети нав анҷом шуд.

Пайдарҳамии тези дигаргуниҳо нозиронро водоштааст, ки гӯянд Путин шояд пас аз поёни давраи кунунии худ барои соли 2024 замина мегузорад.

Дар як фоҳишахонаи Ҳинд шаҳрванди Узбекистонро боздошт карданд

Дар шаҳри Бхопали Ҳиндустон пулиси маҳаллӣ гуруҳеро боздошт кард, ки хадамоти шаҳвонӣ мерасониданд.

Дар ҷараёни як рейд чаҳор зан ва ду мард боздошт шуд. Миёни боздоштшудаҳо як шаҳрванди Узбекистон низ ҳаст, ки ба танфурӯшӣ машғул буд. Дар ин бора расонаҳои ҳиндӣ хабар медиҳанд.

Шаҳрванди Узбекистон айни ҳол дар боздоштгоҳ аст. Айни ҳол дар бораи ному насаби ин зан маълумоте нашр нашудааст.

Расонаҳои хориҷӣ борҳо дар бораи ба танфурӯшӣ машғул будани шаҳрвандони Узбекистон дар кишварҳое чун Имороти Муттаҳидаи Арабӣ, Туркия ва Ҳиндустон хабар додаанд.

Боздошти муттаҳам ба дуздии сандуқи хайрияи як масҷид дар Ашт

Мақомот шахсеро ба иттиҳоми дуздии пулҳои сандуқи хайрияи масҷиди Умари Одили деҳаи Бободархони ноҳияи Ашт, боздошт кардаанд.

Акбар Шарипов, сухангӯи Раёсати вазорати корҳои дохила дар вилояти Суғд рӯзи 23-уми январ дар сӯҳбат бо Радиои Озодӣ гуфт, "кормандони шӯъбаи корҳои дохилии ноҳияи Ашт "гумонбарро мушаххас карданд. Гумонбар, ноболиғ, соли таваллудаш 2003, хонандаи синфи 11, сокини деҳаи Понғоз мебошад. Аз рӯи нишондоди гумонбаршуда ӯ аз даруни сандуқи хайрия 150 сомонӣ гирифтааст".

Ба гуфтаи Шарипов, гумонбар соли 2019 бо ҳукми додгоҳ ба дуздӣ айбдор шуда, ба иҷрои 80 соат корҳои ҳатмӣ муҷозот шуда буд.

Мақомот дар нисбати ӯ бо моддаи 244 Кодекси ҷиноӣ, яъне парванда боз мекунанд. Бинобар ноболиғ будан, мақомот ӯро ба ҳабси пешакӣ нагирифтаанд. Исми ин наврас пурра ба Радиои Озодӣ маълум аст, аммо бинобар ноболиғ будан, аз бурдани номаш худдорӣ мешавад.

Сокинони Ашт рӯзи гузашта ба Радиои Озодӣ гуфта буданд, ки як шахси номаълум пулҳои сандуқи хайрияи масҷиди ба номи Умар Одили деҳаи Бободархонро дуздидааст. Сокинон мегӯянд, ҳодиса шаби 6-уми январ иттифоқ афтод. Ба қавли онҳо, сандуқ чанд моҳ пеш дар берун аз дарвозаи масҷид насб шуда буд. Мақомоти умури дохилӣ мегӯянд, ҳодисаро таҳқиқ доранд.

Дар як наворе, ки дурбини назоратии масҷид сабт карда буд ва нусхаи он ба дасти Радиои Озодӣ расид, дида мешуд, шахсе ниқобпӯш сандуқи хайрияро бо табар шикаста ва пулҳоро гирифтааст.

Ҳодисаи дуздӣ дар дохили масҷид – макони ибодати мардум – камсобиқа аст. Дар гузашта танҳо чанд мавриди "гум шудан"-и пойафзол, телефон ва ашёи дигари намозгузорон сабт шуда буд.

Дар оғози соли 2019 маъмурони милисаи Исфара як сокини 56-солаи ин шаҳрро бо гумони дуздӣ дар масҷиди ба номи "Имом Бухорӣ" дастгир карданд. Ин нафар ба дуздии 80 ҳазор рубли русӣ (беш аз ҳазор доллари амрикоӣ) аз ҷайби як намозгузор айбдор шуд.

Соли 2018 дар ноҳияи Қубодиёни вилояти Хатлон афроди ношинос компютерҳои ду масҷидро дар ин минтақа дуздиданд. Дар ин "протсессор"-ҳо навори равуои сокинон ва ибодати онҳо дар масҷид нигоҳдорӣ мешуд.

Кони тилои Қумтор дигарбора фаъол шуд

Кони тилои Қумтор дар Қирғизистон.

Ширкати "Қумтор Голд Компанӣ" иҷозат ёфт, ки фаъолиятро аз сар гирад. Дар ин бора Элдар Тоҷибоев, намояндаи ширкат хабар дод.

Ба гуфтаи вай, нақшаи кори соли 2020 бо Кумитаи давлатии саноату энержии Қирғизистон мувофиқа шудааст.

Баъди лағзиши куҳпора дар моҳи декабри соли гузашта дар кони Қумтор ҳамакнун хоки бехташударо дар партовгоҳҳои "Чон-Сари-Тор" ва "Кичи-Сари-Тор" мерезанд.

"Ҳоло ширкат ба идома додани фаъолият омода мешавад. 500 коргаре ки то ин замон бекор буданд, бо навбат ба коргоҳ даъват мешаванд",-гуфт Тоҷибоев.

Субҳи 1-уми декабр дар қитъаи наздикии дарёчаи Лисии кони "Қумтор" лағзиши замин рух дод. Ду тан аз кормандони кон дар ин лағзиш нопадид шуданд. Ҷустуҷӯи ҷасади онҳо 2 моҳ давом кард. Наҷотдиҳандагон 9-уми январ ба хулоса расиданд, ки корҳои ҷустуҷӯиро қатъ кунанд.

Путин бо сафари расмӣ вориди Исроил шуд

Владимир Путин, раиси ҷумҳури Русия дар Исроил. 23-юми январи соли 2020.

Президенти Русия бо сафари расмӣ вориди Исроил шуд. Владимир Путин бо сарвазири Исроил Бинямин Натаняҳу ва президенти он кишвар Реувен Ривлин мулоқот намуд.

Президенти Русия ҳамчунин дар маросими пардабардорӣ аз тандиси қаҳрамонҳои муҳосираи Ленинград - "Шамъи хотира" ширкат ва дар форуми "Хотираи Ҳолокостро ҳифз мекунем" суханронӣ мекунад. Форуми Ҳолокост ба 75-солагии озодсозии урдугоҳи кори иҷборӣ ё конслагери "Освентсим" аз сӯи аскарони шӯравӣ бахшида мешавад.

Путин ҳамчунин бо модари зодаи Исроил Наам Иссахар, ки дар Русия зиндонӣ аст, мулоқот хоҳад кард. Соли гузашта Иссахарро дар Русия бо айби қочоқи маводи мухаддир 7,5 сол зиндонӣ карданд.

Моҳи апрели соли гузашта дар фурудгоҳе дар Москва аз ҷомадони Иссахар 9 грам ҳашиш пайдо карданд. Иссахара мегӯяд, ин ҳашишро бо ҳадафи қочоқ интиқол намедод. Бархе аз расонаҳо навиштанд, ки интизор меравад, Путин дар ин сафар ӯро авф кунад.

Қирғизистон назорат дар марз бо Чинро пурзӯр кард

Марзи Қирғизистон ва Чин. Акс аз бойгонӣ.

Мақомоти Қирғизистон дар пайи паҳншавии вируси нав дар Чин чораҳои нави пешгирикунандаеро рӯи даст гирифтаанд. То ба ҳол ягон ҳолати гирифторӣ ба ин вирус дар Қирғизистон қайд нашудааст.

Ба огаҳии Вазорати тандурустии Қирғизистон, ҳамаи мусофироне, ки аз Чин вориди ин кишвар мешаванд, аз санҷиши иловагӣ хоҳанд гузашт. Бо мақсади пешгирӣ аз вуруди вируси 2019-nCoV ба Қирғизистон дар гузаргоҳҳои марзии ин кишвар бо Чин назорати санитарӣ пурзӯр шудааст.

Динара Оторбаева, як масъули Раёсати пешгирии бемориҳо ва назорати санитарии Вазорати тандурустии Қирғизистон гуфт, "то ҳол дар кишвар ягон ҳолати гирифторӣ ба ин вирус сабт нашудааст. Ҳамкорони мо ҳоло дар гузаргоҳҳои марзӣ бо Чин ва фурудгоҳҳо фаъолият доранд. Мутахассисон ҳамаи мусофиронеро, ки аз Чин меоянд, аз санҷиш мегузаронанд",-афзуд ӯ.

Хабари паҳншавии вируси нав дар Чин бори аввал моҳи декабри соли гузашта расонаӣ шуд. То 22-уми январ аз таъсири ин вирус 17 кас ҷон бохта, ҳудуди 570 нафар ба он мубтало шудаанд.

Дар марзу фурудгоҳҳои як қатор кишварҳо, аз ҷумла Қазоқистон, Узбекистон, Тоҷикистон ва Русия ба хотири пешгирӣ аз сирояту паҳни вируси чинӣ назорати санитарӣ пурзӯр карда шудааст.

Муҳлати будубоши беқайди узбекҳо дар Русия дароз мешавад

Муҳоҷирони узбек, ки ғайриқонунӣ вориди Русия шудаанд. Акс аз бойгонӣ.

Москва ва Тошканд масъалаи дароз кардани муҳлати будубоши бидуни қайди шаҳрвандони Узбекистонро дар Русия то ба 15 рӯз баррасӣ доранд. Дар ҳоли ҳозир шаҳрвандони Узбекистон ҳақ доранд, ки дар ҳудуди Русия то 7 рӯз бе қайд ба сар баранд.

Вазорат ва ниҳодҳои дахлдори ду кишвар вазифадор шудаанд, ки созишномаи дуҷониба барои дароз кардани муҳлати будубоши бе қайди шаҳрвандони Узбекистонро дар Русия таҳия кунанд.

Бино ба хабари расонаҳо, интизор меравад, ин санад дар ҷараёни сафари президенти Узбекистон Шавкат Мирзиёев ба Русия дар нимаи аввали тобистони соли равон имзо шавад.

Нерӯҳои амрикоӣ дар Ироқ мемонанд

Доналд Трамп, раиси ҷумҳури Амрико ва ҳамтои ироқии ӯ Барҳом Солеҳ. Швейтсария. 22-юми январи соли 2020

Доналд Трамп, раиси ҷумҳури Амрико ва ҳамтои ироқии ӯ Барҳом Солеҳ ба мувофиқа расидаанд, ки нерӯҳои амрикоӣ дар Ироқ бояд ҳамчунон ҳузур дошта бошанд. Кохи Сафед гуфт, ду тараф дар ин бора рӯзи 21-уми январ дар Швейтсария гуфтугӯ кардаанд.

Дар баёнияи расмии ҳукумати Амрико омадааст, "ду раҳбар ба ин назаранд, ки ҳамкории Амрикову Ироқ дар арсаҳои иқтисодӣ ва амниятӣ ва аз ҷумла мубориза бо (ДОИШ) муҳим аст. Президент Трамп ба аҳди қавии Амрико барои ҳимоят аз Ироқил мустақилу ором ва шукуфо таъкид кардааст".

Раисони ҷумҳури Амрико ва Ироқ дар ҳошияи Форуми иқтисодии Давос дар Швейтсария мулоқот доштанд ва ин нахустин гуфтугӯи онҳо баъди қатли Қосим Сулаймонӣ, фармондеҳи бонуфузи эронӣ дар Бағдод аст.

Куштани Сулаймонӣ аз тарафи нерӯҳои амрикоӣ бисёре аз сиёсатмадорони Ироқро ба хашм овард ва сабаб шуд, ки порлумони кишвар бо қабули қароре ихроҷи нерӯҳои Амрикоро аз Ироқ талаб кунад.

Қабл аз мулоқот Барҳом Солеҳ гуфт, Вашингтон ва Бағдод ҳамкориҳои пойдор доранд ва Амрико дар ҷанг ба зидди гурӯҳи ба ном "Давлати исломӣ" як ҳампаймони Ироқ будааст.

Дар Тошканд маҷмаии тиҷоратӣ бо баландии 230 метр месозанд

Тарҳи ду маҷмаи баландошёна дар Тошканд.

Дар шаҳри Тошканди Узбекистон дар ҳудуди минтақаи саноатии Яккасрой дар доираи тарҳи сармоягузории Day and Night (Шаб ва Рӯз) қарор аст, маркази тиҷорие бо ду бинои дугонаи бо баландии 230 метр сохта шавад.

Дар нақша аст, ки дар ҳудуди маркази тиҷорӣ 16 бинои тиҷорӣ, истиқоматӣ ва фарҳангӣ хоҳад шуд. Дар ин бора Шароф Раҳмонов, муовини раиси шаҳри Тошканд хабар дод.

Вай гуфт, ин тарҳ давоми се сол амалӣ мешавад ва арзиши 1 млрд долларро дорад.

Ба гуфтаи Шароф Раҳмонов, даромади солонаи маркази тиҷорӣ то 500 млн доллар хоҳад буд. Дар ин марказ наздики 20 ҳазор ҷои корӣ таҳия мешавад.

Бинои дугона бо баландии 230 метр "офтобу моҳтобро таҷассум мекунанд". Дар ин бинои дугона тарабхона ва нуқтаҳои фароғатӣ ҷойгир мешавад.

Узбекистон аз хавфи вируси чинӣ чораҳои сахт рӯи даст гирифт

Табибони чинӣ як беморро, ки ба вируси мармуз мубтало шудааст, ба яке аз бемористонҳои шаҳри Вуҳан интиқол медиҳанд. 18-уми январи соли 2020.

Дар гузаргоҳҳои марзии Узбекистон вазъи тиббиву беҳдоштии одамонро ҷиддан назорат мекунанд. Касоне, ки гирифтори пневмония ва ё бемориҳои дигари гузаранда ҳастанд, бистарӣ мешаванд.

"Ин тадбирҳо баъд аз сар задани вируси нави 2019-nCo дар Чин рӯи даст гирифта шудааст",-хабар дод вазорати ҳифзи тандурустии Узбекистон.

"Беморхонаҳо барои бистарӣ кардани касоне, ки гирифтори бемориҳои гузаранда ҳастанд, омода мешаванд. Дору ва васоили дигари тиббӣ таҳия мешавад",-омадааст дар хабари вазорати ҳифзи тандурустии Узбекистон

Дар фурудгоҳҳои Узбекистон низ назорати касоне ҷиддӣ гирифта шудааст, ки аз Чин меоянд.

Хабари паҳншавии вируси нав дар Чин бори аввал моҳи декабри соли гузашта расонаӣ шуд. То 20-уми январ аз таъсири ин вирус 6 кас кушта шуда, 227 тани дигар зери назорати табибон ҳастанд.

Лукашенко: Русия намегузорад, аз Қазоқистон нафт ворид кунем

Мулоқоти Владимир Путин ва Александр Лукашенко дар Санкт-Петербург. 20-уми декабри соли 2019.

Президенти Белорус Александр Лукашенко гуфт, Москва намегузорад, Минск аз Қазоқистон нафт ворид намояд. Ин нукта дар пасманзари баҳсҳои ду кишвар атрофи нархи тарифҳои интиқоли нафти Русия ба Белорус садо доданд.

Лукашенко 21-уми январ дар сӯҳбат бо коршиносони соҳаи нафт дар шаҳри Минск гуфт, шароити иқтисодӣ мушкилтар мешавад. "Аҷиб аст. Ҳампаймони мо розӣ намешавад, ки аз ҳампаймони дигарамон нафт ворид кунем".

Қазоқистон, Белорус ва Русия узви Иттиҳоди иқтисодии Авруосиё ҳастанд, ки президенти Русия Владимир Путин ба хотири тақвияти нуфузи Москва дар маҳдудаи пасошӯравӣ ва муқобала бо Иттиҳоди Аврупову НАТО ташкил кардааст

"Ба иллати андозҳои ҷорикардаи Русия даромади будҷаи ҷумҳурӣ поин рафта, самаранокии кори корхонаҳои коркарди нафти мо коҳиш меёбад. Дар ҳақиқат, мо имрӯз барои нафти Русия гузина надорем, вале мо бояд ин масъаларо ҳал кунем. Бояд коре кард, ки саҳми Русия дар ҳаҷми воридоти нафт то ба 30-40 дарсад поин равад",-гуфт ӯ.

Миёни Русия ва Белорус вақтҳои ахир дар робита ба арзиши транзити нафт баҳсҳо ба миён омадааст. Ин баҳсҳо дар пасманзари фишорҳои Москва ба Минск барои тақвияти ҳамгироии ду кишвар мушоҳида мешавад.

Муовини сарвазири Белорус Дмитрий Крутой 14-уми январ гуфт, Минск барои харидории нафт ба чандин кишвари аврупоӣ ва Қазоқистону Озарбойҷон дархост фиристодааст. Пештар хабар дода шуд, ки Қазоқистон интиқоли нафт ба Белорусро баррасӣ мекунад.

Лукашенко ва Путин соли гузашта дар нақшаи ҳамгироии ду кишвар ба пешрафте ноил нашуданд. Лукашенко он замон гуфт, шароити "баробар"-ро мехоҳад.

Дар Белорус сокинон моҳи декабри соли гузашта зидди гуфтугӯҳои ношаффоф дар бораи ҳамгироӣ ва робитаҳои зичтар бо Русия даст ба тазоҳурот заданд.

Дар зарбаҳои ҳавоӣ дар Сурия даҳҳо одам ҷон бохтанд

Як писарбача аз ваҳшати ҳамлаҳои ҳавоии нерӯҳои ҳукуматӣ дар Идлиб ба даҳшат афтодааст. 15-уми январи соли 2020.

Дар натиҷаи зарбаҳои ҳавоӣ ба раҳбарии нерӯҳои Русия ва Сурия дасти кам 40 нафар ҷони худро аз даст доданд.

Дар ин бора хабаргузории Reuters бо истинод ба шоҳидон хабар додааст. Ҳамчунин дар пайи шадидтар шудани ҳамлаҳо ҳудуди 350 ҳазор сокин хонаҳои худро тарк карда, даҳҳо ҳазор ба минтақаи ҳаммарз бо Туркия паноҳ бурдаанд.

Артиши ҳукумати Сурия миёнаҳои моҳи декабри соли гузашта бо дастгирии нерӯҳои Русия ҳамла ба вилояти Идлибро аз сар гирифтанд. Ин охирин минтақа дар ғарби рӯдхонаи Фурот аст. Ба иттилои созмонҳои башардӯстона, дар натиҷаи задухӯрдҳои моҳи декабр 22 кас кушта шуд.

Москва ва Димишқ иддаои ҳамлаҳои ғайриинтихобиро рад карда, мегӯянд, танҳо мавқеи тундгароёни исломиро ҳадаф қарор медиҳанд.

Путин мақоми "мураббӣ"-ро баъди соли 2024 рад кард

Владимир Путин, раиси ҷумҳури Русия аз як мактаби ҳунарии кӯдакона дар Липеск дидан кард. 22 январи соли 2020.

Президенти Русия Владимир Путин мақоми "мураббӣ"-ро баъди ба поён расидани давраи президентияш дар соли 2024 рад кард. Ӯ дар ин бора дар мулоқот бо донишҷӯёни маркази омӯзишии "Сириус"-и Сочӣ изҳори назар кард.

Дар бораи мақоми "мураббӣ" донишҷӯи Донишкадаи муносибатҳои байналмилалии Москва суол кард. Путин дар посух гуфт, ташкил шудани институте дар Русия, ки раҳбари давлатро назорат кунад, "дуҳокимиятиро ба вуҷуд оварда, барои кишвар фоҷеаовар хоҳад буд".

Путин ҳамчунин бо намояндагони ҷомеаи вилояти Липетс низ мулоқот кард. Ӯ дар суҳбат бо онҳо гуфт, шакли идории порлумониро дар Русия ғайриҳадафмандона медонад.

Ба гуфтаи Путин, ингуна шакли идорӣ зараровар хоҳад буд, зеро дар Русия ҳизбе нест, ки "таҷрибаи бисёрсола дошта бошад" ва ҳизбҳои кунунии Русия ба ҳар як шахси муайян вобастаанд. Ӯ намуна овард, ки "Жириновский ҳаст, Ҳизби либерал-демократии Русия низ ҳаст, Жириновский набошад, .... нест", - изҳор дошт ӯ.

Владимир Путин афзуд, ки "Русия бо қаламрави бузурги худ ба ҳукумати қавии президентӣ ниёз дорад" ва "беҳтар аст, шаклҳои дигари идориро таҷриба накунанд".

Пештар Путин хабар дод, ки ба Конститутсияи Русия тағйирот ворид карда мешавад. Ӯ хост, дар Конститутсияи нав нақш ва мақоми Шӯрои давлатӣ таъйин карда шавад. Мухолифон нигаронанд, ки Путин пас аз ба поён расидани муҳлати президентияш дар соли 2024 раҳбари ин шӯро шуда, дар қудрат боқӣ хоҳад монд.

Идомаи муҳокимаи эълони нобоварӣ ба Трамп дар Сенати Амрико

Доналд Трамп

Додситонҳои Маҷлиси Намояндагони Иёлоти Муттаҳидаи Амрико вазифадор шудаанд, ки рӯзи 22-юми январ далелҳои худро дар мурофиаи муҳиме дар Сенат барои аз вазифа сабукдӯш кардани президент Доналд Трамп пешниҳод кунанд.

Ҷумҳурихоҳон пештар аз ин ба қоидаҳои барои додгоҳи импечмент пешниҳодшуда аз тарафи Митч МакКоннелл, роҳбари аксарияти Сенат, овоз доданд.

Намояндагони маҷлиси Сенати Амрико тарҳи вобаста ба раванди нобоварӣ ба президенти ИМА Доналд Трампро қабул карданд. Ин тарҳ ба пешниҳоди Митч МакКоннелл, роҳбари аксарияти ҷумҳурихоҳон, бо 53 овози тарафдор ва 47 овози зид пазируфта шуд.

Аз рӯи тарҳ, аъзои кумитаи “нобоварӣ”-и Маҷлиси Намояндагон, ки ҳама аз ҳизби демократ ҳастанд, бояд дар се рӯз далелҳои худро барои “нобоварӣ” ба Доналд Трамп пешниҳод кунанд. Гурӯҳи вакилони Доналд Трамп ҳам бояд дар ҳамин муддат далелҳои худро барои пешгирии ин раванд ба миён гузорад.

Трамп, ки дар Форуми умумиҷаҳонии иқтисодии Давос (Швейтсария) иштирок мекунад, рӯзи 21-уми январ дар Твиттер навишт: “Матни гуфтугӯҳоро хонед!” Ишора ба матни гуфтугӯи телефонии ӯ дар 25-уми июли соли 2019 бо Владимир Зеленский, президенти Украина мебошад , ки дар ҷараёни он вай аз Киев хостааст, рақиби сиёсиаш, ноиби пешини президенти Амрико Ҷо Байденро таҳқиқ кунад.

Дуздӣ дар масҷиди Умар Одил. Пулҳои сандуқи хайрияро кӣ рабуд?

Ин лаҳза дар дурбини назоратии масҷиди деҳаи Бободархон сабт шудааст

Як шахси номаълум пулҳои сандуқи хайрияи масҷиди ба номи Умар Одили деҳаи Бободархони ноҳияи Ашти вилояти Суғдро дуздидааст. Сокинон мегӯянд, ҳодиса шаби 6-уми январ иттифоқ афтода, то ба ҳол гумонбар дастгир нашудааст. Ба қавли онҳо, сандуқ чанд моҳ пеш дар берун аз дарвозаи масҷид насб шуда буд. Маблағи умуми рабудашуда ҳанӯз маълум нест. Мақомоти умури дохилӣ мегӯянд, ҳодисаро таҳқиқ доранд.

Дар як наворе, ки дурбини назоратии масҷид сабт кардааст ва нусхаи он ба дасти Радиои Озодӣ расид, дида мешавад, шахсе ниқобпӯш сандуқи хайрияро бо табар шикаста ва пулҳоро гирифтааст.

Акбар Шарифов, сухангӯи Раёсати корҳои дохилии вилояти Суғд, рӯзи 22-юми январ ба Радиои Озодӣ гуфт, "6-уми январ ба Шуъбаи корҳои дохилии ноҳияи Ашт дар бораи ин ҳодиса хабар расид. Мақомот чора меандешанд. Бо ошкор шудани шахси гумонбар ба матбуот маълумот медиҳем."

Мақомоти милиса намедонанд, дар даруни сандуқи хайрияи масҷид чанд сомонӣ будааст, чун касе аз масъулони масҷид пулҳои дохили онро нашумурдааст. Маъмулан имомхатибон ва ё намозгузорон бо пур шудани сандуқ онро мекушоянд ва пулҳои ҷамъшударо барои таъмири масҷид ва кумак ба дармондагон харҷ мекунанд.

Аммо ҳамсуҳбатони мо аз шумори сокинони деҳаи Бободархон мегӯянд, ҳоло ки зимистон аст, аксар муҳоҷирон аз Русия баргашта ва дар хонаҳояшон қарор доранд ва ба сандуқи хайрияи масҷид низ аз дигар вақт дида бештар пул ворид мекунанд.

Имоми масҷиди ба номи Умар Одили деҳаи Бободархони ноҳияи Ашт ба Радиои Озодӣ гуфт, сандуқи хайрия начандон пеш дар назди панҷараи масҷид насб шудааст ва ба гумони ӯ "эҳтимол пули зиёд надошт". Ӯ гуфт, "дар наздикии масҷид қабристон аст ва ба он ният сандуқро гузоштем, ки зиёраткунандагон, бахусус занҳо садақаро дар ҳамин ҷо гузоранд. Дақиқ намедонем, ки дар дохилаш чанд пул буд, аммо маъмулан пули калон намегузоранд. Пули зиёд набуд он ҷо."

Пас аз чанд соати нашри ин хабар дар Радиои Озодӣ, Бахтиёр Турсунзода, раиси ҷамоати Понғоз, ки деҳаи Бободархон шомили он аст, ба Радиои Озодӣ гуфт, "нозири минтақавии деҳа аллакай як гумонбарро боздошт намуда, бозпурсӣ дорад."

Ҳодисаи дуздӣ дар дохили масҷид – макони ибодати мардум – камсобиқа аст. Дар гузашта танҳо чанд мавриди "гум шудан"-и пойафзол, телефон ва ашёи дигари намозгузорон сабт шуда буд.

Дар оғози соли 2019 маъмурони милисаи Исфара як сокини 56-солаи ин шаҳрро бо гумони дуздӣ дар масҷиди ба номи "Имом Бухорӣ" дастгир карданд. Ин нафар ба дуздии 80 ҳазор рубли русӣ (беш аз ҳазор доллари амрикоӣ) аз ҷайби як намозгузор айбдор шуд.

Соли 2018 дар ноҳияи Қубодиёни вилояти Хатлон афроди ношинос компютерҳои ду масҷидро дар ин минтақа дуздиданд. Дар ин “протсессор”-ҳо навори равуои сокинон ва ибодати онҳо дар масҷид нигоҳдорӣ мешуд.

Вируси нав дар Чин 440 танро мубтало кард ва 9 нафарро кушт

Комисияи миллии ҳифзи тандурустии Чин рӯзи 21-уми январ хабар дод, ки 440 тан дар 13 вилояти он кишвар гирифтори вируси нав шудаанд.

Ҳамчунин аз марги нуҳ тан бар асари мубтало шудан ба ин вирус хабар дода шуд. Гуфта мешавад, ки ин вирус аз одам ба одам мегузарад.

Ли Бин, муовини мудири ин комисия рӯзи 22 январ гуфт, ки ба шаҳри Вуҳан, шаҳре дар Чини Марказӣ даровардани ҳайвонҳо манъ шудааст. Маҳз дар ин шаҳр нахустин ҳолати мубтало шудан ба вируси нав ба қайд гирифта шудааст. Вай афзуд, санаде дар бораи "паҳнсозандаи фавқулода" будани ин вирус мавҷуд нест.

Як рӯз пеш мақомоти ИМА тасдиқ карданд, ки нахустин ҳолати гирифторӣ ба вируси нав дар ин кишвар ба қайд гирифта шудааст. Бемор сокини аёлати Вашингтон аст, ки рӯзи 15 январ аз шаҳри Вуҳани Чин баргаштааст. Марди 30-сола рӯзи 19 январ ба бемористон муроҷиат кард. Вазъи ин мард айни ҳол муътадил арзёбӣ мешавад.

Қарор аст, Созмони ҷаҳонии тандурустӣ вазъи паҳншавии вируси навро баррасӣ кунад. Ин созмон хатарҳои бемории фарогирро баҳо хоҳад дод.

Ҷанҷол дар идораи "Казахмис": худкушиву маҷрӯҳшавии коргарон

Дар идораи коргоҳи "Казахмис" дар шаҳри Жезкангани Қазоқистон занозанӣ рух дод. Ба иттилои пулис, як коргар худкушӣ кардаву ду тани дигар маҷруҳ шудаанд. Ба иттилои мақомот, низоъе, ки рӯзи 21-уми январ дар утоқи мудири коргоҳ рух дод, ба фоҷеа анҷомид.

"Раиси иттиҳоди коргарони "Казахмис" Тоғузбой Тажбенов дар рафти ин ҷанҷол бо корд ба пушти мудири корхона Амангелдӣ Минигулов ва ба қафаси синаи Собирҷон Тембоев, коргари дигари ин корхона зарба задааст. Тажбенов баъди ин худкушӣ кардааст. Минигулов ва Тембоев бистарӣ шудаанд",-хабар медиҳанд расонаҳо.

Айни ҳол тафтиши ҳодиса идома дорад.

Боздошти гумонбарон дар нигаҳдории духтари 16-сола дар Бишкек

Пулиси Қирғизистон се гумонбарро дар нигаҳдории духтари 16-сола дар ғуломии шаҳвонӣ боздошт кард. Дар ин бора мақомоти Қирғизистон хабар доданд.

Пештар расонаҳо навиштанд, ки моҳи ноябри соли 2019 мардони ношинос ин духтарро аз шаҳри Қаракул рабудаанд. Давоми ду ҳафта ин духтарро дар фоҳишахонае дар Бишкек иҷборан нигаҳ доштаанд.

Ба иттилои мақомоти Қирғизистон, се марди соли таваллудашон 1996, 1987 ва 1996 боздошт шудаанд. Ба дари фоҳишахонае, ки духтар онҷо нигаҳдорӣ мешуд, айни ҳол муҳр зада шудааст.

Мақомот дар пайи ин ҳодиса бо моддаҳои "Ҷалб кардан ба фоҳишагӣ" ва "Одамрабоӣ" парванда боз карданд.

Дар Узбекистон рӯйхати нави адабиёту сомонаҳои мамнуъ тасдиқ шуд

Кумитаи умури дини Узбекистон рӯйхати нави матлабҳои дорои хусусияти диниеро тасдиқ кард, ки нашр ва паҳни онҳо дар ҳудуди ин кишвар манъ аст.

Дар кумита гуфтанд, ки санад 25-уми декабри соли 2019 тасдиқ ва ба Вазорати умури дохилии ин кишвар фиристода шудааст. Вале аз ироаи ҷузъиёти бештар худдорӣ карданд. Як манбаъ дар мақомоти ҳифзи ҳуқуқи Узбекистон гуфт, санад аз 40 саҳифа иборат аст.

Дар рӯйхат номи мавъиза, китоб, саҳифаҳое дар шабакаҳои иҷтимоӣ оварда шудааст, ки ба гуруҳу созмонҳои фаъолияташон мамнуъ дар ҳудуди Узбекистон, аз ҷумла ҳаракатҳои мамнуи "Ҳизб-ут Таҳрир", "Нурҷулар", "Таблиғи ҷамоат" ва "Ҷабҳат Ан-Нусра" оварда шудааст.

Ҳамчунин маъвиза, шеър, наворҳои видеоию садоӣ ва матлабҳое шомил шудаанд, ки аз сӯи афроди номаълум таҳия шуда, дорои хусусияти сиёсӣ-динӣ мебошанд. Ба рӯйхат ҳамчунин китоби "Ин рӯзҳо"-и нависандаи маъруфи дигарандеши узбек Нурулло Муҳаммад Рауфхон ва муроҷиатномаи видеоии имоми пешини узбек Фазлиддин Парпиев ба президенти Узбекистон Шавкат Мирзиёев шомиланд.

Ба гуфтаи манбаъ, зидди узбекистониҳое, ки бо ҷурми нашру паҳни матлабҳои мазкур боздошт мешаванд, бар асоси бандҳои "Таҳия, ҳифз ва паҳни матлабҳое, ки ба амният ва тартиботи ҷомеа хатар доранд" ва "Қочоқи матлабҳое, ки тундгароии динӣ ва ғояҳои ҷудоихоҳиро таблиғ мекунанд", парвандаи ҷиноӣ боз карда мешавад.

Қатъи ҳаракат дар шоҳроҳи Душанбе-Рашт. Роҳрӯбону ронандагон якдигарро айбдор мекунанд

Гурӯҳе аз ронандагони мошинҳои боркаш аз он шикоят мекунанд, ки ду рӯзи ахир дар шоҳроҳи Душанбе-Рашт банд монданд ва касе ба додашон намерасад. Ин ронандаҳо, ки байни онҳо тоҷирони қирғиз ҳам ҳастанд мегӯянд, ба далели барфрезии зиёд дар масири наздик ба деҳаи Алигалабон дар ҳудуди ноҳияи Нуробод дармондаанд. Аммо мақомот мегӯянд, ки роҳ бо айби ронандаи як мошини борбар банд шудааст.

Гурӯҳе аз ронандагон рӯзи 22-юми январ бо Радиои Озодӣ тамос гирифта ва гуфтанд, ки дар қисматҳои мухталифи ин шоҳроҳ ҳудуди 20 мошини боркаш банд мондааст. Ба гуфтаи ронандаҳо, баландии барф дар ин роҳ аз 40 то 50 сантиметр расидааст.

Маҳмуд Саидов, яке аз ин ронандаҳо дар сӯҳбат бо Радиои Озодӣ гуфт, "роҳ пурра баста аст. Мо дар мошин хобем. Баъзеҳо 3 рӯз боз дар роҳ ҳастанд. Фақат як одам дар роҳ бо бел қуму рег рехта истодааст. Раҳбари ДЭУ-ро гуфтам, мегӯяд 800 сомонӣ маош дорад ва имкони аз ин беш кор карданро надорад. Роҳ пур аз барф ва ях аст".

Дар наворе, ки ронандаҳои дармонда ба Радиои Озодӣ фиристоданд, роҳу пур аз барф ва қатори мошинҳои борбар дида мешавад, ки аз ҳаракат бозмондаанд.

Дилшод Хоҷаев, ронандаи дигари мошинҳои боркаш, ки бояд аз ноҳияи Лахш ба Ёвон 14 тонна картошка мебурд, ҳоло дар нимароҳ дармондааст. Ин соҳибкор аз он ташвиш дорад, ки маҳсулоташ дар сардӣ вайрон мешавад. Ба гуфтаи ӯ, агар роҳ тоза нашавад ӯ зарари калон мебинад.

"Бо вуҷуди ин, ки занҷир бастем, ҳама корро кардем, вале нашуд. Роҳ беҳад мушкилгузар аст ва онро тоза намекунанд. Ман таваккал карда, хостам ҳамон нишебиро поин шавам, аммо ях мошинро партофт ва наздик буд ба дарё афтем".

Ба гуфтаи ронандаҳо масъулини роҳ фақат як маротиба булдозер оварда кӯшиш карданд ҷодаро тоза кунанд, аммо барф дубора роҳро пур кард ва муроҷиаташон ба масъулин бенатиҷа аст.

Мақомоти ноҳияи Нуробод, ки масъулияти нигаҳбонии ин қисмати роҳро доранд, дар сӯҳбат бо Радиои Озодӣ гуфтанд, ки дар воқеъ чанд мошини борбар дармондаанд, вале ба гуфтаи онҳо, роҳ на дар пайи ҷамъшавии барфи зиёд, балки бо айби ронандаи як мошини калонҳаҷми борбар баста шудааст.

Зафар Ҳисориев, як масъули ҳукумати ноҳияи Нуробод, рӯзи 22-юми январ дар сӯҳбат бо Радиои Озодӣ гуфт, ин мошини борбар қоидаҳои бехатариро риоя накарда, дар байни роҳ аз ҳаракат мондааст. Ҳисориев афзуд, ниҳоди масъул 3 рӯзи ахир ба тозакунии ин роҳ машғул аст ва лаҳзаҳои наздик боз мешавад.

Ҳамин тавр бархе аз корбарони дигари Радиои Озодӣ ҳам аз банд мондани мошинҳояш дар ноҳияи Лахш хабар доданд.

Боришоти барф дар минтақаҳои кӯҳии кишвар беист идома дорад ва Кумитаи ҳолатҳои фавқулодда бо нашри як эълон аз сокинони минтақаҳои куҳӣ хостааст "дар ҳоли ях бастани роҳҳо хеле эҳтиёткор бошанд, қоидаҳои ронандагиро ҷиддан риоя кунанд. Аз сафарҳои безарурат худдорӣ намоянд".

Бино ба иттилои Оҷонсии ҳавосанҷии Тоҷикистон, то охири ҳафтаи ҷорӣ ҳаво сардтар, барф дар кӯҳҳо шадид ва ҳаракат дар роҳҳои кӯҳи мушкил хоҳад шуд. Дар ин рӯзҳо эҳтимолӣ яхбандӣ ва лағзиши тарма зиёд будааст.

Манобеъ 6 млн будани аҳолии Туркманистонро рад мекунанд

Мақомоти Туркманистон дар бораи шумори аҳолии ин кишвар маълумоти нав нашр карданд.

Маълумоти нав дар бораи аҳолии Туркманистон чанд рӯз пеш дар сомонаи марбут ба конфронси байналмилалии "Сиёсати бетарафӣ ва нақши он дар таъмини амният, субот ва рушди устувори байналмилалӣ", ки қарор аст моҳи декабри соли 2020 баргузор гардад, нашр шуд. Масъулони сомона гуфтанд, ки шумори аҳолии Туркманистон ба 6,2 миллион нафар расидааст.

Шумораи дақиқи аҳолии Туркманистон аз соли 1995 ба ин сӯ эълом нашуда буд. Ҳамчунин маълумоти ахир ба ҷуз аз сомонаи мазкур, дар расонаҳои дигари расмӣ, аз ҷумла дар сомонаи Кумитаи омори Туркманистон нашр нашудааст.

Муаллифони матлаб низ ҳангоми ироаи ин маълумот ба манбаи дақиқ ва муътамаде истинод накардаанд. Аҳолии Туркманистон бори ахир соли 2012 ҳисоб, вале натиҷааш пинҳон нигаҳ дошта мешуд ва қарор буд, ҳисоби навбатии аҳолии ин кишвар соли 2022 сурат бигирад.

Соли 1995 аҳолии Туркманистон 4 миллиону 481 нафар гуфта шуд ва соли 1991, пеш аз пошхӯрии СССР ин рақам ба 3,7 миллион нафар мерасид.

Ибтидои соли гузашта як манбаъ дар ҳукумати Туркманистон гуфта буд, бар асоси иттилои Кумитаи омор, аз соли 2008 то 1 январи соли 2019 1 миллиону 879 ҳазор шаҳрвандони ин кишвар ба хориҷ рафтаанд.

Манобеъ дар ҳукумати Туркманистон гуфтанд, шумори аҳолии ин кишвар дар моҳи январи соли гузашта 3,3 миллион нафарро ташкил медод.

Шахсияти муҳоҷирони ҳалокшуда дар Томск эълом шуд

Шахсияти 10 муҳоҷири корие, ки шаби 20 ба 21 январ дар натиҷаи оташсӯзӣ дар як хона дар вилояти Томски Русия ҷон бохтанд, эълом карда шуд.

Ба огаҳии мақомоти ҳолатҳои фавқулодаи Русия, ин муҳоҷирони корӣ аз ноҳияи Қизилтеппаи вилояти Навоии Узбекистон буда, дар миёни онҳо бародарон низ ҳастанд.

Кумитаи тафтишотии Русия гуфт, корфармо, ки шаҳрванди Чин аст, ҳадафи пайгарди қонунӣ қарор дода шудааст.

Мақомоти ҳолатҳои фавқулодаи Узбекистон мегӯянд, муҳоҷирони ҳалокшуда дар бинои якошёна зиндагӣ ва барои ширкати "Гринвуд" кор мекарданд. "10 муҳоҷир дар ҷои ҳодиса ҷон бохта, ба 2 тани дигар ёрии тиббӣ расонида шудааст",-афзуд манбаъ.

Вазорати умури хориҷии Узбекистон ному насаби ҳалокшудаҳоро эълом кард:

- Боймуродов Келдиёр Кандиёрович, соли таваллудаш 1987;
- Ғайбуллоев Рамзиддин Меҳриддин (1998);
- Закиров Маммадалӣ Закир уғлӣ (1998);
- Муминов Хуршед Мехриддин уғлӣ (1997);
- Муртазоев Шаҳзод Санжар уғлӣ (1999);
- Норов Меҳриддин Ғайбуллоевич (1966);
- Ҳасанов Бунёд Карим уғлӣ (1994);
- Ҳасанов Умед Каримович (1979);
- Элмуродов Темур Дамир уғлӣ (1994);
- Эргашев Ҳошимжон Уткир уғлӣ (1999).

Ҷасадҳои муҳоҷирон дар ҳоли ҳозир дар яке аз сардхонаҳои вилояти Томск қарор доранд. Вазорат афзудааст, ки барои интиқоли онҳо ба ватан омодагӣ дида мешавад.

Додгоҳи Душанбе шикояти Нилуфар Раҷабоваро рад кардааст. ВИДЕО

Нилуфар Раҷабова

Додгоҳи шаҳри Душанбе шикояти кассатсионии Нилуфар Раҷабова, сокини пойтахт ва духтари Раҳматулло Раҷабов, узви зиндонии ҳизби дар кишвар мамнӯи наҳзати исломиро бетағйир гузоштааст.

Рӯзи 18-уми декабри соли гузашта Додгоҳи ноҳияи Синои пойтахт Нилуфар Раҷабоваро бар асоси шикояти Раъно Абдуллоева, мудири шуъбаи кор бо занон ва оилаи ҳукумати ноҳияи Синои пойтахт бо гуноҳи "майдаавбошӣ" 550 сомонӣ ҷарима баст. Вале ин зани ҷавон мегӯяд, гуноҳе надорад ва баръакс аз ҷониби маъмурони милиса ва намояндаи Идораи занон барои сатр доштанаш боздошт ва таҳқирқ азият шуд.

Баррасии шикояти ӯ рӯзи 22-юми январ зери раёсати додрас Хуршед Азизматзода дар Додгоҳи шаҳри Душанбе баргузор шуд. Раъно Абдуллоева дар мурофиа иштирок надоштааст.

Вазорати умури дохилӣ рузи 19-уми декабри соли 2019 бо нашри хабаре дар торнамояш навишт, парвандаи Нилуфар Раҷабова бар пояи шикояти "шаҳрванд Раъно Абдуллоева" барои "суханони қабеҳи таҳқиромез" ба додгоҳ ирсол шуд.

Ин вазорат гуфт, Нилуфар Раҷабова ба гуноҳаш пурра иқрор карда, ҷаримаро ихтиёран пардохтааст. Аммо ин зани ҷавон рӯзи 22-юми январ дар сӯҳбат бо Радиои Озодӣ гуфт, то ҳанӯз ҷаримаро напардохтааст, чун дар ҷое кор намекунад ва нафақаи 540-сомоние, ки барои ду кӯдаки бемораш мегирад, ҳатто барои табобати онҳо кофӣ нест.

Нилуфар Раҷабова қаблан аз хушунат ва озор аз сӯи пулис ба Додситонии кулли Тоҷикистон шикоят бурда буд. Аммо ӯ рӯзи 22-юми январ ба Радиои Озодӣ гуфт, то ҳанӯз нисбат ба ин шикояти ӯ аз сӯи мақомот чораандешӣ нашудааст. Ба ҷуз инки ӯ як дафъа ба додситонӣ даъват ва дар бораи ин қазия бозпурсӣ шудааст.

Ҳафтаи пеш Нилуфар Раҷабова ҳамчунин ба унвонии Озода Раҳмон, раиси дастгоҳи иҷроияи президенти Тоҷикистон нома навишта, хостори мудохилаи ӯ дар ин қазия шуда буд.

Нилуфар Раҷабова духтари Раҳматуллоҳи Раҷаб, яке аз 13 узви раёсати олии ҳизби дар Тоҷикистон мамнӯи наҳзати исломӣ аст, ки соли 2015 боздошт ва ба 28 соли зиндон маҳкум шуд.

Ин зани ҷавон дар ҳоле барои доштани рӯсарӣ ба идораи пулис бурда шудааст, ки мақомоти Тоҷикистон ҳамеша вуҷуди ҳамагуна амалиёту боздошт барои пӯшидани сатрро рад мекунанд.

Додгоҳи Душанбе шикояти Нилуфар Раҷабоваро рад кард
лутфан мунтазир бошед

Феълан кор намекунад

0:00 0:00:50 0:00

Дар бемористонҳои Тошканд беморонро дар долон бистарӣ мекунанд

Ба далели гирифтории сартосарӣ ба бемории зуком дар беморхонаҳои Тошканд камбуди бистар мушоҳида мешавад. Дар натиҷа табибон маҷбур шудаанд, ки бархе аз беморонро дар долони беморхона бистарӣ кунанд.

"Дар бемористони №1 ноҳияи Юнусободи шаҳри Тошканд шумораи кӯдакони бемор хеле зиёд аст. Дар беморхона ҳатто як курсии холӣ боқӣ намондааст. Модарон барои сиҳатии фарзандонашон ба ҳама чиз омодаанд. Онҳо аз табибон хоҳиш мекунанд, ки ҳадди ақал як курсӣ диҳанд. Долонҳо сарданд, модарон дар бистари фарзандонашон хоб мераванд",-нақл кард як шоҳиди ҳодиса.

Як намояндаи Раёсати тандурустии шаҳри Тошканд тасдиқ кард, ки бархе аз бемористонҳо чунин ҳолат доранд. Ба гуфтаи вай, айни ҳол дар Тошканд ҳамагӣ панҷ бемористони кӯдакона амал мекунад ва дар маҷмӯъ 1267 бистар доранд.

Ин намоянда мегӯяд, соли аввал нест, ки барои афзоиши шумори бистарҳо дар бемористонҳо талош карда мешавад, аммо барои шаҳре, ки 2,5 миллион аҳолӣ дорад, ин талошҳо нокифоя ҳастанд.

Ёфтҳои бештар

Гуфтугӯ бо Умед Бобохонов, муассис ва сардабири "Азия-Плюс"
лутфан мунтазир бошед

Феълан кор намекунад

0:00 0:16:08 0:00
Гузоришҳои радиоӣ
ПОДКАСТ
Гуфтугӯ бо Умед Бобохонов, муассис ва сардабири "Азия-Плюс"
Гузоришҳои радиоӣ

Гузоришҳои видеоӣ

Ахбори Озодӣ
лутфан мунтазир бошед
Embed

Феълан кор намекунад

0:00 0:15:00 0:00
XS
SM
MD
LG